17
खतना अऊर वाचा को चिन्ह,
1 जब अब्राम निन्यानवे साल को भय गयो, तब प्रभु न ओख दर्शन दे क कह्यो, “मय सर्वशक्तिमान परमेश्वर आय; मोरी उपस्थिति म रह्य क निर्दोष आचरन करन की कोशिश कर।
2 मय तोरो संग वाचा बान्धूं, अऊर तोरो वंश ख बहुत जादा बढ़ाऊं।”
3 तब अब्राम मुंह को बल गिरयो : अऊर परमेश्वर ओको सी यो बाते करतो गयो,
4 “देख, मोरी वाचा तोरो संग बंधी रहेंन, येकोलायी तय कुछ राष्ट्रों को बुजूर्ग बनजो।
5 येकोलायी अब सी तोरो नाम अब्राम नहीं रहेंन पर तोरो नाम अब्राहम होयेंन; कहालीकि मय न तोख कुछ राष्ट्रों को बुजूर्ग बनायो हय।
6 मय तोख बहुत जादा वंशज देऊं, अऊर ओको म सी कुछ राजा होयेंन। अऊर तोरो जवर इतनो वंशज होयेंन कि हि राष्ट्र बन जायेंन।
7 “अऊर मय तोरो संग, अऊर तोरो बाद तोरो वंश की पीढ़ी को संग हमेशा लायी अपनो विधान स्थापित करू हय कि मय तोरो अऊर तोरो बाद तोरो वंश को परमेश्वर रहूं।
8 अऊर मय तोख, अऊर तोरो बाद तोरो वंश ख भी, यो पूरो कनान देश, जेको म तय परदेशी होय क रह्य हय, यो रीति सी देऊं कि वा हमेशा हमेशा उन्की अपनी जमीन रहेंन, अऊर मय उन्को परमेश्वर रहूं।”
9 तब परमेश्वर न अब्राहम सी कह्यो, “तय भी मोरो संग बान्धी हुयी वाचा को पालन करजो; तय अऊर तोरो बाद तोरो वंश भी अपनी अपनी पीढ़ी म ओको पालन करे।
10 मोरो संग बान्धी हुयी वाचा, जेको पालन तोख अऊर तोरो बाद तोरो वंश ख करनो पड़ेंन, ऊ यो आय : तुम म सी एक एक आदमी को खतना हो।
11 तुम अपनो अपनो बच्चा को खतना कराय लेवो : जो वाचा मोरो अऊर तुम्हरो बीच म हय, ओको योच चिन्ह होयेंन।
12 तुम्हरो हर एक बच्चा को खतना ओको जनम को आठवों दिन करयो जाये, हर एक पीढ़ी को आदमी को खतना होनो चाहिये, चाहे ऊ तुम्हरो घर म पैदा भयो दास हो, या विदेशियों सी धन दे क खरीद्यो गयो हो, जो तोरो वंश को नोहोय।
13 जो तोरो घर म पैदा भयो दास हय, अऊर जो धन दे क खरीद्यो गयो हय, इन दोयी को खतना करयो जाये। यो तरह मोरी वाचा जेको चिन्ह तुम्हरो शरीर पर होयेंन, अऊर यो वाचा हमेशा हमेशा बनी रहेंन।
14 जो आदमी खतनारहित रहे, मतलब जेको बच्चा को खतना नहीं करयो गयो हय, उच अपनो लोगों म सी नाश करयो जाये, कहालीकि ओन मोरो संग बान्धी हुयी वाचा ख तोड़ दियो।”
15 तब परमेश्वर न अब्राहम सी कह्यो, “तोरी जो पत्नी सारै हय, ओख तय अब सारै मत कहजो, ओको नाम सारा होयेंन।
16 मय ओख आशीष देऊं, अऊर तोख ओको द्वारा एक बेटा देऊं; अऊर मय ओख असी आशीष देऊं, कि वा जाति जाति की माय बनेंन; अऊर ओको वंश म राज्य राज्य को राजा पैदा होयेंन।”
17 तब अब्राहम मुंह को बल गिर पड़्यो अऊर हस्यो, अऊर मन मच कहन लग्यो, “का सौ साल को होनो पर भी सन्तान होय सकय हय? अऊर का नब्बे साल की सारा गर्भवती होय सकय हय?”
18 अऊर अब्राहम न परमेश्वर सी कह्यो, “इश्माएल तोरी नजर म बन्यो रहे, योच बहुत हय।”
19 तब परमेश्वर न कह्यो, “निश्चय तोरी पत्नी सारा ख तोरो सी एक बेटा पैदा होयेंन; अऊर तय ओको नाम इसहाक रखजो; अऊर मय ओको संग असी वाचा बान्धूं जो ओको बाद ओको वंश लायी हमेशा हमेशा की वाचा होयेंन।
20 इश्माएल को बारे म भी मय न तोरी सुनी हय; मय ओख भी आशीष देऊं, अऊर ओख कुछ बच्चा अऊर कुछ वंशज देऊं; अऊर ऊ बारा राजकुमारों को बाप होयेंन, अऊर मय ओको वंशजों को एक महान राष्ट्र बनाऊं।
21 पर मय अपनी वाचा इसहाक को संगच बान्धूं जो सारा सी अगलो साल को योच ठहरायो हुयो समय म पैदा होयेंन।”
22 तब परमेश्वर न अब्राहम सी बाते करनो बन्द करी अऊर ओको जवर सी ऊपर चढ़ गयो।
23 तब अब्राहम न अपनो बेटा इश्माएल ख लियो अऊर, अपनो घर म पैदा भयो दासों, अऊर जितनो ओको रुपया सी खरीद्यो गयो दासों सहित, मतलब ओको घर म जितनो आदमी होतो, उन पूरो ख ले क उच दिन परमेश्वर को वचन को अनुसार उन्को खतना करयो।
24 जब अब्राहम को खतना करयो गयो तब ऊ निन्यानवे साल को होतो
25 अऊर जब अब्राहम को बेटा इश्माएल को खतना करयो गयो तब ऊ तेरह साल को होतो।
26 अब्राहम अऊर ओको बेटा इश्माएल दोयी को खतना एकच दिन भयो।
27 अऊर अब्राहम को घर म जितनो आदमी अऊर दास होतो जो घर म पैदा भयो होतो, अऊर जो विदेशियों सी खरीद्यो गयो होतो, सब को खतना ओकोच हाथ सी भयो।