20
Takai a rip a rau
1 A oroi pas ning a angelo i han purum misaot na langit, i tong pas a ki ana tnan tung ning bel ta araropna, pa i tong pas otleng a tnan sen.
2 I tong akes pas a dregon, a soi tagun nating, ning di atongi mang a tena artitiu, e Satan. I sen akes tari tuk ot ning takai a rip a rau ir rop.
3 I migen purum tari ting na tnan tung ning, pa i tagar alari, sur gong ulak ma i asongo tar a tarai miting na matanitula rop, tuk ning takai a rip a rau ning ir rop. Lamur tana, dir pak seni suir langolango pas ka siklik taim, bel ir bongnani.
4 Pa a oroi na keskes a king, pa la ning la kes saot onla, ning di ka saran tar a rakrakai tanla sur lar warkurai. Pa a oroi a ingun a tarai ning di ka kot kutus tar a pukulunla, anasa ana nunla na warwara talapor oe Iesu pa ana warwara ane God. Bel la lotu tetek a rokoio na inagoi pa manarna, pa bel di kibas a akinalang anuna rokoio na inagoi ting na patarinla o ting na kunla. La laun ulak pa la warkurai taum oe Karisito ning a rip a rau.
5 Ine a ningnigo na kamkamtur ulak kusun a minat. Ika la rop ning la ka mat pa bel la laun ulak ana taim ning, lar borbor tuk ning a rip a rau ning ir rarop, pa lar kamtur bot kusun a minat.
6 La ning di alaun la ana ningnigo na kamkamtur ulak kusun a minat, la angis pa la na totoh a tarai ane God. A munaur a minat bel ta rakrakai sur ir alaulau la. La na tena artabar tetek e God pa e Karisito. Lar warkurai taum oe Karisito ning a rip a rau.
Di tolsot pas e Satan
7 Ning a rip a rau ning ka rop, dir pak sen e Satan miting na nuna keskes a karabus.
8 Pa ir han suir asongo pas a tarai miting na matanitula ting na diat a matana wuwu, na tarai ning di atong la e Gok pa e Magok. Ir ben taum la sur a harum. A wawasinla ir arlar ana woio miting na hang.
9 Pa lar han miting na hananuala rop te na rakrakan hanua, pa lar tur talilis pas a tarai ane God, pa tnan hanua ning e God i maris koli. Ika a iah ir han purum misaot na langit pa ir tun arop sen a tarai a harum ning.
10 Pa dir migen purum sen e Satan, esaning i asongo pas la. Ir kes ting na tnan tung a iah pa salfa, ning di ka migen purum tar kaba a rokoio na inagoi pa asasongo na propet ia. Tingia dir akadik ditol ana kabakiarla pa moromla, bel ir rarop.
A ararop a warkurai
11 Lamur a oroi pas a tnan keskes a king i kokok, pa esaning i kes onoi. A rakrakan hanua pa bakut dia rorom miting na matana, bel ta pukna ulak ma anundiau.
12 Pa a oroi a minatla rop, la ning la leklek pa la ning bel al risanla, ning la tur tar salanigo na keskes a king, pa di sapang a bukla. Di sapang ulak ning a buk, a buk a lalaun. Pa di warkurai a minatla arlar ana nunla a titolla ning di ka tumus akes tari ting na bukla.
13 A tasi i saran ulak a minatla ning la mat salatasi. A minat pa Hedes, a hanua anunla ning la mat, diau otleng dia saran ulak a minatla ning kaning ondiau. Di warkurai la taktakai arlar ot ana nunla na titol.
14 Lamur di migen purum sen a minat pa Hedes uting na tnan tung a iah. A tung a iah ning, a munaur a minat.
15 Pa la ning bel di pastek a risanla ting na buk a lalaun, di migen purum sen la uting na tnan tung a iah.