7
མག༌མི༌རྒྱའེ༌ སྤོན༌བོའེ༌ ཏད༌པ༌།
7:1 ནེ༌ 10
1 མི༌གུན༌ལ༌ ལབ༌ཞ༌ ཚང༌མ༌ སལ༌ ཚར༌ར༌ཅིག༌, གཙོ༌བོ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ སྐྱོདས༌།
2 ཏེ༌རུ༌ རོམ༌པ༌ མག༌མི༌རྒྱའེ༌ སྤོན༌བོའེ༌, མ༌ ཅེས༌པ༌ ཅོ༌ཁན༌ནི༌ ཡོག༌པོ༌ཞིག༌ག༌ ཟུ༌མོ༌ སྲན༌ཏྲེ༌ ཡོངས༌ཏེ༌ ཤི༌ཀྱིས༌ ཡོད༌པིན༌།
3 མག༌མི༌ སྤོན༌བོའ༌ ཡེ༌ཤུའི༌ སྐོར༌ལ༌ ཚོར༌ར༌ཅིག༌, སྐྱོད༌ཏེ༌ ཡོག༌པོ༌བོ༌ ཕན༌ཅུག༌ག༌ ཛད༌ཅེས༌སི༌ ཞུ༌ཝའ༌ ཕུལ༌ཅེས༌ལ༌ ཡ༌ཧུ༌དཱ༌པའེ༌ སྤོན༌བོ༌ ཁ༌ཅིག༌ ཡེ༌ཤུ༌ ཡོད༌ས༌ ལམ༌ཅུགས༌།
4 ཁོང༌གུན༌ ཡེ༌ཤུ༌ ཡོད༌ས༌ ཡོངས༌ ཡང༌ སྙིང༌ནེ༌ ཞུ༌ཝའ༌ སྲན༌ཏྲེ༌ ཕུལ༌ཏེ༌ ཟེརས༌, "འི༌ མི༌བོ༌ ཉེ༌རང༌ངི༌ རོགས༌ ཛད༌ཅེས༌སི༌ འོས༌པ༌ ཨིན༌
5 ཅིའ༌ཟེར༌ན༌ ཁོའེ༌ ང༌དང༌ངི༌ མི༌གུན༌ལ༌ ཅམས༌པ༌ ཅོས༌ཏེ༌ ང༌དང༌ངི༌ དུ༌ཁང༌བོ༌ རྩིག༌ག༌ལ༌ རོགས༌ ཅོས༌ཏེ༌ ཨིན༌།"
6 ཏེ༌ནེ༌ ཡེ༌ཤུ༌ ཁོང༌གུན༌ ཉམ༌པོ༌ སྐྱོདས༌།
ཁང༌པའེ༌ ཉེ༌མོའ༌ ལེབས༌ཏེ༌ ཡོད༌ ཟ༌ནེ༌, མག༌མི༌རྒྱའེ༌ སྤོན༌བོའེ༌ ཁོ༌རང༌ངི༌ ཛ༌འོ༌གུན༌ ཡེ༌ཤུའ༌ འི༌ཟུག༌ ཟེར༌ཅེས༌ལ༌ ཀལས༌, "གཙོ༌བོ༌ འོབ༌གྱལ༌ མ༌ཛད༌, ཉེ༌རང༌ ངའེ༌ ཁང༌པ༌ སྐྱོད༌ཅེས༌སི༌ འོས༌པ༌ མན༌།
7 ཏེན༌ན༌ གྱུན༌ཚན༌བོའེ༌ ཕིའ༌ ངའ༌ ཉེ༌རང༌ངི༌ དུན༌ལ༌ ཇལ༌ཅེས༌པོའང༌ འོས༌པ༌ མ༌ཚོར༌། ཨིན༌ནའང༌ ཉེ༌རང༌ངི༌ བཀའ༌ སལ༌ན༌, ངའེ༌ ཡོག༌པོ༌ ཕན༌ཨིན༌
8 ཝང༌ཆའེ༌ ཡོག༌ག༌ ངའང༌ དུག༌གད༌ ཡང༌ ངའེ༌ ཝང༌ཆའེ༌ ཡོག༌ག༌ མག༌མི༌གུན༌ ཡོད༌། ངའེ༌ ཅིག༌ག༌ སོང༌ ཟེར༌ན༌ ཆའ༌ནོག༌ ཡང༌ ཅིག༌ག༌ ཡོང༌ ཟེར༌ན༌ ཡོང༌ང༌ནོག༌, ཡང༌ ངའེ༌ ཡོག༌པོའ༌ འི༌ ལས༌པོ༌ ཅོས༌ ཟེར༌ན༌ ཅོའ༌ནོག༌།"
