8
ཡེ༌ཤུའི༌ མི༌ སྟོང༌ ཞིའ༌ ཁར༌ཇི༌ སལ༌ལ༌ ཛདས༌།
8:1 ནེ༌ 10
1 ཧ༌ལམ༌ ཏེན༌ན༌ཏུས༌ཤིག༌ག༌ ཞན༌ཡང༌ མི༌ཚོགས༌ ཆེན༌མོ༌ཞིག༌ ཛོམས༌, མི༌གུན༌ལ༌ ཟ༌རྒྱུ༌ མེད༌པ༌, གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ བོད༌ད༌ ཛད༌ཏེ༌ མོལས༌,
2 "འི༌ མི༌གུན༌ ང༌ ཉམ༌པོ༌ དུགས༌ཏེ༌ ཞག༌མ༌ སུམ༌ སོང༌ ཡང༌ ཟའ༌ཅེས༌ལ༌ ཅའང༌ མེད༌ པ༌སང༌, ང༌ སྙིང༌རྗེའ༌ སྐྱེའ༌རག༌།
3 གལ༌ཏེས༌ ངའེ༌ ཁོང༌གུན༌ ཁང༌པ༌ སྟོག༌རིའ༌ ལམ༌ཅུག༌ན༌, ཁོང༌གུན༌ ལམ༌བར༌ལ༌ གོ༌ཡོང༌ ཁོར༌ཏེ༌ གྱེལ༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཕྲོའ༌ མ༌ ཐག༌རིང༌ནེ༌ ཡོངས༌ཁན༌ ཁ༌ཅིག༌གའང༌ ཡོད༌ཏེ༌ ཨིན༌ནོག༌།"
4 ཁོང༌ངི༌ ལོབ༌ཕྲུགས༌གུན༌ནི༌ ལན༌ཏངས༌, "ང༌དང༌ང༌ འི༌ མི༌གུན༌ལ༌ ཏང༌ཅེས༌སི༌ ཕིའ༌ ཏ༌གི༌ འི༌ རི༌སྟོང༌ངི༌ ནང༌ང༌ ཀ༌ནེ༌ ཐོབ༌ཨིན༌?"
5 ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, "ང༌དང༌ངི༌ ལག༌ག༌ ཏ༌གི༌ ཙམ༌ ཡོད༌།" ཁོང༌གུན༌ནི༌ ལན༌ཏངས༌, "ཏ༌གི༌ རྡུན༌ ཡོད༌ལེ༌།"
6 ཏེ༌ནེ༌ ཡེ༌ཤུའི༌ མི༌ཚོགས༌པོའ༌ སའེ༌ཀ༌ དུག༌ཅེས༌ལ༌ མོལས༌། ཁོང༌ངི༌ ཏ༌གི༌ རྡུན༌བོ༌ ནམས༌ས༌ ཛད༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཡང༌ ཏེ༌གུན༌ ཅགས༌ཏེ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལས༌, ཡང༌ ཁོང༌གུན༌ནི༌ མི༌ཚོགས༌ལ༌ བགོས༌ཏེ༌ ཏངས༌།
7 ཁོང༌གུན༌ནི༌ ལག༌ག༌ ཉ༌ ཆུ༌ངུན༌ ཁ༌ཅིག༌གའང༌ ཡོད༌པིན༌, ཡེ༌ཤུའི༌ ཏེ༌གུན༌ནི༌ ཕིའང༌ ཐུག༌རྗེ༌ཆེ༌ ཞུས༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ལ༌ བགོས༌ཏེ༌ ཏང༌ཅེས༌སི༌ ཕིའ༌ མོལ༌ལ༌ ཛདས༌།
8 ཁོང༌གུན༌ནི༌ ཚིམས༌ཚིམས༌ ཟོས༌། སྟིང༌ནེ༌ ལོབ༌ཕྲུགས༌གུན༌ནི༌ ལག༌མ༌ ལུས༌ཁན༌ནི༌ ཏ༌གི༌གུན༌ དུམས༌པ༌ པག༌ཙེ༌ ཆེན༌མོ༌ རྡུན༌ གང༌།
9 ཏེ༌ མི༌ཚོགས༌སི༌ ནང༌ང༌ མི༌ 4,000 ཟམ༌ཤིག༌ ཡོད༌པིན༌། མི༌གུན༌ ཁང༌པ༌ ལོགས༌ཏེ༌ ལམ༌ཅུག༌ག༌ ཛད༌ཏེ༌
