6
ཡེ༌ཤུའ༌ རྩི༌ཝ༌ མ༌ཅོས༌།
6:1 ནེ༌ 6a
1 གཙོ༌བོ༌ ཡེ༌ཤུ༌ ཏེ༌ཀ༌ནེ༌ ལོབ༌ཕྲུགས༌གུན༌ ཉམ༌པོ༌ ཁོང༌རང༌ངི༌ གྲོང༌ཁྱེར༌ ན༌ཙ༌རེད༌ལ༌ སྐྱོདས༌།
2 ཤབ༌བད༌ ངལ༌ཚོའེ༌ ཞག༌ག༌, ཁོང༌ངི༌ དུ༌ཁང༌ངི༌ ནང༌ང༌ ལབ༌ཞ༌ སལ༌ཅེས༌ གོ༌ཟུག༌, ཡང༌ ཁོང༌ང༌ ཚོར༌ཁན༌ མང༌པོའེ༌ ཧ༌ལས༌ཏེ༌ ཏྲིས༌, "འི༌ མི༌བོའ༌ འི༌ ཚང༌མ༌ ཀ༌ནེ༌ ཐོབ༌ཀྱག༌? ཁོའ༌ འི༌ཙོགས༌ ཤེས༌རབས༌ སུའི༌ ཏངས༌ཀྱག༌? ཀ༌ཟུག༌གི༌ ཁོའེ༌ འི༌ཙོགས༌ ཧ༌ལས༌ཤེས༌སི༌ ཛད༌པ༌གུན༌ ལྟན༌ན༌ནོག༌?
3 ཁོ༌ ཤིང༌ཁན༌བོ༌ མ༌ནོག༌ག༌? ཁོ༌ མིར༌ཡམ༌མི༌ བུ༌ཚ༌ ཡང༌ ཡ༌ཀོབ༌, ཡོ༌སེབ༌, ཡུ༌དཱ༌ དང༌, ཤི༌མོན༌ གུན༌ནི༌ ཨ༌ཅོ༌ མ༌ནོག༌ག༌? ཁོའེ༌ སྲིང༌མོ༌གུན༌ འི༌ཀ༌ ང༌དང༌གུན༌ ཉམ༌པོ༌ མེད༌ད༌?" ཁོང༌གུན༌ ཚིག༌ཅེས༌པོའེ༌ ཁོང༌ངི༌ཀ༌ ཏད༌པ༌ མ༌ཅོས༌།
4 ཡེ༌ཤུའི༌ ཁོང༌གུན༌ལ༌ མོལས༌, "ལུང༌སྟོན༌པ༌ཞིག༌ག༌ ཁོ༌རང༌ངི༌ གྲོང༌ཁྱེར༌, ཉེན༌གྲུང༌ དང༌ ཁོ༌རང༌ངི༌ ནང༌ཚངས༌སི༌ ནང༌ང༌ མ༌ནེ༌, ཞན༌ ཀ༌རུང༌ས༌ རྩི༌ཝ༌ ཅོ༌རུག༌།
5 ཁོང༌གུན༌ནི༌ ཏད༌པ༌ མི༌ཅོ༌ཅེས༌པོའེ༌ ཞས༌ཏེ༌, ཁོང༌ངི༌ ཁོང༌གུན༌ནི༌ ཕྲོའ༌ ཟུ༌མོ༌ ཡོང༌ཁན༌ ཁ༌ཅིག༌གི༌ཀ༌ ཁོང༌རང༌ངི༌ ཆག༌ བོར༌ཏེ༌ ཕན༌ཅུག༌ག༌ ཛད༌ཅེས༌ མ༌སྟོགས༌, ཞན༌ཡང༌ ཅའང༌ ཧ༌ལས༌སི༌ ཛད༌པ༌ ལྟན༌ན༌ མ༌ཛདས༌།
6 ཡང༌ ཁོང༌གུན༌ནི༌ ཏད༌པ༌ མེད༌ཅེས༌པོ༌ ཟིགས༌ཏེ༌ ཁོང༌ ཧ༌ལས༌།
ཡེ༌ཤུའི༌ ཅུག༌ཉིས༌པོ༌ ལམ༌ཅུག༌ག༌ ཛདས༌།
6:6b ནེ༌ 13
ཏེ༌ནེ༌ ཡེ༌ཤུ༌ ལབ༌ཞ༌ སལ༌ལ༌ལ༌ གམ༌ཡུལ༌ ཅིག༌ནེ༌ ཅིག༌ག༌ སྐྱོདས༌།
7 ཁོང༌ངི༌ ལོབ༌ཕྲུགས༌ ཅུག༌ཉིས༌པོའ༌ བོད༌ད༌ ཛདས༌, ཡང༌ ཉིས༌ཉིས༌ ཅོས༌ཏེ༌ རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌ ཕིང༌ཅེས༌སི༌ ཝང༌ཆ༌ སལ༌ལ༌ ཛད༌ཏེ༌ ཁོང༌གུན༌ ལམ༌ཅུག༌ག༌ ཛདས༌།
