18
Mendaki Mendaki Lao Rangena Yulu
1 Kamongome namba langyuo
2 baame dopa leya. Dake aki kongwalu piinde wambu dupwa keta yuu Isaraele dokona kamba kamba letamisi?
Rakange dupwa isa girapo kau pingi neyami.
Neyaminyi dokome wane wanake dupwa nenge niki niki piya.
3 Kamongo Mupwa Andake Wakasa karenge dokome dopa lao, Namba Anatu lete karalu karenge dokome kinyi kinyi leto. Nakamame kongwalu pii dake kamba yuu Isaraele dakena laa nalu nao narami.
4 Wambu peparae nambana. Rakange wanepe dupwa peparae nambanako. Mende koo pira ramo doko iki kumara.
5 Akali mende elyape dokome angi dokonako palyuo lao rolae pyuo pira ramo
6 doko baa Isaraele wambu dupwame bange lapo anatu lao wasisi semango karo bange lapo lakando pyao kiso maingi dupwana naa nange ingyara. Baa akali mendena enda kepo pyakami nao panda enda nenge range nao petenge dokopa kepo pii nange ingyuo karara.
7 Baame minyako pyuo waa nyii nange. Bange mende yulu pipalana lao nyuo pao dokopa range peyakarono dokopa jereŋe bange mende minyaro karena lao maipala nyuo penge doko enakana peyakamilyaminyi dokopa dolo range mondo lao maingi. Komau see nangepe dee lopolyaminyi dupwa baa nenge pyuo komau maiyuo pingi.
8 Baame kana matana piso nyipuli lao maiya nange. Koo dupwa pinya pakapala kote dupwana kinyi dokona iki lao kunjingi.
9 Akali dopale dokome namba letonuli pyuo lowa dupwana mondo lao minyingi. Baa rolae pingi dokona yuu gii andarele karara. Kamongo Mupwa Andake Wakasa dokome dopa letamo.
10-11 Akali dopale dokona wane mandeyande ramo dokome yulu koo doo rakange pii nange dupwa pyuo waa nao wambu pyao bange pyao kiso semango karenge dupwana nenge nao dee akali wakalena enda kepo pyakamyuo pira.
12 Baame wambu pendewa dupwa minyako pyuo waa nao bange lapo yulu pipala range jinya lao maingi dupwa baa nyuo semango kingi lenge mare dupwana pao bange lapo kingimi wasisi dupwa lakando
13 kana lapo baa matana piso nyipulinyako suu pyao maiyuo pyuo karenge. Akali dopale doko kapa lete kararase? Ama daa. Baa koo dopale dupwako pyuo papira dokome baa kumara ingilyamo. Rangeme kandakinya pyuo karapala kumuo para ingilyamo.
14 Dee akali mende lapo dokome wane mandeyali doko banya rakangeme koo piyamo dupwa kandapala mana nyuo pii nalana suu piya.
15 Isaraele wambu dupwana anatu lao isa kanapeme wasisi dupwa semango karo lakanda nao Anatumi daa lenge panda dupwana bange lapo pyao kiso maingi dupwana wane baa naa nao akali mendena enda dupwa kepo pyakami nao
16 wambu dupwa mata rukyuo pyao waa nyii nao pingi. Bange mende yulu pipalana nyuo pao dokopa range peyakarono dokopa jereŋe bange mende minyaro karena lao maipala nyuo penge doko enakana peyakamilyaminyi dokopa dolo range mondo lao maiyakamingi. Wambu lopalyaminyipape dee komau see nangepe dupwa komau nengepe maingi.
17 Baa koo dupwa pii napalape dee kana dupwa matana piso nyii nange. Baa nambana lowa minyuo letonuli pyuo karara. Dopa pira ramo doko banya rakangena yulu koo dupwana lao kuma napala baa mee lete karara.