9 ཡེ༌ཤུའི༌ ཏེ༌བོ༌ སན༌ན༌ཅིག༌, ཧ༌ལས༌ཏེ༌ ཁོང༌ང༌ བྲངས༌ཏེ༌ ཡོང༌ཁན༌ནི༌ མི༌ཚོགས༌ ཆོགས༌ལ༌ གྱུར༌ཏེ༌ མོལས༌, "ངའེ༌ ཁྱོ༌ཞའ༌ ཟེར༌རད༌, ཨིས༌ར༌ཨེལ༌ལི༌ ནང༌ངའང༌ ང༌ འི༌ཙོགས༌སི༌ ཏད༌པ༌ཅན༌ཞིག༌ མ༌ནེ༌ མ༌ཐོབ༌།"
10 ཏེ༌ནེ༌ ལམ༌ཅུག༌ཁན༌ནི༌ མི༌གུན༌ ཁང༌པ༌ ལོག༌ཏེ༌ ལེབ༌བ༌ཅིག༌, ཡོག༌པོ༌བོའ༌ ཟུ༌མོ༌ གྱལ༌ཏེ༌ ཐོང༌།
ཡེ༌ཤུའི༌ མ༌རང༌མོ༌ཞིག༌གི༌ བུ༌ཚ༌ སོན༌ཏེའ༌ ལང༌ང༌ ཛདས༌།
7:11 ནེ༌ 17
11 སྟིང༌མ༌ ཞག༌ག༌ གཙོ༌བོ༌ ཡེ༌ཤུ༌ ནཱ༌ཡིན༌ གྲོང༌ཁྱེར༌ལ༌ སྐྱོདས༌, ཡང༌ ཁོང༌ངི༌ ལོབ༌ཕྲུགས༌ དང༌ མི༌ཚོགས༌ ཆེན༌མོ༌ཞིག༌ ཁོང༌ ཉམ༌པོ༌ སོང༌།
12 གྲོང༌ཁྱེར༌རི༌ གྱས༌སྒོའེ༌ ཉེ༌མོ༌ ལེབ༌བ༌ཅིག༌ ཨ༌ནེ༌ མ༌རང༌མོ༌ཞིག༌གི༌ བུ༌ཚའ༌ ཅིག༌ཅིག༌པོ༌ ཤི༌ཁན༌ནི༌ རོ༌ ཕི༌ལོག༌ག༌ ཕིངས༌ཏེ༌ ཁྱོང༌ངད༌པིན༌ ཡང༌ ཏེ༌ གྲོང༌ཁྱེར༌རི༌ མི༌ཚོགས༌ ཆེན༌མོ༌ ཁོ༌ ཉམ༌པོ༌ ཡོད༌པིན༌།
13 ཡེ༌ཤའི༌ བུ༌མོ༌བོ༌ ཟིགས༌ས༌ཅིག༌, སྙིང༌རྗེ༌ སྐྱེས༌ཏེ༌ ཁོའ༌ མོལས༌, "ངུ༌ མ༌ངུ༌།"
14 ཏེ༌ནེ༌ རོ༌སྒམ༌མི༌ དུན༌ལ༌ སྐྱོད༌ཏེ༌ ཆག༌རྩེའ༌ ཛདས༌, སྤུར༌ ཁུར༌ཁན༌གུན༌ གྲུལ༌ མ༌གྲུལ༌ལ༌ དུགས༌། ཁོང༌ངི༌ མོལས༌, "ཁྱོག༌ཏོང༌ ཁྱོ༌རང༌ང༌ ངའེ༌ ཟེར༌རད༌, ལོངས༌།"
15 ཤི༌ཁན༌བོ༌ ལངས༌ཏེ༌ སྤེ༌ར༌ ཏང༌ཅེས༌ གོ༌ཟུགས༌ ཡང༌ ཡེ༌ཤུའི༌ ཁོ༌ ཁོ༌རང༌ངི༌ ཨ༌མ༌ སྟད༌ད༌ ཛདས༌།
