12
ཡེ༌ཤུ༌ ནི༌ ཤབ༌བད༌དི༌ ཞག༌གི༌ གཙོ༌བོ༌ ཨིན༌།
12:1 ནེ༌ 8
1 ཏེན༌ན༌ ཏུས༌ཤིག༌ག༌ གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ སྟོགས༌ཏེ༌ ཡོད༌པ༌ ཞིང༌ངི༌ སྙེ༌མ༌ ཅད༌ཏེ༌ ཟའ༌ཅེས༌ གོ༌ཟུག༌།
2 ཏེ༌བོ༌ ཐོང༌ཏེ༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, "ཁྱོ༌རང༌ངི༌ ལོབ༌ཕྲུགས༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཆོས༌ཁྲིམས༌ ཅགས༌ཏེ༌ ཨིན༌ནོག༌།"
3 ཡེ༌ཤུའི༌ ལན༌སལས༌, "དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡོད༌ ཟ༌ནེ༌ ཅི༌ ཅོས༌ དམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌སིལ༌པིན༌ན༌?
4 དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌, ཡང༌ ཁོ༌ དང༌ ཁོའེ༌ ཕྲོ༌པ༌གུན༌ནི༌ དམ༌པའེ༌ ཏ༌གི༌ ཟོས༌ཏེ༌ ཆོས༌ཁྲིམས༌ ཅགས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌།
5 ཡ༌ ཆོས༌ཁྲིམས༌སི༌ ནང༌ང༌ མ༌སིལ༌པིན༌ན༌, ཆོད༌ཁང༌ངི༌ ནང༌ང༌ བླ༌མའེ༌ ཆོད༌པ༌ ཕུལ༌ཅེས༌སི༌ ལས༌ ཅོས༌ཏེ༌ ཤབ༌བད༌དི༌ ཞག༌གི༌ ཁྲིམས༌ ཅག༌ནའང༌ དཀོན༌མཆོག༌གི༌ དུན༌ལ༌ ཁོང༌གུན༌ ནོངས༌མེད༌ ཨིན༌ནོག༌།
6 ངའེ༌ ཁྱོ༌ཞའ༌ ཟེར༌རད༌, ཆོད༌ཁང༌ངི༌ སང༌ ཀྲག༌ག༌ཞིག༌ འི༌ཀ༌ ཡོད༌།
7 དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལས༌, 'ངའེ༌ དོད༌པ༌ ནི༌ ངའ༌ ཆོད༌པ༌ ཕུལ༌ཅེས༌ མན༌པ༌ ཞན༌མ༌ སྙིང༌རྗེ༌ ལྟན༌ཅེས༌པོ༌ ཨིན༌།' གལ༌ཏེས༌ ཏེ༌བོ༌ ཁྱོ༌ཞ༌གུན༌ལ༌ ཧ༌གོ༌ཏེ༌ ཨིན༌པིན༌ན༌ ཏེ༌ནེ༌ ཁྱོ༌ཞའེ༌ ནོངས༌མེད༌གུན༌ལ༌ སྐྱོན༌ ཀལ༌ཏེ༌ མེད༌གྲོ༌།
8 ཅིའ༌ཟེར༌ན༌ མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།"
ཤབ༌བད༌དི༌ ཞག༌ག༌ ནད༌པ༌ གྱལ༌ཅུག༌ག༌ ཛདས༌།
12:9 ནེ༌ 14
9 གཙོ༌བོ༌ ཡེ༌ཤུ༌ ཏེ༌ཀ༌ནེ༌ དུ༌ཁང༌ང༌ སྐྱོདས༌,
10 ཏེ༌རུ༌ ལག༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌། ཕ༌རུ༌ཤི༌པ༌གུན༌ནི༌ ཡེ༌ཤུའ༌ སྐྱོན༌ ཀལ༌ཅེས༌ལ༌ ཁོང༌གུན༌ནི༌ འི༌ ཏྲི༌ཝ༌བོ༌ ཏྲིས༌, "ཆོས༌ཁྲིམས༌ ནང༌ཞིན༌ ཤབ༌བད༌དི༌ ངལ༌ཚོའེ༌ ཞག༌ག༌ མི༌ཞིག༌ གྱལ༌ཅུག༌ན༌ གྲིག༌ཏེ༌ ཨིན༌ནོག༌ག༌?"
