A munaur a Pas
ane Pol tetek a tarai
Tesalonika
A warwara talapor nigo
Ning e Pol i kes to e Korin i tumus a pas ne.
I longori mang dingla na tarai la urmatana nuknuk ana tinan ot ulak ane Iesu. Dingla na tarai la atongi mang e Iesu ka hanot tar. Te na pas ne e Pol i asaer la ana tinan ot ane Iesu. I atai la mang a barsan na kutus warkurai ir hanot nigo pa ir asongo a galis a tarai. Lamur e Iesu ir hanot ulak pa ir warkurai a tena laulaula. E Pol i atai la otleng mang gong la ngoro, lar rakrakai ana tol a wakak a toltol.
A tinan ana Munaur a Buk Tesalonika:
A kamkama buk ne (1:1-2)
E God ir warkurai a tarai (1:3-12)
A tinan ot ana barsan na kutus warkurai, pa lamur e Iesu ir hanot (2:1-17)
Lar tol a wakak a titol pa gong la ngoro (3:1-15)
A ararop a warwara ane Pol tetek la (3:16-18)
1
1 Iau e Pol, Sailas pa e Timoti, mitol tumtumus tetek mulo a tarai a lotu to e Tesalonika, mulo ning mulo laun oe God a Tamandala pa Leklek e Iesu Karisito.
2 A marmaris pa balmolmol tetek mulo ta e God a Tamandala pa Leklek e Iesu Karisito.
E God ir saran a warkurai a arkeles tetek a tarai
3 Na tastasimitol, i wakak sur mitol ir sira atong wakak bolbolos tetek e God omulo. I tostos ning mitol toli larne, anasa anumulo a tortorot i gomo, pa i gomo rakrakai, pa a marmaris artalai tetek mulo otleng i gomo amon.
4 Ine a kamkamna ning mitol ot mitol sira atong aitna pas mulo tetek a tarai a lotu ane God ting na hananuala. Mitol sira atong aitna pas mulo ana numulo a tuntunur rakrakai pa anumulo a tortorot, na arpotor ana mamahatla ning mulo kilangi, pa kankan ning a tarai la akadik mulo ono.
5 A ututnala rop ne i apuasa i mang a warkurai ane God i tostos. Mulo kilang kankan anasa mulo agomo anuna matanitu. Manglarning e God i atong mulo mang mulo tostos sur anuna matanitu.
6 E God i tostos, pa ir akadik la ning la akadik mulo,
7 pa ir saran a manmanah tetek mulo ning mulo kilang kankan, pa tetek mitol otleng. E God ir toli larning, ning a Leklek e Iesu ir hanot misaot na langit taum ana irnga na iah pa anuna rakrakai a angelola.
8 Ir saran a warkurai a arkeles tetek la ning bel la tasman e God, pa bel la longor ana Wakak a Warwara ana nundala Leklek e Iesu.
9 Lar kilang a warkurai a arkeles ning bel ir rarop, a hinirua tikin, pa lar kes masik kusun a Leklek pa matatar ana rakrakaina.
10 A warkurai ne ir hanot ana pukakiar ning a Leklek ir hanot sur anuna totoh a tarai lar aitna pasi pa la rop ning la tortorot onoi lar hanrawai i. Mulo otleng taum onla, anasa mulo tortorot ana warwarala ning mitol ka atai tar mulo onoi.
11 Ine a kamkamna ning mitol sira araring sur mulo. Mitol araring tetek anundala God sur ir atong mulo mang mulo tostos sur mulor mur a ngas a lalaun ning i kabah pas mulo suri. Pa ana rakrakaina ir nangan mulo, sur mulor tolsot pas a wakak a titol ning mulo mang sur mulor toli, pa a toltolla rop ning anumulo a tortorot i tol otnani.
12 Mitol araring larning sur dir aitna pas a risana nundala Leklek e Iesu anasa omulo, pa e God otleng ir aitna pas mulo. A ututnala rop ne, ir hanot anasa ana marmaris ana nundala God pa Leklek e Iesu Karisito.