22
ཀར༌ཡོད༌པ༌ ཡུ༌དཱའེ༌ ངོ༌ལོག༌ ཅོས༌།
22:1 ནེ༌ 6
1 ཏ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ ཀ༌བོའ༌ པེ༌སག༌གི༌ ཏུས༌ཆེན༌ ཟེར༌རད༌ ཉེ༌མོ༌ ཡོད༌པིན༌,
2 བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ སང༌ཝའེ༌ ཐོག༌ནེ༌ ཡེ༌ཤུ༌ སད༌ཅེས༌སི༌ ཐབས༌ ཙལས༌ ཅིའ༌ཟེར༌ན༌ མི༌ཚོགས༌སི༌ ཏེ༌བོའ༌ གྱབ༌གལ༌ ཅོའ༌ནོག༌ སམ༌ཏེ༌ ཁོང༌གུན༌ ཇིགས༌སད༌པིན༌།
3 ཏེ༌ནེ༌ ལོབ༌ཕྲུགས༌ ཅུག༌ཉིས༌སི༌ ནང༌ནེ༌ ཅིག༌, ཀར༌ཡོད༌པ༌ ཟེར༌ཁན༌ནི༌ ཡུ༌དཱའེ༌ ནང༌ང༌ ཤེ༌ཏན༌ ཞུགས༌,
4 ཡང༌ ཁོ༌ བླ༌མ༌ འུ༌སྐྱོང༌གུན༌ དང༌ ཆོད༌ཁང༌ སྲུང༌ཁན༌ནི༌ མག༌མི༌ འུ༌སྐྱོང༌གུན༌ ཡོད༌ས༌ སོང༌ཏེ༌ ཡེ༌ཤུའ༌ ངོ༌ལོག༌ ཅོས༌ཏེ༌ ཀ༌ཟུག༌གི༌ ཁོང༌གུན༌ནི༌ ལག༌ག༌ སྟད༌ཨིན༌ ཟེར༌ཏེ༌ གྲབས༌ ཅོས༌།
5 ཁོང༌གུན༌ མ༌སྲན༌ཏྲེ༌ ཐད༌ཏེ༌ ཁོའ༌ པེ༌ནེ༌ ཏང༌ཅེས༌ལ༌ ཁའ༌ཆམས༌།
6 ཁོའང༌ ཏེ༌བོའ༌ ཁའ༌ཆམས༌ཏེ༌ མི༌ཚོགས༌ མེད༌ ཟ༌ནེ༌ ཡེ༌ཤུ༌ ཁོང༌གུན༌ནི༌ ལག༌ག༌ སྟད༌ཅེས༌སི༌ སྐབས༌ ཙལ༌ཅེས༌ གོ༌ཟུག༌།
སྟིང༌ཇུག༌གི༌ དོན༌ཏང༌ ནམས༌།
22:7 ནེ༌ 30
7 ཏེ༌ནེ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ ལེབ༌, ཏེ༌ ཞག༌ག༌ པེ༌སག༌གི༌ ལུ༌གུ༌བོ༌ སྲོག༌ཆོད༌ལ༌ ཕུལ༌ལད༌པིན༌,
8 གཙོ༌བོ༌ ཡེ༌ཤུའི༌ པི༌ཏྲར༌ དང༌ ཡོ༌ཧཱ༌ནན༌ ལམ༌ཅུག༌ག༌ ཛད༌ཨིན༌ མོལས༌, "སོང༌ཏེ༌ ང༌དང༌གུན༌ ཟའ༌ཅེས༌ལ༌ པེ༌སག༌གི༌ དོན༌ཏང༌ གྲལ༌གྲིག༌ ཅོས༌།"
9 ཁོང༌གུན༌ནི༌ ཡེ༌ཤུའ༌ ཏྲིས༌, "ང༌ཞའེ༌ པེ༌སག༌གི༌ དོན༌ཏང༌ ཀ༌རུ༌ གྲལ༌གྲིག༌ ཅོ༌ལེ༌།
10 ཡེ༌ཤུའི༌ ཁོང༌གུན༌ལ༌ མོལས༌, "གྱལ༌སའེ༌ ནང༌ང༌ ཞུགས༌ ཟ༌ནེ༌, ཏེ༌རུ༌ ཆུ༌ཀར༌ ཁུར༌ཁན༌ནི༌ མི༌ཞིག༌ ཁྱོ༌ཞ༌གུན༌ལ༌ ཐུག༌ཅེན༌, ཁོའེ༌ སྟིང༌རང༌ནེ༌ སོང༌། ཁོ༌ ཞུགས༌ཏེ༌ ཆ༌སའེ༌ ཁང༌པའེ༌
11 ཁང༌དག༌པོའ༌ ཟེར༌ 'ལོབ༌པོན༌ནི༌ ཏྲིའ༌རག༌, "གྲོན༌པོ༌ ཞུག༌སི༌ ནང༌བོ༌ ཀ༌ནེ༌ ཡོད༌, ཏེ༌རུ༌ ངའེ༌ ང༌རང༌ངི༌ ལོབ༌ཕྲུགས༌གུན༌ ཉམ༌པོ༌ པེ༌སག༌གི༌ དོན༌ཏང༌ ཟེན༌?"
