3
1 ང༌ཞའེ༌ ཡང༌སྐྱར༌ ང༌ཞ༌རང༌ངི༌ཀ༌ ཕོ༌སོ༌ ཅོ༌ཅེས༌ གོ༌ཟུག༌ ཅོས༌ཏེ༌ ཨིན༌ནོག༌ག༌? ཡ༌ ང༌ཞའ༌ ཞན༌གུན༌ ཙོགས༌ལ༌ ཁྱོ༌ཞའ༌ ལྟན༌ཅེས༌ལ༌ ཡ༌ ཁྱོ༌ཞ༌གུན༌ནི༌ ཀ༌ནེ༌ གྱབ༌ཤེད༌དི༌ ཨི༌གེ༌ སྒོས༌དོམ༌ ཡོད༌ཏེ༌ ཨིན༌ནོག༌ག༌? ཏན༌ཏན༌ མི༌གོས༌།
2 ཏེ༌ ཨི༌གེ༌བོ༌ ནི༌ ང༌ཞའེ༌ སྙིང༌ངི༌ཀ༌ བྲི༌ཁན༌ ཁྱོ༌ཞ༌རང༌གུན༌ ཨིན༌, ཀ༌བོ༌ ཚང༌མའེ༌ སིལ༌ཏེ༌ ང༌ཞའེ༌ ཁྱོ༌ཞའེ༌ ཕྲོའ༌ ཅོས༌ཁན༌ནི༌ ལས༌ ཟང༌པོ༌གུན༌ ཧ༌གོ༌ཨིན༌།
3 མ༌ཤི༌ཀའེ༌ ཆོགས༌ནེ༌ ང༌ཞའེ༌ ལས༌གུན༌ནི༌ བྲས༌བུ༌ ལྟན༌ཁན༌ནི༌ ཨི༌གེ༌, ཁྱོ༌ཞའ༌ ཨིན༌ནོག༌། ཏེ༌ ཨི༌གེ༌ ཉི༌གུ༌ ཉམ༌པོ༌ མན༌པ༌, དཀོན༌མཆོག༌ སོན༌པོའེ༌ ཐུག༌ཉིད༌ ཉམ༌པོ༌ བྲིས༌ཏེ༌ ཨིན༌ནོག༌། ཏེ༌བོ༌ བཀའ༌རྒྱ༌ རྕུ༌ ཙོགས༌ལ༌ རྡོའེ༌ཀ༌ སྐོས༌ཏེ༌ མེད༌པ༌, མི༌གུན༌ནི༌ སེམས༌སི༌ ནང༌ང༌ ཡོད༌ཏེ༌ ཨིན༌ནོག༌།
4 ཏེ༌ ཚང༌མ༌ ཟེར༌ཅེས༌སི༌ ནང༌ང༌ ང༌ཞ༌གུན༌ལ༌ ལོ༌ཁྱེལ༌ རག༌, ཅིའ༌ཟེར༌ན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ ནང༌ང༌ ང༌ཞ༌གུན༌ནི༌ ཏད༌པ༌ སྟན༌པོ༌ ཨིན༌།
5 ང༌ཞའེ༌ ཟེར༌ར༌མེད༌, ང༌ཞ༌རང༌ངི༌ ལག༌ག༌ ཞབ༌སྟོག༌ ཞུ༌ཅེས༌སི༌ ཁྱུད༌གུན༌ ཡོད༌, ཨིན༌ནའང༌ དཀོན༌མཆོག༌གི༌ ཆོགས༌ནེ༌ སལ༌ལ༌ ཛད༌ཏེ༌ ཨིན༌།
6 ཁོང༌ངི༌ ང༌ཞ༌གུན༌ལ༌ ཁོང༌རང༌ངི༌ ཆད༌དོན༌ སོ༌མའེ༌ ཞབ༌སྟོག༌ ཞུ༌ཅེས༌སི༌ ཁྱུད༌ སལ༌ལ༌ ཛད༌ཏེ༌ ཨིན༌ནོག༌། འི༌ ཆད༌དོན༌ སོ༌མ༌བོ༌ ནི༌, བྲིས༌ཁན༌ནི༌ ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, དཀོན༌མཆོག༌ ཁོང༌རང༌ངི༌ ཐུག༌ཉིད༌ སལ༌ལ༌ ཛད༌ཅེས༌པོ༌ ཨིན༌ནོག༌། བྲིས༌ཏེ༌ ཡོད༌ཁན༌ནི༌ ཁྲིམས༌ སྙིང༌པ༌བོའེ༌, ཤི༌ཅེས༌ ཁྱོང༌ང༌ནོག༌, ཨིན༌ནའང༌ ཐུག༌ཉིད༌བོའེ༌, མི༌ཚེ༌ སོ༌མ༌ སལ༌ལ༌ནོག༌།
