8
ཛེ༌ནད༌ ཡོད༌ཁན༌ཞིག༌ ཕན༌ཅུག༌ག༌ ཛདས༌།
8:1 ནེ༌ 4
1 གཙོ༌བོ༌ ཡེ༌ཤུ༌ རི༌ནེ༌ ཡོག༌ག༌ བབས༌ཏེ༌ སྐྱོད༌ ཟ༌ནེ༌, མི༌ཚོགས༌ ཆེན༌མོ༌ཞིག༌ ཁོང༌ངི༌ སྟིང༌རང༌ནེ༌ ཡོངས༌།
2 ཛེ༌ནད༌ཅན༌ནི༌ མི༌ཞིག༌ གཙོ༌བོའེ༌ དུན༌ལ༌ ཡོངས༌ ཡང༌ པིག༌དོང༌ ཙུགས༌ཏེ༌ ཟེརས༌, "གཙོ༌བོ༌ལེ༌, ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།"
3 ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, "ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌།", ཏེན༌ན༌མལ༌ལ༌ ཛེ༌ནད༌པོ༌ མེད༌ཁན༌ སོང༌།
4 ཏེ༌ནེ༌ ཡེ༌ཤུའི༌ ཏེ༌ མི༌བོའ༌ མོལས༌, "སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།"
མག༌མི༌རྒྱའེ༌ སྤོན༌བོའེ༌ ཏད༌པ༌།
8:5 ནེ༌ 13
5 གཙོ༌བོ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌རི༌ ནང༌ང༌ ཅབ༌ ལེབ༌བ༌ཅིག༌, རོམ༌མི༌ མག༌མི༌རྒྱའེ༌ སྤོན༌བོ༌ཞིག༌ ཁོང༌ངི༌ དུན༌ལ༌ ཡོངས༌ཏེ༌ རོགས༌ ཛད༌ཅེས༌ལ༌ ཞུས༌,
6 "གཙོ༌བོ༌ལེ༌, ངའེ༌ ཡོག༌པོའ༌ ཟའ༌ཕོག༌ཏེ༌ ཁང༌པའ༌ ཟུ༌མོ༌ སྲན༌ཏྲེ༌ ཡོང༌ཨིན༌ ཡོད༌།"
7 ཡེ༌ཤུའི༌ མོལས༌, "ང༌ ཡོངས༌ཏེ༌ ཁོ༌ ཕན༌ཅུག༌ཨིན༌།"
8 མག༌མི༌རྒྱའེ༌ སྤོན༌བོའེ༌ ཟེརས༌, "གཙོ༌བོ༌ལེ༌, ཉེ༌རང༌ ངའེ༌ ཁང༌པ༌ སྐྱོད༌ཅེས༌སི༌ འོས༌པ༌ ངའ༌ མན༌། ཨིན༌ནའང༌ ཉེ༌རང༌ངི༌ བཀའ༌ སལ༌ན༌ ངའེ༌ ཡོག༌པོ༌ ཕན༌ཨིན༌།
9 ཝང༌ཆའེ༌ ཡོག༌ག༌ ངའང༌ དུག༌གད༌ ཡང༌ ངའེ༌ ཝང༌ཆའེ༌ ཡོག༌ག༌ མག༌མི༌གུན༌ ཡོད༌། ངའེ༌ ཅིག༌ག༌ སོང༌ ཟེར༌ན༌ ཆའ༌ནོག༌ ཡང༌ ཅིག༌ག༌ ཡོང༌ ཟེར༌ན༌ ཡོང༌ང༌ནོག༌, ཡང༌ ངའེ༌ ཡོག༌པོའ༌ འི༌ ལས༌པོ༌ ཅོས༌ ཟེར༌ན༌ ཅོའ༌ནོག༌།"
10 ཡེ༌ཤུའི༌ ཏེ༌བོ༌ སན༌ན༌ཅིག༌ ཧ༌ལས༌ཏེ༌ ཁོང༌ང༌ བྲངས༌ཏེ༌ ཡོང༌ཁན༌ནི༌ མི༌གུན༌ལ༌ མོལས༌, "ངའེ༌ ཁྱོ༌ཞའ༌ དེན༌བའ༌ ཟེར༌རད༌, ཨིས༌ར༌ཨེལ༌ལི༌ ནང༌ང༌ ང༌ འི༌ཙོགས༌སི༌ ཏད༌པ༌ཅན༌ཞིག༌ མ༌ནེ༌ མ༌ཐོབ༌།