12 ཁོའེ༌ ཁྱོ༌ཞའ༌ སྟང༌ཐོག༌ག༌ གྲལ༌གྲིག༌ ཅོས༌ཁན༌ནི༌ ནང༌ ཆེན༌མོ༌ཞིག༌ ལྟན༌ཅེན༌, ཏེ༌རུ༌ དོན༌ཏང༌ངི༌ གྲལ༌ ཅོས༌།"
13 ཏེ༌ནེ༌ ཁོང༌གུན༌ སོང༌ ཡང༌ ཅི༌ཚང༌མ༌ ཡེ༌ཤུའི༌ མོལ༌ཁན༌ ནང༌ཞིན༌ ཐོང༌། ཁོང༌གུན༌ནི༌ ཏེ༌རུ༌ པེ༌སག༌གི༌ དོན༌ཏང༌ངི༌ གྲལ༌གྲིག༌ ཅོས༌།
14 ཏུས༌ཚོད༌ ལེབ༌བ༌ཅིག༌ ཡེ༌ཤུ༌ ཁོང༌རང༌ངི༌ སྐུ༌ཚབས༌གུན༌ ཉམ༌པོ༌ ཅོག༌ཙེ༌ཀ༌ སྟེན༌ཏེ༌ ཞུགས༌
15 ཡང༌ ཁོང༌ངི༌ སྐུ༌ཚབས༌གུན༌ལ༌ མོལས༌, "ང༌ རྡུག༌ངལ༌ ཉུང༌ངི༌ སང༌ སྔུན༌ལ༌ འི༌ པེ༌སག༌གི༌ དོན༌ཏང༌ ཁྱོ༌ཞའ༌ ཉམ༌པོ༌ དུགས༌ཏེ༌ ཟའ༌ཅེས༌སི༌ དོད༌པ༌ ཆེན༌མོ༌ ཡོད༌པིན༌,
16 ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཟེར༌རད༌, ངའེ༌ འི༌བོ༌ ཡང༌སྐྱར༌ མ༌ནེ༌ མི༌ཟ༌ ནམ༌ཚོག༌པ༌ འི༌བོའེ༌ ཏོན༌ཏག༌པོ༌ དཀོན༌མཆོག༌གི༌ གྱལ༌སྲིད༌ ནང༌ང༌ དྲན༌དྲ༌ མི༌གྲུབ༌།"
17 ཏེ༌ནེ༌ ཡེ༌ཤུའི༌ དོན༌སྐྱོག༌པོ༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ ཡང༌ ཁོང༌གུན༌ལ༌ མོལས༌, "འི༌བོ༌ ལེན༌ཏེ༌ ཁྱོ༌ཞ༌རང༌གུན༌ནི༌ ནང༌ང༌ བགོས༌།
18 ངའེ༌ ཁྱོ༌ཞའ༌ ཟེར༌རད༌, འི༌ རྒུན༌ཆང༌བོ༌ ངའེ༌ ཡང༌སྐྱར༌ མི༌ཐུང༌ ནམ༌ཚོག༌པ༌ དཀོན༌མཆོག༌གི༌ གྱལ༌སྲིད༌ མི༌ལེབ༌།"
19 ཏེ༌ནེ༌ དོན༌ཀྱིར༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ ཡང༌ ཅག༌ག༌ ཛད༌ཏེ༌ ལོབ༌ཕྲུགས༌གུན༌ལ༌ སལས༌ ཡང༌ མོལས༌, "འི༌བོ༌ ཁྱོ༌ཞ༌གུན༌ནི༌ ཕིའ༌ ཏངས༌ཁན༌ནི༌ ངའེ༌ ཟུགས༌པོ༌ ཨིན༌། ང༌ ཨིད༌ཏུ༌ ཅོ༌ཅེས༌ལ༌ འི༌བོ༌ ཅོས༌།"
