13
अब्राम अऊर लूत को अलग होन को वर्नन
1 तब अब्राम अपनी पत्नी, अऊर अपनी पूरी सम्पत्ति ले क, अऊर लूत ख भी संग लियो, अऊर मिस्र देश ख छोड़ क कनान को दक्षिन देश म आयो।
2 अब्राम अपनी शेरी मेंढी, गाय बईल, अऊर सोनो चांदी को वजह बहुत धनी होतो।
3 तब अब्राम दक्षिन देश सी चल क, बेतेल नगर को जवर उच जागा पर पहुंच्यो, जित पहिले ओन अपनो तम्बू खड़ो करयो होतो, जो बेतेल अऊर ऐ नगर को बीच म हय।
4 यो जागा ऊ वेदी को हय, जेक अब्राम पहिले सीच बनायो होतो, अऊर उत अब्राम न फिर प्रभु सी आराधना करी।
5 लूत को जवर भी, जो अब्राम को संग चलत होतो, ओको जवर भी शेरी मेंढी, गाय बईल अऊर तम्बू होतो।
6 येकोलायी ऊ देश म उन दोयी लायी उचित जागा नहीं होती कि हि एक संग रह्य सके, कहालीकि उन्को जवर बहुत सारो जनावर होतो, कि हि एक संग नहीं रह्य सकत होतो।
7 तब अब्राम को जनावरों की देखभाल करन वालो अऊर लूत को जनावरों की देखभाल करन वालो को बीच म झगड़ा शुरू भय गयो। ऊ समय कनानी, अऊर परिज्जी लोग, ऊ देश म रहत होतो।
8 तब अब्राम लूत सी कहन लग्यो, “मोरो अऊर तोरो जनावरों की देखभाल करन वालो को बीच झगड़ा होनो नहीं पाये; कहालीकि हम लोग रिश्तेदार हंय।
9 का पूरो देश तोरो आगु नहीं? येकोलायी मोरो सी अलग होय जा; यदि तय बायो तरफ जाजो त मय दायो तरफ जाऊं; अऊर यदि तय दायो तरफ जाजो, त मय बायो तरफ जाऊं।”
10 तब लूत न अपनी आंखी ऊपर उठाय क आगु देख्यो, कि सोअर की दिशा म यरदन नदी को जवर वालो पूरो घाट अऊर प्रभु को बगीचा, अऊर मिस्र देश की जमीन को जसो पानी सी पूरी सिंची हुयी होती। यो प्रभु को द्वारा करयो गयो सदोम अऊर अमोरा को नाश को पहिले की बात आय।
11 येकोलायी लूत अपनो लायी यरदन की पूरो घाट ख चुन क पूर्व दिशा को तरफ चली गयो, यो तरह हि एक दूसरो सी अलग भय गयो।
12 अब्राम त कनान देश म रह्यो, पर लूत ऊ घाट को नगरों म रहन लग्यो; अऊर अपनो तम्बू सदोम नगर को जवर खड़ो करयो।
13 सदोम नगर को लोग प्रभु की नजर म बड़ो दुष्ट अऊर पापी होतो।
अब्राम को हेब्रोन ख जानो
14 जब लूत अब्राम सी अलग भय गयो तब ओको बाद प्रभु न अब्राम सी कह्यो, “अपनी आंखी ऊपर उठाव अऊर जो जागा पर तय हय उत सी उत्तर दक्षिन, पूर्व पश्चिम, इन चारयी तरफ नजर कर।
15 कहालीकि जितनी जमीन तोख दिखायी देवय हय, उन सब ख मय तोख अऊर तोरो वंश ख हमेशा हमेशा लायी देऊं।
16 अऊर मय तोरो वंश ख धरती की धूल को कन को जसो बहुत बढ़ाऊं, कि उन्की गिनती करनो बहुत मुश्किल होयेंन, यदि कोयी धरती की धूल को कन ख गिन सकेंन त उच तोरो वंश ख भी गिन सकेंन।
17 उठ, यो देश की लम्बाई अऊर चौड़ाई म चल फिर; कहालीकि मय यो सब तोख देन जाय रह्यो हय।”
18 येको बाद अब्राम न अपनो तम्बू निकाल क, मम्रे को पवित्र झाड़ को जवर जो हेब्रोन म होतो, जाय क रहन लग्यो, अऊर उत भी ओन परमेश्वर की एक वेदी बनायी।