13
ཐའ༌མའེ༌ ཏུས༌སི༌ སྟགས༌གུན༌།
13:1 ནེ༌ 37
1 གཙོ༌བོ༌ ཡེ༌ཤུ༌ ཆོད༌ཁང༌ནེ༌ བིང༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌ ཅིག༌གི༌ ཟེརས༌, "ལོབ༌པོན༌ལེ༌ འི༌ ཧ༌ལས༌ཤེས༌སི༌ ཆོད༌ཁང༌ང༌ ཟིགས༌སའང༌, ཙམ༌ཤིག༌གི༌ ཆེན༌མོ༌ རྡོའ༌གུན༌ རྩིག༌ཅེས༌ལ༌ ཀོལ༌ཏེ༌ ཨིན༌ནོག༌།"
2 ཡེ༌ཤུའི༌ ལན༌སལས༌, "ཁྱོ༌ཞ༌གུན༌ནི༌ འི༌ ཆོད༌ཁང༌ ཧ༌ལས༌ཤེས༌ རྩིགས༌ཁན༌བོ༌ ཐོང༌དུག༌ག༌? འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།"
3 ཆོད༌ཁང༌ངི༌ འ༌ངོ༌ ཆོགས༌སི༌ ལུང༌པའེ༌ ཨོ༌ལིཝ༌ཝི༌ རི༌ཀ༌ ཡེ༌ཤུ༌ ཞུགས༌ཏེ༌ ཡོད༌ ཟ༌ནེ༌, པི༌ཏྲར༌, ཡ༌ཀོབ༌, ཁོའེ༌ ནོ༌ ཡོ༌ཧཱ༌ནན༌ དང༌ ཨེན༌གྲིརུ༌ གུན༌ སུའང༌ གྱུས༌ཆའ༌ མ༌ཅུག༌ག༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌,
4 "ང༌ཞའ༌ ཤད༌ད༌ ཛད༌དའང༌ ཏེ༌བོ༌ ནམ༌ བྱུང༌ཨིན༌, ཡང༌ ཏེ༌ ཚང༌མ༌ དྲན༌དྲ༌ གྲུབ༌ཅེས༌སི༌ སྟགས༌གུན༌ ཀ༌ཟུག༌ རིག༌ ཡོང༌ཨིན༌?"
5 ཡེ༌ཤུའི༌ ཁོང༌གུན༌ལ༌ མོལས༌, "སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌,
6 ཅིའ༌ཟེར༌ན༌ ངའེ༌ མིང༌ ཁུར༌ཏེ༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ ཟེར༌ཁན༌ མང༌པོ༌ཞིག༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌།
7 ཁྱོ༌ཞ༌གུན༌ནི༌ མག༌ དང༌ མག༌གི༌ སྐོར༌ལ༌ འུ༌ཡ༌གུན༌ ཚོར༌ར༌ཅིག༌, ཇིགས༌ མ༌ཇིག༌ཤིག༌; ཏེ༌གུན༌ བྱུང༌གོས༌, ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌།
8 གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། ནས༌ས༌ མང༌པོའེ༌ ནང༌ང༌ མུ༌གེ༌ དང༌ སང༌གུལ༌ ཡོང༌ཨིན༌། ཨིན༌ནའང༌ ཏེ༌གུན༌ ནི༌ ཕྲུ༌གུ༌ སྐྱེ༌ཅེས༌སི༌ གོ༌ཟུག༌གི༌ ཟུག༌ཟེར༌བོ༌ ཙོགས༌ ཨིན༌།"