20 ཏེན༌ན༌ ཙོགས༌ལ༌ ཁར༌ཇི༌ སྟིང༌ནེ༌ ཡང༌སྐྱར༌ རྒུན༌ཆང༌ངི༌ དོན༌སྐྱོག༌པོ༌ ནམས༌ ཡང༌ མོལས༌, "འི༌ ཀོ༌རེ༌བོ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ངའེ༌ ཁྲག༌ ཉམ༌པོ༌ ཅོས༌ཁན༌ནི༌ ཆད༌དོན༌ སོ༌མ༌ ཨིན༌།
21 ཨིན༌ནའང༌ ལྟོས༌, ང༌ གྲ༌འོའེ༌ ལག༌ག༌ སྟད༌ཁན༌ནི༌ ལག༌པ༌ འི༌ ཅོག༌ཙེ༌ཀ༌ ང༌ ཉམ༌པོ༌ དུག༌།
22 ཐག༌ཅད༌ད༌ ཛད༌ཁན༌ ནང༌ཞིན༌ མི༌རིགས༌སི༌བུ༌ ཤི༌གོས༌, ཨིན༌ནའང༌ ཁོ༌ གྲ༌འོའེ༌ ལག༌ག༌ སྟད༌ཁན༌ནི༌ མི༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌།"
23 ཏེ༌བོ༌ སུའི༌ ཅོ༌ཨིན༌ ཟེར༌ཏེ༌ ལོབ༌ཕྲུགས༌གུན༌ནི༌ ཁོ༌རང༌ ཅིག༌ དང༌ ཅིག༌ག༌ ཏྲི༌ཅེས༌ གོ༌ཟུག༌།
24 ཏེ༌ནེ༌ ལོབ༌ཕྲུགས༌གུན༌ནི༌ ནང༌ང༌ ཁོ༌རང༌གུན༌ནི༌ ཕྲོ༌ནེ༌ ཀྲག༌ཤོག༌ སུ༌ ཨིན༌ ཟེར༌ཨིན༌ ཟེར༌ཟེར༌ སོང༌།
25 ཡེ༌ཤུའི༌ ཁོང༌གུན༌ལ༌ མོལས༌, "ཡ༌ཧུ༌དཱ༌པ༌ མན༌ཁན༌ནི༌ གྱལ༌པོ༌གུན༌ནི༌ མི༌གུན༌ནི༌ཀ༌ སྙིང༌རྗེ༌ མེད༌པ༌ ཝང༌སྲུལ༌ལ༌ནོག༌, ཡང༌ མི༌གུན༌ནི༌ཀ༌ ཝང༌ཆ༌ ཡོད༌ཁན༌གུན༌ནི༌ ཁོ༌རང༌གུན༌ལ༌ 'མི༌གུན༌ལ༌ ཕན༌ཐོགས༌ ཏང༌ཁན༌' ཟེར༌ར༌ནོག༌།
26 ཁྱོ༌ཞའེ༌ ནང༌ང༌ ཏེ༌ཙོགས༌ ཡོང༌ མ༌གོས༌། ཁྱོ༌ཞའེ༌ ཕྲོ༌ནེ༌ ཀྲག༌པོ༌ ཨིན༌ཁན༌བོ༌ ཆུང༌ཤོག༌ གྱུར༌གོས༌ ཡང༌ ཝང༌སྲུལ༌ཁན༌བོ༌ ཞབ༌སྟོག༌ ཞུ༌ཁན༌ གྱུར༌གོས༌།
27 ཅོག༌ཙེ༌ཀ༌ ཟན༌ཟའ༌ལ༌ དུག༌ཁན༌བོ༌ ཆེའ༌ ཨིན༌ནོག༌ག༌ ཡ༌ ཞབ༌ཤི༌ ཞུ༌ཁན༌བོ༌? ཅོག༌ཙེ༌ཀ༌ ཟན༌ཟའ༌ལ༌ དུག༌ཁན༌བོ༌ མི༌ཆེའ༌? ཨིན༌ནའང༌ ངའེ༌ ཞབ༌ཤི༌ ཞུ༌ཁན༌ནི༌ ཚུལ༌ལ༌ ཁྱོ༌ཞ༌གུན༌ནི༌ ཕྲོའ༌ མི༌ཚེ༌ ཕུད༌དད༌།"
28 "ང༌ ཀགས༌པོ༌ ཐོང༌ངི༌ ཏུས༌ལ༌ ཁྱོ༌ཞའ༌ ང༌ ཉམ༌པོ༌ དུག༌ཁན༌གུན༌ ཨིན༌ནོག༌།
