7
Di suah tar a akinalang ana ning a mar diat a bonot pa pisir diat a rip miting na tarai Israel
1 Lamur tana, a oroi diat a angelo la tur ting na diat a matana wuwu te na rakrakan hanua. La tong alar pas diat a matana wuwu sur gong la wus a hananuala, pa tasi, pa rakaila.
2 A oroi pas ning a angelo kaleng i hanot miting na matana tobar pa i tong pas a akinalang ane God, esaning i laun. I arkabah ana tnan elngena tetek diat a angelo ning di ka saran tar a rakrakai tanla sur lar alaulau a hananuala pa tasi.
3 I atongi larne, “Gong mulo alaulau a hananuala pa tasi pa rakaila, tuk ning milar suah tar a akinalang ting na patar a tena titol orosla ane God anundalai.”
4 Pa a longor a wawasinla ning di ka aslang tar la. La ning a mar diat a bonot pa pisir diat a rip miting na mangis a tarai Israel rop.
5 Di ka aslang tar ning a bonot pa pisir naur a rip miting na mangis a tarai Juda,
ning a bonot pa pisir naur a rip miting na mangis a tarai Ruben,
ning a bonot pa pisir naur a rip miting na mangis a tarai Gat,
6 ning a bonot pa pisir naur a rip miting na mangis a tarai Aser,
ning a bonot pa pisir naur a rip miting na mangis a tarai Naptali,
ning a bonot pa pisir naur a rip miting na mangis a tarai Manase,
7 ning a bonot pa pisir naur a rip miting na mangis a tarai Simion,
ning a bonot pa pisir naur a rip miting na mangis a tarai Liwai,
ning a bonot pa pisir naur a rip miting na mangis a tarai Isakar,
8 ning a bonot pa pisir naur a rip miting na mangis a tarai Sebulon,
ning a bonot pa pisir naur a rip miting na mangis a tarai Josep,
ning a bonot pa pisir naur a rip miting na mangis a tarai Benjamin.
A kunum a tarai la lotu tetek e God
9 Lamur tana, a tai, pa a oroi pas a tnan kunum a tarai ning bel tik ir was sot pas la. A tarai miting na matanitula rop, pa miting na mangis a taraila rop, pa miting na hananuala rop pa miting na urmatana ngas a warwarala rop, la tur salanigo na keskes a king pa Nat a Sipsip. La mermer ana kokok a kaenla, pa la tong a paka baibaila.
10 La arkabah ona tnan elngenla mange,
“E God anundalai,
esaning i kes ting na keskes a king
pa Nat a Sipsip,
dia alaun pas dala.”
11 Na angelo rop la tur talilis pas a keskes a king pa na ningnigo pa diat a lalaun a akakes. La punga hanrawai ana patarinla ting na piu salanigo na keskes a king, pa la lotu tetek e God,
12 la atongi mang,
“Amen!
Dalar rakan aleklek pas e God anundalai, dalar aitna pasi, dalar atong wakak teteki, pa dalar hanrawai i.
I tong akes a tastasmai, pa warkurai pa rakrakai,
bel ir rarop.
Amen!”
13 Pa takai a hal a ningnigola i deken iau mang, “Esi la ne la mermer ana kokok a kaenla? Pa la han mitahaia?”
14 Pa kelesi mang, “Leklek, u ot u tasmani.” Pa i atongi tak mang, “La ne, la ning la ka laun ot miting na tnan kankan ning i monong la. La ka gos kokok pas anunla na kaen ana suluk a Nat a Sipsip.
15 Manglarning,
la tur salanigo na keskes a king ane God,
la titol teteki ting na nuna rumai artabar
ana kabakiarla pa moromla.
Pa esaning i kes ting na keskes a king ir pol alar la sur lar kes taum onoi.
16 Bel lar murak,
pa bel ma lar mos ulak.
Pa kamis bel ir alaulau la,
pa bel ta utna otleng ir rang sakan la.
17 Anasa a Nat a Sipsip ning i kes na arpotor a keskes a king, ir hanot anunla a tena tai alar.
Ir nigon la sur uting na matmatana malum a lalaun.
Pa e God ir sah sen na luru matanla rop.”