5
ནམ༌ཁའེ༌ ཟུགས༌པོ༌།
5:1 ནེ༌ 10
1 ང༌དང༌གུན༌ལ༌ གྱུས༌ཨིན༌ནོག༌, ང༌དང༌ དུག༌ཁན༌ནི༌ འི༌ ཇིག༌རྟེན༌ནི༌ ཀུར༌བོ༌ མེད༌ཁན༌ ཆ༌ན༌, ང༌དང༌གུན༌ལ༌ ཐའ༌མེད༌ཁན༌ནི༌ ཁང༌པ༌ཞིག༌ ནམ༌ཁའེ༌ ནང༌ང༌ ཡོད༌ཏེ༌ ཨིན༌ནོག༌, ཀ༌བོ༌ མིའི༌ ལག༌པ༌ནེ༌ མ༌ཅོའ༌ དཀོན༌མཆོག༌ ཁོང༌རང༌ངི༌ ང༌དང༌གུན༌ནི༌ ཕིའ༌ ཛད༌ཏེ༌ ཨིན༌ནོག༌།
2 ང༌དང༌གུན༌ དག༌ས༌ ཡོད༌ཁན༌ནི༌ ཟུགས༌པོའེ༌ ནང༌ང༌ འུ༌ཐུགས༌ཏེ༌, ཀོས༌ལག༌ སོ༌མ༌ ཙོགས༌ལ༌ ནམ༌ཁའེ༌ ཟུགས༌པོ༌བོ༌ གོན༌ཅེས༌ལ༌ རིངས༌ཨིན༌ ཨིན༌ནོག༌།
3 ང༌དང༌གུན༌ནི༌ ནམ༌ཁའེ༌ ཟུགས༌པོ༌བོ༌ གོན༌ཅེས༌ ཨིན༌ པ༌སང༌, ལྗེར༌ཉལ༌ལ༌ མི༌ལུས༌།
4 འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌ ཟ༌ནེ༌, ང༌དང༌གུན༌ འུ༌ཐུག༌ག༌ནོག༌, ཨིན༌ནའང༌ ང༌དང༌གུན༌ འི༌ ཚང༌མའེ༌ ཀ༌ནེ༌ ཐར༌ཅེས༌ལ༌ ཤི༌ཉིན༌ མ༌གྲོའ༌, འི༌ སྟགས༌པ༌ མེད༌ཁན༌ནི༌ ཟུགས༌པོ༌བོ༌, ཐའ༌མེད༌པའེ༌ མི༌ཚེའེ༌ ནང༌ང༌ གྱུར༌ཅེས༌སི༌ ཕིའ༌, ནམ༌ཁའེ༌ ཟུགས༌པོ༌གུན༌ གོན༌ཉིན༌ གྲོའ༌ནོག༌།
5 ཏེ༌གུན༌ནི༌ ཕིའ༌ དཀོན༌མཆོག༌ ཁོང༌རང༌ངི༌ ང༌དང༌གུན༌ གྲལ༌གྲིག༌ ཅོའ༌ ཛད༌ཏེ༌ ཨིན༌ནོག༌, ཡང༌ ང༌དང༌གུན༌ལ༌ དམ༌པའེ༌ ཐུག༌ཉིད༌ སལ༌ལ༌ ཛད༌ཏེ༌, ཁོང༌ངི༌ སལ༌ལ༌ ཛད༌ཅེས༌ ཚང༌མ༌ ཏན༌ཏན༌ ཅོའ༌ ཛད༌ཏེ༌ ཨིན༌ནོག༌།
6 ཏེ༌བོའེ༌ཕིའ༌ ང༌ཞ༌གུན༌ལ༌ ཏུས༌གྱུན༌ ལོ༌ཁྱེལ༌ རག༌, འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ ཡོད༌ ཟ༌ནེ༌, ང༌ཞ༌གུན༌ གཙོ༌བོ༌ ཉམ༌པོ༌ ནམ༌ཁའེ༌ ཁམ༌པའེ༌ ནང༌ང༌ མ༌དུག༌ག༌ ཨིན༌ཁན༌བོ༌ གྱུས༌ཨིན༌ནོག༌།