10 ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ ཞོན༌ཏེ༌ དལ༌མ༌ནུ༌ཐ༌ ཡུལ༌ཇོངས༌ལ༌ སྐྱོདས༌།
ཕ༌རུ༌ཤི༌པ༌གུན༌ནི༌ ལྟས༌ ལྟན༌ཅེས༌ལ༌ ཟེརས༌།
8:11 ནེ༌ 13
11 ཕ༌རུ༌ཤི༌པ༌གུན༌ ཡོངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟས༌ཏེ༌ ཁོང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེར༌ཏེ༌ འུ༌ཙུག༌ ཏངས༌།
12 ཏེ༌བོ༌ སན༌ན༌ཅིག༌ ཁོང༌ངི༌ སྙིང༌ཤུགས༌ ཏངས༌ཏེ༌ མོལས༌, "ཅི༌ཕིའ༌ འི༌ མི༌རབས༌པོའེ༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌? ངའེ༌ ཁྱོ༌ཞའ༌ དེན༌བ༌ ཟེར༌རད༌, ངའེ༌ འི༌ མི༌རབས༌པོའ༌ ཏེ༌ཙོགས༌ སྟགས༌ཤིག༌ མ༌ནེ༌ མི༌ལྟན༌།"
13 ཏེ༌ནེ༌ ཁོང༌གུན༌ བོར༌ཏེ༌ ཁོང༌ ཚོའེ༌ འ༌ངོ༌ ཆོགས༌ལ༌ གྲུ༌ཟིང༌ངི༌ ནང༌ང༌ ཞོན༌ཏེ༌ སྐྱོད༌ད༌ ཛདས༌།
ཕ༌རུ༌ཤི༌པ༌གུན༌ དང༌ ཧེ༌རོ༌དཱའི༌ གྱབ༌གལ༌ལ༌ ཤང༌ སྐུལ༌ལ༌ ཛདས༌།
8:14 ནེ༌ 21
14 ལོབ༌ཕྲུགས༌གུན༌ལ༌ ཏ༌གི༌ ཁུར༌ར༌ལ༌ ཞེད༌, གྲུ༌ཟིང༌ངི༌ ནང༌ང༌ ཁོང༌གུན༌ནི༌ ལག༌ག༌ ཏ༌གི༌ ཅིག༌ མ༌ནེ༌ མེད༌པིན༌།
15 གཙོ༌བོ༌ ཡེ༌ཤུའི༌ ཁོང༌གུན༌ལ༌ སྤང༌པུད༌ད༌ ཛད༌ཏེ༌ མོལས༌, "ཕ༌རུ༌ཤི༌པ༌གུན༌ དང༌ ཧེ༌རོ༌དཱའི༌ སྐྱུར༌ནེ༌ ཤང༌ ཅོས༌།"
16 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, "ང༌དང༌ངི༌ ཏ༌གི༌ ཁུར༌ཏེ༌ མེད༌པ༌, ཁོང༌ངི༌ ཏེ༌བོ༌ མོལ༌ཏེ༌ ཨིན༌ནོག༌ག༌?"
17 ཡེ༌ཤུའི༌ ཏེ༌བོ༌ ཁྱེན༌ཏེ༌ ཏྲིའ༌ ཛདས༌, "ཏ༌གི༌ མེད༌ཁན༌ནི༌ སྐོར༌ལ༌ ཁྱོ༌ཞ༌གུན༌ནི༌ ཅིའ༌ སྤེ༌ར༌ ཏང༌ངད༌? ཏ༌རུང༌ངའང༌, ཁྱོ༌ཞ༌གུན༌ལ༌ མ༌ཐོང༌ང༌ ཡ༌ ཧ༌མ༌གོའ༌? ཁྱོ༌ཞ༌གུན༌ནི༌ སྙིང༌ ཏེ༌ཙམ༌ སྐྱོང༌པོ༌ ཨིན༌ན༌?
18 "ཁྱོ༌ཞ༌གུན༌ལ༌ མིག༌ ཡོད༌ཏེའང༌ ཐོང༌ཐུབ༌བ༌ མེ༌རག༌ག༌?, ནམ༌ཅོག༌ ཡོད༌ཏེའང༌, ཚོར༌ཐུབ༌བ༌ མེ༌རག༌ག༌? ཅི༌ ཁྱོ༌ཞ༌གུན༌ལ༌ ཅའང༌ ཨིད༌ཏུ༌ མེ༌རག༌ག༌?
19 ངའེ༌ ཏ༌གི༌ ལྔ༌ནེ༌ མི༌ སྟོང༌ལྔ༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌?"