9 "ཏེ༌ཏུས༌ལ༌ ཁྱོ༌ཞ༌གུན༌ ཤང༌ ཅོས༌ཏེ༌ དུག༌། ཁྱོ༌ཞ༌གུན༌ ཏེན༌ན༌ ཡུལ༌ལི༌ ཝང༌སྲུལ༌པ༌གུན༌ནི༌ ལག༌ག༌ སྟད༌ཏེ༌ དུ༌ཁང༌གུན༌ནི༌ ནང༌ང༌ ཁྱོ༌ཞའ༌ རྟལ༌ལྕག༌ གྱབ༌ཅུག༌ཨིན༌། ངའེ༌ཀ༌ ཏད༌པ༌ ཡོད༌ཅེས༌པོའེ༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱོ༌ཞའ༌ ཁྱེར༌ཨིན༌, ཏེ༌ཏུས༌ ཁྱོ༌ཞའ༌ ངའ༌ སུ༌ ཨིན༌ཁན༌བོའེ༌ སྤང༌པོ༌ ཁོང༌གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌།
10 ཐའ༌མའེ༌ ཏུས༌ ལེབ༌བི༌ སང༌ སྔུན༌ལ༌, གའ༌མོའེ༌ ནས༌ཚུལ༌བོ༌ གྱལ༌ཁམས༌ ཚང༌མ༌ལ༌ ཤད༌གོས༌།
11 ཁྱོ༌ཞ༌གུན༌ ཟུམས༌ཏེ༌ ཁྲིམས༌ཅད༌ཅེས༌ལ༌ ཁྱོང༌ང༌ཅིག༌, ཅི༌ ཟེར༌ཨིན༌ སམས༌ཏེ༌ སྔུན༌ལ༌ ཚེར༌ མ༌ཚེར༌། ཏེན༌ན༌ ཏུས༌ལ༌, ཁྱོ༌ཞའ༌ ཅི༌ ཟེར༌ཅེས༌ལ༌ སལ༌ལ༌ ཛད༌ནའང༌, ཏེན༌ན༌བོ༌ ཟེར༌, ཅིའ༌ཟེར༌ན༌ སྤེ༌ར༌ ཏང༌ཁན༌བོ༌ ཁྱོ༌ཞ༌གུན༌ མན༌པ༌, དམ༌པའེ༌ ཐུག༌ཉིད༌ ཨིན༌ནོག༌།"
12 "ཨ༌ཅོ༌གུན༌ནི༌ ནོ༌གུན༌ལ༌ ཡང༌ ཨ༌བའེ༌ བུ༌ཚའ༌ ཡང༌ ཕྲུ༌གུའི༌ ཕ༌མ༌གུན༌ལ༌ ངོ༌ལོག༌ ཅོས༌ཏེ༌ སད༌ཅུག༌ཨིན༌།
13 ངའེ༌ཀ༌ ཏད༌པ༌ ཅོ༌ཅེས༌པོའེ༌ མི༌ཚང༌མའེ༌ ཁྱོ༌ཞ༌གུན༌ལ༌ ནཕ༌རད༌ ཅོའ༌ནོག༌, ཨིན༌ནའང༌ ཐའ༌མ༌ ཚོག༌པ༌ ངའེ༌ཀ༌ ཏད༌པ༌ སྟན༌པོ༌ བོར༌ཁན༌གུན༌ ཐར༌ཨིན༌།
14 "ནམ༌ 'ཁམ༌ལོག༌ ཚི༌ཏུ༌ ཅོ༌ཁན༌བོ༌' དམ༌པའེ༌ ཆོད༌ཁང༌ངི༌ ནང༌ང༌' ཡོད༌ཅེས༌པོ༌ འོས༌པ༌ མན༌ཨིན༌ནའང༌ བོར༌ཏེ༌ ཐོང༌ང༌ཅིག༌ ༼སིལ༌ཁན༌གུན༌ནི༌ ངའེ༌ ཟེར༌ཅེས༌ཅན༌གུན༌ནི༌ཀ༌ སྣང༌ང༌ ཏོང༌༽ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌།
15 ཁང༌པའེ༌ ཁ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌།