11 ངའེ༌ ཁྱོ༌ཞའ༌ ཟེར༌རད༌, ཡ༌ཧུ༌དཱ༌པ༌ མན༌ཁན༌ མང༌པོ༌ ཤར༌ དང༌ ནུབ༌ནེ༌ ཡོངས༌ཏེ༌, ནམ༌ཁའེ༌ གྱལ༌སྲིད༌དི༌ ནང༌ང༌ དོན༌ཏང༌ངི༌ ཕིའ༌ ང༌དང༌ངི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌, ཡ༌ཀོབ༌ ཉམ༌པོ༌ རང༌ངི༌ ནས༌སའེ༌ཀ༌ དུག༌ཨིན༌།
12 ཨིན༌ནའང༌ ཨིས༌ར༌ཨེལ༌པ༌ ཀ༌གུན༌ནི༌ ཕིའ༌ ནམ༌ཁའེ༌ གྱལ༌སྲིད༌པོ༌ གྲལ༌གྲིག༌ ཅོའ༌ ཛད༌ཏེ༌ ཨིན༌པིན༌ ཁོང༌གུན༌ ཕི༌ལོག༌ག༌ མུན༌གྲིག༌གི༌ ནང༌ང༌ ཕང༌ང༌ ཛད༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།"
13 ཏེ༌ནེ༌ ཡེ༌ཤུའི༌ མག༌མི༌རྒྱའེ༌ སྤོན༌བོའ༌ མོལ༌ལ༌ ཛདས༌, "སོང༌, ཁྱོ༌རང༌ངི༌ ཏད༌པ༌ ཅོ༌ཁན༌ ནང༌ཞིན༌ ཁྱོ༌རང༌ངི༌ ཡོག༌པོ༌ གྱལ༌ཨིན༌།" ཡེ༌ཤུའི༌ མོལ༌ཁན༌ནི༌ ཏེན༌ན༌ ཏུས༌ཚོད༌པོའེ༌ཀ༌ ཡོག༌པོའེ༌ ཟུ༌མོ༌ རྒྱལས༌།
ཡེ༌ཤུའི༌ མི༌ མང༌པོ༌ ཕན༌ཅུག༌ག༌ ཛདས༌།
8:14 ནེ༌ 17
14 གཙོ༌བོ༌ ཡེ༌ཤུ༌ པི༌ཏྲར༌རི༌ ཁང༌པ༌ སྐྱོད༌ད༌ཅིག༌, ཁོང༌ངི༌ པི༌ཏྲར༌རི༌ ན༌མའེ༌ ཨ༌མ༌ ཚད༌ ཡོངས༌ཏེ༌ མལ༌ཙའེ༌ ནང༌ང༌ དུགས༌ཏེ༌ ཟིགས༌།
15 ཡེ༌ཤུའི༌ ཁོའེ༌ ལག༌པའ༌ ཆག༌ཐུག༌ག༌ ཛད༌ པ༌སང༌ ཚད༌པོ༌ མེད༌ཁན༌ སོང༌, ཁོ༌ ལངས༌ཏེ༌ ཁོང༌ང༌ ཞབ༌སྟོག༌ ཞུས༌།
16 ཏེན༌ན༌ ཕི༌ཏོག༌ མི༌གུན༌ནི༌ རྡུད༌ ཞུགས༌ཁན༌ མང༌པོ༌ ཁོང༌ ཡོད༌ས༌ ཁྲིད༌ཏེ༌ ཁྱོངས༌, ཁོང༌ངི༌ "བིང༌" མོལ༌ཏེ༌ བཀའ༌ སལ༌ པ༌སང༌ རྡུད༌གུན༌ བིངས༌ ཡང༌ ཟུ༌མོ༌ ཡོད༌ཁན༌ ཚང༌མ༌ ཕན༌ཅུག༌ག༌ ཛདས༌།
17 མ༌ཤི༌ཀའེ༌ སྐོར༌ལ༌ ལུང༌སྟོན༌པ༌ ཡེ༌ཤ༌ཡཱའེ༌ བྲིའ༌ ཛད༌ཁན༌བོ༌ དྲན༌དྲ༌ གྲུབ༌ཅེས༌ལ༌ ཡེ༌ཤུའི༌ ཏེ༌གུན༌ ཛདས༌། ཡེ༌ཤ༌ཡཱའེ༌ བྲིའ༌ ཛད༌ཁན༌བོ༌ ནི༌,
"ཁོང༌ངི༌ ང༌དང༌ ནད༌ནེ༌ སྐྱོབ༌བ༌ ཛདས༌,
ཡང༌ ཟུ༌མོ༌ནེ༌ ཕན༌ཅུག༌ག༌ ཛདས༌།"
ཡེ༌ཤུའི༌ གྱབ༌ནེ༌ བྲང༌ཤེས༌ ལ༌མོ༌ མན༌།
8:18 ནེ༌ 22