ཁོང༌གུན༌ནི༌ ཟེརས༌, "ཅུག༌ཉིས༌ལེ༌།"
20 "ཡང༌ ཏ༌གི༌ རྡུན༌ནེ༌ མི༌ སྟོང༌ཞི༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌?
ཁོང༌གུན༌ནི༌ ཟེརས༌, "རྡུན༌ལེ༌།"
21 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, "ཏེ༌ནེ༌ ཏ༌རུང༌ངའང༌ ཁྱོ༌ཞ༌གུན༌ལ༌ ཧ༌གོའ༌ མེ༌རག༌ག༌?"
ཞ༌ར༌ཞིག༌ ཕན༌ཅུག༌ག༌ ཛདས༌།
8:22 ནེ༌ 26
22 ཁོང༌གུན༌ བེད༌སའི༌ད༌ གྲོང༌ཁྱེར༌ལ༌ ལེབ༌བ༌ཅིག༌, མི༌ ཁ༌ཅིག༌གི༌ ཞ༌ར༌ཞིག༌ ཡེ༌ཤུ༌ ཡོད༌ས༌ ཁྱོངས༌, ཡང༌ ཇུ༌ཇུ༌ ཞུ༌ཨིན༌ ཁོའ༌ ཆག༌ རྩེའ༌ ཛད༌ཅེས༌ལ༌ ཞུ༌ཝ༌ ཕུལས༌།
23 ཡེ༌ཤུའི༌ ཞ༌ར༌བོའ༌ ལག༌པ༌ ཐམས༌ཏེ༌ གྲོང༌ཁྱེར༌ནེ༌ ཕི༌ལོག༌ག༌ ཁྱེར༌ར༌ ཛདས༌། ཁོའེ༌ མིག༌གི༌ཀ༌ ཐུ༌མག༌ གྱབས༌ཏེ༌ ཁོང༌རང༌ངི༌ ཆག༌ ཁོའེ༌ཀ༌ བོར༌ཏེ༌ ཏྲིའ༌ ཛདས༌, "ཁྱོ༌རང༌ང༌ ཅི༌ཏོང༌ཤིག༌ ཐོང༌དུག༌ག༌?"
24 ཁོའེ༌ འ༌ངོ༌ འི༌ངོའ༌ ལྟས༌ ཡང༌ ཟེརས༌, "ངའ༌ མི༌གུན༌ ཐོང༌དུག༌ལེ༌, ཨིན༌ནའང༌ སལ༌པོ༌ མན༌པ༌, ལྕང༌མ༌ གྲུལ༌ཁན༌ ཙོགས༌རིག༌།"
25 ཡེ༌ཤུའི༌ ཡང༌སྐྱར༌ ཁོང༌རང༌ངི༌ ཆག༌ ཁོའེ༌ མིག༌གུན༌ནི༌ཀ༌ བོར༌ར༌ ཛདས༌། ཏེ༌ནེ༌ ཁོའེ༌ མིག༌གུན༌ བེ༌ཏེ༌ ཁོའ༌ ཐོང༌ཅེས༌སི༌ ཁྱུད༌པོ༌ ལོགས༌ཏེ༌ ཐོབ༌, ཡང༌ ཁོའ༌ ཅི༌ཚང༌མ༌ སལ༌པོ༌ ཅོས༌ཏེ༌ ཐོང༌།
26 ཁོ༌ ཁང༌པ༌ ལམ༌ཅུག༌ག༌ ཛད༌ཨིན༌ ཡེ༌ཤུའི༌ མོལས༌, "ཁྱོ༌རང༌ ལོགས༌ཏེ༌ ཆ༌ ཟ༌ནེ༌, གྲོང༌ཁྱེར༌རི༌ ནང༌ང༌ མ༌ཆ༌།"
ཡེ༌ཤུ༌ སུ༌ ཨིན༌ཁན༌བོ༌ པི༌ཏྲར༌རི༌ ཤདས༌།
8:27 ནེ༌ 30
27 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ གཱ༌ལིལ༌ལི༌ནེ༌ ཀཱེ༌སར༌རིའ༌ ཕི༌ལི༌པི༌ ཉེ༌ཁོར༌རི༌ གྲོང༌སེབ༌གུན༌ལ༌ སྐྱོདས༌། ཁོང༌གུན༌ སྐྱོད༌ ཟ༌ནེ༌ ལམ༌མ༌ ཁོང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, "མི༌གུན༌ནི༌ ང༌ སུ༌ ཨིན༌ནོག༌ ཟེར༌དུག༌?"
