16
1 “A atong a warwarala ne tamulo sur gong a tortorot anumulo ir punga.
2 Lar sairas mulo kusun a rumai lotula. A taim ir hanot lamur, ning a tarai ning lar umkol mulo, lar nuki mang la tol a titol ane God.
3 A tarai lar tol a ututnala ne tetek mulo, anasa bel la tasman miau ma e Tata.
4 A atai tar mulo ana warwarala ne, sur ning ir hanot, mulor tasmani mang ia ka atumarang nigon tar mulo. Ana kamkama nuk a titol, bel a atai tar mulo ana warwarala ne, anasa kanet a kes taum omulo.
A titol anuna Talngan Tabu
5 “Onone, ar han tetek esaning i sune iau ute. Ika bel tik ta halimulo i deken iau mang, ‘Ur han utaha?’
6 Mulo balmaris kol anasa a atai mulo ana warwarala ne.
7 A atong momoli tamulo mang, ir wakak tetek mulo ning ar han. Ning bel ar han, a Tena Arnangai bel ir hanot tetek mulo. Ika ning ar han, ar sune i ute tetek mulo.
8 “Ning ir hanot, ir asangan a taraila te na rakrakan hanua ana toltol laulau, pa ana tostosna pa ana warkurai ane God.
9 Ir asangan la ana toltol laulau anasa bel la tortorot hok.
10 Pa ir asangan la otleng ana tostosna, anasa ar han tetek e Tata pa bel mulor oroi ulak iau.
11 Pa ir asangan la otleng ana warkurai ane God anasa e God ka warkurai tar a ningnigo mite na rakrakan hanua.
12 “A galis a utna ning ar atongi tamulo, ika onone bel mulor nuk lalani.
13 Ning a Talngan Tabu na momolna ir hanot, ir atalapor mulo ana momolna rop. A warwarala ning ir atongi bel anunai, ir atong ka a warwarala ning i longori, pa ir atai mulo ana ututnala ning ir hanot lamur.
14 Ning ir los pas anuk na warwara pa ir atai mulo onoi, ir apuasa a matatarik.
15 A ututnala rop ning ane Tata, anuki. Ine a kamkamna ning a atongi mang a Talngan Tabu ir los pas anuk na warwara pa ir atai mulo onoi.
A balmaris pa gasgas
16 “Bel ir bongnani, pa bel mulor oroi iau. Pa bel ir bongnani kale, mulor oroi iau.”
17 Anuna dingla na kakak a asaer la deken artalai la mange, “Esi na kamkamna ana nuna warwara ne, bel ir bongnani pa bel dalar oroi, pa bel ir bongnani kale dalar oroi? Pa ning a warwara otleng anunai ne, anasa ir han tetek e Tamana?
18 Esi na kamkamna ana nuna warwara ne ‘bel ir bongnani’? Bel dala tasman a utna ne i warwara onoi!”
19 E Iesu i tasmani mang la mang sur lar dekeni, pa i atai la, “A atong tari mange, ‘Bel ir bongnani bel mulor oroi iau, pa bel ir bongnani kale mulor oroi iau.’ I mangasa, a warwara ne mulo deken artalai mulo onoi?
20 A atong momoli tamulo, mulor balmaris pa mulor domos, ika a taraila mite na rakrakan hanua lar gas. Mulor balmaris, ika lamur anumulo a balmaris ir keles sur a gasgas,
21 arlar ana hane ning i milau sur ir agon, i kilang a tnan kankan, ika, ning ka agon sen tar a kaklik, ir duman sen a kankan pa ir gas, anasa ka agon tar a kaklik ute na rakrakan hanua.
22 Mang otleng larning tetek mulo, onone mulo balmaris, ika ar oroi ulak mulo, pa mulor gas. A gasgas ne, bel tik ir kepseni kusun mulo.
23 “Ana pukakiar ning, bel mulor deken ulak iau ana ta utna. A atong momoli tamulo, e Tata ir tabar mulo ana saning mulo araring suri ana risak.
24 Tuk onone, bel mulo nunung sur ta utna ana risak. Mulor nunung pa dir tabar mulo, sur anumulo a gasgas ir bukus momol.
E Iesu i tolsot pas a rakrakai mite na rakrakan hanua
25 “A atong a warwarala ne tamulo ana warwara larlar, ika a taim ir hanot ning bel ar warwara ulak tetek mulo ana warwara larlar, ar atai talapor mulo oe Tata.
26 Ana pukakiar ning, mulor nunung ana risak. Bel a atongi mang iau ar nunung e Tata sur ir nangan mulo,
27 anasa e Tata ot i mang sur mulo. I mang sur mulo anasa mulo mang sur iau, pa mulo tortorot mang a han misaot ta e God.
28 Ia ka han pas misaot ta e Tata, pa a han ute na rakrakan hanua. Pa onone, ar han kusun a rakrakan hanua, par ulak tetek e Tata.”
29 Anuna kakak a asaer la atai i mange, “Onone bel u warwara ana warwara larlar, u bot warwara talapor.
30 Onone mila ka tasmani mang u tasman a ututnala rop. Bel u kapan sur tik ir deken u anal deke, anasa u ka tasman arop tar a nuknukimila. Onone mila bot tortorot mang u han misaot ta e God.”
31 E Iesu i atai la mange, “Mulo bot tortorot?
32 A taim ir hanot, pa ka hanot, sur dir asarara mulo kusun iau, pa mulor han uting na numulo na hananuala, pa iau kama ar kes. Ika bel iau ka ar kes, miau ot ma e Tata.
33 “A atong a warwarala ne tamulo sur mulor laun te hok pa balmolmol ir kes omulo. Te na rakrakan hanua, mulor kilang a mamahat. Ika gong mulo matmataut, anasa ia ka tolsot pas a rakrakai mite na rakrakan hanua.”