3
ཡོ༌ཧཱ༌ནན༌ ཁྲུས༌སལ༌ཁན༌ནི༌ མི༌གུན༌ གྲལ༌གྲིག༌ ཛདས༌།
3:1 ནེ༌ 12
1 ལོ༌ མང༌པོའེ༌ སྟིང༌ནེ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ ཆོས༌ཤད༌ཅེས༌ གོ༌ཟུགས༌, ཁོང༌ངི༌ ཡ༌ཧུ༌དཱའེ༌ རི༌སྟོང༌ངི༌ ནང༌ང༌ མི༌གུན༌ལ༌ ཆོས༌ཤད༌ཨིན༌
2 མོལས༌, "ནམ༌ཁའེ༌ གྱལ༌སྲིད༌ ཉེ༌མོའ༌ ལེབས༌ཏེ༌ ཨིན༌ནོག༌, གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམས༌ གྱུར༌ཤིག༌།"
3 ལུང༌སྟོན༌པ༌ ཡེ༌ཤ༌ཡཱའེ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ སྐོར༌ལ༌ མོལ༌དུག༌,
"རི༌སྟོང༌ངི༌ ནང༌ང༌ སྐད༌ ཆེན༌མོ༌ཞིག༌གི༌ མོལ༌ཨིན༌,
'གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོས༌,
ཡང༌ ཁོང༌ངི༌ ཕེབས༌ལམ༌བོ༌ དྲང༌པོ༌ ཅོས༌། "
4 ཡོ༌ཧཱ༌ནན༌ནི༌ རྔ༌བོང༌ངི༌ བལ༌ལ༌ ཐགས༌ཁན༌ནི༌ ཀོས༌ དང༌ སྐེད༌པ༌ ཀོའེ༌ སྐྱེ༌རགས༌ ཅིང༌ངད༌པིན༌། ཁོང༌ངི༌ ཁར༌ཇི༌ ནི༌ པར༌པར༌ཙེ༌ དང༌ རི༌སྟོང༌ངི༌ རང༌རྩི༌ ཨིན༌པིན༌།
5 ཏེ༌ཏུས༌ ཡེ༌རུ༌ཤ༌ལེམ༌, ཡ༌ཧུ༌དཱ༌ གང༌པོ༌ དང༌ ཡོར༌དཱན༌ ལུང༌པ༌ གང༌པོའེ༌ མི༌གུན༌ ཁོང༌ང༌ ལྟ༌ཅེས༌ དང༌ ཉན༌ན༌ལ༌ སོང༌།
6 ཁོང༌གུན༌ནི༌ རང༌རང༌ངི༌ སྡིག༌པའེ༌ ལས༌གུན༌ མི༌གུན༌ནི༌ དུན༌ལ༌ ཤདས༌ པ༌སང༌ ཡོ༌ཧཱ༌ནན༌ནི༌ ཁོང༌གུན༌ལ༌ ཡོར༌དཱན༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
7 ཨིན༌ནའང༌ ཕ༌རུ༌ཤི༌པ༌ དང༌ སད༌དུ༌ཀི༌པ༌ མང༌པོ༌ཞིག༌ ཁྲུས༌ལེན༌ན༌ ཡོང༌ཨིན༌ ཟིགས༌ཏེ༌ ཡོ༌ཧཱ༌ནན༌ནི༌ མོལས༌, "ཁྱོ༌ཞའ༌ ཏུག༌རུལ༌ལི༌ པུར༌གྱུད༌གུན༌, ཡོང༌ཅེས༌ཅན༌ནི༌ དཀོན༌མཆོག༌གི༌ ཆད༌པ༌ནེ༌ ཤོར༌ ཟེར༌ཏེ༌ ཁྱོ༌ཞའ༌ སྤང༌ སུའི༌ ཕུདས༌།
8 སྡིག༌པ༌ ཅོ༌ཅེས༌ སྤངས༌ཏེ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ བྲས༌བུ༌ སྨིན༌ཅུག༌།
9 ཡང༌ ཁྱོ༌ཞའེ༌ མ༌སམ༌ཤིག༌ 'ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ པ༌སང༌ ཐར༌ཨིན༌'། ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ འི༌ རྡོའ༌གུན༌ནི༌ ནང༌ནེ༌ ཨབ༌ར༌ཧམ༌མི༌ ཕིའ༌ པུར༌གྱུད༌ ཛད༌ཉན༌ཨིན༌།
