22
བག༌སྟོན༌ནི༌ རུངས༌།
22:1 ནེ༌ 14
1 གཙོ༌བོ༌ ཡེ༌ཤུའི༌ ཆོས༌སི༌ འུ༌སྐྱོང༌གུན༌ལ༌ ཡང༌སྐྱར༌ རུངས༌ གྱུད༌ཏེ༌ ལབ༌ཞ༌ སལས༌,
2 "ནམ༌ཁའེ༌ གྱལ༌སྲིད༌ ནི༌ གྱལ༌པོའེ༌ ཁོ༌རང༌ངི༌ བུ༌ཚའེ༌ བག༌སྟོན༌ནི༌ ཕིའ༌ དོན༌ཏང༌ གྲལ༌གྲིག༌ ཅོ༌ཁན༌ ཙོགས༌ ཨིན༌།
3 བག༌སྟོན༌ལ༌ བོད༌ཏེ༌ ཡོད༌ཁན༌གུན༌ལ༌ ཡོང༌ ཟེར༌ཏེ༌ བོད༌ད༌ལ༌ གྱལ༌པོའེ༌ ཁོ༌རང༌ངི༌ ཡོག༌པོ༌གུན༌ ལམ༌ཅུགས༌, ཨིན༌ནའང༌ ཁོང༌གུན༌ ཡོང༌ང༌ལ༌ མ༌ཐད༌།"
4 "གྱལ༌པོའེ༌ ཡང༌སྐྱར༌ ཞན༌ ཡོག༌པོ༌གུན༌ བོད༌ད༌ལ༌ ལམ༌ཅུགས༌ཏེ༌ ཟེརས༌, 'བག༌སྟོན༌ལ༌ བོད༌ཁན༌གུན༌ལ༌, ངའེ༌ དོན༌ཏང༌ གྲལ༌གྲིག༌ ཅོ༌ ཚར༌, ལང༌ཏོ༌ དང༌ བ༌ལང༌ གྱགས༌པ༌ གུན༌ སད༌ཏེ༌ ཅི༌ཚང༌མ༌ གྲུབ༌ ཚར༌, བག༌སྟོན༌ནི༌ དོན༌ཏང༌ང༌ ཡོང༌ཤིག༌ ཟེར༌།'
5 ཨིན༌ནའང༌ ཁོང༌གུན༌ནི༌ ཏེ༌བོའ༌ ནང༌སྟག༌ མ༌ཏང༌ང༌, ཁ༌ཅིག༌ ཞིང༌ང༌ སོང༌, ཁ༌ཅིག༌ ཚོང༌ང༌ སོང༌།
6 ཞན༌ ལུས༌ཁན༌གུན༌ནི༌ ཡོག༌པོ༌གུན༌ ཟུམས༌ཏེ༌ ཁོང༌ ཉམ༌པོ༌ ངན༌པ༌ ཅོས༌ཏེ༌ སད༌།"
7 "གྱལ༌པོའ༌ སྲོ༌ མ༌སྲན༌ཏྲེ༌ ཡོངས༌, ཡང༌ ཁོ༌རང༌ངི༌ མག༌མི༌ ལམ༌ཅུགས༌ཏེ༌, ཏེ༌ མི༌ སད༌གུན༌ མེད༌ཁན༌ ཅོས༌ ཡང༌ ཁོང༌གུན༌ནི༌ གྱལ༌ས༌ མེའ༌ སྲགས༌།
8 ཏེ༌ནེ༌ ཁོ༌རང༌ངི༌ ཡོག༌པོ༌གུན༌ལ༌ ཟེརས༌, 'བག༌སྟོན༌ནི༌ དོན༌ཏང༌ གྲལ༌གྲིག༌ ཅོ༌ཚར༌, ཨིན༌ནའང༌ ངའེ༌ བོད༌ཁན༌གུན༌ ཏེ༌ནང༌ང༌ ཐུ༌ཤེས༌ འོས༌པ༌ མི༌དུག༌།
9 སོང༌ཏེ༌ ལམ༌གུན༌ནི༌ཀ༌ ཡོད༌ཁན༌ ཚང༌མ༌ བག༌སྟོན༌ནི༌ གྲོན༌ལ༌ ཡོང༌ ཟེར༌ཏེ༌ བོད༌།'
10 གྱལ༌པོའེ༌ ཡོག༌པོ༌གུན༌ ལམ༌གུན༌ལ༌ སོང༌ཏེ༌ ཏེ༌ཀ༌ ཡོད༌ཁན༌ ཟང༌པོ༌ དང༌ ངན༌པ༌ མི༌ཚང༌མ༌ ལྡུམས༌ཏེ༌ ཁྱོངས༌པ༌, བག༌སྟོན༌ནི༌ ཁང༌པ༌ གྲོན༌པོའེ༌ གང༌།"