7 ང༌ཞ༌གུན༌ནི༌ མི༌ཚེ༌ ཐོང༌ཁན༌བོའེ༌ཀ༌ མན༌པ༌, དཀོན༌མཆོག༌གི༌ ནང༌ང༌ ཨིད༌ཤེས༌ ཅོ༌ཨིན༌ཞིག༌ ཕུད༌དད༌།
8 འོ༌ན༌ ང༌ཞ༌གུན༌ལ༌ ཏན༌ཏན༌ ལོ༌ཁྱེལ༌ རག༌, ཡང༌ ངའེ༌ ཟེར༌རད༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌ག༌ སང༌, ནམ༌ཁའེ༌ ཁང༌པའེ༌ ནང༌ང༌ གཙོ༌བོ༌ ཡེ༌ཤུ༌ ཉམ༌པོ༌ དུག༌ག༌ལ༌ ཐད༌ད༌རག༌།
9 ཏེ༌བོའེ༌ཕིའ༌ ང༌ཞ༌གུན༌ འི༌ ཟུགས༌པོའེ༌ ནང༌ང༌ དུག༌ཨིན༌ ཡོད༌གྲོ༌ ཡ༌ ཏེ༌བོ༌ནེ༌ ཐག༌རིང༌ང༌, ཡེ༌ཤུ༌ ཐུགས༌ཐད༌ ཅུག༌ཅེས༌པོ༌ ང༌ཞའེ༌ མིག༌ཞི༌ ཨིན༌།
10 ཅིའ༌ཟེར༌ན༌ ཞག༌ཤིག༌ ང༌དང༌ ཚང༌མ༌ མ༌ཤི༌ཀའེ༌ སྐུན༌དུན༌ལ༌, ཁྲིམས༌ཅད༌དི༌ ཕིའ༌, ལང༌གོས༌ས༌ནོག༌, ཏེ༌ནེ༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ ཟང༌པོ༌ ཡ༌ ངན༌པ༌ ཅོ༌ཁན༌གུན༌ནི༌ བྲས༌བུ༌ ང༌དང༌ རེ༌རེའ༌ སྨིན༌ན༌ནོག༌།
མ༌ཤི༌ཀ༌ གྱུད༌ཏེ༌ དཀོན༌མཆོག༌ ཉམ༌པོ༌ བྲེལ༌།
5:11 ནེ༌ 6:2
11 གཙོ༌བོའེ༌ ཁྲིམས༌ཅད༌ ཙམ༌ཤིག༌ ཀགས༌པོ༌ ཡོད༌ཁན༌བོ༌ ང༌ཞའ༌ གྱུས༌ཡོད༌ པ༌སང༌, ང༌ཞའེ༌ ཞན༌མ༌གུན༌ལ༌ མ༌ཤི༌ཀའེ༌ ནང༌ང༌ ཏད༌པ༌ ཁྱོང༌ཅུག༌ཅེས༌སི༌ རྩོན༌གྲུས༌ གྱལ༌ལ༌ ཅོའད༌། ང༌ཞའེ༌ སྙིང༌ངི༌ ནང༌ང༌ ཡོད༌ཁན༌བོ༌, དཀོན༌མཆོག༌གི༌ སལ༌པོ༌ ཁྱེན༌ན༌ ཛད༌ད༌ནོག༌, ཡང༌ ཁྱོ༌ཞ༌གུན༌ནིའང༌ ཤེ༌ཤེས༌སི༌ རེ༌ཝ༌ ཅོའད༌།