11 ཡེ༌ཤུའི༌ ཁོང༌གུན༌ལ༌ མོལས༌, "གལ༌ཏེས༌ ཁྱོ༌ཞའ༌ ཅིག༌གི༌ ལུག༌ཞིག༌ ཤབ༌བད༌དི༌ ཞག༌ག༌ ས༌དོང༌ངི༌ ནང༌ང༌ བུད༌ན༌, ཁྱོ༌ཞའེ༌ ལུག༌པོ༌ ཟུམས༌ཏེ༌ ཕིང༌ མི༌ ཕིང༌ང༌?
12 ལུག༌གི༌ སང༌ མི༌ མངས༌ཏེའང༌ རིན༌ཆེའ༌ མ༌ནོག༌ག༌། ཏེ༌བོའེ༌ཕིའ༌ ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌།"
13 ཏེ༌ནེ༌ ཡེ༌ཤུའི༌ ལག༌པ༌ ཁོངས༌ཁན༌བོའ༌ མོལས༌, "ལག༌པ༌ རྐྱོང༌" ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌ཏེ༌ ཞན༌ ལག༌པ༌བོ༌ ཙོགས༌ ཤེད༌ཅན༌ གྱུར༌།
14 ཨིན༌ནའང༌ ཕ༌རུ༌ཤི༌པ༌གུན༌ ཕི༌ལོག༌ག༌ སོང༌ཏེ༌, ཡེ༌ཤུ༌ སད༌ཅེས༌སི༌ ཐབས༌ ངན༌པ༌ ལྡིངས༌།
དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཞབ༌སྟོག༌པ༌།
12:15 ནེ༌ 21
15 གཙོ༌བོ༌ ཡེ༌ཤུའི༌ ཁོང༌གུན༌ནི༌ ཐབས༌ལྡིང༌ཁན༌བོ༌ ཁྱེན༌ པ༌སང༌, ཏེ༌ཀ༌ནེ༌ སྐྱོདས༌། མི༌ཚོགས༌ ཆེན༌མོ༌ཞིག༌ ཁོང༌ང༌ བྲངས༌ཏེ༌ ཡོངས༌, ཡང༌ ཏེ༌ ཕྲོའ༌ ཡོད༌ཁན༌ནི༌ ནད༌པ༌ ཚང༌མ༌ ཁོང༌ངི༌ གྱལ༌ཅུག༌ག༌ ཛདས༌།
16 ཁོང༌ངི༌ གྱལ༌ཅུག༌ཁན༌གུན༌ལ༌ ཁོང༌ངི༌ ཛད༌ཁན༌བོ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
17 ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ མོལ༌ཁན༌ ཚང༌མ༌ གྲུབ༌ ཅུག༌ག༌ ཛད༌ཅེས༌ལ༌ ཁོང༌ངི༌ ཏེ༌ཟུག༌ ཅོའ༌ ཛདས༌།
18 དཀོན༌མཆོག༌གི༌ མོལས༌,
"ངའེ༌ ལྡམས༌ཁན༌ནི༌ ཞབ༌སྟོག༌པ༌ ལྟོས༌,
ཚང༌མའེ༌སང༌ མང༌ང༌ ཁོའ༌ ངའེ༌ ཅེས༌པ༌ ཅོའད༌,
ཡང༌ ཁོའེ༌ ང༌ ཐད༌པོ༌ ཆ༌ཅུག༌དུག༌།
ཁོའ༌ ངའེ༌ ང༌རང༌ངི༌ ཐུག༌ཉིད༌ ཏང༌ཨིན༌།
སྡིག༌ཅན༌གུན༌ལ༌ ཆད༌པ༌ ཡང༌ དྲང༌པོ༌གུན༌ལ༌
སོལ༌རས༌ ཐོབ༌ཅེས༌, ཁོའེ༌ གྱལ༌ཁམས༌གུན༌ལ༌ ཤད༌ད༌ ཛད༌ཨིན༌།