29 ཀ༌ཟུག༌ ངའེ༌ ཡབ༌བི༌ ངའ༌ གྱལ༌སྲིད༌ཞིག༌ ཝང༌སྲུལ༌ལ༌ སལས༌ ཏེན༌ན༌ ཙོགས༌ ངེའང༌ ཁྱོ༌ཞ༌གུན༌ལ༌ གྱལ༌སྲིད༌ཞིག༌ ཝང༌སྲུལ༌ལ༌ ཏང༌ཨིན༌།
30 ཁྱོ༌ཞ༌ ངའེ༌ གྱལ༌སྲིད༌དི༌ ནང༌ང༌ ང༌ ཉམ༌པོ༌ ངའེ༌ ཅོག༌ཙེ༌ ཀ༌ནེ༌ ཟེན༌, ཐུང༌ཨིན༌ ཡང༌ ཨིས༌ར༌ཨེལ༌ལི༌ སྡེ༌ ཅུག༌ཉིས༌སི༌ཀ༌ ཝང༌སྲུལ༌ཅེས༌ལ༌ ཁྲིས༌སི༌ཀ༌ དུག༌ཨིན༌།"
པི༌ཏྲར༌རི༌ ཡེ༌ཤུ༌ ངོ༌ མི༌ཤེས༌ཟུན༌ གྱབ༌ཅེས༌པོ༌ ཡེ༌ཤུའི༌ ལུང༌སྟན༌ ཛདས༌།
22:31 ནེ༌ 38
31 གཙོ༌བོའེ༌ ཡེ༌ཤུའི༌ མོལས༌, "ཤི༌མོན༌, ཤི༌མོན༌, ཁྱོ༌ཞ༌གུན༌ ཚོད༌ལྟའེ༌ ནང༌ང༌ ཀྲོ༌ སིག༌ག༌ ཙོགས༌ལ༌ སིག༌ཅུག༌ཅེས༌ལ༌ ཤེ༌ཏན༌ནི༌ དཀོན༌མཆོག༌ག༌ ཞུ༌ཝ༌ ཕུལས༌།
32 ཨིན༌ནའང༌ ཁྱོ༌རང༌ངི༌ ཏད༌པ༌ མི༌ཕང༌ཅེས༌ ཡང༌ གྱོད༌པ༌ ཅོས༌ཏེ༌ ཡང༌སྐྱར༌ ངའེ༌ཀ༌ ཏད༌པ༌ ཅོའ༌ཅིག༌, ཁྱོ༌རང༌ངི༌ སྤུན༌གུན༌ལ༌ སྤོས༌པ༌ ཏང༌ཅེས༌ལ༌ མོས༌ལམ༌ ཞུས༌པིན༌།"
33 པི༌ཏྲར༌རི༌ ལན༌ཏངས༌, "གཙོ༌བོ༌, ང༌ ཉེ༌རང༌ ཉམ༌པོ༌ ཙོན༌ལ༌ ཆ༌ཅེས༌ མ༌ཚད༌ ཤི༌ཅེས༌ལའང༌ གྲལ༌གྲིག༌ ཨིན༌།"
34 ཡེ༌ཤུའི༌ པི༌ཏྲར༌ལ༌ མོལས༌, "ངའེ༌ ཁྱོ༌རང༌ང༌ ཟེར༌རད༌, དི༌རིང༌ ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌ ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།"
35 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ ཁྱོ༌ཞའ༌ ཁོ༌མགས༌, ཇོ༌ལ༌ དང༌ པ༌བུ༌ མེད༌པ༌ ཀལ༌ ཟ༌ནེ༌ ཁྱོ༌ཞ༌གུན༌ལ༌ སྒོས༌དོམ༌གུན༌ དྲན༌དྲ༌ མ༌སོང༌ང༌?" ཁོང༌གུན༌ནི༌ ཟེརས༌, "དྲན༌དྲ༌ སོང༌ལེ༌།"
36 "ཨིན༌ནའང༌ ཁོ༌མགས༌ ཡོད༌ཁན༌གུན༌ནི༌ ཏེ༌བོ༌ ཁུར༌གོས༌ ཏེན༌ན༌ ཙོགས༌ལ༌ ཇོ༌ལའང༌། ར༌འི༌ མེད༌ཁན༌གུན༌ནི༌ རང༌ངི༌ ཀོས༌ ཙོངས༌ཏེ༌ ར༌འི༌ ཉོ༌གོས༌།
