ཡོ༌ཧཱ༌ནན༌ནི༌ ཆག༌བྲིས༌ ཉིས༌པ༌།
ཡོ༌ཧཱ༌ནན༌ནི༌ ཆག༌བྲིས༌ ཉིས༌པའེ༌ སྐོར༌།
འི༌ ཆག༌བྲིས༌ བྲིས༌ ཚུལ༌བོ༌ ཡོ༌ཧཱ༌ནན༌ནི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌ དང༌, ཡོ༌ཧཱ༌ནན༌ནི༌ ཆག༌བྲིས༌ ཏང༌པོ༌ ཉམ༌པོ༌ ཟོབས༌ཤེས༌ ཡང༌, སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ སྤང༌པོ༌ ཏང༌ཅེས༌གུན༌ནེ༌, འི༌ ཆག༌བྲིས༌ གཙོ༌བོ༌ ཡེ༌ཤུའི༌ སྐུ༌ཚབས༌ ཡོ༌ཧཱ༌ནན༌ནི༌ བྲིའ༌ ཛད༌ཁན༌བོ༌ ང༌དང༌གུན༌ལ༌ ཧ༌གོའ༌ནོག༌།
ཆོས༌སི༌ ནང༌ང༌ ཁས༌པ༌གུན༌ནེ༌ ང༌དང༌གུན༌ལ༌ འི༌ ཆག༌བྲིས༌པོ༌ ཡོ༌ཧཱ༌ནན༌ནི༌ ཆག༌བྲིས༌ ཏང༌པོའེ༌ སྟིང༌རང༌ནེ༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌, ཀ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 52 ནེ༌ 62 སི༌ ཉེ༌ཁོར༌ལ༌ ཨིན༌པིན༌།
ཡོ༌ཧཱ༌ནན༌ནི༌ འི༌ ཆག༌བྲིས༌པོ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ བུ༌མོ༌ དང༌, ཁོའེ༌ ཕྲུ༌གུ༌གུན༌ལ༌ བྲིའད༌ མོལ༌ཏེ༌ དུག༌། ཨིན༌ནའང༌ ཆོས༌སི༌ ནང༌ང༌ ཁས༌པ༌ མང༌པོའེ༌ ཡོ༌ཧཱ༌ནན༌ནི༌ ངོས༌པོའ༌ འི༌ ཆག༌བྲིས༌པོ༌ ཆོས༌ཚོགས༌ཤིག༌ག༌ བྲིའ༌ ཛད༌ཏེ༌ ཨིན༌ནོག༌ ཟེར༌ར༌ནོག༌། ཏེ༌ ལྡམ༌ཁན༌ནི༌ བུ༌མོ༌བོ༌ ཆོས༌ཚོགས༌ ཡང༌ ཕྲུ༌གུ༌གུན༌ ཏད༌པ༌ཅན༌ནི༌ མི༌ རེ༌རེ༌ ཨིན༌ཁན༌བོ༌ ལྟན༌ན༌ནོག༌། འི༌ ཆག༌བྲིས༌ ཐོབ༌ཁན༌གུན༌ བུ༌མོ༌ ཡ༌ ཕྲུ༌གུ༌གུན༌ ཡ༌ ཆོས༌ཚོགས༌ སུ༌ཞིག༌ ཨིན༌ནའང༌, འི༌བོའེ༌ ལོན༌ ཡང༌ གྱུན༌ཚན༌བོ༌ ཙོགས༌ ཡོད༌ཏེ༌ ཨིན༌ནོག༌། ཡང༌ འི༌བོ༌ ང༌དང༌ངི༌ ཏད༌པའེ༌ ཕིའ༌ ཕན༌ཐོགས༌ཅན༌ ཨིན༌ནོག༌།