19 ཁོའེ༌ ཛིང༌མོ༌ ཡ༌ ཀུ༌ཅོ༌ མི༌ཏང༌,
ཁྲོམས༌སི༌ ནང༌ང༌ སུ༌ཞིག༌གིའང༌ ཁོའེ༌ ཀུ༌ཅོའེ༌ སྐད༌ མི༌ཚོར༌།
20 ཁོའེ༌ ན༌ཁན༌ནི༌ ལྡམ༌བུ༌ མི༌ཅག༌ ཡ༌ ཤི༌ཀྱི༌ ཡོད༌ཁན༌ནི༌ འོད༌ མི༌སད༌
ཏེན༌ན༌ ཙོགས༌ལ༌ ཁོའེ༌ ཏད༌པའེ༌ ནང༌ང༌ ཉམ༌ཤུང༌གུན༌ལ༌
དྲང༌པོ༌ ཁྲིམས༌ཅད༌དི༌ གྱལ༌ཁའ༌ ཁྱོང༌ཁྱོང༌ཚོག༌པ༌ སྐྱོབ༌ཏེ༌ བོར༌ར༌ ཛད༌ཨིན༌།
21 གྱལ༌ཁམས༌གུན༌ནི༌ ཁོའེ༌ཀ༌ ཨིད༌ཤེས༌ ཅོས༌ཏེ༌
ཁོང༌གུན༌ སྐྱོབ༌ཅེས༌སི༌ རེ༌ཝ༌ བོར༌ཨིན༌།
ཡེ༌ཤུའི༌ གྱབ༌གལ༌ལ༌ སྤེ༌ར༌ ངན༌པ༌ ཟེར༌ཁན༌།
12:22 ནེ༌ 37
22 ཏེ༌ནེ༌ མི༌ ཁ༌ཅིག༌གི༌ རྡུད༌ ཞུགས༌ཁན༌, ཧན༌གྲང༌ དང༌ ཞ༌ར༌ ཡོད༌ཁན༌ནི༌ མི༌ཞིག༌ གཙོ༌བོ༌ ཡེ༌ཤུ༌ ཡོད༌ས༌ ཁྱོངས༌། ཁོའ༌ སྤེ༌ར༌ ཏང༌ཅུག༌ཅེས༌ དང༌ ཐོང༌ཅུག༌ཅེས༌སི༌ ཐུགས༌དོད༌ ཡེ༌ཤུའ༌ ཡོད༌ པ༌སང༌ ཁོང༌ངི༌ ཁོ༌ ཕན༌ཅུག༌ག༌ ཛདས༌།
23 མི༌ཚང༌མ༌ ཧ༌ལས༌ཏེ༌ ཟེརས༌, "འི༌ མི༌བོ༌ གྱལ༌པོ༌ དཱ༌བིད༌དི༌ པུར༌གྱུད༌ མན༌ན༌ཧེ༌ ཀ༌བོའ༌ ང༌དང༌གུན༌ སྲུངས༌ཏེ༌ ཡོད༌?"
24 ཨིན༌ནའང༌ ཕ༌རུ༌ཤི༌པ༌གུན༌ནི༌ ཏེ༌བོ༌ ཚོར༌ར༌ཅིག༌ ཟེརས༌, "བེལ༌ཟེ༌བུལ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།"
25 ཁོང༌གུན༌ནི༌ སམ༌བ༌ ངན༌པ༌བོ༌ ཡེ༌ཤུའི༌ ཁྱེན༌ཏེ༌ མོལས༌, "གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ མེད༌ཁན༌ ཆེན༌, ཡང༌ གྱལ༌ས༌ ཡ༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཏེ༌གུན༌ མེད༌ཁན༌ ཆེན༌།
26 གལ༌ཏེས༌ ཤེ༌ཏན༌ནི༌ ཤེ༌ཏན༌ ཕིང༌ན༌, ཁོའེ༌ ཁོ༌རང༌ངི༌ གྱབ༌གལ༌ལ༌ ནོལ༌ཏེ༌ ཨིན༌ནོག༌, ཏེ༌ནེ༌ ཁོའེ༌ གྱལ༌སྲིད༌པོ༌ ཀ༌ཟུག༌གི༌ ལུས༌ཨིན༌?
