14
La warwara taum pas sur lar umkol e Iesu
(Matiu 26:1-5; Luk 22:1-2; Jon 11:45-53)
1 Naur a pukakiar lanigo tana lotu na Han Lakai, pa lotu na bret ning bel al is ono, a leklek a tena artabarla tetek e God pa tena asaerla tagun a warkurai la nuknuk sur ta ngas sur lar tong kumnan pas e Iesu pa lar umkoli.
2 La atongi mange, “Gong dala toli ana tnan pukakiar a lotu, sakana a tarai lar arsakai.”
Ning a hane i pek a polo na tomtoboh saot na pukul e Iesu
(Matiu 26:6-13; Jon 12:1-8)
3 E Iesu kaning ot e Betani, ting na rumai ane Saimon, esaning nating i sasam ana lepra. Kaning ot i hangan, ning a hane i hanot teteki taum ana koto na tomtoboh ning di atongi a nad. A matana i abit kol, pa kaning na koto di toli ana hat. I pagal sen a matana koto, pa i peki saot na pukul e Iesu.
4 Dingla na tarai ning la kes tingia, la balakut pa la awara artalai mange, “Sur asaning di amus oros ka a tomtoboh ne?
5 I to pasi sur dir siurani, pa dir kibas a mani arlar ana arlou miting na ning a rau ning di titol pasi, sur dir tabar a kapan a taraila ono.” Pa la balakut a hane ning.
6 E Iesu i atai la mange, “Mulo noreni. Sur asaning mulo saran a mamahat teteki? I ka tol tar a wakak a titol hok.
7 A kapan a tarai lar laun bolbolos taum ot omulo. Ning mulo mang sur mulor awakak la, mulor toli ka. Ika iau, bel ar kes tikin napirimulo.
8 A hane ne ka tolsot pas a utna ning i to pasi sur ir toli. I pek tar a polo na tomtoboh te na palaok sur ir sang nigon iau sur a pukakiar ning ar mat pa dir akas a minatik ting na kulam a minat.
9 A atong momoli tamulo, te na rakrakan hanua rop, ning dir warawai ana Wakak a Warwara, dir warwara otleng ana saning a hane ka tol tari, sur a tarai lar nuk akes a hane ne.”
E Judas i malmaling sur ir saran tar e Iesu uting na kuna hiruala
(Matiu 26:14-16; Luk 22:3-6)
10 E Judas Iskariot, ning a halin ning a bonot pa pisir naur a kakak a asaer, i han tetek a leklek a tena artabarla tetek e God, sur ir saran tar e Iesu tetek la.
11 Ning la longori, la gas, pa la lele sur lar lowi. Pa e Judas i nuknuk sur ta ngas ning ir saran tar e Iesu tetek la.
E Iesu pa nuna kakak a asaer la hangan ana lotu na Han Lakai
(Matiu 26:17-25; Luk 22:7-14, 21-23; Jon 13:21-30)
12 Ana ningnigo na pukakiar ana lotu na bret ning bel al is ono, ning di sira umkol a barman a sipsip, sur a lotu na Han Lakai, a kakak a asaerla ane Iesu la dekeni, “U mang sur milar han utaha, sur milar sang andala utna na hangan sur a lotu na Han Lakai?”
13 I sune sen naur tagun anuna kakak a asaerla, pa i atai diau mange, “Mur han kas usaot e Jerusalem. Pa ning a barsan i los a tnan koto na malum, ir pastetek mu, pa mur muri.
14 Ning ir kas uting na ta rumai, mur atai a tamana rumai mange, ‘A Tena Asaer i atongi mang: Kanaha a tuk a rumai ning mila taum ana nuk a kakak a asaerla, milar ien a utna na Han Lakai tingia?’
15 Pa ir asangan tar mu ana tnan tuk a rumai saot, ning di ka sang tari, pa mur sang andala utna na hangan tingia.”
16 Naur a kakak a asaer dia han usaot e Jerusalem, pa dia pastek rop ot a ututnala ning e Iesu ka atong tari tandiau. Pa dia sang a ututnala na Han Lakai.
17 Ning a rah ma, e Iesu taum ana nuna ning a bonot pa pisir naur a kakak a asaer la hanot.
18 Kaning ot la hangan, i atongi mange, “A atong momoli tamulo, ning a halimulo ir saran tar iau uting na kuna hiruala, takai ot ne dala hangan taum.”
19 La balmaris, pa la rop taktakai la dekeni mange, “Bel iau gepi?”
20 Pa e Iesu i keles la mange, “Ning a halimulo ot ning a bonot pa pisir naur, ning mia amurung taum amiau naur a bret te na besen.
21 A Nat a Barsan ir hirua lar otning di ka tumus tari ting na Buk Tabu. Ika ir laulau kol tetek a barsan ning ir saran tari tetek a hiruala. Ir wakak teteki ning bel dir agoni.”