ཡོ༌ཧཱ༌ནན༌ནི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌ ནི༌, སིལ༌ཁན༌གུན༌ལ༌ ཏད༌པའེ༌ ནང༌ང༌ སྟོབས༌ཅན༌ གྱུར༌ཅེས༌ ཡང༌ མ༌ཤི༌ཀའེ༌ སྐོར༌ལ༌ ཟུས༌མའེ༌ ལབ༌ཞའ༌ ཏང༌ཁན༌གུན༌ནེ༌ སྤང༌པུད༌ཅེས༌པོ༌ ཨིན༌པིན༌།།
1
ཡོ༌ཧཱ༌ནན༌ནི༌ ཇུ༌ ཞུས༌།
1:1 ནེ༌ 3
1 ང༌ ཆོས༌ཚོགས༌སི༌ ལམ༌སྟོན༌པའེ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ བུ༌མོ༌ དང༌ ཁོའེ༌ ཕྲུ༌གུ༌གུན༌ལ༌ བྲིའད༌། ཁྱོ༌རང༌གུན༌ལ༌ ངའེ༌ དེན༌བའ༌ ཅེས༌པ༌ ཅོའད༌, ཡང༌ ང༌ ཅིག༌པོ༌ མན༌པ༌ དེན༌བའེ༌ ལབ༌ཞ༌གུན༌ གྱུས༌ཡོད༌ཁན༌ནི༌ སྤུན༌གུན༌ནིའང༌,
2 ཅིའ༌ཟེར༌ན༌ དཀོན༌མཆོག༌གི༌ དེན༌བ༌བོ༌ ང༌དང༌གུན༌ནི༌ ནང༌ང༌ ནས༌ཏེ༌ ཡང༌ ཏུས༌གྱུན༌ ང༌དང༌གུན༌ ཉམ༌པོ༌ ལུས༌ཨིན༌།
3 དེན༌བ༌ དང༌ ཅམས༌པའེ༌ ནང༌ང༌ མི༌ཚེ༌ ཕུད༌ ཟ༌ནེ༌, དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ གུན༌ནི༌ ཆོགས༌ནེ༌, ཐུག༌རྗེ༌, སྙིང༌རྗེ༌ དང༌ ཞི༌དེ༌ ང༌དང༌གུན༌ལ༌ ཐོབ༌ཤིག༌།
དེན༌བ༌ དང༌ ཅམས༌པ༌།
1:4 ནེ༌ 11
4 ཁྱོ༌རང༌ངི༌ ཕྲུ༌གུ༌ ཁ༌ཅིག༌, ཡབ༌ དཀོན༌མཆོག༌གི༌ ང༌དང༌གུན༌ལ༌ བཀའ༌ སལ༌ཁན༌ ནང༌ཞིན༌, ཁོང༌ངི༌ དེན༌བའེ༌ཀ༌ གྲུལ༌དུག༌ ཟེར༌ཏེ༌ ཚོར༌ར༌ཅིག༌, ངའ༌ སྲན༌ཏྲེ༌ ཐད༌།
5 ཏ༌ ངའེ༌ བཀའ༌ སོ༌མ༌ཞིག༌གི༌ སྐོར༌ལ༌ མ༌བྲིའ༌, གོ༌མ༌ནེ༌ ཕར༌ལ༌ ང༌དང༌གུན༌ ཉམ༌པོ༌ ཡོད༌ཁན༌བོའེ༌ སྐོར༌ལ༌ བྲིའད༌། ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།
6 ཡང༌ ཅམས༌པ༌བོ༌ ནི༌, ང༌དང༌གུན༌ དཀོན༌མཆོག༌གི༌ བཀའ༌གུན༌ལ༌ ཁའ༌ཉན༌ཏེ༌ གྲུལ༌ཅེས༌པོ༌ ཨིན༌ནོག༌། ཁྱོ༌ཞ༌གུན༌ནི༌ གོ༌མ༌ནེ༌ ཕར༌ལ༌ ཚོར༌ཁན༌ནི༌ བཀའ༌བོ༌ ནི༌, ཁྱོ༌ཞ༌གུན༌ ཏེ༌ ཅམས༌པའེ༌ ནང༌ང༌ གྲུལ༌གོ༌ཤེས༌པོ༌ ཨིན༌ནོག༌།
