13
4 Dokopa Kamongome lao, Namba nakamana Kamongo Anatu yuu Isipi piso lanyuo epeyo doko, leya. Nakamame anatu wakale mende soo nyii napala namba iki soo nyepenge. Namba ikiko nakamana pyuo nyingi ingyuo karenge.
5 Yuu muiyane yando nao oo lasi nenge see nange dokona nambame nakama rapu pyuo kareyo.
6 Dopa piyunupape nakama yuu keyange doko pao kando nyuo nenge nao sikya pipyamo kapa karapala dokopa kimbu pyao piso nakama namba kame silyaminyi.
7 Dokona lao nambame nakama mena laeneme minyarapala nyili lao mena lepete ingyuo nakamana kata nee paelyaminyi dupwana isaro soo piru.
8 Sepala mena beyame ikyane nembapala wambu kanda kanda pyao nala epamuli pyuo epo nao roko kata lumbwasero. Nambame mena laeneme nakama waiya lao nalamuli pyuo naro. Mena rae lenge ingyuo pyao suu lalya lana pyuo nembaro.
9 Isaraele wambu dupwa nambame pyao kokwa sero dokopa apimi nakama nyisarase?
10 Nakamame kiŋi akali mendepe dee akali rapu pyuo mupwa kararami lapope jii lao piso silyaminyi doko akali dusipame apa pyuo nakama akali rara doko nyiso kararamisi?
11 Nambana imbu singi paleta karo nakama kiŋi dupwa jiyu doko dee kamame wakasa imbwayono dokome kiŋi dupwa ramo nyisa nembeyo.
12 Isaraele wambunya koo piyami dupwa pepana pyasi silyamo. Dee pepana pyasi silyamo dupwa kando panda mendena retapunu silyamo.
13 Isaraele dupwa yuu gii mende mairunu palu kararami ingyapyamopa nakama wane nyaŋa ene manjana pilyaminyipa romba anda piso epana saka nange dopale ingyo yuu gii doko nyelana kopyali minyuo yakara pilyaminyi.
14 Nambame wambu dapwa kumakarami lao nyiso dee kumapala kumasi wambu penge panda dokona paka nana lao kyawa lete nyuope pii naro. Kumunginya renge porai doko epara dokopa nambame kiiramo nyii naroko. Dokona lao kumungi renge doko embena porai renge doko anja palipyandeme namwa randa jerase? Embena anamasi minyare renge doko anja silyase? Wambu dupwa kando dee sakame kumuoko karalu kara naro ingyara.
15 Isaraele wambu dupwa mee ee pisinya ukunanyi andele laraminyipape yuu muiyane neta pyakaenge dorena piso porambaiye ama isasa pingi mende peyaronopa dokome ipwa isa yuunya piso potemo epengepe dee ipwa guu lao epengepe dupwa soko rali pira. Dee porambaiye dokomeko nakamana bange wakale wakale mona nyingi dupwa nyuo nembarasa pira, leya.
16 Samaria wambu dupwa nambapa kamba leyaminyi dokona randa narami ingilyamo. Dokopa banya wambu dupwa yanda piraminyi dokona kumarami. Dee wane nyaŋa dupwa kalyuo inju konda pyao nembarami dee enda wane palenge dupwa kalyuo poro larami.