8 ཁོང༌ངི༌ ཁོང༌གུན༌ལ༌ ལབ༌ཞའ༌ སལ༌ཏེ༌ མོལས༌, "ཁྱོ༌རང༌གུན༌ནི༌ བེས༌སི༌ ཕིའ༌ གྲུལ༌ཅེས༌སི༌ བེར༌ཀ༌ མ༌སྟོགས༌, ཁར༌ཇི༌, ཇོ༌ལ༌ དང༌ ཁོ༌མགས༌སི༌ ནང༌ང༌ པེ༌ནེ༌ མ༌ཁུར༌།
9 པ༌བུ༌ གོན༌ ཨིན༌ནའང༌ ཀོས༌ལག༌ སྤོ༌ཅེས༌ མ༌ཁུར༌།"
10 "ཁྱོ༌ཞའ༌ དུག༌ས༌ ཏང༌ཁན༌ནི༌ ཏེན༌ན༌ ཁང༌པའེ༌ ནང༌ང༌ དུག༌ ནམ༌ ཚོག༌པ༌ ཏེ༌ གྲོང༌ཁྱེར༌ནེ༌ བིང༌ཏེ༌ མི༌ཆའ༌།
11 གལ༌ཏེས༌ གྲོང༌ཁྱེར༌ཞིག༌གི༌ ནང༌ང༌ སུ༌ཞིག༌གིའང༌ ཁྱོ༌ཞའ༌ གའ༌སུས༌ མ༌ཅོ༌ན༌, ཡ༌ ཁྱོ༌ཞའེ༌ ཟེར༌ཁན༌བོའ༌ མ༌ཉན༌ན༌, ཏེ༌ནེ༌ བིང༌ཏེ༌ ཆ༌ ཟ༌ནེ༌, རང༌ངི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ སྟོན༌།"
12 ཏེ༌ནེ༌ ཁོང༌གུན༌ སྐྱོད༌ཏེ༌ མི༌གུན༌ལ༌ སྡིག༌པའེ༌ ཀ༌ནེ༌ གྱོད༌པ༌ ཅོས༌ཏེ༌ དཀོན༌མཆོག༌གི༌ ཆོགས༌ལ༌ སེམས༌ གྱུར༌ཅེས༌ལ༌ ཆོས༌ཤདས༌།
13 ཁོང༌གུན༌ནི༌ རྡུད༌ མང༌པོ༌ ཕིངས༌ཏེ༌ ཟུ༌མོ༌ ཡོང༌ཁན༌ མང༌པོ༌ཞིག༌ག༌ ཨོ༌ལིཝ༌ཝི༌ མར༌ སྐུས༌ཏེ༌ ཕན༌ཅུགས༌།
ཁྲུས༌སལ༌ཁན༌ ཡོ༌ཧཱ༌ནན༌ ཀྲོངས༌།
6:14 ནེ༌ 29
14 གཙོ༌བོ༌ ཡེ༌ཤུའི༌ ཚན༌ མིང༌ཅན༌ གྱུར༌ཅེས༌པོའེ༌ གྱལ༌པོ༌ ཧེ༌རོ༌དཱའི༌ ཁོང༌ངི༌ སྐོར༌ལ༌ ཚོར༌། ཁ༌ཅིག༌གི༌ ཟེར༌རད༌པིན༌, "ཁྲུས༌སལ༌ཁན༌ ཡོ༌ཧཱ༌ནན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌ ཁོང༌ང༌ ཛད༌པ༌ ལྟན༌ཅེས༌སི༌ ཁྱུད༌ ཡོད༌ཏེ༌ ཨིན༌ནོག༌།"
15 ཞན༌གུན༌ནི༌ ཟེརས༌, "ཁོང༌ ནི༌ ལུང༌སྟོན༌པ༌ ཨེ༌ལི༌ཡཱ༌ ཨིན༌ནོག༌།" ཡང༌ ཞན༌གུན༌ནི༌, "སྔུན༌མའེ༌ ལུང༌སྟོན༌པ༌ ཙོགས༌ལ༌ ཁོང༌ ལུང༌སྟོན༌པ༌ཞིག༌ ཨིན༌ནོག༌།"