18 གཙོ༌བོ༌ ཡེ༌ཤུའི༌, ཁོང༌ང༌ སྐོར༌ཁན༌ནི༌ མི༌ཚོགས༌པོ༌ ཟིགས༌ས༌ཅིག༌, ཁོང༌རང༌ངི༌ ལོབ༌ཕྲུགས༌གུན༌ལ༌ ཚོའེ༌ ཕར༌ཀ༌ ཆ༌ཅེས༌ལ༌ བཀའ༌ སལ༌ལ༌ ཛདས༌།
19 ཆོས༌ཁྲིམས༌ལ༌ ཁས༌པ༌ཞིག༌ ཡོངས༌ཏེ༌ ཟེརས༌, "ལོབ༌པོན༌ལེ༌, ཉེ༌རང༌ ཀ༌རུ༌ སྐྱོད༌ནའང༌ ང༌ ཉེ༌རང༌ང༌ བྲངས༌ཏེ༌ ཡོང༌ཨིན༌།"
20 ཡེ༌ཤུའི༌ ལན༌སལས༌, "ཝ༌ཙེའི༌ ཝ༌ཚངས༌ དང༌, ནམ༌ཁའེ༌ ཅ༌ ཅ༌ཚངས༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌ མི༌རིགས༌སི༌བུའ༌ གོ༌ བོར༌ཏེ༌ ངལ༌ཚོ༌ཅེས༌སི༌ ནས༌སའང༌ མེད༌།"
21 ཞན༌ ལོབ༌ཕྲུགས༌ཞིག༌གི༌ ཟེརས༌, "གཙོ༌བོ༌ལེ༌, སྔུན༌ལ༌ ང༌ ཁང༌པ༌ སོང༌ཏེ༌ ང༌རང༌ངི༌ ཨ༌བ༌ ཤི༌ཏེ༌ སུབ༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ལ༌ གོངས༌པ༌ སལ༌།"
22 ཡེ༌ཤུའི༌ མོལས༌, "ངའེ༌ སྟིང༌རང༌ནེ༌ བྲོངས༌, ཡང༌ སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ལ༌ ཁོ༌རང༌གུན༌ནི༌ ཤི༌ཁན༌གུན༌ སུབ༌ཅུག༌།"
ཡེ༌ཤུའི༌ ལུང༌རག༌ མེད༌ཁན༌ ཛདས༌།
8:23 ནེ༌ 27
23 ཏེ༌ནེ༌ གཙོ༌བོ༌ ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛདས༌ ཡང༌ ལོབ༌ཕྲུགས༌གུན༌ ཁོང༌ ཉམ༌པོ༌ སོང༌།
24 ཧུན༌མེད༌ལ༌ ནམ༌ཚུབས༌ཏེ༌ ཚོའེ༌ ནང༌ང༌ ལུང༌རག༌ ཀྲག༌པོ༌ ཡོང༌ཅེས༌པོའེ༌ ཆུལ༌བག༌ གྲུ༌ཟིང༌ངི༌ ནང༌ང༌ ལེབ༌ནའང༌, ཡེ༌ཤུ༌ ནལ༌ཟིམས༌ཏེ༌ ཡོད༌པིན༌།
25 ལོབ༌ཕྲུགས༌གུན༌ སོང༌ཏེ༌ ཡེ༌ཤུའ༌ ཉིད༌ཚད༌ད༌ ཛད༌ཏེ༌ ཟེརས༌, "གཙོ༌བོ༌ལེ༌, གཙོ༌བོ༌ལེ༌, ང༌ཞ༌གུན༌ ཆུའི༌ ནང༌ང༌ ནུབ༌ཏེ༌ ཤི༌ཅེས༌ དུག༌། སྐྱོབ༌བ༌ ཛད༌དའང༌།"
26 ཡེ༌ཤུའི༌ ལན༌སལས༌, "ཏད༌པ༌ ཆུ༌ངུན༌ཅན༌, ཅིའ༌ ཇིགས༌སད༌?" ཁོང༌ ཞངས༌ཏེ༌, ལུང༌རག༌ དང༌ ཆུལ༌བག༌ གུན༌ལ༌ ཁའ༌སྐྱེའ༌ ཛད༌པ༌ ཏེན༌ན༌མལ༌ལ༌ ཏེ༌གུན༌ མེད༌ཁན༌ སོང༌ཏེ༌ ཚོའེ༌ ནང༌ང༌ པད༌ ཞི༌དེ༌ བྱུང༌།
