18
Joapeme Epesalome Pyao Kumakaya
1 Kiŋi Dapitimi banya akali dupwa peparae nyuo malu palyiya. Palyapala akali dupwa lili pirapu akali taosande mendaki lili wakale piya dee andete mende ingyarapu lili wakale pirapu karo piya. Dopa pipala akali mupwa iso laminyaraminyi dupwa lili dupwana mendaki larapu karo peya.
2 Dopa pipala yanda angi pyala pena lao dokopa baame liti remana ingyuo wakale wakale akali Joapemoo dee Joapena yangonge akali Apisaimoo dee yuu Gati range akali Itaimoome pipya role pyao laminyuo iso pena, leya. Lapala kiŋi dokome banya akali dupwa lamaiyuo lao, Namba range nakama pipya role pyao paro, leya.
3 Dokopa nakamame isingi lao, Emba namwa pipya epa nare. Namwa lapo kapu kyuo ralo makando paramanopape panda pingisi paki pyao kumakaraminyipape dokona nyisu petenge dupwa keta mende ingya nara. Dopa piramopape emba angingyuo pyalena lao karaminyi. Renge doko embame kyawa nyepala namwa taosande akalisa (10,000) ingilini. Dokona emba mee yuu taone dakena piso kaepala namwa nyisaramili lapo peyarapu pepe, leyami.
4 Dokopa kiŋi dokome isingi lao, Nakamame mende keyange lao suu pyaraminyi doko nambame piru, leya. Lapala baa kame kambu kii wangu dokona kareyamopa banya akali dupwa kimbu pyao piso liti taosande mende ingyarapu andete mende ingyarapu pyuo peyami.
5 Baame akali Joapemoo Apisaimoo dee Itaimoo pii lamaiyuo lao, Nambana kingi dokona lao akali parange Epesalome doko randa maiyaka nana, leya. Doko Dapitimi banya akali mupwa dupwa peparae pii dake lamaiyamopa yanda singi dupwa peparaeme soo oteyami.
6 Dokopa Dapitinya yanda singi ami dupwa pao yuu kipwa kipwa dorena papala yuu Eporaime imwa dokona nakama Isaraele pipya yanda piyami.
7 Dapitinya akali dupwame Isaraele akali dupwa pyao wini piyami. Dopa pyuo yanda isare rao pipala pyao wini piyaminyipa yuu gii dokopako akali ama malu taosande akalisa (20,000) kumuyami.
8 Yuu muu kipwa kipwa dokona yanda doko pyuo andakyapala akali yandana kumuyaminyipape daa mee lapo kamame wakasa ingyuo imwa dokona kumuo peyami.
9 Dokopa aopa akali Epesalome dokome Dapitinya akali lapo kando nyiya. Epesalome baa mena donge matana piso peya. Pao isa kameya mende oke lenge kareya dokona isa lungwa lungwarena peyamosa isa wangya dokome banya ayemba rambuki nyepala mee yukwaro kareya. Dokopa mena donge doko makandoko peyamopa baa yeelyo isa dokona pero kareya.
10 Dokopa Dapitinya akali dokona mendeme kandapala akali Joape doko kando lamaiyuo lao, Nambame Epesalome baa isa oke mendena yukwaro karapyamo kandapu, leya.
11 Dokopa Joapeme isingi lao, Embame kandapala dokopa akipamo aopa pyao kumaka napisi? Embame baa pyapili doko namba rangeme emba kana kulingi akalisa dee marapu mende pipala emba jipuli, leya.
12 Dopa leyamopape akali dokome isingi lao, Embame namba kana kulingi taosande mendaki jipilinyipape nambame kiŋinya ikinyingi doko yango palyili lao nambana kingi kuki dokona mendeme minyalyuo pyaa napuli, leya. Doko kiŋi dokome lao, Nambana lao suu pyao akali parange Epesalome doko randa maiyaka nalapape, lao embamoo akali Apisaimoo dee Itaimoope pii lao langiyamo doko namwa peparae siyama kande.
13 Kiŋi baame mende pingi dupwa peparae soo otenge dokona nambame banya pii warombo see napala baa pyapuli doko dopa pyuo pyapi lao pii baa sipyali. Sepala baame namba randa jipyali embame namba nyisa napili, leya.
14 Dokopa Joapeme lao, Yuu gii malu nembo namba embapa pii laa naramba, leya. Lapala Epesalome baa isa oke dokona lete yukwaro kareyamopa kaku rema nyepala Epesalomena kyangali dokona pyao pisiya.
15 Dokopa Joapena yanda singi akali akalisame karo awali lapala Epesalome baa angi pyao kumakayami.
16 Doko Joapeme yanda piyama doko kaena lao bikuli poo lena leyamo dokopa banya yanda singi malumi Isaraele dupwa peta ralyuo piyami dupwa yaki nyuo kaepala anda epeyami.
17 Dokopa nakamame akali Epesalomena yongo doko nyepala imwa dokona yuwale kyuwa mendena malyiyami. Malyapala kana malumi ama ketae reto yambe pyao pulyuo nyiyami. Dokopa Isaraele akali peparae mendaki mendaki lao nakama rangena anda dupwana ralo makando peyami.