11 "ཨིན༌ནའང༌ གྱལ༌པོ༌ གྲོན༌པོ༌གུན༌ལ༌ ཐུག༌ག༌ལ༌ ཡོང༌ང༌ཅིག༌, བག༌སྟོན༌ནང༌ ཟོབས༌པའེ༌ ཀོས༌ལག༌ མ༌གོན༌ཁན༌ཞིག༌ ཐོང༌ཏེ༌,
12 ཁོའེ༌ ཟེརས༌, 'ཛ༌འོ༌ལེ༌, ཁྱོ༌རང༌ ཟབ༌ མ༌ཟབ༌བ༌ བག༌སྟོན༌ལ༌ ཀ༌ཟུག༌གི༌ ཡོངས༌པིན༌?' ཁོའ༌ ཅའང༌ ལན༌ཏང༌ མ༌ཉན༌།
13 ཏེ༌ནེ༌ གྱལ༌པོའེ༌ ཁོ༌རང༌ངི༌ ཡ༌ཏོ༌གུན༌ལ༌ ཟེརས༌, 'འི༌ མི༌བོའེ༌ ལག༌པ༌ དང༌ རྐང༌པ༌ གུན༌ ལྡམས༌ཏེ༌, ཕི༌ལོག༌ག༌ མུན༌གྲིག༌གི༌ ནང༌ང༌ ཕོང༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌'།"
14 ཡེ༌ཤུའི༌ མོལས༌, "ནམ༌ཁའེ༌ གྱལ༌སྲིད༌དི༌ ནང༌ང༌ མང༌པོའ༌ བོད༌ད༌ ཛདས༌, ཨིན༌ནའང༌ ཉུ༌ངུན༌ཞིག༌ མ༌ནེ༌ ལྡམ༌མ༌ མ༌ཛདས༌།"
རོམ༌པའེ༌ གྱལ༌པོའ༌ ཁྲལ༌ཤལ༌ཅེས༌།
22:15 ནེ༌ 22
15 ཏེ༌ནེ༌ ཕ༌རུ༌ཤི༌པ༌གུན༌ ཏེ༌ཀ༌ནེ༌ སོང༌ ཡང༌ ཁོང༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌ནི༌ སྤེ༌ར༌རིག༌ གྱུད༌ཏེ༌ ཁོང༌ ཁད༌ཅུག༌ཅེས༌ལ༌ གྲབས༌ ཅོས༌ཏེ༌
16 ཁོ༌རང༌གུན༌ནི༌ ལོབ༌ཕྲུགས༌གུན༌ གྱལ༌པོ༌ ཧེ༌རོ༌དཱའི༌ ཆོགས༌པ༌གུན༌ ཉམ༌པོ༌ ཡེ༌ཤུའི༌ཀ༌ འི༌ཟུག༌ ཟེར༌ཅེས༌ལ༌ ལམ༌ཅུགས༌, "ལོབ༌པོན༌ལེ༌, ཉེ༌རང༌ དྲང༌པོ༌ ཛད༌ཁན༌བོ༌ ང༌ཞའ༌ གྱུས༌ཡོད༌, ཡང༌ ཉེ༌རང༌ངི༌ དྲང༌པོ༌ ཉམ༌པོ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌ ལབ༌བ༌ ཛད༌ད༌ནོག༌། ཉེ༌རང༌ངི༌ མི༌ ནང༌ང༌ ཡ༌ཕེས༌ ཛད༌ད༌ མ༌ནོག༌ ཅིའ༌ཟེར༌ན༌ ཉེ༌རང༌ངི༌ ཁོང༌གུན༌ སུ༌ ཨིན༌ཁན༌བོའེ༌ཀ༌ སྣང༌ང༌ ཛད༌ད༌ མ༌ནོག༌།
17 མོལ༌ལ༌ ཛད༌དའང༌ ཉེ༌རང༌ངི༌ ཐུགས༌སམ༌ ཅི༌ ཨིན༌? རོམ༌མི༌ གྱལ༌པོའ༌ ཁྲལ༌ ཤལ༌ཅེས༌པོ༌ འོས༌པ༌ ཨིན༌ནོག༌ག༌ ཡ༌ མ༌ནོག༌?"
