9
दानिय्येल की अपनो लोगों लायी प्रार्थना करनो
1 मादी क्षयर्ष को टुरा दारा, जो कसदियों को देश पर राजा ठह्यरायो गयो होतो,
2 ओको राज्य पहिलो साल म, मय दानिय्येल न पवित्रशास्त्र को द्वारा समझ लियो कि यरूशलेम की उजड़ी हुयी दशा यहोवा को ऊ वचन को अनुसार जो यिर्मयाह नबी को जवर पहुंच्यो होतो, कुछ सालों को बीतनो पर मतलब सत्तर साल को बाद पूरी होय जायेंन।
3 तब मय अपनो मुख प्रभु परमेश्वर को तरफ कर क् गिड़गिड़ाहट को संग प्रार्थना करन लग्यो, अऊर उपवास कर क्, बोरा को कपड़ा पहिन क, अऊर राख म बैठ क वरदान मांगन लग्यो।
4 मय न अपनो परमेश्वर यहोवा सी यो तरह प्रार्थना करयो अऊर पाप ख मान लियो, “हे प्रभु, तय महान अऊर डर लायक परमेश्वर हय, जो अपनो प्रेम रखनो अऊर आज्ञा मानन वालों को संग अपनी वाचा ख पूरो करय अऊर करुना करतो रह्य हय,
5 हम लोगों न त पाप, कुटिलता, दुष्टता अऊर विद्रोह करयो हय, अऊर तोरी आज्ञावों अऊर नियमों ख तोड़ दियो हय।
6 तोरो जो दास भविष्यवक्ता लोग, हमरो राजावों, शासकों, पूर्वजों अऊर सब साधारन लोगों सी तोरो नाम सी बाते करत होतो, उन्की हम्न नहीं सुनी।
7 हे प्रभु, तय न्यायी हय, पर हम लोगों ख अज को दिन लज्जित होनो पड़य हय, मतलब यरूशलेम म रहन वालो सब यहूदियों ख, का नजीक, का दूर को सब इस्राएली लोगों ख, जिन्ख तय न ऊ विश्वासघात को वजह जो उन्न तोरो संग करयो होतो, देश देश म तीतर बीतर कर दियो हय, उन सभी ख लज्जित होनो पड़य हय।
8 हे यहोवा, हम लोगों न अपनो राजावों, शासकों अऊर पूर्वजों सहीत तोरो खिलाफ पाप करयो हय, यो वजह हम्ख लज्जित होनो पड़य हय।
9 पर, कभी हम अपनो परमेश्वर प्रभु सी फिर गयो, तब भी तय दयासागर अऊर माफ करन वालों आय।
10 हम त अपनो परमेश्वर यहोवा की शिक्षा सुनन पर भी ओको पर नहीं चल्यो जो ओन अपनो दास भविष्यवक्तावों सी हम्ख सुनायी।
11 तब सब इस्राएलियों न तोरी व्यवस्था को उल्लंघन करयो, अऊर असो हट गयो कि तोरी नहीं सुनी। यो वजह जो श्राप अऊर कसम की चर्चा परमेश्वर को दास मूसा की व्यवस्था म लिखी हुयी हय, ऊ श्राप हम पर घट गयो, कहालीकि हम न ओको खिलाफ पाप करयो।
12 येकोलायी ओन हमरो अऊर न्यायियों को बारे म जो वचन कह्यो होतो, उन्ख हम पर बड़ी विपत्ति डाल क पूरो करयो हय; यहां तक कि जसी विपत्ति यरूशलेम पर पड़ी हय, वसी पूरी धरती पर अऊर कहीं नहीं पड़ी।
13 जसो मूसा कि व्यवस्था म लिख्यो हय, वसोच या पूरी विपत्ति हमरो पर आय पड़ी हय, तब भी हम अपनो परमेश्वर यहोवा ख मानन लायी न त अपनो अधर्म को कामों सी फिरयो, अऊर न तोरी सत्य बातों पर ध्यान दियो।
14 यो वजह यहोवा न सोच बिचार क हमरो पर विपत्ति डाली हय; कहालीकि हमरो परमेश्वर यहोवा जितनो काम करय हय उन पूरो म न्यायी ठह्यरय हय; पर हम न ओकी नहीं सुनी।
15 अब, हे हमरो परमेश्वर, हे प्रभु, तय न अपनी प्रजा ख मिस्र देश सी, बली हाथ को द्वारा निकाल लायो अऊर अपनो असो बड़ो नाम करयो, जो अज तक प्रसिद्ध हय, पर हम न पाप करयो हय अऊर दुष्टताच करी हय।
