7
A tarai la atarna sen a warwara ane God
(Mt 15:1-9)
1 A Parisaiola pa tena asaerla tagun a warkurai misaot e Jerusalem, la han taum tetek e Iesu,
2 pa la oroi dingla na kakak a asaer ane Iesu, la hangan ka ana dur a kunla, bel la gos nigon pas a kunla.
3 A Parisaiola pa a tarai Juda rop bel lar hangan ning bel la gos kunla, anasa la sira mur a asaerla ana anundala a tarai tagun nating.
4 Ning la ulak miting na pukna na sisiurai, lar gos nigon pas ot a kunla, lamur lar hangan. Galis a utna otleng lar toli, lar gos a kapla, a kurola pa a ketella.
5 A Parisaiola pa tena asaerla tagun a warkurai la deken e Iesu mang, “Sur asa ning anuma kakak a asaerla bel la mur a asaerla ana nundala a tarai tagun nating? La hangan ka ana dur a kunla.”
6 Pa e Iesu i keles la mange, “A warwara ane Aisaia i momol ot, ning i warwara na propet nigo tar o mulo a tena asasongola mang,
‘A tarai ne la hanrawai iau ka ana pahanla,
ika a balanla i bakbak kol kusun iau.
7 La lotu oros ka tetek iau,
anasa la asaer a taraila ana warkuraila anuna taraila ka.’
8 Mulo ka han kusun tar a Warkuraila ane God, pa mulo mur kama asasaer anuna taraila.”
9 Pa e Iesu i atai la mange, “A momolna ot, mulo longor orsan a warkurai ane God, sur mulor mur a asaerla ana numulo a tarai tagun nating.
10 E Moses i atongi mange, ‘Ur hanrawai e tamam pa e tnam.’ Kisim Bek 20:12
Pa i atongi otleng mang, ‘Esining ir warwara laulau o e tamana pa e tana dir umkoli.’ Kisim Bek 21:17
11 Ika mulo, mulo asaer a taraila mang, i wakak ka ning tik ir atai e tamana pa e tana mang, ‘Asaning ar nangan mu ono, ia ka saran tari tetek e God.’
12 Ana asaer ning, mulo sairasi sur gong i nangan e tamana pa e tana.
13 Ning mulo toli larning, mulo anatarna pas a warwara ane God, pa mulo mur ot a asaerla ning mulo kibasi tana numulo na tarai tagun nating. Pa a galis a ututna otleng larne ning bel i tostos mulo toli.”
A ututna ning ir adur tik namatana e God
(Mt 15:10-20)
14 E Iesu i kabah ulak a kunum a tarai teteki, pa i atongi mang, “Mulo rop mulor longor iau, pa mulor talapor ana nuka warwara.
15-16 Asaning tik ir ien pasi pa i kas ting na balana, bel ir aduri namatana e God. Ika asaning i purum kusun a nuknukna, i ning ir aduri namatana e God”.
17 Ning e Iesu i han kusun a kunum a taraila, pa i kas uting ui na rumai, anuna kakak a asaer la dekeni ana warwara larlar ne.
18 Pa i atai la mange, “I mangasa bel mulo talapor? I mangasa bel mulo tasmani mang a ututnala rop ning i kas ting na balan tik, bel ir aduri namatana e God?
19 Anasa bel i kas uting na nuknukna, i kas ka uting na balana pa ir kepseni.”
Ning i atong a warwara ne, i atong talapori mang a utna na hangan rop i wakak.
20 I atongi otleng mange, “A utna ning i purum pas miting na nuknukin tik, i ning ir aduri.
21 Ine a ututnala ning i sira purum miting na nuknuk a taraila: A nuknuk laulau, na toltol a pamuk, a kinkinau, umkol a mainla, a toltol laulau ana ta hane anuna tik o ta barsan anuna tik,
22 a toltol a muk, a laulau a ginina, a asasongo, toltol na tintaulai pa bel ta meme ono, ram sur a ututnala, di anan saksakan tik, a toltol na aitna pa dat abarah a pukulundi pa a longlong a toltol.
23 A ututna laulaula rop ne la purum miting na nuknuk a taraila, pa ir adur la namatana e God.”
A tortorot ana hane ning bel a hane Juda
(Mt 15:21-28)
24 E Iesu i han mitingia, pa i hanot milau a hanua Tair. I kas uting na ning a rumai. Bel i mang sur tik ir tasmani, ika bel i tolsot sur ir mumun.
25 Ning a hane, a natna hane a mot kaning ono. Ning i longor a warwara o e Iesu, aiapka i han pa i punga tuntudu salanigo ta e Iesu.
26 A hane ning, i a hane Ponisia miting na papar Siria, belsur a hane Juda. I nunung e Iesu sur ir kepsen a mot kusun e natnalik.
27 Pa e Iesu i atai i mang, “Dir tabar masur nigon a kakakla. Bel i tostos sur dir los pas a utna na hangan ana kakakla pa dir minggeni tana papla.”
28 Pa a hane i kelesi mang, “Leklek, a momolna ot ning. Ika a papla otleng ting nahai logo, la sira ien a mumut a utna na hangan ana kakakla.”
29 Pa e Iesu i atai i mange, “Ana num a wakak a arkeles, ur han ka, a mot ka purum tar kusun e natumlik.”
30 Ning a hane i ulak, i oroi e natnalik, kaning i borbor tar ting na logo ngasna. A mot ka purum kusuni.
E Iesu i alangolango pas a talnganakutkut pa a ngatlau
31 E Iesu i han kusun a hanua Tair pa i han potor e Saidon sur a puka tasi Galili, pa i hanot ting na papar Dekapolis.
32 A tarai la ben pas ning a barsan a talnganakutkut tetek e Iesu, pa la nunungi sur ir suah a kuna ono.
33 E Iesu i ben masik pasi kusun a kunum a tarai, pa i suah naur a pitlai kuna ting na naur a talngana barsan ning. Lamur i namis pas, pa i tong a laigerem a barsan ning.
34 I tadai usaot na langit, i los wuwu pas, pa i atai i mang, “Epata!” A kamkamna mange: “Ur Sapang!”
35 Pa a talngana i talapor, a laigeremna i tapalas pa i warwara talapor kakat.
36 Pa e Iesu i sairas rakrakai a taraila sur gong la atai tar tik ono. Ika ning i sairas la, bel la longor pasi, a warwara ono i han sarara ka.
37 La ning la longor a utna ne, la kulkulan kol ono, pa la atongi larne, “E Iesu i tol wakak pas a ututnala rop. I awakak pas a talngana kutkutla sur lar longor, pa a ngatlaula sur lar warwara!”