4
इस्राएल सुधरन म असफल
1 “ओ बाशान राज्य की धनवान गायों, ओ सामरिया पहाड़ी गायों, यो वचन सुनो, जो गरीबों पर अत्याचार करय, अऊर दरिद्रों ख कुचल डालय हय, अऊर अपनो अपनो पति सी कह्य हय, ‘लाव, दे हम पीबो!’
2 परमेश्वर यहोवा अपनो पवित्रता की कसम खाय क कह्य हंय, देखो, तुम पर असो दिन आवनवालो हंय, कि तुम काटावों सी, अऊर तुम्हरी सन्तान मच्छी पकड़न की गरी सी खींच लियो जायेंन।
3 तुम म सी हर एक शहरपनाह की दीवाल की फट सी होय क सीधी निकल जावों अऊर हर्म्मोन पहाड़ी म डाली जावो, यहोवा की याच वानी आय।
इस्राएल सुधरन म असफल
4 “बेतेल नगर म आय क अपराध करो, अऊर गिलगाल नगर म आय क बहुत सो अपराध करो; अपनो चढ़ावा पहेट ख, अऊर अपनो दशमांश हर तीसरो दिन ले आयो करो;
5 धन्यवाद की भेंट खमीर मिलाय क चढ़ावो, अऊर अपनी इच्छाबलियों की चर्चा चलाय क उन्को प्रचार करो; कहालीकि हे इस्राएलियों, असो करनो तुम्ख भावय हय,” परमेश्वर यहोवा की याच वानी आय।
6 “मय न त तुम्हरो सब नगरों म अकाल भेज्यो, अऊर तुम्हरो सब जागा म रोटी की कमी करी हय, तब भी तुम मोरो तरफ फिर क नहीं आयो,” यहोवा की याच वानी आय।
7 “जब कटनी को तीन महीना रह्य गयो, तब मय न तुम्हरो लायी बरसात नहीं करी; मय न एक नगर म पानी बरसायो दूसरो म नहीं बरसायो; एक खेत म पानी बरस्यो, अऊर दूसरो खेत जेको म नहीं बरस्यो, ऊ सूख गयो।
8 येकोलायी दोय तीन नगरों को लोग पानी पीवन ख मारे मारे फिरयो, पर तृप्त नहीं भयो; तब भी तुम मोरो तरफ नहीं फिरयो, यहोवा की याच वानी आय।
9 “मय न तुम्ख गर्मी अऊर गेरुए किड़ा सी मारयो हय; अऊर जब तुम्हरो बगीचा अऊर अंगूर की बाड़ियों, अऊर अंजीर अऊर जैतून को झाड़ बहुत भय गयो, तब फाफा उन्ख खाय गयी; तब भी तुम मोरो तरफ फिर क नहीं आयो, यहोवा की याच वानी आय
10 “मय न तुम्हरो बीच म मिस्र देश को जसी महामारी फैलायी; मय न तुम्हरो घोड़ा ख छिन क तुम्हरो जवानों ख तलवार सी मरवाय दियो; अऊर तुम्हरी छावनी की दुर्गन्ध तुम्हरो जवर पहुंचायो; तब भी तुम मोरो तरफ फिर क नहीं आयो, यहोवा की याच वानी आय।
11 “मय न तुम म सी कुछ एक ख असो उलट दियो, जसो परमेश्वर न सदोम अऊर अमोरा ख नाश कर दियो होतो, अऊर तुम आगी सी निकाली हुयी लकड़ी को जसो ठहरयो; तब भी तुम मोरो तरफ फिर क नहीं आयो, यहोवा की याच वानी आय।
12 “यो वजह, हे इस्राएल, मय तोरो सी असोच करूं, अऊर येकोलायी कि मय तोरो म यो काम करन पर हय, हे इस्राएल, अपनो परमेश्वर को सामने आवन लायी तैयार होय जा!”
13 देख, पहाड़ियों ख बनावन वालो अऊर हवा ख सिरजन वालो, अऊर मनुष्य ख ओको मन को बिचार बतावन वालो अऊर पहेट ख अन्धकार करन वालो, अऊर जो धरती को ऊंचो जागावों पर चलन वालो हय, ओकोच नाम सेनावों को परमेश्वर यहोवा आय!