4
ཟུས༌མའེ༌ ལོབ༌པོན༌གུན༌ནི༌ གྱབ༌གལ༌ལ༌ སྤང༌ ཕུདས༌།
4:1 ནེ༌ 5
1 དམ༌པའེ༌ ཐུག༌ཉིད༌དི༌ སལ༌པོ༌ ཅོས༌ཏེ༌ མོལ༌ཏེ༌ དུག༌, ཐའ༌མའེ༌ ཏུས༌ལ༌ ཏད༌པ༌ ཅོ༌ཁན༌ ཁ༌ཅིག༌གི༌ ཁོ༌རང༌གུན༌ནི༌ ཏད༌པ༌ སྤངས༌ཏེ༌ གོབ༌སྐོར༌ ཏང༌ཁན༌ནི༌ སེམས༌ཉིད༌ དང༌ རྡུད༌དི༌ ལབ༌ཞ༌གུན༌ནི༌ གྱབ༌ནེ༌ བྲངས༌ཏེ༌ ཆེན༌།
2 ཏེ༌ ལབ༌ཞ༌གུན༌ ཁ༌ཆོས༌ ཅོ༌ཁན༌ དང༌ ཟུན༌ཇན༌ གུན༌ནི༌ ཀ༌ནེ༌ ཡོང༌ང༌ནོག༌, ཀ༌གུན༌ནི༌ སེམས༌པོ༌ ཤི༌ཏེ༌ ཨིན༌ པ༌སང༌, ཁོང༌གུན༌ནི༌ སྡིག༌པ༌གུན༌ལ༌ སྐྱོན༌རྗོད༌ ཅོའ༌ མ༌ནོག༌།
3 ཏེ༌གུན༌ནི༌ ཏད༌པ༌ཅན༌གུན༌ལ༌ བག༌སྟོན༌ ཅོ༌ཅེས༌ དང༌ ཁར༌ཇི༌ རིགས༌ ཁ༌ཅིག༌ ཟའ༌ མི༌ཆོགས༌ ཟེར༌ར༌ནོག༌། ཨིན༌ནའང༌ དཀོན༌མཆོག༌གི༌ དེན༌བ༌ ཤེས༌ཏེ༌ ཏད༌པ༌ ཅོ༌ཁན༌གུན༌ལ༌ ཁོང༌ངི༌ ཟའ༌ཅེས༌སི༌ རིགས༌ ཚང༌མ༌ ཐུག༌རྗེ༌ཆེ༌ ཉམ༌པོ༌, ཟའ༌ལ༌ ཅོའ༌ ཛད༌ཏེ༌ ཨིན༌ནོག༌།
4 དཀོན༌མཆོག༌གི༌ ཅོའ༌ ཛད༌ཁན༌ ཚང༌མ༌ ཟང༌པོ༌ ཨིན༌ པ༌སང༌, ང༌དང༌གུན༌ནི༌ ཏེ༌གུན༌ ཅིག༌གའང༌ ཕང༌ མ༌ཕང༌ང༌ ཐུག༌རྗེ༌ཆེ༌ ཉམ༌པོ༌ ལེན༌གོས༌།
5 ཅིའ༌ཟེར༌ན༌ དཀོན༌མཆོག༌གི༌ བཀའ༌ དང༌ ང༌དང༌གུན༌ནི༌ ཁོང༌ང༌ ཐུག༌རྗེ༌ཆེའེ༌ མོས༌ལམ༌མི༌ ཞས༌ཏེ༌ ཏེ༌གུན༌ རྩང༌མ༌ ཅོའ༌ ཛད༌ཏེ༌ ཨིན༌ནོག༌།
མ༌ཤི༌ཀ༌ ཡེ༌ཤུའི༌ ཞབ༌སྟོག༌པ༌ ཟང༌པོ༌ཞིག༌ གྱུར༌ཅེས༌།
4:6 ནེ༌ 16