16 ཏེ༌གུན༌ ཚོར༌ར༌ཅིག༌, ཧེ༌རོ༌དཱའི༌ ཟེརས༌, "ངའེ༌ གོ༌ ཅད༌ཅུག༌ཁན༌ནི༌ ཡོ༌ཧཱ༌ནན༌, ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌ནོག༌།"
17 ཧེ༌རོ༌དཱའི༌ ཡོ༌ཧཱ༌ནན༌ ཟུམས༌ཏེ༌ ལྕག༌ཐག༌ག༌ ཏགས༌ཏེ༌ ཙོན༌ཁང༌ང༌ ཀག༌ཅེས༌ལ༌ བཀའ༌ ཏངས༌ཏེ༌ ཨིན༌པིན༌། ཁོའེ༌ ཏེ༌བོ༌ ཁོ༌རང༌ངི༌ ཨ༌ཅོ༌ ཕི༌ལིབ༌བི༌ ན༌མ༌ ཧེ༌རོ༌དཱིས༌སི༌ ཕིའ༌ ཅོས༌, ཧེ༌རོ༌དཱའི༌ ཁོ༌ ཉམ༌པོ༌ ན༌མ༌ ཅོས༌ཏེ༌ ཨིན༌པིན༌།
18 ཡོ༌ཧཱ༌ནན༌ནི༌ ཧེ༌རོ༌དཱ༌ལ༌ མོལ༌ལད༌པིན༌, "ཁྱོ༌རང༌ངི༌ ཨ༌ཅོའེ༌ ན༌མ༌ ཉམ༌པོ༌ ན༌མ༌ ཅོ༌ཅེས༌པོ༌ དཀོན༌མཆོག༌གི༌ ཁྲིམས༌སི༌ གྱབ༌གལ༌ ཨིན༌ནོག༌།"
19 ཧེ༌རོ༌དཱིས༌སི༌ ཡོ༌ཧཱ༌ནན༌ལ༌ ནཕ༌རད༌ ཅོས༌ཏེ༌ ཁོང༌ སད༌ཉིན༌ ཡོད༌པིན༌, ཨིན༌ནའང༌ ཁོའ༌ ཅའང༌ ཅོ༌ མ༌ཉན༌,
20 ཅིའ༌ཟེར༌ན༌ ཧེ༌རོ༌དཱའི༌ ཡོ༌ཧཱ༌ནན༌ མི༌ ཟང༌པོ༌ དང༌ དམ༌པ༌ ཨིན༌ཁན༌བོ༌ ཤེས༌པ༌, རྩི༌ཝ༌ དང༌ ཇིགས༌སི༌ ནང༌ང༌ ཁོང༌ སྐྱོབས༌ཏེ༌ བོརས༌། ཡོ༌ཧཱ༌ནན༌ནི༌ མོལ༌ཁན༌གུན༌ ཉན༌ ཟ༌ནེ༌, གྱལ༌པོ༌ ཧེ༌རོ༌དཱ༌ལ༌ སེམས༌སི༌ ནང༌ང༌ མི༌དེ༌ཅེས༌ ཡོང༌ནའང༌ ཁོ༌ ཡོ༌ཧཱ༌ནན༌ནི༌ མོལ༌ཁན༌གུན༌ ཉན༌ཅེས༌ལ༌ ཐད༌དད༌པིན༌།
21 ཨིན༌ནའང༌ གྱལ༌པོ༌ ཧེ༌རོ༌དཱའི༌ སྐྱེ༌ཞག༌གི༌ ཞག༌ག༌ ཧེ༌རོ༌དཱིས༌ལ༌ སྐབས༌ ཐོབ༌། ཏེ༌ ཞག༌ག༌ ཧེ༌རོ༌དཱའི༌ ཁོ༌རང༌ངི༌ ལས༌མི༌ འུ༌སྐྱོང༌, མག༌མི༌ སྤོན༌བོ༌གུན༌ དང༌, གཱ༌ལིལ༌ལིའི༌ སྤོན༌བོ༌གུན༌ གྲོན༌ལ༌ བོད༌ཏེ༌ ཡོད༌པིན༌།
22 ཧེ༌རོ༌དཱིས༌སི༌ བུ༌མོ༌ ཡོངས༌ཏེ༌ རྩེས༌ མ༌ ལྡེ༌མོ༌ ཏངས༌པ༌, ཧེ༌རོ༌དཱ༌ དང༌ ཁོང༌ངི༌ གྲོན༌པོ༌གུན༌ སྲན༌ཏྲེ༌ ཐད༌། གྱལ༌པོའེ༌ བུ༌མོ༌བོའ༌ ཟེརས༌, "ཁྱོ༌རང༌ང༌ དོད༌པ༌ ཡོད༌ཁན༌བོ༌ ངའ༌ ཤོད༌, ཡང༌ ངའེ༌ ཏེ༌བོ༌ ཁྱོ༌རང༌ང༌ ཏང༌ཨིན༌།"
