7
Ɔgbɔ lɔsu nœ aaya Yisu
1 Manda nœ, Yisu sœ lima kœna lœ ogo Galilayi. Tshe yiyi lima ndœ kœna lœ ogo Yuda nene mbœrœ Ayuda sœ lima kœpara awa ndœ kœwo she.
2 Andaa angbo nœ ayuda á dœ angbo gbanda tande ndo lima ye.
3 Aaya Yisu kœpa fœ she adœke: «Gitœ zœ kpœke, yé œ na ga lœ ogo Yuda adœke ayambarœ nœ zœ wu ndje akwa á ɓœ sœ tœ kœmbœrœ tœnœ.
4 Uzu mbœmbœrœ œrœ lœ ubunœ nene œdœ tshe kœgbe adœke azu wusœ œne. Ɓata á ɓœ sœ kœmbœrœ akwa atake, matœ zœ dœ tœnœ ga ushu tshapashɔ wusœ nœ.»
5 Gbambanœ nene, aayanœ dœ tœ endje sœsœ lima dœ kœyindœrœ ga ndœ ye nene.
6 Yisu kœpa fœ endje adœke: «Ɔlɔ nœ mœ tɔtɔ damba nene. Tœ e'e nœ 'e, ɔlɔ kɔ sœ dœ ɔtshɔnœ.
7 Tshapashɔ œ li tœ kœyiangba 'e nene, kashe œmœ, œ yiangba mœ mbœrœ á mœ sœ kœpandœ nœ ngbɨ adœke akwa nœ ye sœ tœ ekpenœ.
8 'E ɔ ndœ angbonœ zœ. Kashe œmœ, mœ ɔ ga zœ nene mbœrœ ɔlɔ nœ mœ tɔtɔ damba nene.»
9 Manda kœpa o'onœ ataa, tshe sœpe lima tɨ lœ Galilayi.
Yisu na ga tœ angbo gbanda tande
10 Lɔkɔ á aayanœ áafo á ro ndœ angbonœ da ye, Yisu áalafo yaa œ na ndje ga zœ dœ mara adœke azu wuwusœ nœ nene.
11 Dœ lɔkɔ á ala angbonœ doro, agbozu Ikrizia sœ lima kœpara she yé endje sœ lima kœyu osho adœke: «Tshe sœ kpœta a?»
12 Endje ndɨvwɨrɨ lima o'o waa tœ upu nœ ye. Anga azu pa lima adœke: «Uzunœ asœke kœdœ ɔtshɔ uzu.» Yé anga endje pa ndje adœke: «Œ̃ œ̃ nene, œshe kœdœ ayi kœdjingili tshelœ kumu azuzu.»
13 Yé uzu bale papa o'o o'ara tœ upu nœ ye nene mbœrœ á endje lœ lima dœ awa agbozu Ikrizia.
14 Kœwu adœke tshelœ angbonœ za, Yisu na lima ga lœ anda Tepelo, yé œ tetœ kœyisœ œrœ.
15 Uvuru Ayuda kpa lima lœnœ, yé endje pa lima adœke: «Uzunœ asœ dɨdɨ œrœ nene, yé kotoo á tshe sœ dœ kœwusœrœ tshaata a?»
16 Yisu kœgi o'o fœ endje adœke: «Œrœnœ á mœ sœ kœyisœ nœ asœke toto ɓa ndœ mœ nene, kashe œ to ɓa ndœ tsheneke á tshe vwa mœ.
17 Œdœ uzu kœgbe kœmbœrœ œrœneke á Ndjaba yindœ nœ, tshe wusœ nœ adœke kœyisœrœnœ asœke to ɓa ndœ Ndjaba, too mœ sœ kœpa o'o tœ upu nœ mœ dœ tœ mœ.
18 Uzu á tshe sœ kœpa o'o tœ upu nœ ye dœ tœ ye, tshe sœ kœpara awa adœke azu donga œne. Kashe uzu tsheneke á tshe sœ kœpara awa adœke azu donga ayi kœvwa she, tshe kœdœ uzu nœ adja o'o, yé ekperœ gugu lœ ye nene.