27 ཡང༌ གལ༌ཏེས༌ ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ ལོབ༌ཕྲུགས༌གུན༌ནི༌ སུ༌ གྱུད༌ཏེ༌ རྡུད༌གུན༌ ཕིང༌ང༌ནོག༌? ཏེ༌བོའེ༌ཕིའ༌ ཁོང༌གུན༌ནི༌ ཁྱོ༌ཞའེ༌ ཟེར༌ཁན༌བོའ༌ སྐྱོན༌རྗོད༌ ཅོ༌ཨིན༌།
28 ཨིན༌ནའང༌ གལ༌ཏེས༌ ངའེ༌ དཀོན༌མཆོག༌གི༌ ཐུག༌ཉིད༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ཀ༌ ནམ༌ཁའེ༌ གྱལ༌སྲིད༌ ལེབ༌ ཚར༌ཏེ༌ ཨིན༌།
29 སུའང༌ མི༌ ཤེད༌ཅན༌ཞིག༌གི༌ ཁང༌པའེ༌ ནང༌ང༌ ཞུགས༌ཏེ༌ ཁོའེ༌ ནོར༌ རྐུ༌ མི༌ཉན༌ ནམ༌ཚོག༌པ༌ ཁོའེ༌ སྔུན༌ལ༌ མི༌ ཤེད༌ཅན༌བོ༌ ལྡམ༌ མི༌ལྡམ༌, ཏེ༌ནེ༌ ཁོའེ༌ ཁང༌པའེ༌ ནང༌ང༌ ཡོད༌ཁན༌ནི༌ ནོར༌གུན༌ རྐུ༌ཉན༌ཨིན༌།"
30 "ངའེ༌ ཆོགས༌ལ༌ མན༌ཁན༌གུན༌ནི༌ ངའ༌ གྱབ༌གལ༌ལ༌ ཅོའ༌ནོག༌, ཡང༌ ང༌ ཉམ༌པོ༌ ལས༌ ཅོས༌ཏེ༌ བྲས༌བུ༌ མ༌ལྡུམ༌ཁན༌གུན༌ནི༌, ངའེ༌ ལས༌སི༌ བྲས༌བུ༌ ཡན༌ཅུག༌ག༌ནོག༌།
31 ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, མི༌གུན༌ནི༌ སྡིག༌པ༌ ཅོ༌ཁན༌ དང༌ དཀོན༌མཆོག༌ག༌ དད༌ལོག༌ ཞུ༌ཁན༌ ཚང༌མ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ དམ༌པའེ༌ ཐུག༌ཉིད༌ལ༌ དད༌ལོག༌ ཞུ༌ཁན༌གུན༌ལ༌ ཤགས༌པ༌ མ༌ནེ༌ སལ༌ལ༌ མི༌ཛད༌
32 ཡང༌ མི༌རིགས༌སི༌བུའི༌ གྱབ༌གལ༌ལ༌ ཟེར༌ཁན༌གུན༌ལ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ དམ༌པའེ༌ ཐུག༌ཉིད༌དི༌ གྱབ༌གལ༌ལ༌ ཟེར༌ཁན༌གུན༌ལ༌ འི༌ མི༌ཚེའེ༌ མ༌ཚད༌ ཡོང༌ཅེས༌ཅན༌ནི༌ མི༌ཚེའེ༌ ནང༌ངའང༌ ཤགས༌པ༌ མ༌ནེ༌ མི༌སལ༌།"
33 "ལྕང༌མ༌ ཟང༌པོ༌ ཨིན༌ན༌ ཏེ༌བོའ༌ ཁ༌ཟས༌ ཟང༌པོ༌ ཆགས༌ཨིན༌, ཡ༌ ལྕང༌མ༌ ངན༌པ༌ ཨིན༌ན༌ ཏེ༌བོའ༌ ཁ༌ཟས༌ ངན༌པ༌ ཆགས༌ཨིན༌། ལྕང༌མ༌ ཏེ༌བོའེ༌ བྲས༌བུའི༌ ཀ༌ནེ༌ ཤེས༌ས༌ནོག༌།
34 ཁྱོ༌རང༌ ཕ༌རུ༌ཤི༌པ༌, ཏུག༌རུལ༌ལི༌ ཕྲུ༌གུ༌གུན༌, ཁྱོ༌ཞ༌ ངན༌པ༌ ཨིན༌ཨིན༌ཞིག༌ ཀ༌ཟུག༌གི༌ སྤེ༌ར༌ ཟང༌པོ༌ ཏང༌ཨིན༌? སྙིང༌ གངས༌ཏེ༌ ལུད༌ཁན༌བོ༌ ཁའ༌ནེ༌ བིང༌ང༌ནོག༌།
