69
Nyisinya Lao Ee Leya
1 O Anatu, ipwa dokome epo nambana mange koe nyilyamo nyisape.
2 Namba ipwa inju mendena nyuo yalu pilyamo.
Yuu porai mende see nalyamo.
Namba ipwa kota ama yalu mendenakaro.
Ipwa kota kasakole minyuo ipwa dokome namba oo nyuo napalana pilyamo.
3 Namba nysinya lao kyakale lapu doko lao lisa pipala pendoko rokolyamo.
Nyisala eparali lao lenge nyuo karo lenge alyilyamo.
4 Renge angi mende palya napyamopa namba awa nao karaminyi dupwa
ama malu ingyapyasa nambana kyawasi malu karamo dupwa manda manja nalyamo.
Nambana yanda pimwai dupwame kando kyambo lao yanda pimwailyaminyi.
Nakamame namba pyalana poraiyuo kaelyaminyi.
Dopa pipala bange dupwa waa nyiyu ingyuo range maiyakami letaminyi.
5 Nambana koo dupwa Anatu embapa yalu pyuo silyande daa.
Namba kopyali ingyuo pyuo karene lao embame soo kaeyo karene doko.
6 Kamongo Mupwa Andake Wakasa Ama Porai,
Emba Isaraele wambunya Anatu doko.
Namba koo pirunusa embena wambuemba mona retenge dupwa mona kenda nana lao suu pyao karape.
Wambu kingiwapambupi lakao emba kingi lenge dupwa nambame koo pirunusa
emba Isaraele wambunya Anatu elya nyii namili lao suu pyao karape.
7 Embena kingi reke lao karapusa
wambu dupwame giyalya giyana pyuo karaminyi elyame kumulyu.
8 Namba nambana yangonge dupwa pipya kanda nange upunili ingyuo pelyamo.
Nambana endangi rakangepa dupwa pipya namba yuu nanesa wambu enenge ingyuo pelyamo.
9 Embena tembole anda suu pyao yulu andake isare rao pyuo kararo.
Emba kando pii kopyali minyinyi nembo leyaminyi dupwa namba keta soo punjilyamo.
10 Namba range inyimungu karapala nenge wasaka pyuo pisipunupa
wambumi kilya kando letaminyi.
11 Namba kumanda piso ee lao wapungi komau wapwaro pisipu dokopa
giyalya giyana pilyamini.
12 Kata jima jima dupwana karo nambanalao lakao karaminyipa
ipwa biya nenge akali dupwame nambapa lao kenane rana isa poko pyao karaminyi.
13 Dopa lao karaminyipape nambaramo doko Kamongo embapa lao loma soo kararowale.
Anatu, yuu gii mende embame rombo palyuo nyepala namba isingi langipi.
Embame namba mona andakeretelene dokona laope
embame kyawa lete nyero lenge pii doko minyingi dokome isingi langipi.
14 Ipwa injunya yalyilyu dokona nyisape.
Nambana yanda pimwai
dee ipwa andake dolapona nenge rekya lao nyepe.
15 Namba ipwa palyuo koo mange nelyamo dokome nyuo koko palya nanale.
Namba yuwale kyasisi londe dokona
malu pisi kara narowale.
16 Kamongo embena mona reto puu penge keyange dokona piso pii yano pyaka.
Embena saka renge palenge doko paleta namba keta ipupi.
17 Embena kendemande akali doko kandele kanda nale lao kara napipi.
Namba angi randa nyilyu dokona dakepa embame nyisa.
18 Namba keta epapala nyisape.
Nambana yanda pimwai dapwana namba nenge rekya lao nyepe.
19 Nambana kingi doko kokwa soo lao
koo keta palyamisa elya nyilyu doko emba silini.
Embame nambana yanda pimwai dupwa peparae kandasi karene.
20 Kingi kokwa soo laminyi dokome nambana mona doko kwaepyasa namba kopyali pakana palamo.
Namba dopa pyuo pilini lao mendeme kenda dokona nakanju sepala
mona minyaramburami kandena lao lengenyipunu dokopa mendali daa ingilyamo.
21 Namba lopo piyamo dokopamauli nyuo jiyami.
Namba ipwa nano piyamo dokopa ipwa waene kau pingi doko nyuo jiyami.
22 Nakamana pati andake laminyi dupwame nakama kokwa sinyi nembo penale.
Nakamana nenge nenge yuu gii dokona kone makarami dokona mangena minyinya.
23 Pyao lenge kwaenyi nembape.
Nakamana mata dupwa poraiya nanale lao pipi.
24 Embena imbu singi doko nakama keta kulimbwanyi palyapala
imbu singi dokome pyao yamasu pyanyi palyape.
25 Nakamana piso palyuo pyuo papilyaminyi panda doko mee apa sinyale.
Nakamana komau anda dokona mendepe lenge rao see nanale.
26 Embame koo piyaminyi pyao yano nyiinyi dupwako randa mailyaminyi.
Nakamame embame pyao ranjama nyiinyi wambu dupwanako pii lakamyuo palaminyi.
27 Nakama lete parami panda dorena maiya narene.
Nakamana koo dupwa mondo lao pepana pyao retakamyuo karape.
28 Lete karengena buku dokona nakamana kingi doko kwuanyi nembasi palena.
Nakama embena wambunya kingi silyamo dokona sisara daa.
29 Namba mona rando mona kendo pilyu.
O Anatu, embame namba minyalyuo nyepala nyisape.
30 Nambame banya lao suu pyao kenane romope lao rana isa poko baa suu pyao kararo.
Banya yulu keyange wakasa dupwana namba banyalao sangyu lao lao panaro.
31 Renge dokome Kamongo baa rae mainyipyambwaramopa mena bulamakao kali kameya mairaminyi dupwa
mee ingyuo para.
32 Pendewa dupwame doko kandaraminyi dokopa raeme kumarami.
Dopako pyuo Anatu kingi lenge wambu dupwa dokome porainyi pyambwaramo larami.
33 Kamongome bange yano pilyamo karelyaminyi dupwana pii doko soo nyuo
dee banya wambu karapusi palenge dupwa kame see naowako karo pingi.
34 Anatu baa yake yuupi laparaeme lakando wee kenanepe lena.
Ipwa kota dee bange wasiyamo silyamo dupwa opetaeme baa lakandena.
35 Baame yuu Jerusaleme doko nyiso
Juta wambunya taone dupwa dee kamba pyakamira dokopa
banya wambu dupwa dokona yuu rombo pyao nyuo nao palirami ingilyamo.
36 Banya kendemande wambunya para pyao nyerami.
Wambu baa mona retarami dupwame dokona panda nyuo nao palirami.