16 हे प्रभु, हमरो पापों अऊर हमरो पूर्वजों को अधर्म को कामों को वजह यरूशलेम की अऊर तोरी प्रजा की, हमरो आस पास को सब लोगों को तरफ सी नामधरायी होय रही हय; गुस्सा अऊर जलजलाहट अपनो नगर यरूशलेम पर सी उतार दे, जो तोरो पवित्र पहाड़ पर बस्यो हय।
17 हे हमरो परमेश्वर, अपनो दास की प्रार्थना अऊर गिड़गिड़ाहट सुन क, अपनो उजड़्यो हुयो पवित्र जागा पर अपनो मुख को उजारो चमका; हे प्रभु, अपनो नाम को निमित्त यो कर।
18 हे मोरो परमेश्वर, कान लगाय क सुन, आंखी खोल क हमरी उजड़ी हुयी दशा अऊर ऊ नगर ख भी देख जो तोरो कह्यलावय हय; कहालीकि हम जो तोरो आगु गिड़गिड़ाय क प्रार्थना करजे हंय, ऊ अपनो धर्म को कामों पर नहीं, बल्की तोरी बड़ी दयाच को कामों पर भरोसा रख क करजे हय।
19 हे प्रभु, सुन ले, हे प्रभु, पाप माफ कर; हे प्रभु, ध्यान दे क जो करनो हय ओख कर, देरी मत कर; हे मोरो परमेश्वर, तोरो नगर अऊर तोरी प्रजा तोरीच कह्यलावय हय; येकोलायी अपनो नाम को निमित्त असोच कर।”
जिब्राएल को भविष्यवानी ख समझानो
20 यो तरह मय प्रार्थना करतो, अऊर अपनो अऊर अपनो इस्राएली लोगों को पाप ख मानतो हुयो, अपनो परमेश्वर यहोवा को जवर ओकी पवित्र पहाड़ी-नगर लायी गिड़गिड़ाय क बिनती करतोच होतो,
21 तब ऊ आदमी जिब्राएल जेख मय न ऊ समय देख्यो जब जब तोख पहिले दर्शन भयो होतो, ओन तेजी सी उड़न की आज्ञा पा क, शाम की अन्नबलि को समय मोख छूय लियो; अऊर मोख समझाय क मोरो संग बातें करन लग्यो।
22 ओन मोरो सी कह्यो, “हे दानिय्येल, मय तोख बुद्धि अऊर समझ देन ख अभी निकल आयो हय।
23 जब तय गिड़गिड़ाय क बिनती करन लग्यो, तबच येकी आज्ञा निकली, येकोलायी मय तोख बतान आयो हय, कहालीकि तय अति प्रिय ठह्यरयो हय; येकोलायी ऊ विषय ख समझ ले अऊर दर्शन की बात को अर्थ जान ले।”
24 “तोरो लोगों अऊर तोरो पवित्र नगर लायी सत्तर हप्ता ठह्यरायो गयो हय कि उन्को अन्त तक अपराध को होनो बन्द हो, अऊर पापों को अन्त अऊर अधर्म को प्रायश्चित करयो जाये, अऊर हमेशा हमेशा की धार्मिकता प्रगट हो; अऊर दर्शन की बात पर अऊर भविष्यवानी पर छाप दी जाये, अऊर पवित्र जागा को अभिषेक करयो जायेंन।
25 येकोलायी यो जान अऊर समझ ले, कि यरूशलेम ख फिर बसान की आज्ञा को निकलनो सी ले क अभिषिक्त प्रधान को समय साल को सात हप्ता बीतेंन। फिर बासठ हप्ता बीतन पर चौक अऊर खायी सहीत ऊ नगर कष्ट को समय म फिर बसायो जायेंन।
26 साल को बासठ हप्ता को बीतन पर अभिषिक्त करयो हुयो आदमी काट्यो जायेंन : अऊर ओको हाथ कुछ नहीं लगेंन; अऊर आवन वालो प्रधान की प्रजा नगर अऊर पवित्र जागा ख नाश त करेंन। पर ऊ प्रधान को अन्त असो होयेंन जसो बाढ़ सी होवय हय; तब भी ओको अन्त तक लड़ायी होती रहेंन; कहालीकि ओको उजड़ जानो निश्चय ठान लियो गयो हय।
27 ऊ मुखिया सालों को एक हप्ता लायी बहुतों को संग मजबूत वाचा बांधेंन, पर सालों को आधोच हप्ता को बीतन पर ऊ मेलबलि अऊर अन्नबिल ख बन्द करेंन; अऊर सेंडा पर उजाड़न वाली बुरी चीजे दिखायी देयेंन अऊर निश्चयच ठनी हुयी बात को हप्ता होन तक परमेश्वर को गुस्सा उजाड़न वालो पर पड़्यो रहेंन।”