18 ཨིན༌ནའང༌ ཡེ༌ཤུའི༌ ཁོང༌གུན༌ནི༌ ཅུས༌ངན༌ ཁྱེན༌ཏེ༌ མོལས༌, "ཁ༌ཆོས༌པ༌གུན༌ ཅིའ༌ ང༌ སྤེ༌རའེ༌ ནང༌ང༌ སྐར༌ཅེས༌སི༌ རྩོན༌གྲུས༌ ཅོའད༌?
19 ཁྲལ༌ལ༌ ཏང༌ཁན༌ནི༌ པེ༌ནེ༌ཞིག༌ ངའ༌ སྟོན༌ནའང༌།" ཁོང༌གུན༌ནི༌ ཡེ༌ཤུའ༌ རོམ༌པའེ༌ མུལ༌ལི༌ པེ༌ནེ༌ཞིག༌ སྟནས༌།
20 ཡེ༌ཤུའི༌ ཁོང༌གུན༌ལ༌ མོལས༌, "འི༌ པེ༌ནེ༌ཀ༌ ཡོད༌ཁན༌ནི༌ པར༌ དང༌ མིང༌ སུའི༌ ཨིན༌ནོག༌?"
21 ཁོང༌གུན༌ནི༌ ལན༌ཏངས༌, "རོམ༌མི༌ གྱལ༌པོའེ༌།"
ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, "གྱལ༌པོའེ༌ ཨིན༌ཁན༌བོ༌ གྱལ༌པོའ༌ ཏོང༌ ཡང༌ དཀོན༌མཆོག༌གི༌ ཨིན༌ཁན༌བོ༌ དཀོན༌མཆོག༌ག༌ ཕུལ༌།"
22 ཁོང༌གུན༌ནི༌ ཏེ༌བོ༌ ཚོར༌ར༌ཅིག༌, ཧ༌ལས༌ཏེ༌ ཡེ༌ཤུ༌ བོར༌ཏེ༌ ཏེ༌ཀ༌ནེ༌ སོང༌།
སོན༌ཏེའ༌ ལང༌ཅེས༌སི༌ སྐོར༌ལ༌ ཏྲི༌ཝ༌།
22:23 ནེ༌ 33
23 ཏེན༌ན༌ ཞག༌ག༌, ཤི༌ཁན༌གུན༌ སོན༌ཏེའ༌ ལང༌ང༌ མ༌ནོག༌ ཟེར༌ཁན༌ནི༌ སད༌དུ༌ཀི༌པ༌གུན༌ ཡེ༌ཤུ༌ ཡོད༌ས༌ ཏྲི༌ཝ༌ཞིག༌ ཏྲིའ༌ལ༌ ཡོངས༌ཏེ༌ ཟེརས༌
24 "ལོབ༌པོན༌ལེ༌ མོ༌ཟེས༌སི༌ མོལ༌ཏེ༌ ཨིན༌པིན༌, 'གལ༌ཏེས༌ བུ༌ཚ༌ཞིག༌ ཕྲུ༌གུ༌ མེད༌པ༌ ཤི༌ན༌, ཨ༌ཅོ༌ ཡ༌ ནོ༌བོའེ༌ ཁོའེ༌ མིར༌གྱུད༌ ལུས༌ཤེས༌སི༌ ཕིའ༌ ཤི༌ཁན༌ནི༌ ན༌མ༌ ཉམ༌པོ༌ བག༌སྟོན༌ ཅོས༌ཏེ༌ ཕྲུ༌གུ༌ ཇོར༌ཅུག༌ གོས༌།'
25 ཏ༌ ཨ༌ཅོ༌ནོ༌ རྡུན༌ ཡོད༌པིན༌, ཏང༌པོ༌བོའེ༌ ན༌མ༌ ཅོས༌, ཡང༌ ཕྲུ༌གུ༌ མེད༌པ༌ ཤི༌, ཁོའེ༌ ནོའེ༌ ཏེ༌ བུ༌མོའ༌ ན༌མ༌ ཅོས༌
26 ཏེན༌ན༌ ཙོགས༌ ཉིས༌པ༌ དང༌ སུམ༌པ༌ དང༌ རྡུན༌པའ༌ ཚག༌པ༌ སོང༌།