16 མི༌ཚང༌མའེ༌ རྩི༌ཝ༌ དང༌ ཇིགས༌སི༌ ནང༌ང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, "ལུང༌སྟོན༌པ༌ ཀྲག༌པོ༌ཞིག༌ ང༌དང༌ངི༌ ཕྲོའ༌ སྐྱོད༌ཏེ༌ ཨིན༌ནོག༌། དཀོན༌མཆོག༌ ང༌དང༌ངི༌ མི༌གུན༌ལ༌ རོགས༌ ཛད༌ད༌ལ༌ སྐྱོད༌ཏེ༌ ཨིན༌ནོག༌།"
17 ཏེ༌ ནས༌ཚུལ༌བོ༌ ཡ༌ཧུ༌དཱའེ༌ ཡུལ༌ཇོངས༌ གང༌པོ༌ དང༌ ཉེ༌ཁོར༌རི༌ ཡུལ༌ ཚང༌མའེ༌ ནང༌ང༌ ཁྱེབས༌།
ཡེ༌ཤུ༌ དང༌ ཡོ༌ཧཱ༌ནན༌ ཁྲུས༌སལ༌ཁན༌།
7:18 ནེ༌ 35
18 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ནི༌ ཁོང༌ང༌ གཙོ༌བོ༌ ཡེ༌ཤུའི༌ ཛད༌ཁན༌ ཚང༌མ༌ ཤདས༌པ༌, ལོབ༌ཕྲུགས༌ ཉིས༌ བོད༌ཏེ༌,
19 ཡེ༌ཤུ༌ ཡོད༌ས༌ འི༌ ཏྲི༌ཝ༌བོ༌ ཏྲིའ༌ལ༌ ལམ༌ཅུགས༌, "ལུང༌སྟོན༌པ༌གུན༌ནི༌ སྐྱོད༌ཨིན༌ མོལ༌ཁན༌ མ༌ཤི༌ཀ༌ ཉེ༌རང༌ ཞུགས༌ཏེ༌ ཨིན༌ན༌ ཡ༌ ང༌ཞའ༌ ཡང༌ཞིག༌ག༌ སྲུང༌?"
20 ཁོང༌གུན༌ ཡེ༌ཤུ༌ ཡོད༌ས༌ ལེབ༌བ༌ཅིག༌ ཟེརས༌, "ཡོ༌ཧཱ༌ནན༌ ཁྲུས༌སལ༌ཁན༌ནི༌ ང༌ཞའ༌ འི༌བོ༌ ཏྲིའ༌ལ༌ ཀལས༌, 'ལུང༌སྟོན༌པ༌གུན༌ནི༌ སྐྱོད༌ཨིན༌ མོལ༌ཁན༌ མ༌ཤི༌ཀ༌ ཉེ༌རང༌ ཞུགས༌ཏེ༌ ཨིན༌ན༌ ཡ༌ ང༌ཞའ༌ ཡང༌ཞིག༌ག༌ སྲུང༌?' "
21 ཏེན༌ན༌ ཏུས༌ལ༌ ཡེ༌ཤུའི༌ ནད༌ ཡོང༌ཁན༌, ཟུ༌མོ༌ ཡོད༌ཁན༌ མང༌པོ༌ ཕན༌ཅུགས༌, གོང༌པོ༌ ཞུགས༌ཁན༌ མང༌པོ༌ ཕིང༌ང༌ ཛདས༌ ཡང༌ ཞ༌ར༌ མང༌པོའ༌ མིག༌ནེ༌ ཐོང༌ ཅུག༌ག༌ ཛདས༌།
22 ཡེ༌ཤུའི༌ ལོན༌ ཁྱོང༌ཁན༌གུན༌ལ༌ ལན༌སལས༌, "ལོགས༌ཏེ༌ སོང༌ ཡང༌ ཁྱོ༌ཞའེ༌ ཐོང༌ཁན༌ དང༌ ཚོར༌ཁན༌ གུན༌ ཡོ༌ཧཱ༌ནན༌ལ༌ ཤོད༌། ཞ༌ར༌གུན༌ལ༌ ཐོང༌, ཞ༌འོ༌གུན༌ གྲུལས༌, ཛེ༌ནད༌ཅན༌གུན༌ གྱལ༌ཏེ༌ རྩང༌མ༌ སོང༌, མ༌ཚོར༌ཁན༌གུན༌ནི༌ ཚོར༌, ཤི༌ཁན༌གུན༌ སོན༌ཏེའ༌ ལངས༌, ཡང༌ ཉལ༌བ༌ཅན༌གུན༌ལ༌ གའ༌མོའེ༌ ནས༌ཚུལ༌ ཤདས༌།
