2
E Iesu i alangolango pas a barsan ning a palaona i mat
(Mt 9:1-8; Lk 5:17-26)
1 Dingla na pukakiar i rop, e Iesu i han ulak utumo e Kapernaum. A tarai la longori mang ika hanot tar ting na rumai,
2 pa galis onla, la hanot teteki, pa belal pukna tingui na rumai, pa tumo lapiu na taman otleng. Pa e Iesu i warawai ana warwara ane God tetek la.
3 Dingla na tarai la hanot taum ana ning a barsan a palaona i mat. Diat a barsan la losi tetek e Iesu.
4 Ika a galis a tarai la ka tur alar pasi pa bel la tolsot sur lar kas anoi. La abit taum onoi usaot na rumai, pa la regen pas ning a ris a pukul a rumai tostos ana pukna ning e Iesu i kes ia. Pa la alorong purum a barsan ning a palaona i mat taum ana logo ngasna.
5 Ning e Iesu i oroi anunla tortorot, i atai a barsan ning a palaona i mat mange, “Natuklik, di ka kepsen tar anum na toltol laulau.”
6 Dingla na tena asaer tagun a warkurai la kes tingia. La nuknuk mange,
7 “Sur asa a barsan ne i atongi larne? I atong saksakan e God anasa i arlari ono. Esi ir kepsen a toltol laulaula? E God ka.”
8 Aiap ka e Iesu ka tasman tar a nuknukinla, pa i deken la mange, “Sur asa mulo nuknuk larne?
9 Esi na ngas a warwara ning bel i ngangaten sur ar atongi tana barsan ne? Ar atongi mange, ‘Di ka kepsen tar anum na toltol laulaula,’ o ar atongi mange, ‘Ur kamtur, los pas a logo ngasim pa ur han’?
10 Ar atongi larne sur mulor tasmani mang e God ka saran tar a warkurai tetek a Nat a Barsan sur ir kepsen a toltol laulaula te lapiu.” Pa, i atai a barsan ning a palaona i mat mange,
11 “A atai u, ur kamtur, ur kibas a logo ngasim, pa ur han uting na rumai ngasim.”
12 I kamtur, i kibas a logo ngasna, pa i purum na matanla rop. La rop la kulkulan pa la rakan aleklek pas e God mange, “Bel mila sira oroi ta utna manglarne. Onobot ne mila oroi i.”
E Iesu i kabah pas e Liwai
(Mt 9:9-13; Lk 5:27-32)
13 E Iesu i han purum ulak utumo na ris a puka tasi Galili, pa a tnan kunum a tarai la hanot teteki, pa i turpas a asaer la ana warwara ane God.
14 Ning i han amon, i oroi tetek e Liwai, a nat e Alpius, i kes ting na rumai a los totokom, pa e Iesu i atongi tana mang, “Ur mur iau.” Pa e Liwai i kamtur pa i muri.
15 Lamur, ning e Iesu i kes ana utna na hangan ting na rumai ane Liwai, a galis a tena los totokom taum ana tena laulaula, la hangan taum o e Iesu pa kakak a asaerla anunai. Anasa galis a tarai la mur e Iesu.
16 Dingla na tena asaer tagun a warkurai, ning a Parisaiola, la oroi e Iesu ning i hangan pa a tarai laulaula pa a tena kibas totokomla. La deken anuna kakak a asaerla mang, “Sur asa ning i hangan taum ana tena los totokomla pa a tena laulaula?”
17 Ning e Iesu i longori, i atai la, “A dokta bel i hanot sur la ning la langolango. I hanot sur la ka ning la sasam. Bel a hanot sur a tena tostosla. A hanot sur ar kabah pas a tena laulaula.”
A kabah ana tamai
(Mt 9:14-17; Lk 5:33-39)
18 A kakak a asaerla ane Jon taum ana Parisaiola la tamai. Dingla na tarai la han tetek e Iesu, pa la dekeni mang, “I mangasa ning a kakak a asaerla ane Jon taum ana kakak a asaer anuna Parisaiola, la tamai, ika anum na kakak a asaerla bel?”
19 E Iesu i keles la mange, “Ning ta barsan ir taulai totoh, na halalna lar tamai mangmangasa ning a barsan ning kaning ot i kes taum onla? Ning kaning ot i kes taum onla, bel lar tamai.
20 Ika ta pukakiar ir hanot ning dir ben maskan pas a barsan ning kusun la, pa ana pukakiar ning lar bot tamai.
21 “Bel tik ir raprap ta tona dia kaen ana ta muarna. Ning ir toli larning, a tona ning dir raprap ono, ir silir sen aulak a muar a kaen, pa ir taksilir kol.
22 Pa bel tik ir tere a tona wain uting na turai a koto na wain ning di toli ana palaona inagoi. Ning ir toli larning a turai a koto na wain ir pusa, pa a wain ir tapek, pa a koto na wain otleng ir laulau. Dir pek ot a tona wain uting na tona koto na wain.”
E Iesu ot a Leklek ana Pukakiar Sabat
(Mt 12:1-8; Lk 6:1-5)
23 Ana ning a Pukakiar Sabat, e Iesu i han potor ting na barim a wit. Ning la han amon, anuna kakak a asaerla la turpas a kumut kutus a witla.
24 A Parisaiola la deken e Iesu mang, “Oroi! Sur asa ning la tol a utna ning, pa bel la mur a warkurai tagun a Pukakiar Sabat?”
25 E Iesu i keles la mange, “I mangasa belot mulo was asaning e King Dewit i toli ning i taum ana taraila ning la armuri la murak, pa belal utna anlai?
26 Ning e Abiatar i ningnigo na tena artabar tetek e God, e Dewit i kas uting na rumai ane God pa i ien a bret ning di ka tabar tar e God ono. Pa i tabar la otleng ning la armuri. A bret ning di sairasi kusun a tarai oros. I arlar ana Warkuraila sur a tena artabarla ka tetek e God lar ieni.”
27 Pa e Iesu i atai la mange, “Di tol tar a Pukakiar Sabat sur ir nangan a taraila, bel sur a tarai lar nangan a Pukakiar Sabat.
28 I maining a Nat a Barsan ot a Leklek tagun a Pukakiar Sabat.”