19 Œ dœ́dœ́ Moyize dá za liya awa akwa fœ 'e nene a? Kashe uzu bale ugurutœ 'e á tshe sœ kœmbœrœtœ ye liakanœ gugu nene. Mbœrœ gaɗe á 'e sœ kœpara awa ndœ kœwo mœ a?»
20 Á ukpulu azunœ kœpa fœ she adœke: «Ekpe ɨshirɨ sœ pa zœ a! Œɗe dá sœ kœpara awa ndœ kœwo ɓœ a?»
21 Yisu kpa kœza o'o á kœpa fœ endje adœke: «Mœ mbœrœ kolœ akwa bale yé œvuru 'e kɔkɔ kpa lœnœ ataa!
22 Moyize za liya o'o fœ 'e adœke 'e wa agbolo yakoshe nœ 'e tœ gaza. Œ dœ́dœ́ Moyize kœdœ ali uzu kœmbœrœ tœnœ nene, kashe œ to liya ɓa ndœ aata 'e, yé 'e sœ kœza ga tœ akwa dœ lɔkɔ Sabata.
23 Á 'e kœwu adœke kœwa anga gbolo yakoshe dœ lɔkɔ Sabata kœndɨndɨ awa akwa nœ Moyize nene, mbœrœ gaɗe á 'e so ókó ga tœ mœ mbœrœ á mœ she uzu djigi dœ lɔkɔ sabata a?
24 'E katœ kœwa ngbanga liaka œrœ á 'e wu dœ ala 'e ye, kashe 'e wa ngbanga dœ mara á sœ ndjii kane.»
Adja Yisu kœdœ Masiya a?
25 Anga azu lœ Yerusaleme sœ lima kœpa adœke: «Œ dœ́dœ́ uzunœ á endje sœ kœpara she á kœwo she dœke nene a?
26 'E wu, œshe dá pa o'o o'ara o'ara á uzu kœpa o'o fœ she gugu nene asœke! Ataa agbozu tshapa azœ wu ete œsœnœ adœke œshe kœdœ Kristu ye na a?
27 Andaa a wusœ osho á yakoshenœ asœke to tœnœ ye, kashe Kristu, uzu bale œ wu bala sœ osho á tshe to tœnœ á yi kumu ye nene.»
28 Yeka á Yisu á tshe sœ lima kœyisœ œrœ lœ anda Tepelonœ pa adœke: «'E wusœ mœ ye! 'E wu ndje sœ osho á mœ to tœnœ ye! Mœ nana dœ tœ mœ nene. Tsheneke á tshe vwa mœ, tshe kœdœ adja o'o; œshe á 'e wuwusœ ye nene asœmœ.
29 Œmœ, mœ wusœ ye mbœrœ á mœ to ɓa ɨndɨrɨ ye, yé œshe dá vwa mœ.»
30 Endje para lima awa kœtepa ye kashe uzu bale toto lima kane ye ga tœ ye nene mbœrœ á olo ye lili damba lima nene.
31 Azu ndjoro lœ ukpulu azunœ sœ lima dœ kœyindœrœ ga ndœ ye. Endje pa lima adœke: «Lɔkɔ á Kristu œ na, tshe mbœrœ ambárá afá kœropa œneke á tsheneke œ mbœrœ asœke ye a?»
32 Œneke á ukpulu azu sœ kœpulœma endje tœ upu nœ ye li ga lœ utu Afarisayi. Ataa, agbozu tshapa anganga Ndjaba œdœ Afarisayi vwa lima atshendjerœ nœ endje ndœ kœna kœtepa ye.
33 Yisu kœpa fœ endje adœke: «Mœ sœpe dœ 'e manda olo teasho, yé manda nœ, mœ gu ga ndœ tsheneke á tshe vwa mœ.
34 'E para bala mœ kashe 'e gbɔ mœ nene. Gbambanœ nene, osho á mœ sœ tœnœ, 'e li kœna ɓa zœ nene.»