16 ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཀོས༌ ཁྱོང༌ང༌ལ༌ མ༌ཆ༌།
17 ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌།
18 འི༌གུན༌ དགུན༌ཏུས༌ལ༌ མི༌བྱུང༌ཅེས༌ལ༌ མོས༌ལམ༌ ཞུས༌,
19 ཅིའ༌ཟེར༌ན༌ ཏེ༌ཏུས༌ལ༌ འི༌ཟམ༌ རྡུག༌ངལ༌ ཀྲག༌པོ༌ བྱུང༌ཨིན༌, ཀ༌བོ༌ དཀོན༌མཆོག༌གི༌ ཇིག༌རྟེན༌ ཛད༌པ༌ནེ༌ ཕར༌ལ༌ དག༌ས༌ ཚག༌པ༌ མ༌བྱུང༌ང༌ ཨིན༌ནོག༌ ཡང༌ སྟིང༌ཞིན༌ནའང༌ མི༌བྱུང༌།
20 གལ༌ཏེས༌ གཙོ༌བོ༌ དཀོན༌མཆོག༌གི༌ ཏེ༌ཏུས༌པོ༌ ཉུ༌ངུན༌ མ༌ཛད༌པིན༌ན༌ སུ༌ཞིག༌གའང༌ སོན༌ཏེའ༌ ལུས༌ཏེ༌ མེད༌གྲོ༌, ཨིན༌ནའང༌ ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ཏོན༌ལ༌, ཏེ༌ཏུས༌པོ༌ ཉུ༌ངུན༌ ཅོའ༌ ཛདས༌།"
21 "ཏེ༌ཏུས༌ལ༌ གལ༌ཏེས༌ སུ༌ཞིག༌གི༌ ཁྱོ༌ཞའ༌, 'ལྟོས༌ཤིག༌ མ༌ཤི༌ཀ༌ འི༌ཀ༌ནེ༌ ཡ༌ འ༌ཀ༌ནེ༌ ཞུགས༌ཏེ༌ དུག༌' ཟེར༌ན༌ ཨིད༌ཤེས༌ མ༌ཅོ༌།
22 ཅིའ༌ཟེར༌ན༌ ཟུས༌མ༌ མ༌ཤི༌ཀ༌ དང༌ ཟུས༌མ༌ ལུང༌སྟོན༌པ༌གུན༌ ཡོངས༌ཏེ༌ ཛད༌པ༌ དང༌ ལྟས༌གུན༌ ལྟན༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལའང༌ གོབ༌སྐོར༌ ཏང༌ཅེས༌སི༌ རྩོན༌གྲུས༌ ཅོ༌ཨིན༌ ཨིན༌ནའང༌ ཏང༌ མི༌ཉན༌།
23 ཤང༌ ཅོས༌, ཏུས༌པོ༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞའ༌ ཅི༌ཚང༌མ༌ ཤད༌ཏེ༌ ཨིན༌།"
24 "ཏེ༌ཏུས༌ལ༌, རྡུག༌ངལ༌ལི༌ སྟིང༌ནེ༌
'ཉི༌མ༌ མུན༌གྲིག༌ གྱུར༌ཨིན༌,
ཟླ༌ཝའེ༌ འོད༌ མི༌ཏང༌
25 ནམ༌ནེ༌ སྐར༌མ༌གུན༌ བུད༌ཨིན༌
ཡང༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཨིན༌'།
26 ཏེ༌ནེ༌ མི༌ཚང༌མའེ༌, མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཐོང༌ཨིན༌།
27 ཡང༌ ཁོའེ༌, ཕོ༌ཉ༌གུན༌ ཇིག༌རྟེན༌ གང༌པོའེ༌ ནང༌ནེ༌ ཁོ༌རང༌ངི༌ ལྡམ༌ཁན༌གུན༌ ལྡུ༌ཅེས༌ལ༌ ཀལ༌ཨིན༌།"