23 ཁོའ༌ ཤོད༌, ངའེ༌ ཅོ༌ཁན༌གུན༌ནི༌ ཞས༌ཏེ༌ ངའ༌ མ༌ཕང༌ཁན༌གུན༌ལ༌ ཅིན༌ལབས༌ སལ༌ལ༌ ཛད༌ཨིན༌།
24 ཡོ༌ཧཱ༌ནན༌ནི༌ ལོན༌ ཁྱོང༌ཁན༌གུན༌ ལོགས༌ཏེ༌ ཆ༌ ཚར༌ར༌ཅིག༌, ཡེ༌ཤུའི༌ མི༌ཚོགས༌ལ༌ ཡོ༌ཧཱ༌ནན༌ནི༌ སྐོར༌ལ༌ མོལ༌ཅེས༌ གོ༌ཟུགས༌, "ཁྱོ༌ཞའ༌ རི༌སྟོང༌ངི༌ ནང༌ང༌ ཀ༌ཟུག༌ མི༌ཞིག༌ག༌ ལྟའ༌ལ༌ སོང༌པིན༌? ཆུའི༌ ཐའ༌མའེ༌ ལྡམ༌བུ༌ ལུངས༌པོའེ༌ སྐུལ༌ལ༌ ཙོགས༌ལ༌, ལབ༌ཞའེ༌ ནང༌ང༌ ཏུས༌གྱུན༌ གྱུར༌ཇ༌ ཁྱོང༌ཁན༌ ཞིག༌ག༌?
25 གལ༌ཏེས༌ མན༌ན༌ ཁྱོ༌ཞ༌གུན༌ ཅི༌ ལྟའ༌ལ༌ སོང༌པིན༌? མི༌ ཀོས༌ལག༌ ཇམ༌པོ༌ དང༌ རིན༌ཅན༌ གོན༌ཁན༌ཞིག༌ ཁྱོ༌ཞ༌གུན༌ནི༌ ཐོང༌ང༌? མ༌ཐོང༌། ཀོས༌ རིན༌ཅན༌ གོན༌ཁན༌ དང༌ རིན༌ཅན༌ ཅ༌ལག༌ ཀོལ༌ཨིན༌ མི༌ཚེ༌ ཕུད༌ཁན༌གུན༌ གྱལ༌པོའེ༌ ཁར༌ལ༌ དུག༌ག༌ནོག༌།
26 ཁྱོ༌ཞའ༌ ལུང༌སྟོན༌པ༌ཞིག༌ག༌ ལྟའ༌ལ༌ སོང༌པིན༌ན༌? འོ༌ན༌, ཁོ༌ ལུང༌སྟོན༌པ༌ སང༌ ཀྲག༌ག༌ཞིག༌ ཨིན༌།
27 དམ༌པའེ༌ སུང༌རབས༌སི༌ ནང༌ང༌ ཁོའེ༌ སྐོར༌ལ༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌,
"ལྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌།
ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།
28 ངའེ༌ ཁྱོ༌ཞའ༌ ཟེར༌རད༌, དག༌ས༌ ཚོག༌པ༌ སྐྱེས༌ཁན༌ མི༌གུན༌ནི༌ ནང༌ནེ༌ ཡོ༌ཧཱ༌ནན༌ནི༌ སང༌ ཀྲག༌ག༌ཞིག༌ སུའང༌ མེད༌པ༌ ཨིན༌ནོག༌, ཨིན༌ནའང༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆུང༌ཤོག༌པོ༌ ཡོ༌ཧཱ༌ནན༌ནི༌ སང༌ ཀྲག༌ག༌ ཨིན༌།