27 སྟིང༌ཇུག༌ག༌ བུ༌མོ༌བོའང༌ ཤི༌།
28 བུ༌མོ༌བོའེ༌ ཁོང༌ ཚང༌མ༌ ཉམ༌པོ༌ ན༌མ༌ ཅོས༌པ༌, ཤི༌ཁན༌གུན༌ སོན༌ཏེའ༌ ལང༌ངི༌ ཏུས༌ལ༌ ཁོ༌ ཁོང༌གུན༌ནི༌ ནང༌ནེ༌ སུའི༌ ན༌མ༌ གྱུར༌ཨིན༌?"
29 ཡེ༌ཤུའི༌ མོལས༌, "ཁྱོ༌ཞའེ༌ ནོར༌ཁྲུལ༌བོ༌ ནི༌ ཁྱོ༌ཞ༌གུན༌ལ༌ དཀོན༌མཆོག༌གི༌ སྟོབས༌ ཡ༌ དམ༌པའེ༌ སུང༌རབས༌པོ༌ ཧ༌མ༌གོའ༌ ཨིན༌ནོག༌།
30 དཀོན༌མཆོག༌གི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ ཟ༌ནེ༌, ཁོང༌གུན༌ནི༌ ན༌མ༌ མི༌ཅོ༌ ཡ༌ བག༌མ༌ མི༌ཏང༌, ཁོང༌གུན༌ ནམ༌ཁའེ༌ ཕོ༌ཉ༌ ཙོགས༌ གྱུར༌ཨིན༌།"
31 "ཨིན༌ནའང༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཅེས༌སི༌ སྐོར༌ལ༌ དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌?
32 ཏེ༌བོ༌ ནི༌,
'ང༌ ནི༌ ཨབ༌ར༌ཧམ༌མི༌ དཀོན༌མཆོག༌,
ཨི༌སཱག༌གི༌ དཀོན༌མཆོག༌ དང༌ ཡ༌ཀོབ༌བི༌ དཀོན༌མཆོག༌ ཨིན༌།'
ཁོང༌ ནི༌ ཤི༌ཁན༌གུན༌ནི༌ དཀོན༌མཆོག༌ མན༌པ༌, སོན༌པོ༌གུན༌ནི༌ དཀོན༌མཆོག༌ ཨིན༌ནོག༌།"
33 ཏེ༌གུན༌ ཚོར༌ར༌ཅིག༌ མི༌ཚོགས༌ ཁོང༌ངི༌ ལབ༌ཞ༌གུན༌ནི༌ཀ༌ ཧ༌ལས༌།
བཀའ༌རྒྱ༌ ཚང༌མའེ༌སང༌ ཁག༌ཅན༌།
22:34 ནེ༌ 40
34 སད༌དུ༌ཀི༌པ༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌བོའ༌ ལན༌ཏང༌ མ༌ཉན༌པ༌ ཕ༌རུ༌ཤི༌པ༌གུན༌ ཛོམས༌།
35 ཁོང༌གུན༌ནི༌ ནང༌ནེ༌ ཆོས༌ཁྲིམས༌ལ༌ ཁས༌པ༌ཞིག༌གི༌ ཡེ༌ཤུའ༌ ཚོད༌ལྟ༌ཅེས༌ལ༌ འི༌ ཏྲི༌ཝ༌བོ༌ ཏྲིས༌,
36 "ལོབ༌པོན༌ལེ༌, བཀའ༌ཁྲིམས༌སི༌ ནང༌ནེ༌ ཀ༌ བཀའ༌རྒྱ༌བོ༌ ཚང༌མའེ༌སང༌ ཁག༌ཅན༌ ཨིན༌ནོག༌?"
