1 बहुत दिन को बाद, जब परमेश्वर न इस्राएलियों ख उन्को आजु-बाजू को दुस्मनो सी आराम दियो, अऊर यहोशू बूढ्ढा अऊर बहुत उमर को भय गयो होतो, 2 तब यहोशू सब इस्राएलियों ख, अऊर बुजूर्गों, मुख्य आदमियों, न्यायियों, अऊर सरदारों ख बुलाय क कहन लग्यो, “मय त अब बूढ्ढा अऊर बहुत उमर को भय गयो हय; 3 अऊर जो तुम न देख्यो हय कि तुम्हरो परमेश्वर यहोवा न तुम्हरो वजह इन सब जातियों को संग का का करयो हय, कहालीकि जो तुम्हरो तरफ सी लड़तो आयो हय ऊ तुम्हरो परमेश्वर यहोवा आय। 4 देखो, मय न बची हुयी जातियों ख तुम्हरो वंश को हिस्सा बाट दियो हय; अऊर यरदन नदी सी ले क पश्चिम को तरफ को बड़ो समुन्दर तक रहन वाली उन सब जातियों ख भी असोच दियो हय, जिन्को मय न नाश कर डाल्यो हय। 5 अऊर तुम्हरो परमेश्वर यहोवा उन्ख तुम्हरो सामने सी उन्को देश सी निकाल देयेंन; अऊर तुम अपनो परमेश्वर यहोवा को वचन को अनुसार उन्को देश को अधिकारी होय जावो। 6 येकोलायी बहुत हिम्मत बान्ध क, जो कुछ मूसा की व्यवस्था की किताब म लिख्यो हय ओको पूरो करन म सावधान रहो, ओको सी नहीं त दायो मुड़ो अऊर नहीं बायो तरफ। 7 हि जो जातियां तुम्हरो बीच म रह्य गयी हंय इन्को बीच म मत जावो, अऊर नहीं इन्को देवतावों को नाम की चर्चा करो, अऊर नहीं इन्की कसम खिलावो, अऊर नहीं उन्ख दण्डवत करो, 8 पर जसो अज भी तुम अपनो परमेश्वर यहोवा की भक्ति म लवलीन रह्य हय, वसोच रह्यो करो। 9 ✡परमेश्वर न तुम्हरो सामने सी बड़ी अऊर शक्तिशाली जातियों ख निकाल्यो हय; अऊर तुम्हरो सामने अज तक कोयी ठहर नहीं सक्यो। 10 ✡तुम म सी एक आदमी हजार आदमियों भगाय सकय हय, कहालीकि तुम्हरो परमेश्वर यहोवा अपनो वचन को अनुसार तुम्हरो तरफ सी लड़य हय। 11 येकोलायी अपनो परमेश्वर यहोवा सी प्रेम रखन लायी सदा चौकस रहो। 12 कहालीकि यदि तुम कोयी रीति सी परमेश्वर सी फिर क इन जातियों को बाकी लोगों सी घुल-मिल जावो जो तुम्हरो बीच म बच्यो हुयो रह्य हंय, अऊर इन सी शादी बिहाव कर क् इन्को संग समधियाना रिस्ता जोड़ो, 13 त जरूर जान लेवो कि तुम्हरो परमेश्वर यहोवा इन जातियों ख तुम्हरो सामने सी नहीं निकालेंन; अऊर हि तुम्हरो लायी जाल अऊर फन्दा, अऊर तुम्हरो पीठ पर कोड़ा, अऊर तुम्हरी आंखी म काटा को जसो खतरनाक ठहरेंन, अऊर आखरी म तुम या अच्छी जमीन पर सी जो तुम्हरो परमेश्वर यहोवा न तुम्ख दियो हय नाश होय जावो।

14 “सुनो, मय त अब मृत्यु की गति पर जान वालो हय, अऊर तुम सब अपनो अपनो दिल अऊर मन म जानय हय, कि जितनी भलायी की बाते हमरो परमेश्वर यहोवा न हमरो बारे म कही हय उन्म सी एक भी पूरी हुयी बिना नहीं रही; हि सब की सब तुम पर घट गयी हंय, उन्म सी एक भी पूरी हुयी बिना नहीं रही। 15 त जसो तुम्हरो परमेश्वर यहोवा की कही हुयी सब भलायी की बाते तुम पर घटी हय; वसो परमेश्वर यहोवा विपत्ति की सब बाते भी तुम पर लगायेंन अऊर तुम्ख या अच्छी जमीन को ऊपर सी, जेक तुम्हरो परमेश्वर यहोवा न तुम्ख दियो हय, नाश कर डालेंन। 16 जब तुम ऊ वाचा की, जेक तुम्हरो परमेश्वर यहोवा न तुम्ख आज्ञा दी हय, उल्लंघन कर क् परायो देवतावों की उपासना अऊर उन्ख दण्डवत करन लगो, तब परमेश्वर को कोप तुम पर भड़केंन, अऊर तुम यो अच्छो देश म सी जेक ओन तुम्ख दियो हय तुरतच नाश होय जावो।”