29 ༼ཁྲལ༌ནེན༌ཁན༌གུན༌ནའང༌ ཐེས༌ཏེ༌ ཡེ༌ཤུའི༌ མོལ༌ཁན༌གུན༌ ཚོར༌ཁན༌ ཚང༌མའེ༌, དཀོན༌མཆོག༌གི༌ བཀའ༌ དེན༌བ༌ ཨིན༌ནོག༌ ཟེརས༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ནི༌ སལ༌ཁན༌ནི༌ ཁྲུས༌ ལེན༌ཏེ༌ ཨིན༌པིན༌།
30 ཨིན༌ནའང༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡོ༌ཧཱ༌ནན༌ནེ༌ ཁྲུས༌ མ༌ལེན༌ན༌ ཁོང༌རང༌གུན༌ནི༌ ཕིའ༌ དཀོན༌མཆོག༌གི༌ ཐུགས༌དོད༌པོ༌ ཕངས༌༽།
31 ཡེ༌ཤུའི༌ མོལས༌, "ངའེ༌ འི༌ མི༌རབས༌པོ༌ སུ༌ ཉམ༌པོ༌ ལྡུར༌? ཁོང༌གུན༌ སུ༌ ཙོགས༌ ཨིན༌ནོག༌?
32 ཁྲོམས༌སི༌ ནང༌ང༌ དུག༌ཁན༌ནི༌ ཕྲུ༌གུ༌གུན༌ ཙོགས༌ ཀ༌གུན༌ནི༌ ཅིག༌ དང༌ ཅིག༌ག༌ བོད༌ཨིན༌ ཟེར༌དུག༌,
ང༌ཞའེ༌ ལིང༌བུ༌ ཕུས༌ཏེའང༌ ཁྱོ༌ཞའ༌ མ༌རྩེས༌།
ང༌ཞའེ༌ ཤད༌པ༌ ཏང༌ ཟ༌ནེ༌ ཁྱོ༌ཞའ༌ མ༌ངུས༌།
33 ཏེན༌ན༌ ཙོགས༌ལ༌ ཡོ༌ཧཱ༌ནན༌ ཁྲུས༌སལ༌ཁན༌ ཡོངས༌ཏེ༌ ཟན༌ མ༌ཟོས༌ ཡ༌ ཆང༌ མ༌ཐུངས༌པ༌ ཁྱོ༌ཞའེ༌ ཁོའེ༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌ ཟེརས༌།
34 མི༌རིགས༌སི༌བུ༌ ཡོང༌ཏེ༌ ཟན༌ ཟོས༌ཏེ༌ ཆང༌ ཐུངས༌པ༌, ཁྱོ༌ཞའེ༌ ཁོ༌ མུག༌ཞུགས༌ དང༌ ར༌རོས༌ཏེ༌ དུག༌ཁན༌ ཡང༌ ཁྲལ༌ལེན༌ཁན༌ དང༌ སྡིག༌ཅན༌ གུན༌ནི༌ ཛ༌འོ༌ ཨིན༌ནོག༌ ཟེརས༌།
35 ཨིན༌ནའང༌ ང༌ཞའ༌ དཀོན༌མཆོག༌གི༌ ཤེས༌རབས༌སི༌ ལམ༌མི༌ཀ༌ གྲུལ༌ཁན༌བོ༌ ཤེས༌རབས༌ཅན༌གུན༌ནི༌ ཤེས༌ས༌ནོག༌ །"
ཡེ༌ཤུའི༌ སྡིག༌ཅན༌ བུ༌མོ༌ཞིག༌ག༌ ཤགས༌པ༌ སལས༌།
7:36 ནེ༌ 50