35 མི༌ ཟང༌པོའེ༌ སེམས༌ ཟང༌པོའེ༌ བང༌ཛོད༌ནེ༌ བྲས༌བུ༌ ཟང༌པོ༌ སྨིན༌ན༌ནོག༌, ཡང༌ མི༌ ངན༌པའེ༌ སེམས༌ ངན༌པའེ༌ བང༌ཛོད༌ནེ༌ བྲས༌བུ༌ ངན༌པ༌ སྨིན༌ན༌ནོག༌།
36 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ཁྱོ༌ཞའེ༌ སྣང༌མེད༌ ཅོས༌ཏེ༌ སྤེ༌ར༌ ཟེར༌ཁན༌ རེ༌རེ༌ ཏོན༌ དཀོན༌མཆོག༌གི༌ སྐུན༌དུན༌ལ༌ ཤད༌གོས༌ཨིན༌།
37 ཅིའ༌ཟེར༌ན༌ ཁྱོ༌ཞའེ༌ སྤེ༌ར༌ ཟེར༌ཁན༌གུན༌ནི༌ ཁྱོ༌ཞའ༌ ནོངས༌མེད༌ ཡ༌ ནོངས༌ཅན༌ ཡོད༌ཁན༌བོ༌ ལྟན༌ཨིན༌།"
ལུང༌སྟོན༌པ༌ ཡོ༌ནཱའེ༌ སྟགས༌།
12:38 ནེ༌ 45
38 ཏེ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, "ལོབ༌པོན༌ལེ༌, ང༌ཞའ༌ ཉེ༌རང༌ངི༌ ཀ༌ནེ༌ ནམ༌ཁའ༌ནེ༌ སྟགས༌ཤིག༌ ལྟ༌ཉིན༌རག༌, ཀ༌བོའེ༌ ཉེ༌རང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཨིན༌།"
39 ཁོང༌ངི༌ ཁོང༌གུན༌ལ༌ ལན༌སལས༌, "མི༌རབས༌ ངན༌པ༌ དང༌ དཀོན༌མཆོག༌ག༌ ཨིད༌ཤེས༌ མེད༌ཁན༌གུན༌ནི༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌། ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཁོང༌གུན༌ལ༌ ཡང༌སྟགས༌ཤིག༌ མི༌ལྟན༌།
40 ཀ༌ཟུག༌གི༌ ལུང༌སྟོན༌པ༌ ཡོ༌ནཱ༌ ཉི༌མ༌ སུམ༌ དང༌ ཚན༌ སུམ༌ ཆུའི༌ སེམས༌ཅན༌ མ༌ ཆེན༌མོ༌ཞིག༌གི༌ གྲོད༌པའེ༌ ནང༌ང༌ ལུས༌ཁན༌ ཙོགས༌ལ༌ མི༌རིགས༌སི༌བུའང༌ ཉི༌མ༌ སུམ༌ དང༌ ཚན༌ སུམ༌ སའེ༌ ནང༌ང༌ ལུས༌ཨིན༌།"
41 "དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ནི༌ནེ༌ཝ༌པ༌གུན༌ནི༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ནཱའེ༌ ཆོས༌ཤད༌ཁན༌བོ༌ ཉན༌ཏེ༌, གྱོད༌པ༌ ཅོས༌, ལྟོས༌སའང༌ ཡོ༌ནཱ༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།