27 ཁོང༌གུན༌ ཧ༌ལས༌ཏེ༌ ཟེརས༌, "ཁོང༌ ཀ༌ཟུག༌ མི༌ཞིག༌ ཨིན༌ཧེ༌? ལུངས༌པོ༌ དང༌ ཆུལ༌བག༌ གུན༌ནིའང༌ ཁོང༌ངི༌ ཁའ༌ ཉན༌དུག༌།"
རྡུད༌ ཞུགས༌ཁན༌ནི༌ མི༌ ཉིས༌ ཕན༌ཅུག༌ག༌ ཛདས༌།
8:28 ནེ༌ 34
28 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཚོའེ༌ ཕར༌ཀ༌, ག༌ད༌རཱའེ༌ ཡུལ༌ཇོངས༌ལ༌ ལེབ༌བ༌ཅིག༌, རོམ༌ཁང༌ངི༌ ནས༌ས༌ནེ༌ བིངས༌ཏེ༌ ཡོང༌ཨིན༌ ཡོད༌ཁན༌ རྡུད༌ ཞུགས༌ཁན༌ ཉིས༌ ཡེ༌ཤུའ༌ ཐུག༌། ཁོང༌གུན༌ མ༌ ནོད༌སྐྱལ༌ ཇིགས༌ནང༌ཅན༌ ཡོད༌ཅེས༌པོའེ༌ སུ༌ཞིག༌གའང༌ ཏེ༌ ལམ༌ནེ༌ ཆ༌ཐུབ༌བ༌ མེད༌པིན༌།
29 ཁོང༌གུན༌ནི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, "དཀོན༌མཆོག༌གི༌ སྲས༌ ཉེ༌རང༌ ང༌ཞའེ༌ ལས༌སི༌ ནང༌ང༌ ཅིའ༌ དྲེས༌སད༌? དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཁྲིམས༌ཅད༌དི༌ ཏུས༌པོའེ༌ སང༌ སྔུན༌ལ༌ ང༌ཞའ༌ ནགས༌ ལྟན༌ན༌ལ༌ སྐྱོད༌པིན༌ན༌?"
30 ཁོང༌གུན༌ ཡོད༌སའེ༌ སང༌ ཙ༌པིག༌ ཐག༌རིང༌ང༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌།
31 རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཟེརས༌, "གལ༌ཏེས༌ ཉེ༌རང༌ངི༌ ང༌ཞའ༌ ཁོང༌གུན༌ནི༌ ནང༌ནེ༌ ཕིང༌ན༌, ང༌ཞའ༌ འ༌ ཕག༌གུན༌ནི༌ ནང༌ང༌ ཆ༌ཅུག༌ག༌ ཛད༌།"
32 ཡེ༌ཤུའི༌ ཁོང༌གུན༌ལ༌ "སོང༌ཤིག༌" མོལ༌པ༌, ཏེ༌གུན༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌ས༌ཅིག༌, ཕག༌གི༌ ཁྱུ༌ གང༌པོ༌ རི༌ནེ༌ ཐུར༌ལ༌ ཚོའེ༌ ཆོགས༌ལ༌ གྱུགས༌པ༌ ཆུའི༌ ནང༌ང༌ ནུབ༌ཏེ༌ ཤི༌།
33 ཕག༌ཚོ༌ཁན༌གུན༌ གྲོང༌ཁྱེར༌ལ༌ བང༌ཏངས༌ཏེ༌ སོང༌, ཡང༌ རྡུད༌ ཞུགས༌ཁན༌ནི༌ མི༌གུན༌ལ༌ བྱུང༌ཁན༌ ཚང༌མ༌ ཤདས༌།
34 ཏེ༌ནེ༌ གྲོང༌ཁྱེར༌པ༌ ཚང༌མ༌ ཡེ༌ཤུ༌ ཇལ༌ལ༌ ཡོངས༌, ཡང༌ ཡེ༌ཤུ༌ ཇལ༌ལ༌ཅིག༌, ཁོང༌གུན༌ སྲན༌ཏྲེ༌ ཇིགས༌ པ༌སང༌ ཁོང༌ང༌, ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཇུ༌ཇུ༌ ཟེརས༌།