36 ཏེ༌ནེ༌ ཕ༌རུ༌ཤི༌པ༌ཞིག༌གི༌ གཙོ༌བོ༌ ཡེ༌ཤུའ༌ ཁོའེ༌ ཁང༌པ༌ དོན༌ཏང༌ང༌ བོད༌པ༌, ཡེ༌ཤུ༌ ཁོའེ༌ ཁང༌པ༌ སྐྱོད༌ཏེ༌ དོན༌ཏང༌ དོན༌ན༌ལ༌ ཅོག༌ཙེ༌ དུན༌ལ༌ ཞུགས༌།
37 ཏེ༌ གྲོང༌ཁྱེར༌རི༌ ནང༌ང༌ སྕོད༌ལམ༌ ངན༌པ༌ ཡོད༌ཁན༌ནི༌ བུ༌མོ༌ཞིག༌ག༌ ཡེ༌ཤུ༌ ཕ༌རུ༌ཤི༌པའེ༌ ཁང༌པ༌ དོན༌ཏང༌ དོན༌ན༌ ཞུགས༌ཏེ༌ ཡོད༌ཁན༌བོ༌ ཚོར༌ར༌ཅིག༌, ཁོ༌ ཀའ༌ཡོལ༌ལི༌ ནོད༌ ཏྲི༌ཞིམ༌མི༌ མར༌ནག༌ ཀུས༌པོ༌ སྐངས༌ཁན༌ ཁུར༌ཏེ༌ ཡོངས༌།
38 ཡེ༌ཤུའི༌ གྱབ༌བ༌ ཁོང༌ངི༌ ཞབས༌སི༌ དུན༌ལ༌ པིག༌དོང༌ ཙུགས༌ཏེ༌ ངུ༌ཨིན༌ནའང༌ ཆི༌མ༌ ཉམ༌པོ༌ ཁོང༌ངི༌ ཞབས༌ ལོན༌པ༌ ཅོས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕི༌ཨིན༌, པུག༌ ཏང༌ཨིན༌, ཁོའེ༌ ཏྲི༌ཞིམ༌ཅན༌ནི༌ མར༌ནག༌ ལུགས༌།
39 ཡེ༌ཤུ༌ དོན༌ཏང༌ང༌ བོད༌ཁན༌ནི༌ ཕ༌རུ༌ཤི༌པ༌བོའེ༌ ཏེ༌གུན༌ ཐོང༌ཏེ༌, "གལ༌ཏེས༌ ཁོང༌ ལུང༌སྟོན༌པ༌ཞིག༌ ཨིན༌ན༌, ཁོང༌ང༌ ལག༌པ༌ རྩེ༌ཨིན༌ ཡོད༌ཁན༌ནི༌ བུ༌མོ༌བོ༌ སྡིག༌ཅན༌ཞིག༌ ཨིན༌ཁན༌ ཤེས༌གོས༌" སམ༌།
40 ཁོའེ༌ སམ༌ཨིན༌ ཡོད༌ཁན༌བོའ༌ ཡེ༌ཤུའི༌ ལན༌སལས༌, "ཤི༌མོན༌ ངའེ༌ ཁྱོ༌རང༌ང༌ ཅིག༌ ཟེར༌ཨིན༌།" ཁོའེ༌ ཟེརས༌, "ལོབ༌པོན༌ལེ༌ མོལ༌ལ༌ ཛད༌།"
41 "བུ༌ལོན༌ ཏང༌ཁན༌ཞིག༌གི༌ མི༌ ཉིས༌ལ༌ པེ༌ནེ༌ བུ༌ལོན༌ ཏངས༌, ཅིག༌པོའ༌ ཞག༌ ལྔབ༌རྒྱའེ༌ ལ༌ཆ༌ ཟམ༌ཤིག༌ ཡང༌ ཅིག༌པོའ༌ ཞག༌ ལྔབ༌ཅུའི༌ ལ༌ཆ༌ ཟམ༌ཤིག༌།
42 ཁོང༌ ཉིས༌ཀོའ༌ བུ༌ལོན༌ ལོགས༌ཏེ༌ ཤལ༌ མ༌ཉན༌ པ༌སང༌ བུ༌ལོན༌ ཏང༌ཁན༌བོའེ༌ ཁོང༌གུན༌ནི༌ བུ༌ལོན༌བོ༌ ཕུད༌ཏངས༌། ཏ༌ ཁོང༌གུན༌ནི༌ ནང༌ནེ༌ སུའི༌ བུ༌ལོན༌ ཏང༌ཁན༌བོའ༌ མང༌ང༌ ཅེས༌པ༌ ཅོ༌ཨིན༌།"