10 ཤང༌ ཅོ༌ཤིག༌། སྟ༌རི༌ ནི༌ ལྕང༌མ༌གུན༌ནི༌ རྩའི༌ཀ༌ གྱབ༌ཆོག༌ཆོག༌ དུག༌, བྲས༌བུ༌ ཟང༌པོ༌ མ༌སྨིན༌ཁན༌ནི༌ ལྕང༌མ༌ ཚང༌མ༌ ཅད༌ཏེ༌ མེའེ༌ ནང༌ང༌ ཕང༌ཨིན༌།"
11 "ངའེ༌ ཁྱོ༌ཞའ༌ གྱོད༌པ༌ ཅོས༌ཏེ༌ དཀོན༌མཆོག༌གི༌ ཆོགས༌ལ༌ སེམས༌ གྱུར༌ཅེས༌ལ༌ ཆུའི༌ཁྲུས༌ ཏང༌ངད༌། ཨིན༌ནའང༌ ངའེ༌ སྟིང༌ནེ༌ སྐྱོད༌ཅེས༌ཅན༌, ཁོང༌ ངའེ༌ སང༌ མང༌ང༌ ཝང༌ཅན༌, ཡང༌ ང༌ ནི༌ ཞབ༌ཤི༌ ཙོགས༌ལ༌ ཁོང༌ངི༌ ཞབ༌པུལ༌ ཁུར༌ཅེས༌སི༌ འོས༌པ༌ མེད༌། ཁོང༌ངི༌ དམ༌པའེ༌ ཐུག༌ཉིད༌ དང༌ མེའེ༌ ཁྲུས༌སལ༌ཨིན༌།
12 ཞིང༌བད༌པའེ༌ ཡུལ༌ཐག༌ག༌ ཟར༌ ཉམ༌པོ༌, ཀྲོ༌ དང༌ ཕུག༌མ༌ ཕེས༌ཏེ༌ ཀྲོ༌ ཁོ༌རང༌ངི༌ བང༌ངེ༌ ནང༌ང༌ ཡང༌ ཕུག༌མ༌ མེའེ༌ ནང༌ང༌ སྲག༌ག༌ ཙོགས༌ལ༌ ཁོང༌ངིའང༌ ཁོང༌རང༌ངི༌ མི༌གུན༌ དང༌ མི༌ ངན༌པ༌གུན༌ སོ༌སོའ༌ ཕེའ༌ ཛད༌ཨིན༌།
ཡེ༌ཤུའི༌ ཁྲུས༌ ལེན༌ན༌ ཛདས༌།
3:13 ནེ༌ 17
13 ཏེ༌ནེ༌ གཙོ༌བོ༌ ཡེ༌ཤུ༌ གཱ༌ལིལ༌ལི༌ ཡུལ༌ཇོངས༌ནེ༌ ཡོར༌དཱན༌ ལྩངས༌པོའ༌ ཡོ༌ཧཱ༌ནན༌ནེ༌ ཁྲུས༌ ལེན༌ན༌ལ༌ སྐྱོདས༌།
14 ཨིན༌ནའང༌ ཡོ༌ཧཱ༌ནན༌ནི༌ ཡེ༌ཤུའ༌ ཁྲུས༌ ལེན༌ཅེས༌ནེ༌ སྒག༌ཅེས༌སི༌ རྩོན༌གྲུས༌ ཅོ༌ཨིན༌ མོལས༌, "ངའ༌ ཉེ༌རང༌ངི༌ ཁྲུས༌སལ༌ གོ༌ཤེས༌ ཨིན༌ནོག༌། ཏེ༌ནེ༌ ཉེ༌རང༌ ངའེ༌ཀ༌ ཁྲུས༌ ལེན༌ན༌ ཅིའ༌ སྐྱོད༌ཏེ༌ ཨིན༌?"
15 ཡེ༌ཤུའི༌ ཡོ༌ཧཱ༌ནན༌ལ༌ མོལས༌, "དག༌ས༌ ང༌ ཁྲུས༌ལེན༌ཅུག༌ ཅིའ༌ཟེར༌ན༌ འི༌ཟུག༌ ཅོ༌ཅེས༌པོའེ༌ ང༌དང༌ངི༌ དཀོན༌མཆོག༌གི༌ ཐུག༌གོངས༌ གྲུབ༌ ཅུག༌ག༌ནོག༌།" ཏེ༌ནེ༌ ཡོ༌ཧཱ༌ནན༌ ཁོང༌ང༌ ཁྲུས༌སལ༌ཅེས༌ལ༌ ཐད༌།
16 ཁྲུས༌ ནམས༌ཏེ༌ ཡེ༌ཤུ༌ ཆུའི༌ ནང༌ནེ༌ བིང༌ང༌ཅིག༌, ནམ༌ཁའ༌ བེ༌ཏེ༌, ཕུར༌གོན༌ཞིག༌གི༌ ཚུལ༌ལ༌ དཀོན༌མཆོག༌གི༌ ཐུག༌ཉིད༌ བབས༌ཏེ༌ ཁོང༌ངི༌ཀ༌ ཞུགས༌ས༌ ཛདས༌།
17 ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, "འི༌བོ༌ ནི༌ ངའེ༌ ཅེས༌པའེ༌ བུ༌ཚ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།"