ཆད༌དོན༌ སོ༌མའེ༌ ཟིར༌རྗིད༌།
3:7 ནེ༌ 18
7 ཞན༌ ཏེ༌ཟུག༌ ནས༌ལུག༌ ཟིར༌རྗིད༌ཅན༌ ཉམ༌པོ༌ གོ༌ཟུགས༌ཏེའང༌, རྡོའེ༌ཀ༌ སྐོས༌ཁན༌ བཀའ༌རྒྱ༌ རྕུ༌བོའེ༌, ཤི༌ཅེས༌སི༌ ཆོགས༌ལ༌ ཁྲིདས༌, ཀ༌བོ༌ ཨིས༌ར༌ཨེལ༌པ༌གུན༌ནི༌ ལུང༌སྟོན༌པ༌ མོ༌ཟེས༌སི༌ ལྡོང༌ང༌ ལྟ༌ མ༌ཉན༌, ཅིའ༌ཟེར༌ན༌ ཁོང༌ངི༌ ལྡོང༌ནེ༌ དཀོན༌མཆོག༌གི༌ ཟིར༌རྗིད༌ ལྡང༌ཤན༌ བིང༌ངད༌པིན༌, ཨིན༌ནའང༌ ལྡངས༌པོ༌ ཀུ༌ལེ༌ ཀུ༌ལེའ༌ ཡོལ༌ཨིན༌ སོང༌།
8 ཏ༌ དམ༌པའེ༌ ཐུག༌ཉིད༌དི༌ མི༌ཚེ༌ སལ༌ཅེས༌པོའེ༌ ཅི༌ ང༌དང༌གུན༌ནི༌ འི༌ ཆད༌དོན༌ སོ༌མའེ༌ ནང༌ང༌ མངས༌ཏེའང༌ ཟིར༌རྗིད༌ མང༌པོའེ༌ རེ༌ཝ༌ ཅོ༌ མ༌གོས༌ས༌?
9 ཁྲིམས༌ཅད༌ ཁྱོང༌ཁན༌ནི༌ བཀའ༌རྒྱ༌ རྕུ༌བོ༌ ཟིར༌རྗིད༌ཅན༌ཞིག༌ ཡོད༌ན༌, ཏེ༌ནེ༌ དཀོན༌མཆོག༌གི༌ སྐུན༌དུན༌ལ༌ ང༌དང༌ དྲང༌པོ༌ ཛད༌ཁན༌ནི༌ ཆད༌དོན༌ སོ༌མ༌བོའ༌, ཙམ༌ཤིག༌གི༌ ཟིར༌རྗིད༌ མེད༌གྲོ༌།
10 ངོས༌པོའ༌, གོ༌མའེ༌ ཟིར༌རྗིད༌པོ༌ ཆད༌དོན༌ སོ༌མའེ༌ ཧ༌ལས༌ཤེས༌སི༌ ཟིར༌རྗིད༌པོ༌ ཉམ༌པོ༌ ལྡུར༌ན༌, ཟིར༌རྗིད༌ མ༌ནེ༌ མེད༌ཁན༌ ཙོགས༌ ཨིན༌ནོག༌།
11 ཡང༌ གལ༌ཏེས༌ ཏེ༌ ཡོལ༌ཨིན༌ ཆའ༌ཁན༌བོ༌ ཟིར༌རྗིད༌ ཉམ༌པོ༌ བྱུངས༌ཏེ༌ ཨིན༌ན༌, ཏེ༌ནེ༌ ཏུས༌གྱུན༌ ལུས༌ཤེས༌སི༌ ཆད༌དོན༌ སོ༌མའ༌, ཙམ༌ཤིག༌གི༌ ཟིར༌རྗིད༌ མང༌ང༌ མེད༌གྲོ༌།
12 ཏེ༌ ཆད༌དོན༌ སོ༌མ༌བོའེ༌ ང༌ཞ༌གུན༌ལ༌ ཏེ༌ཟམ༌ ལོ༌ཁྱེལ༌ ཏངས༌ པ༌སང༌, ང༌ཞ༌གུན༌ ཆོས༌ཤད༌ཅེས༌སི༌ ནང༌ང༌ མང༌ང༌ ཧམ༌པ༌ཅན༌ གྱུར༌།