43 ཤི༌མོན༌ནི༌ ཟེརས༌, "ངའེ༌ སམ༌མ༌རག༌ བུ༌ལོན༌ མང༌ང༌ ཕུད༌ཁན༌བོའེ༌།" ཡེ༌ཤུའི༌ མོལས༌, "ཁྱོ༌རང༌ངི༌ དྲང༌པོ༌ ཟེརས༌།"
44 ཏེ༌ནེ༌ བུ༌མོ༌བོ༌ ཆོགས༌ལ༌ ཟིགས༌ཏེ༌ ཡེ༌ཤུའི༌ ཤི༌མོན༌ལ༌ མོལས༌, "འི༌ བུ༌མོ༌ ཐོང༌ངའ༌? ང༌ ཁྱོ༌རང༌ངི༌ ཁང༌པ༌ ཡོངས༌ཏེའང༌ ཁྱོ༌རང༌ངི༌ ངའེ༌ རྐང༌པ༌ ཁྲུའ༌ལ༌ ཆུ༌ མ༌ཏངས༌, ཨིན༌ནའང༌ འི༌ བུ༌མོ༌བོའེ༌ ངའེ༌ རྐང༌པ༌ ཁོ༌རང༌ངི༌ ཆི༌མ༌ ཉམ༌པོ༌ ཁྲུས༌ཏེ༌ སྲའ༌ ཉམ༌པོ༌ ཕིས༌།
45 ཁྱོ༌རང༌ངི༌ ངའ༌ པུག༌ མ༌ཏངས༌ ཨིན༌ནའང༌ འི༌ བུ༌མོ༌བོའེ༌ ང༌ ནང༌ང༌ ཡོངས༌པ༌ནེ༌ ཕར༌ལ༌ ངའེ༌ རྐང༌པའ༌ པུག༌ ཏང༌ཨིན༌ དུགས༌།
46 ཁྱོ༌རང༌ངི༌ ངའེ༌ གོའ༌ མར༌ནག༌ མ༌སྐུས༌ ཨིན༌ནའང༌ འི༌ བུ༌མོའེ༌ ཏྲི༌ཞིམ༌བོ༌ ངའེ༌ རྐང༌པའེ༌ཀ༌ ལུགས༌།"
47 "ངའེ༌ ཁྱོ༌རང༌ང༌ ཟེར༌རད༌, འི༌ བུ༌མོའེ༌ སྡིག༌པ༌ ཅོ༌ཁན༌ མང༌པོའ༌ ཤགས༌པ༌ ཏངས༌པ༌, ཁོའེ༌ ཅེས༌པ༌ མང༌པོ༌ ཅོས༌། ཨིན༌ནའང༌ སྡིག༌པ༌ ཉུ༌ངུན༌ ཅོ༌ཁན༌ནི༌ སྡིག༌པ༌ ཤགས༌པ༌ ཏང༌ཁན༌བོའེ༌ ཅམས༌པ༌ ཉུ༌ངུན༌ ཅོས༌།"
48 ཏེ༌ནེ༌ ཡེ༌ཤུའི༌ བུ༌མོ༌བོའ༌ མོལས༌, "ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏངས༌ཏེ༌ ཨིན༌།"
49 ཞན༌ གྲོན༌པོ༌གུན༌ནི༌ ཁོ༌རང༌ ཅིག༌ དང༌ ཅིག༌ག༌ ཟེརས༌, "སྡིག༌པ༌ ཤགས༌པ༌ ཏང༌ཅེས༌སི༌ ཧམ༌པ༌ ཅོ༌ཁན༌ནི༌ འི༌ མི༌བོ༌ སུ༌ ཨིན༌ནོག༌།"
50 ཡེ༌ཤུའི༌ བུ༌མོ༌བོའ༌ མོལས༌, "ཁྱོ༌རང༌ངི༌ ཏད༌པའེ༌ ཁྱོ༌རང༌ སྐྱོབས༌ཏེ༌ ཨིན༌། ཏ༌ སོང༌ དཀོན༌མཆོག༌གི༌ ཞི༌དེ༌ ཁོ༌རང༌ ཉམ༌པོ༌ ལུས༌ཨིན༌།"