A utna na hangan ana Leklek
(Matiu 26:26-30; Luk 22:14-20; 1 Korin 11:23-25)
22 Kaning ot la hangan, e Iesu i los pas a bret, i atong wakak onoi, i kibiki, pa i tabar anuna kakak a asaerla ono. I atongi mang, “Mulor kibasi, ine a palaok.”
23 Lamur i los pas a kap, i atong wakak pas onoi, i sarani tanla, pa la rop la gang onoi.
24 I atai la mang, “Ine a sulukik, ning i amomol tar a kunubus ning i dat taum tar e God pa tarai. A sulukik ne i tapek sur a galis a tarai.
25 A atong momoli tamulo mang, bel ar gang ulak al wain, tuk ning ar gang a tona wain ting na matanitu ane God.”
26 Ning la ka saken tar a saksak a lotu, la han usaot na Mangir Oliw.
E Iesu i warwara nigo mang e Pita ir puain seni
(Matiu 26:31-35; Luk 22:31-34; Jon 13:36-38)
27 E Iesu i atai la mange, “Mulo rop mulor han kusun iau, anasa di ka tumus tari ting na Buk Tabu mang,
E God i atongi mange, ‘Ar um a tena tai alar ana sipsipla,
pa sipsipla lar liu sarara.’ Sekaraia 13:7
28 Ika ning ia ka kamtur ulak kusun a minat, ar nigo utumo e Galili.”
29 E Pita i atai i mange, “Ning la rop lar han kusun u, ika iau bel.”
30 E Iesu i atai i mange, “A atong momoli tam, onone na morom, ning a kakaruk belot ir areur a kurkurirakuk, ur puai munatol mang bel u tasman iau.”
31 Ika e Pita i warwara rakrakai teteki mange, “Bel ar puain sen u. Noren iau, ar hirua taum hom.” A kakak a asaerla rop otleng la atongi larning.
E Iesu i araring ting e Getsemani
(Matiu 26:36-46; Luk 22:39-46)
32 E Iesu taum ana nuna kakak a asaer la hanot ting na ning a pukna di atongi e Getsemani, pa i atai la mange, “Mulor kes ka te, pa iau ar araring pas.”
33 Pa i ben pas e Pita, e Jems pa e Jon. Ana taim ning i kilang a tnan balmaris pa i nuknuk kol.
34 I atai ditol mange, “Anuk a lalaun i mamahat kol ana balmaris, milau ar mat ono. Mutol ar kes ka te, pa mutol ar kokohoi.”
35 I han siklik usa lanigo, i punga tuntudu ting lapiu, pa i araring sur a pukakiar a minat ir han lakai, ning ir wakak manglarning.
36 I araring mange, “Tata, Tata, a ututnala rop i to pas u sur ur toli, ur kibas sen a kap a mamahat ne kusun iau. Ika gong u mur a nuknukik, ur mur ot a nuknukim.”
37 Ning i ulak, i oroi ditol ka borbor duman. I deken e Pita mange, “Saimon, kaning ot u borbor duman? Bel ur tolsot sur ur kokohoi on ta tuk a kamis lik ka?
38 Mutol ar kokohoi, pa mutol ar araring, sur gong mutol punga ana larlarla. A ingumutol i mang sur ir longor, ika a palaomutol i ngol.”
39 Pa i han, pa i araring ulak ana niaring ning ka atong tari kaba.
40 Ning i ulak, i oroi ditol ka borbor duman ulak, anasa a matanditol ka sulam kol. Bel ditol tasman asaning ditol ar kelesi ono.
41 Ning i aretol a tinan anunai tetek ditol, i atongi mange, “Mutol borbor liklik kama? I sot ka! A taim ka hanot. Oroi, dir saran tar a Nat a Barsan uting na kuna tena laulaula.
42 Mutol kamtur, dala kar han! Oroi, a barsan ning ir saran tar iau uting na kuna hiruala, ka hanot.”
Di tong akes pas e Iesu
(Matiu 26:47-56; Luk 22:47-53; Jon 18:3-12)
43 Kaning ot e Iesu i warwara, e Judas, ning a halin ning a bonot pa pisir naur a kakak a asaer, i hanot taum ana kunum a tarai. La los na liwan a harum pa puka buturla. A leklek a tena artabarla tetek e God, pa na tena asaerla tagun a warkurai pa ningnigola la sune sen la.
44 Esaning ir saran tar e Iesu uting na kuna hiruala ka atai nigon tar a kunum a tarai ana akinalang ning ir toli larne, “Esaning ar goro a ris a pahana, i ot ning. Mulor tong akesi, mulor ben maskan pasi pa mulor tai alar wakaki.”