37 ཡེ༌ཤུའི༌ མོལས༌, "གཙོ༌བོ༌ ཁྱོ༌ཞའེ༌ དཀོན༌མཆོག༌ག༌ སྙིང༌ གང༌པོ༌, སེམས༌ གང༌པོ༌, དང༌ སམ༌བ༌ གང༌པོ༌ནེ༌ ཅེས༌པ༌ ཅོས༌།
38 ཏེ༌བོ༌ ནི༌ བཀའ༌རྒྱ༌ མ༌ ཁག༌ཅན༌ དང༌ ཀྲག༌ཤོག༌པོ༌ ཨིན༌།
39 ཏེན༌ན༌ ཙོགས༌ལ༌ བཀའ༌རྒྱ༌ ཁག༌ཅན༌ ཉིས༌པ༌བོ༌ ནི༌, རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པ༌ ཅམས༌པ༌ ཅོས༌།
40 མོ༌ཟེས༌སི༌ བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ སྤེ༌ཆའེ༌ ནང༌ང༌ བྲིས༌ཁན༌གུན༌ ཏེ༌ བཀའ༌རྒྱ༌ ཉིས༌ཀོའེ༌ ནང༌ང༌ ཚང༌ཏེ༌ ཨིན༌ནོག༌།"
མ༌ཤི༌ཀ༌ སུའི༌ པུར༌གྱུད༌ ཨིན༌།
22:41 ནེ༌ 46
41 ཕ༌རུ༌ཤི༌པ༌གུན༌ ཛོམས༌ཏེ༌ ཡོད༌ཏུས༌, ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌,
42 "དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ སྐོར༌ལ༌ ཁྱོ༌ཞའེ༌ ཅི༌ སམ༌མ༌རག༌? ཁོ༌ སུའི༌ པུར༌གྱུད༌ ཨིན༌ནོག༌?" ཁོང༌གུན༌ནི༌ ལན༌ཏངས༌, "གྱལ༌པོ༌ དཱ༌བིད༌དི༌ པུར༌གྱུད༌ ཨིན༌ནོག༌།"
43 ཡེ༌ཤུའི༌ ཁོང༌གུན༌ལ༌ མོལས༌, "དཱ༌བིད༌དི༌ མ༌ཤི༌ཀའ༌, དམ༌པའེ༌ ཐུག༌ཉིད༌ གྱུད༌ཏེ༌ གཙོ༌བོ༌ ཅི༌ཕིའ༌ ཟེར༌ཏེ༌ ཨིན༌ནོག༌? དཱ༌བིད༌དི༌ ཟེརས༌,
44 'དཀོན༌མཆོག༌གི༌ ངའེ༌ གཙོ༌བོའ༌ མོལས༌,
ངའེ༌ ཁྱོ༌རང༌ངི༌ གྲ༌འོ༌ ཚང༌མ༌,
ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌,
ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།'
45 "གལ༌ཏེས༌ དཱ༌བིད༌དི༌ མ༌ཤི༌ཀའ༌ 'གཙོ༌བོ༌' ཟེར༌རད༌ན༌, ཏེ༌ནེ༌ ཀ༌ཟུག༌གི༌ མ༌ཤི༌ཀ༌ ཁོའེ༌ པུར༌གྱུད༌ ཨིན༌ནོག༌?"
46 སུ༌ཞིག༌གའང༌ ལན༌ཏང༌ མ༌ཉན༌, མ༌ཚད༌ ཏེ༌ ཞག༌ནེ༌ ཕར༌ལ༌ སུ༌ཞིག༌གིའང༌ ཁོང༌ང༌ ཏྲི༌ཝ༌ ཏྲི༌ཅེས༌སི༌ ཧམ༌པ༌ མ༌ཅོས༌།