37 ངའེ༌ ཁྱོ༌ཞའ༌ ཟེར༌རད༌, དམ༌པའེ༌ སུང༌རབས༌སི༌ ནང༌ང༌ 'ཁོ༌ ཁྲིམས༌ ཅག༌ཁན༌གུན༌ནི༌ ཕྲོའ༌ རྩི༌ཨིན༌' བྲིས༌ཁན༌བོ༌ ངའེ༌ ནང༌ང༌ གྲུབ༌གོས༌། ཏན༌ཏན༌ ངའེ༌ སྐོར༌ལ༌ ཏེ༌ བྲིས༌ཁན༌བོ༌ གྲུབ༌ཨིན༌ ཨིན༌ནོག༌།"
38 ཁོང༌གུན༌ནི༌ ཟེརས༌, "གཙོ༌བོ༌ལེ༌, ང༌ཞའེ༌ ལག༌ག༌ ར༌འི༌ ཉིས༌ ཡོད༌།"
ཡེ༌ཤུའི༌ མོལས༌, "ར༌འི༌ སྐོར༌ལ༌ མང༌པོ༌ ཟེརས༌, ཏ༌ བྲའོག༌།"
ཡེ༌ཤུའི༌ ཨོ༌ལིཝ༌ཝི༌ རི༌ཀ༌ མོས༌ལམ༌ ཞུའ༌ ཛདས༌།
22:39 ནེ༌ 46
39 གཙོ༌བོ༌ ཡེ༌ཤུ༌ ལོབས༌ ནང༌ཞིན༌ གྱལ༌ས༌ནེ༌ ཕི༌ལོག༌ག༌ བིངས༌ཏེ༌ ཨོ༌ལིཝ༌ཝི༌ རི༌ཀ༌ སྐྱོདས༌ ཡང༌ ཁོང༌ངི༌ ལོབ༌ཕྲུགས༌གུན༌ ཁོང༌ངི༌ སྟིང༌རང༌ནེ༌ སོང༌།
40 ཏེ༌ ནས༌སའེ༌ཀ༌ ལེབ༌བ༌ཅིག༌ ཁོང༌ངི༌ ཁོང༌གུན༌ལ༌ མོལས༌, "ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ མོས༌ལམ༌ ཞུས༌།"
41 ཏེ༌ནེ༌ རྡོའ༌ ཕངས༌ཏེ༌ ལེབ༌ཚད༌ ཟམ༌ཤིག༌ ཁོང༌གུན༌ནེ༌ ཐག༌རིང༌ང༌ སྐྱོད༌ཏེ༌ པིག༌དོང༌ ཙུགས༌ཏེ༌ མོས༌ལམ༌ ཞུས༌,
42 "ཡབ༌ལེ༌ གལ༌ཏེས༌ ཉེ༌རང༌ ཐུགས༌ཐད༌ན༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཀ༌ནེ༌ ཐེན༌ན༌ ཛད༌, ཨིན༌ནའང༌ ངའེ༌ དོད༌པ༌ ནང༌ཞིན༌ མན༌པ༌, ཉེ༌རང༌ངི༌ ཐུག༌གོངས༌ ནང༌ཞིན༌ ཅོའ༌ ཛད༌།"
43 ཏེ༌ནེ༌ ནམ༌ཁའ༌ནེ༌ ཕོ༌ཉ༌ཞིག༌ སྐྱོད༌ཏེ༌ ཁོང༌ང༌ སྟོབས༌ ཅུག༌ག༌ ཛདས༌།
44 རྡུག༌ངལ༌ སྲན༌ཏྲེ༌ ནང༌ང༌ སྙིང༌ངི༌ ཐིལ༌ནེ༌ མོས༌ལམ༌ ཞུའ༌ ཛདས༌, ཡང༌ ཁོང༌ངི༌ ཞལ༌དོང༌ནེ༌ བིང༌ཁན༌ནི༌ མུལ༌ཆུ༌ ཁྲག༌གི༌ ཐིགས༌པ༌ ཙོགས༌ལ༌ སའེ༌ཀ༌ བུད༌།
