3
ཟང༌པོ༌ ཨིན༌ཁན༌གུན༌ ཅོས༌།
3:1 ནེ༌ 11
1 ཏད༌པ༌ཅན༌གུན༌ལ༌ ཁོ༌རང༌གུན༌ ཝང༌སྲུལ༌པ༌ དང༌ ཝང༌ ཡོད༌ཁན༌གུན༌ནི༌ ལག༌ག༌ སྟད༌ཅེས༌, ཁའ༌ཉན༌ཅེས༌, དང༌ ཏུས༌གྱུན༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ གྲལ༌གྲིག༌ ཅོས༌ཏེ༌ དུག༌ཅེས༌ལ༌, ཨིད༌ཏུ༌ སྐུལ༌།
2 ཁོང༌གུན༌ནི༌ ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ མ༌ཟེར༌ར༌, ཛིང༌མོ༌ ཏང༌ཅེས༌ནེ༌ ཐག༌རིང༌ང༌ དུག༌གོས༌། ཨིན༌ནའང༌ ཁོང༌གུན༌ ཞན༌མའེ༌ སྒོས༌དོམ༌གུན༌ སམ༌ཁན༌ ཡང༌ དེན༌བའེ༌ པས༌མོ༌ ཨིན༌ཁན༌བོ༌ ཚང༌མ༌ལ༌ ལྟན༌ཁན༌ རིག༌ ཡོང༌གོས༌།
3 ཏུས༌ཤིག༌ག༌ ང༌དང༌གུན༌ནའང༌ སམ༌བ༌ མེད༌ཁན༌ དང༌ ཁའ༌མི༌ཉན༌ རིག༌ ཡོད༌པིན༌། ཞན༌མ༌གུན༌ནི༌ ང༌དང༌གུན༌ ལམ༌ ནོར༌སའི༌ཀ༌ ཁྲིདས༌, ཡང༌ དོད༌པ༌ ངན༌པ༌ མང༌པོ༌ཞིག༌ དང༌, ཇིག༌རྟེན༌ནི༌ སྐྱིད༌པོ༌གུན༌ནི༌ ཚེ༌ཡོག༌ གྱུར༌། ང༌དང༌གུན༌ནི༌ མི༌ཚེ༌བོའེ༌ ནང༌ང༌ ངན༌པ༌ དང༌ ཚིག༌ཅེས༌ གངས༌ཏེ༌, ཞན༌མ༌གུན༌ནི༌ ང༌དང༌གུན༌ལ༌ ནཕ༌རད༌ ཡང༌ ང༌དང༌གུན༌ནིའང༌ ཅིག༌ དང༌ ཅིག༌ག༌ ནཕ༌རད༌ ཅོའད༌པིན༌།
4 ཨིན༌ནའང༌ "དཀོན༌མཆོག༌ ང༌དང༌ངི༌ སྐྱབ༌གོན༌ནི༌ ཐུག༌རྗེ༌ དང༌
ཅེས༌པ༌ གུན༌ སྔོན༌ན༌ ཛད༌ད༌དང༌,
5 ཁོང༌ངི༌ ང༌དང༌གུན༌ སྐྱོབ༌བ༌ ཛདས༌།
ཏེ༌བོ༌ ང༌དང༌གུན༌ནི༌ ལས༌ དྲང༌པོ༌ ཅོ༌ཅེས༌པོའེ༌ ཞས༌ཏེ༌ མན༌པ༌, ཁོང༌ངི༌ སྙིང༌རྗེའེ༌ ཞས༌ཏེ༌ ཨིན༌ནོག༌།
ཁོང༌ངི༌ ང༌དང༌ངི༌ སྡིག༌པ༌གུན༌ ཁྲུའ༌ ཛདས༌, ཡང༌ དམ༌པའེ༌ ཐུག༌ཉིད༌ གྱུད༌ཏེ༌
ང༌དང༌གུན༌ ཡང༌སྐྱར༌ སྐྱེས༌ཏེ༌, མི༌ཚེ༌ སོ༌མ༌ཞིག༌ སལས༌།
6 ཡེ༌ཤུ༌ མ༌ཤི༌ཀ༌ ང༌དང༌གུན༌ནི༌ སྐྱབ༌གོན༌ གྱུད༌ཏེ༌ དམ༌པའེ༌ ཐུག༌ཉིད༌བོ༌
ཁོང༌ངི༌ སྙིང༌ ཕེས༌ཏེ༌ ང༌དང༌གུན༌ནི༌ཀ༌ ལུག༌ག༌ ཛདས༌།
7 ཁོང༌ངི༌ ཐུག༌རྗེ༌ ཞས༌ཏེ༌
ང༌དང༌གུན༌ དྲང༌པོ༌ ཐེའ༌ ཛདས༌ པ༌སང༌, ང༌དང༌གུན༌ལ༌ དཀོན༌མཆོག༌གི༌ ཕྲུ༌གུ༌ གྱུར༌ཏེ༌
ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ རེ༌ཝ༌ ཡོད༌ཏེ༌ ཨིན༌ནོག༌།"