23 ཁོའེ༌ ནའ༌ ཁུར༌ཏེ༌ ཟེརས༌, "ཁྱོ༌རང༌ངི༌ ཅི༌ཞིག༌ ཏོང༌ ཟེར༌ནའང༌, ངའེ༌ ཏང༌ཨིན༌, ངའེ༌ གྱལ༌སྲིད༌དི༌ ཕེད༌པོའང༌།"
24 ཁོ༌ ཕི༌ལོག༌ག༌ སོང༌ཏེ༌ ཁོ༌རང༌ངི༌ ཨ༌མ༌ ཏྲིས༌, "ངའེ༌ ཅི༌ ཏོང༌ ཟེར༌།" ཨ༌མའེ༌ ཁོའ༌ ཟེརས༌, "ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཏོང༌ ཟེར༌།"
25 ཏེན༌ན༌མལ༌ལ༌ བུ༌མོ༌ གྱལ༌པོ༌ ཡོད༌ས༌ གྱོགས༌པ༌ སོང༌ཏེ༌ ཟེརས༌, "དག༌ས༌རང༌ ངའ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཐལ༌ལི༌ཞིག༌གི༌ཀ༌ གོས༌སད༌།"
26 གྱལ༌པོ༌ མ༌སྲན༌ཏྲེ༌ ཚེར༌ ཨིན༌ནའང༌ གྲོན༌པོ༌གུན༌ནི༌ དུན༌ལ༌ ནའ༌ ཁུར༌ཁན༌བོའེ༌ ཞས༌ཏེ༌, ཁོའེ༌ བུ༌མོའ༌ མན༌ ཟེར༌ མ༌ཉན༌།
27 ཏེ༌ནེ༌ ཁོའེ༌ ཏེན༌ན༌མལ༌ལ༌ མི༌ སད༌ཅེས༌སི༌ ལས༌ ཅོ༌ཁན༌ནི༌ མི༌བོ༌ ཙོན༌ཁང༌ང༌ ཡོ༌ཧཱ༌ནན༌ནི༌ གོ༌ ཁྱོང༌ཅེས༌ལ༌ ལམ༌ཅུགས༌། ཁོ༌ སོང༌ཏེ༌ ཙོན༌ཁང༌ངི༌ ནང༌ང༌ ཡོ༌ཧཱ༌ནན༌ནི༌ གོ༌ ཅདས༌།
28 ཁོའེ༌ ཁོང༌ངི༌ གོ༌བོ༌ ཐལ༌ལི༌ཞིག༌གི༌ཀ༌ ཁྱོངས༌ཏེ༌, བུ༌མོ༌བོའ༌ ཏངས༌, ཏེ༌ནེ༌ ཁོའེ༌ ཁོ༌རང༌ངི༌ ཨ༌མ༌ ཏངས༌།
29 ཏེ༌བོ༌ ཚོར༌ར༌ཅིག༌, ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ཡོངས༌ཏེ༌ ཁོང༌ངི༌ སྤུར༌བོ༌ ཁྱེར༌ཏེ༌ སྤུར༌ཁང༌ངི༌ ནང༌ང༌ བོརས༌།
ཡེ༌ཤུའི༌ མི༌ སྟོང༌ལྔ༌ ཟའ༌ཅེས༌ སལ༌ལ༌ ཛདས༌།
6:30 ནེ༌ 44
30 སྐུ༌ཚབས༌གུན༌ གཙོ༌བོ༌ ཡེ༌ཤུ༌ ཡོད༌ས༌ ལོགས༌ཏེ༌ ཡོངས༌, ཡང༌ ཁོང༌གུན༌ནི༌ ཅོས༌ཁན༌ དང༌ ལབ༌ཁན༌ ཚང༌མའེ༌ སྐོར༌ལ༌ ཤདས༌།