42 ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ལྷོ༌ ཆོགས༌སི༌ གྱལ༌མོའེ༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོ༌ གྱལ༌པོ༌ སོ༌ལོ༌མོན༌ནི༌ ཤེས༌རབས༌སི༌ སྤེ༌ར༌གུན༌ ཉན༌ན༌ལ༌ ས༌ཆ༌ མ༌ ཐག༌རིང༌ནེ༌ ཡོངས༌, ལྟོས༌སའང༌ སོ༌ལོ༌མོན༌ནི༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།"
43 "མི༌ཞིག༌གི༌ ནང༌ནེ༌ གོང༌པོ༌ བིང༌ཏེ༌ སྟིང༌ནེ༌, གོང༌པོའེ༌ ཆུ༌ མེད༌ས༌ རི༌སྟོང༌ངི༌ ནང༌ང༌ ཁོར༌ཨིན༌ ངལ༌ཚོས༌སེ༌ ནས༌ས༌ ཙལ༌ཏེའང༌ མ༌ཐོབ༌ པ༌སང༌,
44 ཁོའེ༌ ཁོ༌རང༌ང༌ ཟེར༌ར༌ནོག༌, 'ང༌ བིང༌ཏེ༌ ཡོང༌ཁན༌ནི༌ ཏེན༌ན༌ མིའི༌ ནང༌ང༌ ལོགས༌ཏེ༌ ཆེན༌།' ཏེ༌རུ༌ ལེབ༌བ༌ཅིག༌, ཏེ༌ ནས༌ས༌བོ༌ སྟོང༌པ༌ དང༌ ལག༌མོ༌ ལྡུས༌ཏེ༌ ཅི༌ཚང༌མ༌ རང༌རང༌ངི༌ མལ༌ལ༌ བོར༌ཏེ༌ ཐོང༌།
45 ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ སང༌ མང༌ང༌ ངན༌པ༌ ཞན༌ གོང༌པོ༌ རྡུན༌ ཁོ༌རང༌ ཉམ༌པོ༌ ཁྲིད༌ཏེ༌ ཁྱོངས༌ ཡང༌ ཏེན༌ན༌ ནས༌སའེ༌ ནང༌ང༌ དུགས༌, ཏེ༌ནེ༌ ཏེ༌ མི༌བོའེ༌ ནས༌ལུག༌པོ༌ སྔུན༌ནི༌ སང༌ ཐུའ༌ སོང༌།
འི༌ མི༌རབས༌ ངན༌པ༌གུན༌ལའང༌ ཏེན༌ན༌ ཙོགས༌ ཇིགས༌ནང༌ཅན༌ནི༌ ནས༌ལུག༌ ཤར༌ཨིན༌།
གཙོ༌བོ༌ ཡེ༌ཤུའི༌ ཨ༌མ༌ དང༌ ནོ༌ གུན༌།
12:46 ནེ༌ 50
46 གཙོ༌བོ༌ ཡེ༌ཤུའི༌ མི༌ཚོགས༌ལ༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ཁོང༌ངི༌ ཨ༌མ༌ དང༌ ནོ༌གུན༌ ཡོངས༌ཏེ༌, ཁོང༌ང༌ སྤེ༌ར༌ ཏང༌ཅེས༌ལ༌ ཁོང༌གུན༌ ཁང༌པའེ༌ ཕི༌ལོག༌ག༌ སྲུངས༌ཏེ༌ དུགས༌།
47 མི༌ཞིག༌གི༌ ཁོང༌ང༌ ཟེརས༌, "ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ང༌ སྤེ༌ར༌ ཏང༌ཅེས༌ལ༌ ཕི༌ལོག༌ག༌ སྲུང༌ཏེ༌ དུག༌།"
48 ཡེ༌ཤུའི༌ ཁོའ༌ ལན༌སལས༌, "སུ༌ ཨིན༌ནོག༌ ངའེ༌ ཨ༌མ༌ དང༌ ནོ༌གུན༌།"
49 ལོབ༌ཕྲུགས༌གུན༌ ཆོགས༌ལ༌ ཛི༌གུ༌ ཙུགས༌ཏེ༌, "འི༌གུན༌ ངའེ༌ ཨ༌མ༌ དང༌ ནོ༌གུན༌ ཨིན༌།
50 ངའེ༌ ཡབ༌ དཀོན༌མཆོག༌ ནམ༌ཁའེ༌ ནང༌ང༌ ཞུགས༌ཏེ༌ ཡོད༌ཁན༌ནི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ ངའེ༌ ཨ༌མ༌ དང༌ མིང༌སྲིང༌ གུན༌ ཨིན༌།"