8 ཏེ༌ ཞལ༌ཏ༌གུན༌ དེན༌བའེ༌ ལབ༌ཞ༌ ཨིན༌ནོག༌, ཡང༌ ངའེ༌ དོད༌པ༌ ནི༌, ཏད༌པ༌ཅན༌ ཚང༌མའེ༌ ཏུས༌པོ༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཕུད༌ཅེས༌སི༌ ཕིའ༌, ཁྱོ༌རང༌ངི༌ ཏེ༌ ལབ༌ཞ༌གུན༌ ཁོང༌གུན༌ནི༌ ནང༌ང༌ ཡོང༌གོ༌ཤེས༌པོ༌ ཏན༌ཏན༌ ཅོ༌ཅེས༌པོ༌ ཨིན༌། ཏེ༌ ལབ༌ཞ༌གུན༌ ཚང༌མའེ༌ ཕིའ༌ ཟང༌པོ༌ དང༌ ཕན༌ཐོགས༌ཅན༌ཞིག༌ ཨིན༌ནོག༌།
9 ཁྱོ༌རང༌ ཁོང༌གུན༌ནི༌ མིར༌གྱུད༌དི༌ མིང༌ཐོའེ༌ སྐོར༌ལ༌ སམ༌བ༌ མེད༌ཁན༌ནི༌ གྲབས༌སི༌ ནང༌ང༌ མ༌དྲེས༌, ཡ༌ ཡ༌ཧུ༌དཱ༌པའེ༌ ཁྲིམས༌གུན༌ སྲུང༌ཅེས༌སི༌ སྐོར༌ལ༌, ཛིང༌མོ༌ དང༌ ནོལ༌ མ༌ནོལ༌། ཏེ༌གུན༌ནི༌ ཕན༌མི༌ཐོགས༌ དང༌ ཏུས༌ གོད༌ལ༌ ཆ༌ཅེས༌ མ༌ནེ༌ ཅའང༌ མ༌ནོག༌།
10 གལ༌ཏེས༌ མི༌གུན༌ནི༌ ཁྱོ༌རང༌གུན༌ ཕེ༌ཅེས༌ ཅོ༌ན༌, ལྡམ༌ཞག༌ ཏོང༌ཤིག༌ ཡང༌ ལན༌ ཉིས༌པའང༌, ཏེ༌བོའེ༌ སྟིང༌ནེ༌ གལ༌ཏེས༌ སེམས༌ མ༌གྱུར༌ན༌, ཁོང༌གུན༌ ཉམ༌པོ༌ བྲེལ༌ མ༌བོར༌ཤིག༌།
11 ཏེ༌ཙོགས༌སི༌ མི༌གུན༌ དཀོན༌མཆོག༌གི༌ དེན༌བ༌ གྱབ༌ལོག༌ཁན༌ ཡང༌ ཁོ༌རང༌གུན༌ནི༌ སྡིག༌པའེ༌ ཁོ༌རང༌གུན༌ལ༌ སྐྱོན༌ ཀལ༌ལ༌ནོག༌།
སྟིང༌ཇུག༌གི༌ ལབ༌ཞ༌ དང༌ ཇུ༌།
3:12 ནེ༌ 15
12 ངའེ༌ སྤུན༌, ཨར༌ཏི༌མིས༌ ཡ༌ ཏི༌ཁི༌ཀུས༌ ཉིས༌ཀོའེ༌ ནང༌ནེ༌ ཅིག༌པོ༌ ཁྱོ༌རང༌ངི༌ཀ༌ ཀལ༌ལ༌ཅིག༌, ནི༌ཀོ༌པོ༌ལིས༌ གྱལ༌སའེ༌ ནང༌ང༌ ཁྱོ༌རང༌ ངའ༌ ཐུག༌ག༌ ཡོང༌ཅེས༌སི༌ རྩོན༌གྲུས༌ ཅོས༌, ཅིའ༌ཟེར༌ན༌ ང༌ ཏེ༌རུ༌ དགུན༌ལ༌ དུག༌ཅེས༌ ཐག༌ཅད༌ཏེ༌ ཨིན༌།
13 ངའེ༌ སྤུན༌ ཝ༌ཀྱིལ༌ ཟེ༌ནཱས༌ ཡང༌ སྤུན༌ ཨ༌པོ༌ལོས༌ གུན༌ བེས༌ལ༌ ཆ༌ཅེས༌སི༌ ནང༌ང༌ ཁྱོ༌རང༌ངི༌ ཅི༌ས༌ཐོག༌ནེ༌ རོགས༌ ཅོ༌ཅེས༌སི༌ རྩོན༌གྲུས༌ ཅོས༌། ཁོང༌གུན༌ལ༌ སྒོས༌དོམ༌ ཡོད༌ཁན༌ ཚང༌མ༌ ཏངས༌ཏེ༌ དུག༌ག༌ ལྟོས༌།
14 ང༌དང༌ངི༌ སྤུན༌གུན༌ནི༌ ཞན༌མ༌ ཏད༌པ༌ཅན༌གུན༌ནི༌ དེན༌བའེ༌ སྒོས༌དོམ༌གུན༌ རིགས༌ཏེ༌ ཁོ༌རང༌གུན༌ནི༌ ཏུས༌པོ༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཕུད༌ཅེས༌ ལོབ༌གོས༌། ཏེ༌ནེ༌ ཁོང༌གུན༌ནི༌, ཏོན༌མེད༌དི༌ མི༌ཚེ༌ཞིག༌ མི༌ཕུད༌།
15 འི༌རུ༌ ཡོད༌ཁན༌ ཚང༌མའེ༌ ཇུ༌ ཞུ༌རུག༌། ཇུ༌ཇུ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌, ང༌དང༌གུན༌ལ༌ ཅེས༌པ༌ ཅོ༌ཁན༌གུན༌ལ༌ ངའེ༌ ཆོགས༌ནེ༌ ཇུ༌ ཞུས༌།
དཀོན༌མཆོག༌གི༌ ཐུག༌རྗེ༌བོ༌ ཁྱོ༌ཞའ༌ ཚང༌མ༌ལ༌ སལ༌ཤིག༌།།