45 མོས༌ལམ༌ ཞུ༌ ཚར༌ར༌ཅིག༌, ཁོང༌ ཞངས༌ཏེ༌ ལོབ༌ཕྲུགས༌གུན༌ ཡོད༌ས༌ ལོགས༌ཏེ༌ སྐྱོདས༌། ཁོང༌གུན༌ ཉིད༌ལ༌ སོང༌ཏེ༌ ཟིགས༌, ཚེར༌ཁའེ༌ ཞས༌ཏེ༌ ཁོང༌གུན༌ སྲན༌ཏེ༌ ངལ༌ཏེ༌ ཡོད༌པིན༌།
46 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, "ཁྱོ༌ཞའ༌ ཅིའ༌ ཉིད༌ལོགས༌ཏེ༌ ཨིན༌། ལོང༌ཤིག༌, ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ མོས༌ལམ༌ ཞུས༌།"
ཡེ༌ཤུ༌ ཟུམས༌།
22:47 ནེ༌ 53
47 གཙོ༌བོ༌ ཡེ༌ཤུའི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ལོབ༌ཕྲུགས༌ ཅུག༌ཉིས༌པོའེ༌ ནང༌ནེ༌ ཅིག༌, ཡུ༌དཱ༌ ཟེར༌ཁན༌བོའེ༌ མི༌ཚོགས༌ལ༌ གོ༌ ཅོས༌ཏེ༌ ཡེ༌ཤུའ༌ པུག༌ ཏང༌ང༌ལ༌ ཁོང༌ ཡོད༌ས༌ ཡོངས༌།
48 ཨིན༌ནའང༌ ཡེ༌ཤུའི༌ ཁོའ༌ མོལས༌, "ཡུ༌དཱ༌, ཁྱོ༌རང༌ངི༌ པུག༌ ཏངས༌ཏེ༌ མི༌རིགས༌སི༌བུའ༌ ངོ༌ལོག༌ ཅོའ༌དའ༌?"
49 ཡེ༌ཤུའི༌ ལོབ༌ཕྲུགས༌གུན༌ནི༌ བྱུང༌ཅེས༌ཅན༌བོ༌ ཐོང༌ང༌ཅིག༌ ཁོང༌གུན༌ནི༌ ཟེརས༌, "གཙོ༌བོ༌ལེ༌, ང༌ཞའེ༌ ར༌འི༌ གྱབ༌བ༌?"
50 ཡང༌ ཁོང༌ ཅིག༌ཅིག༌གི༌ བླ༌མ༌ ཆེན༌མོའེ༌ ཡོག༌པོའ༌ ར༌འི༌ གྱབས༌ཏེ༌ ཁོའེ༌ ནམ༌ཅོག༌ ཡས༌པ༌ ཅད༌ཏངས༌།
51 ཨིན༌ནའང༌ ཡེ༌ཤུའི༌ མོལས༌, "ཏ༌ བྲའོག༌, འི༌ཙོགས༌ མ༌ཅོ༌" ཡང༌ ཏེ༌ མི༌བོའེ༌ ནམ༌ཅོག༌པོའ༌ ཆག༌ རྩེས༌ཏེ༌ ཕན༌ཅུག༌ག༌ ཛདས༌།
52 ཏེ༌ནེ༌ ཡེ༌ཤུའི༌ བླ༌མ༌ འུ༌སྐྱོང༌, ཆོད༌ཁང༌ སྲུང༌ཁན༌ནི༌ མག༌མི༌ འུ༌སྐྱོང༌ དང༌ ཡ༌ཧུ༌དཱ༌པའེ༌ འུ༌སྐྱོང༌ ཁོང༌ ཟུམ༌མ༌ ཡོང༌ཁན༌གུན༌ལ༌ མོལས༌, "ར༌འི༌ དང༌ བེར༌ཀ༌ ཁུར༌ཏེ༌ ང༌ ཟུམ༌མ༌ ཡོངས༌ཏེ༌ ཅི༌ ང༌ ཅག༌པ༌ ཨིན༌ནོག༌ག༌?