31 མི༌ མང༌པོ༌ ཆེན༌ ཡོང༌ཨིན༌ དུགས༌པ༌, ཡེ༌ཤུ༌ དང༌ ཁོང༌ངི༌ སྐུ༌ཚབས༌གུན༌ལ༌ ངལ༌ཚོས༌ཏེ༌ དོན༌ཏང༌ དོན༌ཅེས༌སི༌ ཏུས༌ མ༌ཐོབ༌། ཏེ༌བོའེ༌ཕིའ༌ ཡེ༌ཤུའི༌ མོལས༌, "ཡོང༌ཤིག༌ ང༌དང༌རང༌ སུའང༌ མེད༌སའེ༌ ནས༌ས༌ཞིག༌ག༌ སོང༌ཏེ༌ ངལ༌ཚོ༌ ཨིན༌།"
32 ཏེ༌ནེ༌ ཁོང༌གུན༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ སྐྱོདས༌།
33 ཨིན༌ནའང༌ མི༌ མང༌པོ༌ཞིག༌གི༌ ཁོང༌གུན༌ ཏེ༌ཀ༌ནེ༌ སྐྱོད༌ད༌ལ༌ ཐོང༌ ཡང༌ ངོ༌ཤེས༌། གྱ༌ཚོའེ༌ ཐའ༌མ༌ ཡོད༌ཁན༌ནི༌ གྲོང༌ཁྱེར༌ ཚང༌མ༌ནེ༌ མི༌གུན༌ བང༌ཏང༌ཨིན༌ སོང༌ཏེ༌ ཁོང༌གུན༌ནི༌ སང༌ སྔུན༌ལ༌ ཏེ༌ ནས༌སའེ༌ཀ༌ ལེབ༌།
34 གྲུ༌ཟིང༌ནེ༌ བབས༌ཏེ༌ ཡེ༌ཤུའི༌ མི༌ཚོགས༌ ཆེན༌མོ༌ ཟིགས༌ས༌ཅིག༌, ཁོང༌ང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛདས༌ ཅིའ༌ཟེར༌ན༌ ཁོང༌གུན༌ ལུག༌རྫི༌ མེད༌ཁན༌ནི༌ ལུག༌ ཙོགས༌ ཡོད༌པིན༌། ཡང༌ ཁོང༌ངི༌ ཁོང༌གུན༌ལ༌ ལབ༌ཞ༌ མང༌པོ༌ སལ༌ཅེས༌ གོ༌ཟུགས༌།
35 ཉི༌མ༌ གོར༌གོར༌ལ༌ ཡེ༌ཤུའི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཟེརས༌, "ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌ ཡང༌ མུན༌ཅུའང༌ རུབ༌ཀྱིས༌ དུག༌།
36 ཉེ༌ཁོར༌རི༌ ནས༌ས༌ དང༌ གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌།"
37 ཨིན༌ནའང༌ ཡེ༌ཤུའི༌ མོལས༌, "ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།"
ཁོང༌གུན༌ནི༌ ལན༌ཏངས༌, "འི༌ མི༌ཚང༌མ༌ ཁར༌ཇི༌ ཏང༌ཅེས༌སི༌ ཕིའ༌ ཟླ༌ཝ༌ 8 དི༌ ལ༌ཆ༌ དྲན༌དྲའེ༌ པེ༌ནེ༌ གོས༌སོག༌། ང༌ཞའ༌ སོང༌ཏེ༌ ཏེ༌ཟམ༌ཤིག༌གི༌ པེ༌ནེ༌ སྐྱགས༌ཏེ༌ ཁོང༌གུན༌ལ༌ ཁར༌ཇི༌ ཟའ༌ཅེས༌ ཉོའ༌?"