7 གཙོ༌བོ༌ ཡེ༌ཤུ༌ ངོས༌པོའ༌ ཟུགས༌སི༌ ནང༌ང༌ ཕེབས༌ཁན༌བོའ༌ ཏད༌པ༌ མ༌ཅོ༌ཁན༌ནི༌ གོབ༌སྐོར༌ཁན༌ མང༌པོ༌ཞིག༌, འི༌ ཇིག༌རྟེན༌ནི༌ ནང༌ང༌ བིང༌ཏེ༌ ཨིན༌ནོག༌། ཏེ༌ཙོགས༌སི༌ མི༌ཚང༌མ༌ གོབ༌སྐོར༌ཁན༌ དང༌ མ༌ཤི༌ཀའེ༌ གྲ༌འོ༌གུན༌ ཨིན༌ནོག༌།
8 དཀོན༌མཆོག༌གི༌ ཕིའ༌ ཁྱོ༌ཞའེ༌ ཞབ༌སྟོག༌ ཞུ༌ཁན༌གུན༌, ཏོན༌མེད༌ལ༌ མ༌ཆའ༌, དཀོན༌མཆོག༌གི༌ ཆོགས༌ནེ༌ ཚང༌རིག༌ སོལ༌རས༌ ཐོབ༌ཅེས༌སི༌ ཕིའ༌ ཁྱོ༌ཞ༌གུན༌ ཤང༌ ཅོ༌ཤིག༌།
9 མ༌ཤི༌ཀའེ༌ ལབ༌ཞ༌གུན༌ནི༌ སང༌ ཐལ༌ཏེ༌ སོང༌ཏེ༌, ཁོང༌ངི༌ ལབ༌ཞའེ༌ ནང༌ང༌ མ༌ལུས༌ཁན༌གུན༌ནི༌ བྲེལ༌བོ༌ དཀོན༌མཆོག༌ ཉམ༌པོ༌ མེད༌པ༌ ཨིན༌ནོག༌། མ༌ཤི༌ཀའེ༌ ལབ༌ཞའེ༌ ནང༌ང༌ ལུས༌ཁན༌གུན༌ནི༌ བྲེལ༌ དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཉིས༌ཀོ༌ ཉམ༌པོ༌ ཡོད༌ཏེ༌ ཨིན༌ནོག༌།
10 གལ༌ཏེས༌ སུ༌ཞིག༌ ཁྱོ༌ཞ༌གུན༌ནི༌ཀ༌ ཡོངས༌ཏེ༌ མ༌ཤི༌ཀའེ༌ ལབ༌ཞ༌ མན༌པ༌, ཡང༌ ལབ༌ཞ༌ སོ༌སོ༌ རིག༌ ལབ༌ན༌, ཏེ༌གུན༌ རང༌ངི༌ ཁང༌པའེ༌ ནང༌ང༌ མ༌ཉེན༌, མ༌ཚད༌ ཁོང༌གུན༌ལ༌ ཇུའང༌ མ༌ཅོ༌ཤིག༌།
11 སུ༌ཞིག༌གི༌ འི༌ཙོགས༌སི༌ མི༌གུན༌ལ༌ གའ༌སུས༌ ཞུ༌ན༌, ཏེ༌ མི༌བོ༌, ཁོའེ༌ ལས༌ ངན༌པའེ༌ ནང༌ང༌ དྲེས༌ཏེ༌ ཨིན༌ནོག༌།
སྟིང༌ཇུག༌གི༌ ཞལ༌ཏ༌།
1:12 ནེ༌ 13
12 ང༌ ཟེར༌ཅེས༌ ཏ༌ མང༌པོ༌ རག༌, ཨིན༌ནའང༌ ང༌ ནག༌ཙ༌ དང༌ ཉི༌གུ༌ ཉམ༌པོ༌ བྲི༌ཅེས༌པོ༌ ལྡེ༌མོ༌ཞིག༌ ཚོར༌ར༌ མེ༌རག༌། ཁྱོ༌ཞ༌གུན༌ནི༌ ཕྲོའ༌ ཡོངས༌ཏེ༌ དུན༌ལ༌ སྤེ༌ར༌ ཏང༌ཅེས༌སི༌ རེ༌ཝ༌ ཅོའད༌། ཏེ༌ནེ༌ ང༌དང༌གུན༌ནི༌ ཐད༌པོ༌ དྲན༌དྲ༌ གྲུབ༌ཨིན༌།
13 དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཁྱོ༌རང༌ངི༌ སྲིང༌མོའེ༌ ཕྲུ༌གུ༌གུན༌ནི༌ ཁྱོ༌ཞ༌གུན༌ལ༌ ཇུ༌ ཞུ༌རུག༌༎