13 ང༌ཞ༌གུན༌ མོ༌ཟེས༌ ཙོགས༌ མན༌, ཁོའེ༌ ཨིས༌ར༌ཨེལ༌པ༌གུན༌ནི༌ ཁོ༌རང༌ངི༌ ལྡོང༌ངི༌ ཀ༌ནེ༌ ཀུ༌ལེའ༌ ཡོལ༌ཏེ༌ ཆེན༌ ཡོད༌ཁན༌ནི༌ ཟིར༌རྗིད༌པོའ༌ མི༌ལྟ༌ཅེས༌སི༌ ཕིའ༌, ཁོ༌རང༌ངི༌ ལྡོང༌བོ༌ རས༌ ཉམ༌པོ༌ ཀབས༌།
14 ཨིན༌ནའང༌ ཏེ༌གུན༌ནི༌ སྙིང༌གུན༌ སྐྱོང༌པོ༌ གྱུར༌། ཏན༌ཏན༌ལ༌ དག༌སའང༌ ནམ༌ ཆད༌དོན༌ སྙིང༌པ༌བོ༌ སིལ༌ལ༌ཅིག༌, ཁོང༌གུན༌ལ༌ ཧ༌གོ༌ ཐུབ༌བ༌ མ༌ནོག༌ ཀ༌ཟུག༌ མོ༌ཟེས༌སི༌ ལྡོང༌ང༌ ཀབ༌ཁན༌བོ༌ ཙོགས༌། མ༌ཤི༌ཀ༌ ཅིག༌པོའེ༌ ནང༌ང༌ ཏད༌པ༌ ཅོ༌ཅེས༌པོའེ༌, ཏེ༌ ཀབ༌ཁན༌བོ༌ ཐེན༌ན༌ ཛད༌ཨིན༌།
15 འོ༌ན༌, དི༌རིང༌ངའང༌ མོ༌ཟེས༌སི༌ ཁྲིམས༌གུན༌ སིལ༌ ཟ༌ནེ༌, ཁོང༌གུན༌ནི༌ སྙིང༌གུན༌ ཀབས༌ཏེ༌ ཁོང༌གུན༌ལ༌ ཧ༌གོ༌ ཐུབ༌བ༌ མ༌ནོག༌།
16 ཨིན༌ནའང༌ སུ༌ཞིག༌གི༌ གཙོ༌བོའེ༌ ནང༌ང༌ ཏད༌པ༌ ཁྱོང༌ང༌ཅིག༌, ཀབས༌ཏེ༌ ཡོད༌ཁན༌བོ༌ ཐེན༌ན༌ ཛད༌ད༌ནོག༌།
17 ཏ༌ གཙོ༌བོ༌ ནི༌ ཐུག༌ཉིད༌ ཞུགས༌ཏེ༌ ཨིན༌ནོག༌, ཡང༌ དམ༌པའེ༌ ཐུག༌ཉིད༌ ཡོད༌ཁན༌གུན༌ལ༌ ཏེ༌ ཁྲིམས༌གུན༌ནི༌ ཀ༌ནེ༌ རང༌ཝང༌ ཡོད༌ཏེ༌ ཨིན༌ནོག༌།
18 ང༌དང༌ ཚང༌མའེ༌ ཀ༌ནེ༌ ཀབས༌ཏེ༌ ཡོད༌ཁན༌བོ༌ ཐེན༌ པ༌སང༌, ང༌དང༌གུན༌ནི༌ ཐོང༌ཏེ༌ གཙོ༌བོའེ༌ ཟིར༌རྗིད༌པོ༌ ཕེལ༌ ཅུག༌ག༌ནོག༌, ཀ༌ཟུག༌གི༌ མེ༌ལོང༌ངི༌ ལྡངས༌ ཁྱབས༌ཤུག༌གད༌། ཡང༌ ཐུག༌ཉིད༌ ཨིན༌ཁན༌ནི༌ གཙོ༌བོའེ༌, ང༌དང༌གུན༌ མང༌ནེ༌ མང༌ང༌ ཁོང༌རང༌ ཙོགས༌ ཅོའ༌ ཛད༌ཏེ༌, ང༌དང༌གུན༌ ཁོང༌ངི༌ ཟིར༌རྗིད༌ཅན༌ནི༌ ཟོབ༌སྟའེ༌ ནང༌ང༌ གྱུར༌ཨིན༌ ཆའ༌ནོག༌།