28 ཁོང༌གུན༌ནི༌ ལན༌ཏངས༌, "ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌, ཡང༌ ཞན༌མ༌གུན༌ནི༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ཅིག༌ ཞུགས༌ཏེ༌ ཨིན༌ནོག༌ ཟེར༌དུག༌།"
29 ཏེ༌ནེ༌ ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, "ཨིན༌ནའང༌ ཁྱོ༌ཞའེ༌ ང༌ སུ༌ ཨིན༌ནོག༌ ཟེར༌རད༌?" པི༌ཏྲར༌རི༌ ལན༌ཏངས༌, "ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཞུགས༌ཏེ༌ ཨིན༌ནོག༌།"
30 ཨིན༌ནའང༌ ཡེ༌ཤུའི༌ ཁོང༌གུན༌ལ༌ ཁོང༌ངི༌ སྐོར༌ལ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
ཡེ༌ཤུའི༌ ཁོང༌རང༌ ཀྲོང༌ཤེས༌སི༌ སྐོར༌ལ༌ ལུང༌སྟན༌ ཛདས༌།
8:31 ནེ༌ 9:1
31 ཏེ༌ནེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ མི༌རིགས༌སི༌བུའ༌ རྡུག༌ངལ༌ མང༌པོ༌ ཉོངས༌ཏེ༌ སད༌གོ༌ཤེས༌ ཡང༌ ཞག༌ སུམ༌མི༌ སྟིང༌ནེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ཅེས༌སི༌ སྐོར༌གུན༌ གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ ལབ༌ཅེས༌ གོ༌ཟུག༌ ཛདས༌།
32 ཏེ༌བོའེ༌ སྐོར༌ལ༌ ཁོང༌ངི༌ སལ༌པོ༌ ཅོས༌ཏེ༌ ཤད༌ད༌ ཛད༌པ༌, པི༌ཏྲར༌རི༌ ཁོང༌ སོ༌སོའ༌ ཁྱེར༌ཏེ༌ ཁའ༌སྐྱེས༌།
33 ཨིན༌ནའང༌ ཡེ༌ཤུ༌ གྱུར༌ར༌ ཛད༌ཏེ༌ ལོབ༌ཕྲུགས༌གུན༌ལ༌ ཟིགས༌ཨིན༌ པི༌ཏྲར༌ལ༌ ཁའ༌སྐྱེའ༌ ཛད༌ཨིན༌ མོལས༌, "ཤེ༌ཏན༌, ང༌ནེ༌ ཐག༌རིང༌ང༌ སོང༌། ཁྱོ༌རང༌ངི༌ སམ༌ཚུལ༌ དཀོན༌མཆོག༌གི༌ ཆོགས༌ནེ༌ མན༌པ༌, མིའི༌ ཆོགས༌ནེ༌ ཨིན༌ནོག༌།"
34 ཏེ༌ནེ༌ མི༌ཚོགས༌ དང༌ ལོབ༌ཕྲུགས༌གུན༌ལ༌ ཁོང༌ ཡོད༌ས༌ ཛོམ༌ཅེས༌ལ༌ བོད༌ད༌ ཛདས༌ ཡང༌ མོལས༌, "ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌།
35 རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ང༌ དང༌ གའ༌མོའེ༌ ནས༌ཚུལ༌ལི༌ ཏོན༌ལ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌།
36 མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ ཐའ༌མེད༌པའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌?
37 ཡ༌ ཏེ༌བོའེ༌ ཚབས༌ལ༌ མི༌ཞིག༌གི༌ ཅི༌ ཏང༌ཉན༌ཨིན༌?
38 འི༌ མི༌རབས༌ དཀོན༌མཆོག༌གི༌ གྱབ༌ནེ༌ གྲུལ༌ཅེས༌ ཕངས༌ཁན༌ དང༌ སྡིག༌ཅན༌ གུན༌ནི༌ ཕྲོའ༌ གལ༌ཏེས༌ སུ༌ཞིག༌གི༌ ང༌ དང༌ ངའེ༌ ལབ༌ཞའེ༌ སྤང༌པོ༌ ཏང༌ཅེས༌ལ༌ ཁྲེལ༌བ༌ ཚོར༌ན༌, ང༌ མི༌རིགས༌སི༌བུ༌ ང༌རང༌ངི༌ ཡབ༌བི༌ ཟིར༌རྗིད༌དི༌ ནང༌ང༌ དམ༌པའེ༌ ཕོ༌ཉ༌གུན༌ ཉམ༌པོ༌ ལོགས༌ཏེ༌ ཡོང༌ ཟ༌ནེ༌, ངའང༌ ཁོའེ༌ཀ༌ ཁྲེལ༌བ༌ ཚོར༌ཨིན༌།"