6 ཏི༌མོ༌ཐི༌ གལ༌ཏེས༌ ཁྱོ༌རང༌ངི༌ སྤུན༌གུན༌ལ༌ ཏེ༌གུན༌ནི༌ སྐོར༌ལ༌ ཧ༌གོ༌ཅུག༌ན༌, ཁྱོ༌རང༌ མ༌ཤི༌ཀ༌ ཡེ༌ཤུའི༌ ཞབ༌སྟོག༌པ༌ འོས༌པ༌ཅན༌ཞིག༌ གྱུར༌ཨིན༌, ཀ༌བོ༌ ཁྱོ༌རང༌ངི༌ མི༌ཚེའེ༌ ནང༌ང༌ ཏད༌པའེ༌ དེན༌བ༌གུན༌ ལོབས༌ཏེ༌, ལབ༌ཞ༌ ཟང༌པོའེ༌ གྱབ༌ནེ༌ གྲུལ༌ཅེས༌པོའེ༌, ཤེད༌ཅན༌ གྱུར༌ཏེ༌ ཨིན༌།
7 རིན༌ མེད༌ཁན༌ དང༌ དེན༌བ༌ མན༌ཁན༌ནི༌ ཅོས༌མའི༌ རུངས༌གུན༌ནི༌ སྐོར༌ལ༌ ཛིང༌མོ༌ ཏང༌ཨིན༌, ཁྱོ༌རང༌ངི༌ ཏུས༌ ཙ༌པིག༌གའང༌ གོད༌ལ༌ མ༌ཏང༌ང༌, དཀོན༌མཆོག༌གི༌ སྕོད༌ལམ༌མི༌ ནང༌ང༌ རང༌ངི༌ མི༌ཚེ༌བོ༌ མང༌ང༌ ཡར༌གྱས༌ ཆ༌ཅུག༌ཨིན༌ ཕུད༌།
8 ཁྱོ༌རང༌ང༌ འི༌ ཟེར༌ལོ༌བོ༌ གྱུས༌ཡོད༌ཏེ༌ ཨིན༌ནོག༌།
"རྩལ༌ཡངས༌ རྩེས༌ཏེ༌ ཟུགས༌པོའ༌ ཡར༌གྱས༌ ཅོ༌ཅེས༌པོའེ༌,
ཕན༌ཐོགས༌ ཙ༌པིག༌ ཡོད༌ཏེ༌ ཨིན༌ནོག༌།
ཨིན༌ནའང༌ ཏེ༌སང༌ མང༌ང༌ ཕན༌ཐོགས༌ ནི༌,
དཀོན༌མཆོག༌གི༌ སྕོད༌ལམ༌མི༌ ནང༌ང༌ ཡར༌གྱས༌ ཅོ༌ཅེས༌པོ༌ ཨིན༌ནོག༌།
ཅིའ༌ཟེར༌ན༌ ཏེ༌བོའེ༌ ང༌དང༌གུན༌ལ༌ འི༌ མི༌ཚེ༌ དང༌ ཤི༌ཏེ༌ སྟིང༌ནེ༌
ཐོབ༌ཅེས༌ཅན༌ནི༌ མི༌ཚེ༌ ཉིས༌ཀོའེ༌ ཕིའ༌ ཕན༌ཐོགས༌ ཅོའ༌ནོག༌།"
9 ཏེ༌ ཟེར༌ལོ༌བོ༌ ཨིད༌ཤེས༌ཅན༌ ཨིན༌ནོག༌, ཡང༌ ཚང༌མའེ༌ ཐེ༌ཚོམས༌ མེད༌ད༌, ཏད༌པ༌ ཅོ༌གོ༌ཤེས༌ ཨིན༌ནོག༌།
10 ཏེན༌ན༌བོའེ༌ཕིའ༌ ང༌དང༌གུན༌ནི༌ རྩོན༌གྲུས༌ ཅོས༌ཏེ༌ བར༌དོ༌ ཁུར༌ར༌ནོག༌, ཅིའ༌ཟེར༌ན༌ ང༌དང༌གུན༌ནི༌ རེ༌ཝ༌བོ༌ ནི༌, སོན༌པོ༌ དཀོན༌མཆོག༌གི༌ ནང༌ང༌ ཡོད༌ཏེ༌ ཨིན༌ནོག༌, ཀ༌བོ༌ མི༌ཚང༌མ༌ དང༌ མིག༌སལ༌ལི༌ ཏད༌པ༌ཅན༌གུན༌ སྐྱོབ༌ཁན༌བོ༌ ཞུགས༌ཏེ༌ ཨིན༌།
