8
E Iesu anundala ningnigo na tena artabar tetek e God ana tona kunubus
1 A tnan utna ning mila ka warwara pas ono i mange: Anundala ningnigo na tena artabar tetek e God, ning ka kes tar ting na ris a sot a kuna keskes ane God, a leklek a King kol saot na langit.
2 I titol tetek e God saot na langit ting na pukna ning i Tabu Kol ting na rumai a sel ane God. I ne a rumai a sel momol, ning a Leklek ot i toli, bel a tarai la toli.
3 A ningnigo na tena artabarla rop tetek e God, e God i suah tar la sur lar saran tar a artabarla pa lar tun a inagoila sur a artabar teteki. Manglarning i tostos sur e Iesu anundala ningnigo na tena artabar otleng ir artabar ot anal utna.
4 Ning ir kes te lapiu, bel ir tena artabar tetek e God, anasa dingla na tena artabar kanet la lapiu, pa la sira saran a artabarla arlar ana Warkuraila ane Moses.
5 A titol a artabar la sira toli ting na rumai artabar. A rumai ning i arlar ka ana manar a rumai saot na langit. Ine a kamkamna ning e God i atumarang e Moses, ning i sang sur ir tol a rumai a sel ning lar tun artabar ono. I atongi tana mange, “Tumarang tar! Ur tol a ututnala rop, arlar ot ana manar a rumai ning ia ka asangan tari tam saot na mangir.” Kisim Bek 25:40
6 Ika e Iesu ka kibas pas a titol a tena artabar ning i itna kol tana titol a artabar anuna tena artabarla. Mang otleng larning a kunubus ning e Iesu ka tolsot pasi sur ir dat taum e God pa tarai, i itna kol tana ningnigo na kunubus. A lelela ning la a kama kunubus, la wakak kol tana ningnigo na lelela.
7 Ning a ningnigo na kunubus kar tostos kol, bel dir tai ulak sur tik.
8 Ika e God i oroi mang a toltol laulau kaning ot ona tarai pa i atongi larne,
“A Leklek i atongi mang: Oroi, a pukakiarla lar hanot,
ning ar tol a tona kunubus
taum ana tarai Israel
pa tarai Juda.
9 Bel ir arlar ana kunubus
ning a toli taum ana tumtubunla
ana pukakiar ning a ben purum pas la mitumo e Ijip,
anasa bel la mur anuk a kunubus,
pa a gilam ris kusun la.
10 A Leklek i atongi larne: A kunubus ning ar toli taum ana tarai Israel,
ana pukakiarla lamur, i mange:
Ar suah tar anuk a warkuraila ting na nuknukinla,
pa ar tumus tari ting na balanla.
Pa iau a God anunla,
pa la anuk a tarai.
11 Bel tik ir asaer ta halna,
o ta tasnalik ulak ma larne,
‘Ur tasman a Leklek,’
anasa la rop lar tasman iau,
a tarai oros ka pa la otleng ning la leklek.
12 Ar kepsen anunla na rongo,
pa bel ar nuk ulak pas ma anunla na toltol laulaula.” Jeremaia 31:31-34
13 Ning e God i atong a kunubus ne mang “a tona kunubus”, i talapor mang a ningnigo na kunubus ka turai. Pa utna i turai pa ka bongnani ono, milau ma ir rorom.