18 Banya rakangena yulu doko wakale ingyuo pelyamo. Baame wambu minyako pyuo waa nao yuu peparae yulu koo pyuo kareyamo dokona kumuya.
19 Dopa piyamopape nakamame piso soo, Akipamo banya rakangena koo dupwana ikinyingi randa nyii nalyase? letaminyi. Dokona isingi pii doko ikinyingi doko baa keyange rolae pingi. Nambana lowa letamuli pyuo karenge dokome baa mee karara.
20 Mendaki doko koo pingi dokona baa kumungi. Rakangena koo piyamo dokona lao ikinyingi yano nyerande daa. Dee ikinyinginya koo pingi dokona rakange yano nyii narako. Koo keyangepe pirambinyi dokonako manda manju range yano nyingi.
21 Akali yulu koo pyuo karara mendeme koo yaki nyuo kaepala nambana mawa pii dupwa minyuo dee rolae pira ramo doko baa kuma nara. Baa mee lete karara.
22 Dopa piramopa baa yulu keyange piramo dokona banya koo wambarae dupwa nyuo kame sakamirunu baa mee karara.
23 Akali koo pingi kumara dokopa namba mona seramopa rae maiyuo karare lao suu pilyamisi? Dopa lao Kamongo Mupwa Andake Wakasa dokome piso silyamo. Ama daa baa mona enenge palyuo epo lete kararamo dokopa kando namba rae mairu.
24 Akali rolae pingi dokome keyange piyamo dupwa kupyuo yaki nyepala koo dupwana sukusa pao wambu wakalena koo pipala elya nyingi dupwana mana makandope nyepala pyuo karara ramo doko baa lete karara ingyarase? Ama daa mendeme banya keyange wambo piyamo dupwana dee suu pyaa naro. Baa yaki nyuo yulu koo pyuo kareyamo dokona kumara.
25 Nakamame dopa letaminyi. Kamongome pilyamo doko angi rolae daa letaminyi. Nakama Isaraele dupwa nambame apa leene lao soo karalapape. Nakamame nambame pilyu dupwa rolae angi daa lao suu pilyamisi? Namba daa. Nakamame angi kyai doko pimisa pilyamo.
26 Akali rolae pingi mendeme kaepala koo dupwa kanda soo piramopa baa kumara. Doko koo banya dokome range kumarasa pira.
27 Dee akali koo pingi mendeme koo doko mata maiyuo kaepala epo keyange rolae pira ramo baa range lete wai pyao nyerasa pira.
28 Baa koo piyamo doko soo nyepala yaki nyipyamo dokome baa kuma nao mee karara.
29 Nakama Isaraele dupwame dopa lao, Kamongome pilyamo doko rolae daalyamo lao karaminyi. Nakamame nambame pipu doko rolae daa lao suu pilyaminyi doko kinyisi? Nakambana pilyaminyi doko rolae daa.
30 Namba Kamongo Mupwa Andake Wakasa dokome nakamba Isaraele wambu dupwa langilyu. Koo emba rangena pilini dokona wakale wakale yapalya yapana pyuo laro ingilyamo koo dokome nakama kokwasi nanale dupwa yaki nyepala ipupwa.
31 Nakamana koo doo pyuo karaminyi dupwa mata maiyuo kaeyalapa. Kaepala suu pingi enenge palyuo mona alowa pyuo pipwape. Nakama Isaraele wambu dupwa akipamo kyawa kana palyapala kumalana karamipi?
32 Dokona lao Kamongo Mupwa Andake Wakasa dokome nakama mendali kumarami dokona rae mai nalyo. Dokona lao koo dupwa yaki nyepala lete karalapa, letamo.
19:1—32:32 Anatumi banya wambu keta pii yapalya yapana pyuo kote leya. Dee yuu rara wakale wakale range wambu Juta repeta kareyaminyi dupwa keta Anatumi randa mairu lao pii lapapu pyuo leyamo dupwa palamo.