38 ཁོང༌ངི༌ ཏྲིའ༌ ཛདས༌, "ཁྱོ༌ཞའེ༌ ལག༌ག༌ ཏ༌གི༌ ཙམ༌ ཡོད༌། སོང༌ཏེ༌ ལྟོས༌?"
ཁོང༌གུན༌ སོང༌ཏེ༌ ལྟས༌ ཡང༌ ཟེརས༌, "ཏ༌གི༌ ལྔ༌ དང༌ ཉ༌ ཉིས༌ དུག༌ལེ༌།"
39 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ མི༌གུན༌ སྡེ༌སྡེ༌ ཅོས༌ཏེ༌ རྩཱ༌ སྔོན༌པོའེ༌ཀ༌ དུག༌ཅུག༌ཅེས༌སི༌ ཕིའ༌ མོལས༌།
40 མི༌གུན༌ 50 ཡ༌ 100 སྡེ༌ ཅོས༌ཏེ༌ སའེ༌ཀ༌ དུགས༌།
41 ཡེ༌ཤུའི༌ ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌། ཏེན༌ན༌ ཙོགས༌ལ༌ ཁོང༌ངི༌ ཉ༌བོའང༌ བགོས༌ཏེ༌ ཁོང༌ ཚང༌མ༌ལ༌ སལ༌ལ༌ ཛདས༌།
42 ཁོང༌ ཚང༌མ༌ གྲང༌གྲང༌ ཟོས༌
43 ཡང༌ ལོབ༌ཕྲུགས༌གུན༌ནི༌ ཏ༌གི༌ དང༌ ཉའེ༌ ལག༌ལུས༌གུན༌ ལྡུས༌པ༌ པག༌ཙེ༌ ཅུག༌ཉིས༌ གང༌།
44 ཏ༌གི༌ དང༌ ཉ༌ ཟའ༌ཁན༌གུན༌ནི༌ ཕྲོའ༌ ལྡན༌ཁན༌ནི༌ བུ༌ཚའ༌ སྟོང༌ལྔ༌ ཡོད༌པིན༌།
ཡེ༌ཤུའི༌ ཆུའི༌ ཁེ༌ཐོག༌ག༌ ཞབ༌གྲུལ༌ ཛདས༌།
6:45 ནེ༌ 56
45 ཏེན༌ན༌མལ༌ལ༌ གཙོ༌བོ༌ ཡེ༌ཤུའི༌ མི༌ཚོགས༌པོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ ཁོང༌རང༌ངི༌ སང༌ སྔུན༌ལ༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌ལ༌ བེད༌སེ༌དཱའེ༌ གྲོང༌ཁྱེར༌ལ༌ ལམ༌ཅུག༌ག༌ ཛདས༌།
46 མི༌ཚོགས༌ སོང༌ཚར༌ཏེ༌ སྟིང༌ནེ༌ ཁོང༌ རི༌ཀ༌ མོས༌ལམ༌ ཞུའ༌ སྐྱོདས༌།
47 མུན༌ཅུ༌རུབ༌བ༌ཅིག༌ ལོབ༌ཕྲུགས༌གུན༌ གྲུ༌ཟིང༌ངི༌ ནང༌ང༌ ཚོའེ༌ སྐྱིལ༌ལ༌, ཡང༌ ཡེ༌ཤུ༌ རི༌ཀ༌ ཅིག༌པོ༌ ཡོད༌པིན༌།
48 དུན༌ནེ༌ ལུངས༌པོ༌ ཀྲག༌པོ༌ ཡོངས༌པ༌ ཁོང༌གུན༌ལ༌ གྲུ༌ཟིང༌ སྲུལ༌ཅེས༌ལ༌ ནགས༌ མང༌པོ༌ ཐོང༌ཨིན༌ ཡོད༌ཁན༌བོ༌ ཡེ༌ཤུའི༌ ཟིགས༌། ཧ༌ལམ༌ ང༌ཏོག༌ ཆུ༌ཚོད༌ སུམ༌པ༌ཞིག༌གི༌ཀ༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ ཁོང༌གུན༌ནི༌ ཆོགས༌ལ༌ སྐྱོདས༌, ཡང༌ ཁོང༌གུན༌ནི༌ ཆོགས༌ནེ༌ སྐྱོད༌ཅེས༌ ཡོད༌པ༌