11 ཁོང༌གུན༌ལ༌ འི༌ ལབ༌ཞ༌གུན༌ ལོབ༌, ཡང༌ ཏེ༌གུན༌ནི༌ཀ༌ ལག༌ལེན༌ ཅོ༌ཅེས༌སི༌ བཀའ༌ ཏོང༌།
12 ཁྱོ༌རང༌, ཏད༌པ༌ཅན༌གུན༌ནི༌ ཕིའ༌ སྤེ༌ར༌ ཏང༌ཅེས༌, མི༌ཚེ༌ ཕུད༌ཅེས༌, ཅམས༌པ༌ ཅོ༌ཅེས༌, ཏད༌པ༌ ཡང༌ རྩང༌མའེ༌ ཐོག༌ནེ༌ སྤེ༌ཞིག༌ག༌ གྱུར༌། གལ༌ཏེས༌ ཏེ༌ཟུག༌ ཅོ༌ན༌ ཞུན༌ནུ༌ ཨིན༌ནོག༌ སམས༌ཏེ༌ ཁོ༌རང༌ང༌ རྩི༌ཝ༌ མི༌ཅོ༌ཅེས༌སི༌ ནང༌ང༌ སྒག༌ཞའ༌ ཏང༌ཨིན༌།
13 ང༌ ཡོང༌ཡོང༌ ཚག༌པ༌, ཁྱོ༌རང༌ངི༌ ཏུས༌ མང༌ཆེའ༌ ཆོས༌ཚོགས༌སི༌ དུན༌ལ༌ དམ༌པའེ༌ སུང༌རབས༌ སིལ༌ཅེས༌ ཡང༌ ཆོས༌ཤད༌ཅེས༌ དང༌ དཀོན༌མཆོག༌གི༌ དེན༌བའེ༌ སྐོར༌ལ༌ ལབ༌ཅེས༌སི༌ ནང༌ང༌ ཕུད༌།
14 ཁྱོ༌རང༌ང༌ དཀོན༌མཆོག༌གི༌ སལ༌ཁན༌ནི༌ ཁྱུད༌པོ༌ གོད༌ལ༌ ཆ༌ མ༌ཅུག༌, ཀ༌བོ༌ ཁྱོ༌རང༌ང༌ ཆོས༌ཚོགས༌སི༌ འུ༌སྐྱོང༌གུན༌ནི༌ ཁྱོ༌རང༌ངི༌ཀ༌ ཁོང༌རང༌གུན༌ནི༌ ཆག༌གུན༌ བོར༌ཏེ༌, ཁྱོ༌རང༌ངི༌ སྐོར༌ལ༌ ལུང༌སྟན༌གུན༌ སལ༌ ཟ༌ནེ༌ ཐོབ༌།
15 ངའེ༌ ལབ༌ཞ༌གུན༌ལ༌ སྣང༌ང༌ བོར༌ཏེ༌, སྙིང༌ གང༌པོ༌ ཉམ༌པོ༌ ལག༌ལེན༌ ཅོས༌, ཏེ༌ནེ༌ མི༌ཚང༌མའེ༌ ཁྱོ༌རང༌ སེམས༌ཉིད༌དི༌ ཐོག༌ནེ༌ ཡར༌གྱས༌ ཆའ༌ཁན༌བོ༌, ཐོང༌ ཐུབ༌ཨིན༌།
16 ཁྱོ༌རང༌ངི༌ མི༌ཚེ༌ ཕུད༌ཅེས༌ ཡང༌ ཁྱོ༌རང༌ངི༌ ལབ༌ཞ༌གུན༌ལ༌ སྟག༌ཅད༌ ཅོས༌, ཏུས༌གྱུན༌ ཏེ༌ཙོགས༌ ཅོ༌ཨིན༌ དུག༌ཤིག༌། གལ༌ཏེས༌ ཏེ༌ཟུག༌ ཅོ༌ན༌, རང༌ངི༌ མི༌ཚེ༌ དང༌ ཁྱོ༌རང༌ངི༌ ལབ༌ཞ༌ ཉན༌ཁན༌གུན༌ནི༌ མི༌ཚེའང༌ སྐྱོབ༌ཨིན༌།