53 ཆོད༌ཁང༌ངི༌ ནང༌ང༌ ཞག༌ཏང༌ ངའེ༌ ལབ༌ཞ༌ ཏང༌ ཟ༌ནེ༌ ཁྱོ༌ཞའེ༌ ང༌ ཅིའ༌ མ༌ཟུམས༌པིན༌?, ཨིན༌ནའང༌ འི༌བོ༌ ནི༌ ཁྱོ༌ཞ༌གུན༌ནི༌ ཏུས༌ཚོད༌, མུན༌གྲིག༌གི༌ ཝང༌སྲུལ༌ལི༌ ཏུས༌ ཨིན༌ནོག༌།"
པི༌ཏྲར༌རི༌ ཡེ༌ཤུ༌ མི༌ཤེས༌ཟུན༌ ཏངས༌།
22:54 ནེ༌ 65
54 ཏེ༌ནེ༌ ཆོད༌ཁང༌ སྲུང༌ཁན༌གུན༌ནི༌ ཁོང༌ ཟུམས༌ཏེ༌, བླ༌མ༌ ཆེན༌མོའེ༌ ཕོ༌གྲང༌ང༌ ཁྱེརས༌ ཡང༌ པི༌ཏྲར༌ ཐག༌རིང༌ཞིག༌ནེ༌ ཁོང༌ངི༌ གྱབ༌ནེ༌ སོང༌།
55 ཁོང༌གུན༌ནི༌ ཕོ༌གྲང༌ངི༌ གྱང༌སྐོར༌རི༌ ཞུང༌ང༌ མེའ༌ ཏངས༌ཏེ༌ ཏེ༌བོའ༌ ཁོར༌ཏེ༌ དུགས༌, པི༌ཏྲར༌རའང༌ ཁོང༌གུན༌ ཉམ༌པོ༌ དུགས༌།
56 ཏེ༌ནེ༌ ཡོག༌མོ༌ཞིག༌གི༌ པི༌ཏྲར༌ མེའ༌ དུགས༌ཏེ༌ ཐོང༌པ༌ ཁོའ༌ ཞིབ༌ཅ༌ ཅོས༌ཏེ༌ ལྟས༌ ཡང༌ ཟེརས༌, "འི༌ མི༌བོའང༌ ཡེ༌ཤུ༌ ཉམ༌པོ༌ དུག༌པིན༌།"
57 ཨིན༌ནའང༌ པི༌ཏྲར༌རི༌ ཟུན༌ ཏངས༌ཏེ༌ ཟེརས༌, "བུ༌མོ༌, ངའེ༌ ཁོ༌ ཤེས༌ས༌མེད༌།"
58 ཙ༌པིག༌ སྟིང༌ནེ༌ ཡང༌ མི༌ཞིག༌གི༌ ཁོ༌ ཐོང༌ཏེ༌ ཟེརས༌, "ཁྱོ༌རང༌ངའང༌ ཁོང༌གུན༌ནི༌ ཕྲོ༌པ༌ ཅིག༌ ཨིན༌ནོག༌།"
པི༌ཏྲར༌རི༌ ཁོའ༌ ཟེརས༌, "ཛ༌འོ༌, ངའ༌ མན༌།"
59 ཆུ༌ཚོད༌ ཅིག༌ ཛོད༌ ཅིག༌གི༌ སྟིང༌ནེ༌ ཞན༌ མི༌ཞིག༌གི༌ ཟེརས༌, "ཏན༌ཏན༌ འི༌ མི༌བོའང༌ ཁོའེ༌ ཕྲོ༌པ༌གུན༌ནི༌ ནང༌ནེ༌ ཅིག༌ ཨིན༌ནོག༌ ཅིའ༌ཟེར༌ན༌ ཁོ༌ གཱ༌ལིལ༌ལི༌པ༌ ཨིན༌ནོག༌།"
60 ཨིན༌ནའང༌ པི༌ཏྲར༌རི༌ ལན༌ཏངས༌, "ཁྱོ༌རང༌ངི༌ ཅི༌ ཟེར༌ཏེ༌ ཨིན༌ ང༌ ཧ༌གོའ༌ མེ༌རག༌།" ཁོའེ༌ ཏེ༌བོ༌ ཟེར༌ཨིན༌ ཡོད༌ ཟ༌ནེ༌, ཅ༌པོའེ༌ ཅ༌སྐད༌ ཏངས༌།