49 ཁོང༌གུན༌ནི༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ སྐྱོད༌ཨིན༌ ཐོང༌ང༌ཅིག༌, ཤིན༌དྲེ༌ ཨིན༌ནོག༌ སམས༌ཏེ༌ ཀུ༌ཅོ༌ ཏངས༌།
50 ཡེ༌ཤུ༌ ཐོང༌ང༌ཅིག༌, ཁོང༌ ཚང༌མ༌ མ༌སྲན༌ཏྲེ༌ ཇིགས༌། ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ མོལས༌, "ཇིགས༌ མ༌ཇིགས༌ ང༌ ཨིན༌, ཧམ༌པ༌ ཅོས༌།
51 ཏེ༌ནེ༌ ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛདས༌, ཡང༌ ལུངས༌པོ༌བོ༌ ཆད༌། ཁོང༌ ཚང༌མ༌ པད༌ ཧ༌ལས༌།
52 ཁོང༌གུན༌ལ༌ ཡེ༌ཤུའི༌ ཏ༌གི༌ ཉམ༌པོ༌ ཛད༌པ༌ ཛད༌ཁན༌བོ༌ ཐོང༌ཏེའང༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ ཏ༌རུང༌ངའང༌ ཧ༌མ༌གོའ༌, ཁོང༌ངི༌ སྙིང༌གུན༌ མ༌ སྐྱོང༌པོ༌ ཡོད༌པིན༌།
53 ཁོང༌གུན༌ ཚོའེ༌ འ༌ངོ༌ ཆོགས༌ལ༌ སྐྱོདས༌ ཡང༌ ཆུའི༌ ཐའ༌མ༌ གེ༌ནེ༌ས༌རེད༌དི༌ གྲོང༌ཁྱེར༌ལ༌ ལེབ༌བ༌ཅིག༌ གྲུ༌ཟིང༌བོ༌ ལྡམས༌།
54 གྲུ༌ཟིང༌ནེ༌ ཕི༌ལོག༌ག༌ བིང༌ང༌ཅིག༌, མི༌གུན༌ནི༌ ཡེ༌ཤུ༌ ཨིན༌ཁན༌བོ༌ ངོ༌ཤེས༌།
55 ཁོང༌གུན༌ ཡུལ༌ཇོངས༌ གང༌པོའེ༌ ནང༌ང༌ བང༌ཏང༌ཨིན༌ སོང༌ཏེ༌ ཟུ༌མོ༌ ཡོད༌ཁན༌གུན༌ མལ༌ཙའེ༌ཀ༌ ཁུར༌ཏེ༌ ཡེ༌ཤུ༌ ཞུགས༌ཏེ༌ དུག༌ ཟེརས༌སའེ༌ ནས༌སའེ༌ཀ༌ ཁྱོངས༌།
56 ཁོང༌ གམ༌ཡུལ༌, གྲོང༌ཁྱེར༌ ཡ༌ གྲོང༌སེབ༌ ཀ༌རུ༌ སྐྱོད༌ནའང༌ མི༌གུན༌ནི༌ ཟུ༌མོ༌ ཡོད༌ཁན༌གུན༌, ཁྲོམས༌སི༌ ནང༌ང༌ ཕི༌ལོག༌ག༌ ཕིངས༌ཏེ༌ ཁྱོངས༌། ཁོང༌གུན༌ནི༌ ཟུ༌མོ༌ ཡོད༌ཁན༌གུན༌ལ༌ ཡེ༌ཤུའི༌ ནམ༌ཟའེ༌ ཀྲུ༌ཞིག༌ག༌ ལག༌པ༌ རྩེ༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཡང༌ ཁོང༌ངི༌ ནམ༌ཟའ༌ ལག༌པ༌ རྩེ༌ཁན༌ ཚང༌མ༌ ཕན༌།