12 ང༌ཞའེ༌ ཡང༌སྐྱར༌ ང༌ཞ༌རང༌ངི༌ སྐོར༌ལ༌ ཕོ༌སོ༌ ཅོ༌རུག༌ག༌? ཅོའ༌མེད༌། ང༌ཞའེ༌ ཁྱོ༌ཞ༌གུན༌ལ༌ ང༌ཞའེ༌ སྐོར༌ལ༌ ཐད༌པོ༌ ཅོ༌ཅེས༌སི༌ སྐབས༌ ཏང༌ངད༌, ཏེ༌ནེ༌ ཁྱོ༌ཞ༌གུན༌ནི༌ སེམས༌ དྲང༌པོ༌ ཡོད༌ཅེས༌ལ༌ ཕོ༌སོ༌ མ༌ཅོའ༌, རང༌ངི༌ ལས༌གུན༌ནི༌ཀ༌ ཕོ༌སོ༌ ཅོ༌ཁན༌གུན༌ལ༌ ལན༌ཏང༌ཉན༌ཨིན༌།
13 གལ༌ཏེས༌ ང༌ཞའེ༌ མི༌ སྙོན༌བ༌གུན༌ ཙོགས༌ལ༌ སྤེ༌ར༌ ཏང༌དུག༌ སམ༌མད༌ན༌, ཏེ༌བོ༌ དཀོན༌མཆོག༌ག༌ སྤལ༌ ཐོབ༌ཅེས༌ལ༌ ཅོའད༌། ཡང༌ གལ༌ཏེས༌ ང༌ཞའེ༌ ཤེས༌རབས༌ཅན༌ནི༌ ལབ༌ཞ༌ ཏང༌དུག༌ སམ༌ན༌, ཏེ༌བོ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌།
14 མ༌ཤི༌ཀའེ༌ ཅམས༌པའེ༌ ང༌ཞའ༌ ཏེ༌གུན༌ ཅོ༌ཅུག༌དུག༌། ང༌དང༌གུན༌ནི༌ མ༌ཤི༌ཀ༌ ང༌དང༌ ཚང༌མའེ༌ ཏོན༌ལ༌ ཀྲོངས༌ཏེ༌ ཨིན༌ཁན༌བོའ༌ ཏད༌པ༌ ཅོས༌པ༌, ང༌དང༌གུན༌ནི༌ ང༌དང༌རང༌ངི༌ སྙིང༌པ༌ མི༌ཚེ༌ ཕུད༌ཚུལ༌བོ༌, ཤི༌ཏེ༌ ཨིན༌ཁན༌བོའེ༌ཀའང༌, ཏད༌པ༌ ཅོའ༌ནོག༌།
15 མ༌ཤི༌ཀ༌ ཚང༌མའེ༌ ཕིའ༌ ཀྲོངས༌། ཁོང༌ངི༌ ཏེ༌བོ༌ ཅོའ༌ ཛདས༌ ཅིའ༌ཟེར༌ན༌, མི༌ཚེ༌ སོ༌མ༌ ཐོབ༌ཁན༌གུན༌ནི༌ ཁོ༌རང༌གུན༌ནི༌ ཕིའ༌, མི༌ཚེ༌ མ༌ཕུད༌ད༌, མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ལང༌ང༌ ཛད༌ཁན༌བོའེ༌ ཕིའ༌ མི༌ཚེ༌ ཕུད༌ཅེས༌སི༌ ཐུགས༌དོད༌ ཛད༌ད༌ནོག༌།
16 ཏ༌ ང༌ཞའེ༌ ཇིག༌རྟེན༌པའེ༌ སམ༌ཚུལ༌ ནང༌ཞིན༌ མི༌ཞིག༌ ཟང༌པོ༌ ཡ༌ ངན༌པ༌ ཨིན༌ནོག༌ ཟེར༌ཏེ༌ ཐག༌ཅད༌ད༌ མེད༌། ཏུས༌ཤིག༌ག༌ ང༌ཞ༌གུན༌ནིའང༌ མ༌ཤི༌ཀའ༌ ཏེན༌ན༌ ཙོགས༌ལ༌ སམ༌མད༌པིན༌, ཏ༌ དག༌ས༌ ང༌ཞ༌གུན༌ནི༌ ཏེ༌བོ༌ ཅོའ༌མེད༌།