61 གཙོ༌བོའེ༌ གྱུར༌ཏེ༌ པི༌ཏྲར༌ལ༌ ཟིགས༌། ཏེ༌ནེ༌ པི༌ཏྲར༌ལ༌ གཙོ༌བོའེ༌, "ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌ ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌" མོལ༌ཁན༌བོ༌ ཨིད༌ཏུ༌ ཡོངས༌,
62 ཡང༌ ཁོ༌ ཕི༌ལོག༌ག༌ སོང༌ཏེ༌ མ༌སྲན༌ཏྲེ༌ ངུས༌།
63 ཡེ༌ཤུ༌ སྲུང༌ཁན༌གུན༌ནི༌ ཁོང༌ང༌ ཚིག༌ ཏང༌ཨིན༌ རྡུང༌ཅེས༌ གོ༌ཟུག༌།
64 ཁོང༌གུན༌ནི༌ ཁོང༌ངི༌ མིག༌ ལག༌ཕིས༌ ཉམ༌པོ༌ ཀབས༌ཏེ༌ ལྡབས༌ཏེ༌ ཟེརས༌, "ལུང༌སྟན༌ སལ༌ལའང༌ ཁྱོ༌རང༌ང༌ རྡུང༌ཁན༌བོ༌ སུ༌ ཨིན༌ནོག༌?"
65 ཡང༌ སྤེ༌ར༌ རྩོག༌པོ༌ མང༌པོ༌ ཟེར༌ཏེ༌ ཁོང༌ང༌ ཁྲེལ༌བ༌ སྟནས༌།
ཡེ༌ཤུ༌ ཡ༌ཧུ༌དཱ༌པའེ༌ ཚོགས༌དུའི༌ ནང༌ང༌ ཁྱེརས༌།
22:66 ནེ༌ 71
66 ནམ༌ལངས༌ས༌ཅིག༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཚོགས༌དུ༌ ཚོགས༌ཏེ༌ གཙོ༌བོ༌ ཡེ༌ཤུ༌ ཁོང༌གུན༌ནི༌ དུན༌ལ༌ ཁྱོང༌ཅུགས༌།
67 ཁོང༌གུན༌ནི༌ ཟེརས༌, "ང༌ཞའ༌ ཤོད༌དའང༌, ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌ ཨིན༌ན༌?"
ཁོང༌ངི༌ ལན༌སལས༌, "གལ༌ཏེས༌ ངའེ༌ ཁྱོ༌ཞའ༌ ཟེར༌ན༌ ཁྱོ༌ཞའ༌ དེན༌ མི༌ཤེས༌,
68 ཡང༌ གལ༌ཏེས༌ ངའེ༌ ཏྲི༌ཝ༌ཞིག༌ ཏྲི༌ན༌ ཁྱོ༌ཞའེ༌ ལན༌ མི༌ཏང༌།
69 ཨིན༌ནའང༌ ཏ༌ནེ༌ཕར༌ལ༌ མི༌རིགས༌སི༌བུ༌ ཀུན༌ཝང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ དུག༌ཨིན༌།"
70 ཁོང༌ ཚང༌མའེ༌ ཟེརས༌, "ཁྱོ༌རང༌ དཀོན༌མཆོག༌གི༌ སྲས༌ ཨིན༌ན༌?" ཁོང༌ངི༌ ལན༌སལས༌ "ཁྱོ༌ཞའེ༌ ཟེར༌ཁན༌བོ༌ ང༌ ཨིན༌།"
71 ཏེ༌ནེ༌ ཁོང༌གུན༌ནི༌ ཟེརས༌, "ང༌དང༌ང༌ འི༌ སང༌ མང༌ང༌ སྤང༌པོ༌ ཅི༌ གོས༌ཨིན༌? ཁོའེ༌ ཟེར༌ཁན༌བོ༌ ང༌དང༌གུན༌ནི༌ ཚོར༌།"