45 Ono otning e Judas i han tetek e Iesu, pa i atai i mange, “Tena Asaer!” Pa i goro i.
46 A tarai la tong akes pas e Iesu pa la dati.
47 A halinla ning i tur milau, i lasur pas anuna liwan a harum, pa i umsem a talngan a tena titol oros anuna ningnigo na tena artabar tetek e God.
48 Pa e Iesu i atai la mang, “I mangasa, ngandek iau a tena harum pa tena kinkinau, sur i ma ine mulo hanot taum ana liwanla na harum pa puka buturla sur mulor tong akes iau?
49 Ana pukakiarla rop dala sira kes taum ting na woroh na rumai artabar, a sira asaer a taraila, pa bel mulo tong akes iau. Ika di toli larne sur dir tolsot pas a warwara ting na Buk Tabu.”
50 Pa kakak a asaerla rop la liu pas kusuni.
51 Ning a barman, i mermer pas ka ana kaen, i mur e Iesu. La tong akes pasi,
52 i migen sen anuna kaen, pa i liu mengere kama.
E Iesu i tur ana warkurai na matana tarai a kiwung
(Matiu 26:57-68; Luk 22:54-55, 63-71; Jon 18:13-14, 19-24)
53 La ben pas e Iesu tetek a ningnigo na tena artabar tetek e God. Pa leklek a tena artabarla rop tetek e God, a ningnigola, pa tena asaerla tagun a warkurai la hanot taum tingia.
54 E Pita i mur amon e Iesu, ika i bakbak ot kusuni, pa i kas uting na pukna anuna ningnigo na tena artabar tetek e God. Pa i marnan a iah taum ana tena tai alarla.
55 A leklek a tena artabarla tetek e God, pa tarai a kiwung rop la tai sur ta rongo ning e Iesu ka tol tari, sur lar tiwi ono, pa lar umkoli, ika bel la tai pas ta utna.
56 A galis la atong a asasongo na warwara oe Iesu, ika anunla na warwara bel i han taum.
57 Dingla na tarai la tur pa la atong a asasongo na warwara oe Iesu mange,
58 “Mila longori i atongi mange, ‘Ar regen sen a rumai artabar ne ning a tarai la toli, pa ana natol a pukakiar ka, ar tol pas tik ning bel a tarai la toli.’ ”
59 Ika anunla na warwara otleng bel i han taum.
60 A ningnigo na tena artabar tetek e God i tur salanigo tanla, pa i deken e Iesu mange, “I mangasa, bel ur keles la? Asaning ur keles a warwarala na artitiu ne tetek u ono?”
61 Ika e Iesu bel i warwara. A tena artabar ne i deken ulaki mange, “U a Karisito, a Nat e God, ning i angis, o bel?”
62 E Iesu i kelesi mange, “Iau ot ning, pa lamur mulor oroi a Nat a Barsan ir kes ting na ris a sot a kuna e God, esaning i rakrakai kol, pa lamur mulor oroi i ning ir hanot ana didiah bakutla misaot na langit.”
63 A ningnigo na tena artabar i balakut pa i silir anuna kaen ot, pa i atongi mange, “Dala mang ulak sur al warwara na artitiu sur asa?
64 Mulo ka longor tar anuna na warwara laulau oe God. Asa mulo nuki?” Pa la rop la malmaling sur dir umkol e Iesu.
65 Dingla na tarai tagun la, la namis e Iesu, la poroi alar tar a matana, la tubuli pa la atai i mange, “U a propet, atai mila, esining i tubul u!” A tena tai alarla la ben pasi pa la umi.
E Pita i puain sen e Iesu
(Matiu 26:69-75; Luk 22:56-62; Jon 18:15-18, 25-27)
66 Ning e Pita kanumo ot lapiu ana rumai, ning a basbas, a tena titol anuna ningnigo na tena artabar tetek e God i hanot.
67 Ning i oroi e Pita kaning i marmarim, i ngoson rakrakai i, pa i atai i mange, “U otleng u keskes taum oe Iesu a te Nasaret.”
68 Ika i puai mange, “Bel a tasman asaning u warwara ono, pa bel a talapor ono.” Pa i purum utumo ana taman a woroh. Pa kakaruk i kurkurirakuk kakat.
69 A hane ning i oroi ulak pasi, pa i atai la ning la tur tingia mange, “A barsan ne i otleng takai tagun la.”
70 E Pita i puai ulak.
Lamur siklik, la ning la tur milau e Pita, la atai i mange, “A momolna, u otleng ning a halinla, anasa u a te Galili.”
71 Pa i lele tetek la, i atongi mange, “E God ir warkurai laulau iau ning ar asongo. Bel a tasman a barsan ning mulo warwara ono.”
72 Pa kakaruk i munaur na kurkurirakuk kakat. Pa e Pita i nuk pas a warwara ning e Iesu ka atong tari tana mange, “Ning a kakaruk belot ir areur a kurkurirakuk, ur puai munatol mang bel u tasman iau.” I nuk pasi pa i tangis koli.