8
Isa se naan̰ ɓo *magal debm tɛɗn sɛrkɛ Raa ki gɛn naajege
1 ꞋBooyki! *Ko Taar kɛn naaje kꞋtaaɗsen mɛtin̰ se, kɛse ɓo napar magal debm tɛɗn sɛrkɛ Raa ki kɛn naajege kꞋjꞋɔkki se. Ɔɔ naan̰ se ookga maakŋ raa ki utu iŋg do ji daam kaag do *Raa ki ɔɔ Raa Sidburku ɓo gaar magal kɛn cir nakgen ɓaa se paac.
2 Isa tɛɗn naabm *salal maakŋ *kɔrɔr Raa kɛn mala mala ɔɔ kɔrɔr se jikilimge ɓo ɗaapin̰ eyo num Mɛljege ɓo debm ɗaapin̰a.
3 Magal jee tɛɗn sɛrkɛ Raa ki paacn̰ kɛn kꞋtɔndɗe se naŋa naŋa kic ɓo ɔk nakŋ kɛn naan̰ Ꞌkɛɗn Raa ki ɔɔ an̰ kɔjn̰ mooso. Bin ɓo magal debm tɛɗn sɛrkɛ Raa ki gɛn naajege se kic Ꞌkɔkŋ ɗim tak kɛn Ꞌkɛɗn Raa ki.
4 Kɛn *al‑Masi jaay debm do naaŋ ki sum num, naan̰ Ꞌkɔŋ tɛɗn debm tɛɗn sɛrkɛ Raa ki eyo, taa kaaɗ kɛn se jee kuuy utu kɛn lee ɛɗ nakge *sɛrkɛ Raa ki aan gɔɔ kɛn Ko Taar kɛn Raa ɛɗo Musa ki taaɗno se.
5 Naaɗe se ɓee kɛn naaɗe tɛɗn naaba maak ki se, naan̰ se kaam nirli sum ɔɔ tec tec ɓo *Ɓee Raa mala mala kɛn maakŋ raa ki. Bin ɓo kɛn Musa jaay ɓaa ɗaap kɔrɔr magal se, Raa dɛjin̰ ɔɔ: Aakin̰ jiga. ꞋƁaa ɗaapin̰ Ꞌtec raa raa aan gɔɔ kɛn maam mꞋtaaɗisin̰ do ko ki se.
6 Ɗeere, ɓɔrse, naabm Isa se magal cir paac paac. Taa *dɔɔkŋ kɛn Raa dɔɔk ute jeege, ute ɗoobm naan̰ se jiga cir paac paac. Ɔɔ Isa se naan̰ ɓo daan Raa ute jeege ɔɔ ute ɗoobm naan̰ se, Raa taaɗga taaɗ ɔɔ utu kɛɗn nakgen bɛɛ cir paac paac jeege tu.
*Dɔɔkŋ kɛn Raa dɔɔk kiji ute jeege
7 Kɛn dɔɔkŋ kɛn Raa dɔɔko ute jeege do dɔkin̰ se jaay tɛɗ naabin̰ aasga ute ɗoobin̰ num, Raa se Ꞌkɔŋ dɔɔkŋ ute jeege kuuy eyo.
8 Num kɛn Raa jaay mooy jeen̰ge se taa *kusin̰ naaɗe tɛɗ se naan̰ ɗeek ɔɔ:
ꞋBooyki, maam Mɛlɛ mꞋtaaɗsen mꞋɔɔ ɓiigen utu aɗe ɓaa naan ki se,
maam mꞋutu mꞋdɔɔkŋ kiji ute mɛtjil gaan *Israɛlge
ɔɔ ute taa ɓee Judakici.
9 Dɔɔkŋ kɛn maam mꞋdɔɔko ute naaɗe se
Ꞌtec aan gɔɔ dɔɔkŋ kɛn maam mꞋdɔɔko dɔkin̰ ute ɓugɗege se eyo.
Kaaɗ kɛn naane se ɓo, maam mꞋtɔkɗeno jiɗe ki
ɔɔ mꞋtɔɔɗ mꞋɔɔɗɗeno naatn maakŋ taa naaŋ Masar ki.
Gaŋ dɔɔkŋ kɛn maam mꞋdɔɔko ute naaɗe se, naaɗe tujga ɔrmɗe ro ki.
Taa naan̰ se ɓo maam mꞋtɛrlɗeno naaga.
Kɛse ɓo taar Mɛljege taaɗa.
10 Tɛr Mɛljege Raa taaɗ ɔɔ: Taa dɔɔkŋ kɛn maam mꞋutu mꞋdɔɔk ute gaan Israɛlge,
kɛn ɓiigen aɗe ɓaa naan ki se, maam mꞋaɗe kɛɗn jeele gɛn jeel ɗoobumge
ɔɔ ɗoobumge se mꞋaɗesin̰ taaɗn kɔmb maakɗe ki.
Maam mꞋaɗen tɛɗn Raaɗe ɔɔ naaɗe tɛɗn jee maamge.
11 Maakɗe ki se nam Ꞌdooy naapin̰ ute gɛnaan̰ gɛn jeel Raa ey sum,
taa jeege paac am jeelum maam Raa,
Ꞌkɔnd do gaange tu bini Ꞌkaan do jee magalge tu.
12 Taa ute bɛɛm se, maam mꞋaɗen tɔɔl tujɗege
ɔɔ kusin̰ɗege se mꞋan̰ dirigin̰ naatn.
13 Kɛn Raa jaay daŋ dɔɔkŋ kɛn naan̰ utu dɔɔkŋ ute naaɗe kiji se, naan̰ je taaɗn ɔɔ dɔɔkŋ kɛn naan̰ dɔɔko deet deet se gɔtin̰ deelga; taa nakŋ jaay daanin̰ dɔkga se naan̰ ooyga koono ɔɔ ɔɔpga baata utu Ꞌdeele.