Nan Umunaay Suyat Pablo An Timoteo
Nan Mipangkop Sannaja Suyat
Sa'ad as Timoteo mernus gway namati gway ijAsia Minor. Sa'ad nan inana Hudyu ja sa'ad nan amana Griego. Nangngachan huyun ja atuyungan Pablo san terwhasuna san mipangkop an Apudyus.
Agwad nan tuyu napatog gway whayugwon Pablo gway iwhaka san umunaay suyatna an Timoteo. Sa'ad nan umuna iwhakana nan oon Timoteo tot ijachina nan wha'on kus ustuway sussuyu gway nerpu ekay san somsomo' nan taku. Nan mi'aggwa, ingwhakan Pablo gway maserpu ustu nan ukalin nan mangipangpangu sasan namati ja ustu ahos nan oon chanan namati san makimukimungancha. Sa'ad nan anungus nan suyatna, ingwhakana an Timoteo nan oona tot umamamod humayu nan i'amannaay mangisuyu san mipangkop an Kristu Hesus ja popotpotana nan pammatina.
Chanan Hu'yona
Nan Lugyukin Nan suyat 1:1-2
Nan Mipangkop Sasan Wha'on Kus Tuttuwa Nan Isuyucha 1:3-11
Nan Nanjamanan Pablo An Apudyus Kapu San Achakuna 1:12-20
Nan Tudtuchu Mipangkop San Manchajagwan Chanan Namati 2:1-15
Chanan Mangngachan Mangipangpangu Sasan Namati Ja Mangngachan Atuyungancha 3:1-13
Nan Mangiwhagan Pablo San Pangkopna Gway Nanuyat 3:14-16
Tudtuchu An Timoteo Mipangkop San Mansilsilwhiyan An Kristu 4:1-16
Tudtuchu Mipangkop Sasan Nan'aya'ayasi Taku San Kimung 5:1–6:2
Tudtuchu Mipangkop San Mangipatokan San Pila' 6:3-10
Nan Tudtuchun Pablo An Timoteo Ja Anungus Nan Tudtuchu Sasan Namati 6:11-21
1
1 As Pablo na gway nachutu'an as apostol Kristu Hesus. Chinutu'ana' an Apudyus gway manaku an chita'u ja as Kristu Hesus gway sija nan merpugwan nan namnama ta'u.
2 Annaja suyat'u an si'a, Timoteo, gway iwhilang'us kadto'ay ana''u san pammati.
Ta'okot nu as Apudyus gway Ama ja as Kristu Hesus gway Apu ta'u nan mangipaila an si'a san inawhayucha, san achakucha ja pawhayugwoncha nan whijagnu.
Nan Mipangkop Sasan Wha'on Kus Tuttuwa Nan Isuyucha
3 Anna iwhaka' asin chay ingwhakawhaka' an si'a gway oom say ummaja' ad Macedonia gway ainnugwam ad asnatay Efeso ta iwhakam peeka iwhaka sasay uchumay takud asnatay achicha isuyu nan wha'wha''onay sussuyu.
4 Iwhakam peeka iwhaka an chicha ta achicha chongchongyon nan uullit ekay gway inggwan chanan taku ja nan mipangkop sasan achi ap'appungay auullitan nan mipangkop sasan ummunaay taku san agwi gway oyog as maniisi'an. Ipayosgwana nan a'ammasna ja maid kun iwhachangcha san ma'gwaan nan pangkop Apudyus gway maakammugwan kapu san pammati.
5 Sa'ad nan pangkop nannaja ingwhaka' tot manisiwhayu chanan namati gway merpu san por'asay somsomo', maid kun pangkop as sawhali ja merpu san kadto'ay pammati.
6 Sa'ad chachay mangisussuyu san wha'wha''on nanchu'kancha nannachaja sussuyu kun patinajunay manisiisi'cha.
7 Whayugwonchaay mangngachan mimistuyun nan lintog Apudyus gway inatodna an Moses gwon achicha kun maagwatan nan ana'anancha gwinnu nan mipangkop san ipapilitchaay ananchaon tuttuwa.
8 Akammu ta'uway whayu nan lintog Apudyus nu usayon nan osa taku gway ustu.
9 Akammu ta'u hosay sa'ad nan lintog wha'on kus na'gwa kapu sasan takuway mamatpati san lintog Apudyus gwon na'gwa kapu sasan achi kun mamatpati san lintog, sasan nayu'u, sasan mallagwing gway manchajaw an Apudyus, sasan humersuwhersu, sasan wha'on kus mamigwhig an Apudyus, sasan manguya an Apudyus, sasan mangtoy san amacha ja inacha, sasan manootoy,
10 sasan manggwamanggwas whayangna awhawhain ja ina'aisaw gway pijaon nan longag, sasan laya'iyay mangibog san asillaya'icha, sasan takuway mangila'ya'u san asintatakucha, sasan tuliyan, sasan mangisapata san tuli ja sasan manggwa san achi kun umajun san ustuway sussuyu.
11 Nan ustuway sussuyu nerpu san Whayuway Chamag gway intayo' Apudyus an sa'on gway ipaakammu'. Nannaja Whayuway Chamag nerpu an Apudyus gway a'erjad ja machaychajaw.
Nan Nanjamanan Pablo An Apudyus Kapu San Achakuna
(Apostoles 8:3; 9:3-19)
12 Manjamana' an Kristu Hesus gway Apu ta'u gway nangatod an sa'on san pigsa gway manggwa san ipa'gwana an sa'on. Ingwhilangnas sa'on as mantayo'an ja pinilinas sa'on as mansilwhi an sija.
13 Ta'on nu ingwhakawhaka' san agwi nan mihursu an sija ja pinalpalikata' ancha inamsaamsiw'us sija san nanggwaa' san lagwing sasan takuna, inachakugwana' an Apudyus kapu tan achi' kun akammu nan inggwa'inggwa' ja chaana' kun mamati an sija.
14 Amod cha'or nan inawhayun Apudyus gway impailana an sa'on gway nahurnan san pammati ja lajad gway nerpu an Kristu Hesus.
15 Annaja nan kadto'ay ukud gway maserpu lobhongnaay agwaton ja tuttugwaon gway sa'ad as Kristu Hesus ummalid asna luta ta takuwona chanan humersuwhersu. Sa'on nan aamochan nan whersuna an chicha.
16 Sijachi nan kapuway inachakugwana' an Apudyus tot kapu an sa'on gway aamchan san whersu, ipailan Hesu Kristu nan maid uyangnaay anusna tot mangilan chanan takuway mamati an sija as tapin chi erkaw ad na'awhijagcha an Apudyus as ingkaingkana.
17 Mawhigwhig ja machajaw as ingkaingkana nan Ali gway maid kun pungpungna gway achi kun matmatoy ja achi kun maila gway sija nan osossa''anay Apudyus. Amen!
Ingwhakan Pablo An Timoteo Gway Popotpotana Nan Pammatina
18 Sa'ad nannachaja iwhilin'u an si'a Timoteo gway ana''u san pammati, umajun san anan chachay profeta san mipangkop an si'a, chachi otjan nan mangipapigsa san somsomo'nu tot ilawhannuway ustu nan atuttugwaan gway mipangkop san Whayuway Chamag
19 gway popotpotam nan pammatim ja nan por'as gway somsomo'nu. Nan uchumay taku lagwingoncha por'as nan somsomo'cha kun tinangkaancha nan pammaticha.
20 Mitapi an chicha cha Himeneo an Alejandro gway impawhijang'u an Satanas tot masuyuwanchaay achi manapapat san mihursu an Apudyus.