18 Epesalome banya kingi dokona lao mendeme panda nyera wane ikinyingi mende manja naya dokome baa lete kareyamo yuu gii dokopa banya kingi doko ota naramopa suu pyao kararamiŋi lao kana londe mende Kiŋinya Yuu Pau Lama Lama dokona yuu apu rao pisiya. Pisiyamo yuu gii dokona piso pao dakepape wambu dupwame kana doko Epesalomena Kana lenge.
Epesalome Kumuyamo Dokona Lao Dapiti Lamaiyami
19 Dokopa akali Aimase Satokona ikinyingi dokome Joape lamaiyuo lao, Kamongo dokome banya nyisu petenge dupwa pipya kiŋi doko kyawa lete nyuo nyisapyaŋa lao wai pii keyange doko minyuo kiŋi petamo dokona lamaila makando paowa, leya.
20 Dokopa Joapeme lao, Daa. Epapu emba wai pii keyange lapo minyuo paa nare. Doko kiŋinya ikinyingi doko kumapyamo dokona yuu gii mendepa emba minyuo pare. Epapu daa, leya.
21 Dokona banya kendemande akali Itiopia range doko lamaiyuo lao, Emba doo pipyamo kandapi dupwa kiŋi doko lamaiya puu, leya. Dokopa kendemande akali dokome Joape kando pangu sepala makando peya.
22 Aimase suu lao lao, Namba mende pira dupwana mende masa nalyoŋo. Wai pii doko kamame minyuo parole, leya.
Dokopa Joapeme isingi lao, Nambana ikinyingi, emba dokona yano mende nyii nare doŋo akipamo dopa pinya suu pilisi? leya.
23 Aimaseme kamba lao, Mende pira dupwana wari laa nalyo mee panya suu pilyu, leya.
Dokopa Joapeme lao, Doko kapaŋa puu, leya. Dokona lao baa kata dokona makando lupyapala yuu Jotane Pau Lama Lama dokona suku suku papala Itiopia akali doko yaki nyuo baa wambo peya.
24 Yuu taone dokona kame kambu dowa kamandape dee andakarepe kanya iki siyamo dokona Dapiti baa peteya. Dokona yuu taonena kambu isingi akali mende kana kame doko ketae pulyuo peya. Papala kambu dorena ketae anda yangi ingyuo perao karenge dokona kareya. Karapala dokopa akali mende baa iki makando repeta repeta epeyamo doko kandeya.
25 Kandapala baame isa kee lapala kiŋi doko lamaiya. Dokopa kiŋi dokome lao, Baa iki epara ramo doko baame wai pii keyange mende minyuo epara, leya. Dokopa akali makandeyamo doko makando repeta repeta epeya.
26 Dokopa dee isingi akali dokome akali mendeko iki makando epeyamo kandeya. Kandapala baame akali kame kambu dowa dokona iso karenge doko kee lapala, Kanda. Akali mendeko makandelyamo, leya.
Dokopa kiŋi dokome isingi lao, Akali dokome opetae wai pii keyange mende minyuo epelyamo, leya.
27 Dokopa isingi akali dokome lao, Nambame kandapu dokopa akali wambo makandapya doko Aimasena makandenge dopale ingyapya, leya.
Dokopa kiŋi dokome lao, Baa akali keyange. Baame wai pii keyange mende minyuo epo pilyamo, leya.
28 Dokopa Aimaseme kiŋi doko pii ketae palyuo yako lapala banya lenge kambu siyamo dokona pangu soo dopa lamaiyuo, Embena Kamongo Anatu lakando karape. Renge dokona lao akali dupwame emba kiŋi andake doko isa nembalana lao karaminyi dupwa keta baame anamasi minyingi renge doko jiya, leya.
29 Dokopa kiŋi dokome piso soo lao, Akali parange Epesalome doko kapa lete karase? leya.
Aimaseme isingi lao, Kamongo, embena akali mupwa Joapeme namba puu lapyamo dokopa wambu peparae mona rando pii malu lao akema lalya lana pyuo karami. Doko piminyipape doko apa pipya lao namba langi nami, leya.
30 Doko kiŋi dokome baa lamaiyuo lao, Dumbisa karena leya. Dokopa baa dokona papala kareya.
31 Dokopa Itiopia kendemande akali doko epapala kiŋi doko lamaiyuo lao, Emba kiŋi andake doko, nambame wai pii keyange mende minyakao ipu. Epapu Kamongo dokome wambu emba kando pimwaiyuo nyuo isa palyalana kareyami dupwa isa palyuo anamasi minyakapya, leya.
32 Dokopa kiŋi dokome piso soo lao, Akali parange Epesalome kapa lete karase? leya.
Dokopa Itiopia kendemande akali dokome isingi lao, Kamongo, baa keta mende pipyamo doko embena nyisu petenge dupwape dee emba mata joo penge dupwape peparae keta pipyali yaka lao suu pilyu, leya.
33 Dokopa kiŋi doko baa wakasa mona randaya. Kame kambu penge dorena ingyuo panda kuki ketae dokona papala ee lao peteya. Baa pao dokopa ee dopa pyuo leya. O nambana ikinyingi, nambana Epesalome. Epesalome nambana ikinyingi. Namba embena panda doko nyepala kumapuli doko kapa ingyapyali. Nambana ikinyingi Epesalome, nambana ikinyingi, lao ee leya.