17 ཏེ༌བོའེ༌ ཏོན༌ཏག༌པོ༌ ནི༌, མ༌ཤི༌ཀའེ༌ ཨིན༌ཁན༌གུན༌ མི༌ སོ༌མ༌ཞིག༌ གྱུར༌ཏེ༌ ཨིན༌ནོག༌། མི༌ཚེ༌ སྙིང༌པ༌བོ༌ མེད༌ཁན༌ ཡང༌ སོ༌མ༌ཞིག༌ གོ༌ཟུག༌ སོང༌ཏེ༌ ཨིན༌ནོག༌།
18 ཏེ༌ ཚང༌མ༌ དཀོན༌མཆོག༌གི༌ ཆོགས༌ནེ༌ སྐྱེས༌ ཨིན༌ནོག༌, ཁོང༌ངི༌ མ༌ཤི༌ཀ༌ གྱུད༌ཏེ༌, ང༌དང༌གུན༌ ཁོང༌རང༌ ཡོད༌ས༌ ལོགས༌ཏེ༌ ཁྱོང༌ང༌ ཛད༌ཏེ༌ ཨིན༌ནོག༌། ཡང༌ དཀོན༌མཆོག༌གི༌ ང༌ཞའ༌, ཁོང༌ དང༌ མི༌གུན༌ནི༌ ནང༌ང༌ ཐུན༌བྲེལ༌ ཅོ༌ཅེས༌སི༌ ཁག༌པོ༌ ཀལ༌ལ༌ ཛད༌ཏེ༌ ཨིན༌ནོག༌།
19 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ འི༌ ཇིག༌རྟེན༌པ༌གུན༌ ཁོང༌རང༌ ཉམ༌པོ༌ ཐུན༌བྲེལ༌ ཅོའ༌ ཛད༌ཏེ༌ ཏེ༌གུན༌ནི༌ སྡིག༌པ༌གུན༌ ཁོ༌རང༌གུན༌ནི༌ གྱབ༌གལ༌ལ༌ རྩིའ༌ མ༌ཛདས༌། ཡང༌ ཁོང༌ངི༌ ང༌ཞ༌གུན༌ལ༌ འི༌ ཐུན༌བྲེལ༌ལི༌ ལོན༌བོ༌ ཞན༌མའ༌ ཤད༌ཅེས༌ལ༌ སལ༌ལ༌ ཛདས༌།
20 ཏེ༌བོའེ༌ཕིའ༌ ང༌ཞ༌གུན༌ མ༌ཤི༌ཀའེ༌ སྐུ༌ཚབས༌ ཨིན༌, ཡང༌ ང༌ཞའ༌ གྱུད༌ཏེ༌ དཀོན༌མཆོག༌གི༌, ཇིག༌རྟེན༌པ༌གུན༌ལ༌ ཞུ༌ཝ༌ ཕུལ༌ལ༌ནོག༌། མ༌ཤི༌ཀའེ༌ ཚབས༌ ཅོས༌ཏེ༌ ང༌ཞའེ༌ ཞུ༌ཝ༌ ཕུལ༌ལད༌ 'ཇུ༌ཇུ༌, དཀོན༌མཆོག༌ ཡོད༌ས༌ ལོགས༌ཏེ༌ ཡོང༌ཤིག༌'།
21 དཀོན༌མཆོག༌གི༌ སྡིག༌པ༌ མ༌ནེ༌ མེད༌ཁན༌ནི༌ མ༌ཤི༌ཀ༌ ང༌དང༌གུན༌ནི༌ སྡིག༌པའེ༌ ཕིའ༌ ཆོད༌པའེ༌ ཚུལ༌ལ༌ ལྡམ༌མ༌ ཛདས༌། ང༌དང༌གུན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ རྩི༌ཅེས༌ལ༌ ཏེ༌བོ༌ ཅོའ༌ ཛདས༌།