28 "ཕིག༌ ཁ༌ཟས༌སི༌ ལྕང༌མའེ༌ ཀ༌ནེ༌ ལབ༌ཞ༌ ལེན༌ནའང༌; ཏེ༌བོའེ༌ ཡལ༌ག༌ སྔོན༌པོ༌ སོང༌ཏེ༌ ལོ༌མ༌ སོ༌མ༌ བིང༌ང༌ཅིག༌, ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌།
29 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌གུན༌ ཐོང༌ང༌ཅིག༌, ང༌ ལོགས༌ཏེ༌ ཡོང༌ཅེས༌སི༌ ཏུས༌ ཉེ༌མོ༌, སྒོའེ༌ དུན༌ལ༌ ལེབས༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ནི༌ ཤེས༌ཨིན༌།
30 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ བྱུང༌ཨིན༌།
31 ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།"
32 "ཏེ༌ ཚང༌མ༌ བྱུང༌ཅེས༌སི༌ ཞག༌ ཡ༌ ཏུས༌ཚོད༌པོ༌ དཀོན༌མཆོག༌ ཡབ༌ ཅིག༌པོའ༌ མ༌ནེ༌ ཡང༌ སུའང༌ གྱུས༌མེད༌, ནམ༌ཁའེ༌ ཕོ༌ཉ༌ ཡ༌ བུ༌ཚའང༌།
33 ཏེ༌ཏུས༌པོ༌ ཁྱོ༌ཞ༌གུན༌ལ༌ གྱུས༌མེད༌ པ༌སང༌, ཉིད༌ མ༌ཏང༌ང༌ ཤང༌ ཅོས༌ཏེ༌ དུག༌།
34 "ཏེ༌བོ༌ ནི༌ མི༌ཞིག༌ ས༌ཆ༌ ཐག༌རིང༌ཞིག༌ག༌ བེས༌ལ༌ ཆའ༌ཁན༌ ཙོགས༌ ཨིན༌ནོག༌། ཁང༌པ༌ནེ༌ བིང༌ངི༌ སང༌ སྔུན༌ལ༌ ཁོའེ༌ ཡོག༌པོ༌གུན༌ལ༌ རང༌རང༌ངི༌ ལས༌ ཅོ༌ཅེས༌ལ༌ ཁག༌ ཀལ༌ཏེ༌ སྒོ༌ སྲུང༌པ༌བོའ༌ ཤང༌ ཅོས༌ཏེ༌ ཁོ༌ ལོགས༌ཏེ༌ ཡོང༌ཅེས༌ལ༌ སྲུངས༌ཏེ༌ དུག༌ ཟེར༌ར༌ནོག༌།
35 ཏེ༌བོའེ༌ཕིའ༌ ཤང༌ ཅོས༌, ཅིའ༌ཟེར༌ན༌ ཁང༌དག༌ ཕི༌ཏོག༌, ཚན༌ནི༌ སྐྱིལ༌, ནམ༌ལངས༌སི༌ སང༌ སྔུན༌ལ༌, ཡ༌ ཉི༌མ༌ ཤར༌ཏེ༌ སྟིང༌ནེ༌, ནམ༌ ལོགས༌ཏེ༌ ཡོང༌ཨིན༌ ཁྱོ༌ཞ༌གུན༌ལ༌ གྱུས༌མེད༌ཏེ༌ ཨིན༌ནོག༌།
36 གལ༌ཏེས༌ ཁོ༌ ཧུན༌མེད༌ལ༌ ལེབ༌ན༌, ཁྱོ༌ཞ༌གུན༌ ཉིད༌ལོགས༌ཏེ༌ ཡོད༌ཁན༌བོ༌ ཐོང༌ མ༌གོས༌།
37 ངའེ༌ ཁྱོ༌ཞ༌གུན༌ལ༌ ཟེར༌ཁན༌བོ༌ ཚང༌མ༌ལ༌ ཟེར༌རད༌; ཤང༌ ཅོ༌ཤིག༌།"