35 Ayuda kœte lima tœ kœyutœ endje ugurutœ endje adœke: «Tshe na má gata yekane á a gbɔ she nene a? Tshe na manda azunœ á endje ndjɔtshelœtœ endje djelœ angbɨ azu a? Tshe na ndœ kœyisœ œrœ fœ angbɨ azunœ a?
36 Ádá o'onœ á tshe pa asœke kœdœ gaɗe: 'E para bala mœ, kashe 'e gbɔ mœ nene. Yé osho á mœ sœ tœnœ, 'e li kœna ɓa zœ nene!»
Yisu pa o'o tœ upu nœ Ɨshirɨ
37 Ndɔngɔlɔ olo kœka angbo kœdœ ɓalima ɨkpɨlɨ olo angbonœ. Dœ ɔlɔnœ asœmœ, Yisu ka lœ angbonœ œ tetœ kœmɨndœ o'o adœke: «Œdœ uzu kœsœ dœ ogo ungu, kaka tshe na ga ndœ mœ yé œ ndjo.
38 Uzu á tshe kœsœ dœ kœyindœrœ ga ndœ mœ, egerœ ungu á za soro œ tara tœ lɔsu ye, ɓata á endje sú ala Buku nœ Ndjaba.»
39 Yisu pa lima o'onœ asœ tœ upu nœ Ɨshirɨ á azu á endje sœ dœ kœyindœrœ ga ndœ ye œ gbɔ má. Yé Ndjaba zaza lima damba awa fœ azu kœgbɔ Ɨshirɨnœ nene mbœrœ Ndjaba gigi mokɔ nœ ye fœ she nene.
40 Manda kœdji o'onœ asœke, anga azu lœ ukpulu azunœ pa lima adœke: «Adja tsheneke kœdœ ayi kœgbara o'o tako.»
41 Anga endje pa lima adœke: «Kristu dœmœ.» Kashe anga udu endje pa ndje lima adœke: «Adja Kristu œ li kœwuta lœ Galilayi a?
42 Buku nœ Ndjaba papa adœke tshe wuta bala lœ aata Davidi yé œ sœ ɓa lakpɨ Beteleme ogo obo Davidi nene a?»
43 Ataa, azu kuru lima tshelœtœ endje kpœ lœ kumu Yisu.
44 Anga endje yi lima ndœ kœtepa ye kashe uzu bale toto lima kane ye ga tœ ye nene.
Ɔgbɔ lɔsu nœ agbozu yuda
45 Atshendjerœ gu lima ga ndœ agbozu tshapa anganga Ndjaba œdœ pe Afarisayi á endje pa fœ endje adœke: «Mbœrœ gaɗe á 'e gugu dœ she nene a?»
46 Atshendjerœ kœgi adœke: «Bale anga uzu papa o'o ɓata yakoshe asœmœ nene.»
47 Afarisayi kœpa fœ endje adœke: «E'e kɔ, tshe djingili ndje tshelœ kumu 'e a?
48 Œdœ ugurutœ agbozu Ikrizia œdœ ugurutœ Afarisayi, anga uzu bale wuta dœ kœyindœrœ ga ndœ ye ye a?
49 Azunœ ndjoro asœmœ, anga bale á tshe wusœ awa akwa gugu nene. Azu á endje darandœ endje dœmœ!»
50 Kashe anga uzu bale ugurutœ Afarisayi á ɨ'ɨrɨ ye kœdœ Nikodeme, œshe á tshe na lima utshunœ ga ndœ Yisu, pa fœ endje adœke:
51 «Awa akwa nœ azœ wawa ngbanga ga tœ uzu utshu kœdji she too kœwusœ œrœ á tshe mbœrœ nene.»
52 Á endje kœyu she adœke: «Atamœ œɓœ kœdœ uzu Galilayi, œɓœ ndje a? Mirœ tshelœ zœ dœ ɔtshɔnœ yé ɓœ wusœ nœ adœke ayi kœgbara o'o wuwuta bale lœ ogo Galilayi nene.»
Yisu œdœ yashe angba budu
[
53 Manda nœ, uzu dœ uzu gu ga ndœ ye.