3
Yisu œdœ Nikodeme
1 Anga yakoshe bale á ɨ'ɨrɨ ye kœdœ Nikodeme, sœ lima ugurutœ Afarisayi, yé œ dœ́ lima anga gbozu tshapa Ayuda.
2 Anga butshɔ bale, tshe na ga ndœ Yisu œ pa fœ she adœke: «Rabi, 'a wusœ nœ adœke Ndjaba dá vwa ɓœ adœke ɓœ yisœ œrœ fœ 'a mbœrœ uzu œ li kœmbœrœ ambárá afá ɓata á ɓœ mbœrœ asœke œdœ Ndjaba kœsœsœ dœ she awa bale nene.»
3 Yé Yisu gi fœ she adœke: «Mœ pa fœ ɓœ dœ adjapu adœke, uzu bale œ li kœwu Ogo gbozu nœ Ndjaba nene œdœ endje kpa kœzuzu she tœ bishanœ nene.»
4 Nikodeme kœyu she adœke: «Mara gaɗe dá uzu á tshe gbɔ ye á endje kpa zu she tœ bishanœ a?»
5 Yisu gi fœ she adœke: «Mœ pa fœ ɓœ dœ adjapu adœke, uzu bale lili tœ kœli ga lœ Ogo gbozu nœ Ndjaba nene œdœ endje kœzuzu she dœ awa nœ ungu œdœ ndje dœ awa nœ Ɔtshɔ Ɨshirɨ nene.
6 Œneke á to lœ undu uzu kœdœ undu uzu; yé œneke á to lœ Ɨshirɨ, kœdœ ɨshirɨ.
7 Uvuru zœ kpakpa lœ zœ nene mbœrœ o'onœ á mœ pa fœ ɓœ adœke: “Œ li adœke endje zu 'e lœ awa nœ tshalafo.”
8 Yugu sœ kœna tœ osho á yindœ nœ, yé ɓœ sœ kœdji œsœnœ kashe ɓœ wusœ osho á to tœnœ too osho á sœ kœna ga tœnœ nene. Asœke kœdœ mara œrœ á sœ kœmbœrœtœ ye mbœrœ uzu kɔ á endje zu she lœ awa nœ Ɨshirɨ.»
9 Á Nikodeme kœpa fœ she adœke: «Mara œrœ atake œ li kœmbœrœtœ ye koto o?»
10 Yisu gi fœ she adœke: «Œɓœ kœdœ ayi kœyisœrœ fœ azu Israyele yé ɓœ wuwusœ œrœnœ asœke nene a?
11 Mœ sœ kœpa fœ ɓœ dœ adjapu adœke: 'a sœ kœpa o'o tœ upu nœ œrœ á 'a wusœ nœ œdœ pe œneke á 'a wu, kashe 'e wu o'o nœ 'a gbambanœ.
12 Œdœ mœ kœpa o'o tœ œrœ á sœ kœmbœrœtœ ye pa ɔshɔ asœke fœ 'e á 'e kœdjidji mœ nene, 'e yi má ndœ o'o ama mœ kotoo œ kœsœ adœke mœ pa o'o tœ œrœ á mbœrœtœ ye ɓa lafo fœ 'e a?
13 Gbambanœ nene, uzu bale ɔɔ ɓa lafo nene, kolœ Gbolo nœ uzu á tshe to ɓa lafo á jerœ ga atɨ.
14 «Ɓata Moyize i lima anga yakoro á endje mbœrœ she de yarakowo ga tœ ɔyɔ ndœ kœtɨ she ga lafo ɓa lœ kpagagasho, awa bale azu œ za Gbolo nœ uzu œ tɨ she ga lafo,
15 yekane uzu kɔ á tshe sœ dœ kœyindœrœ ga ndœ ye, tshe gbɔ soro neke á ka nene.
16 Gbambanœ nene, Ndjaba yindœ tshapashɔ waa yeka á vwa Gbolo nœ ye tshebale adœke uzu kɔ á tshe yindœ ye, tshe tshu nene, kashe tshe sœ dœ soro á ka nene.
17 Ndjaba vwavwa Gbolo nœ ye ga pa ɔshɔ mbœrœ kœwa ngbanga ga tœ tshapashɔ nene, kashe Ndjaba vwa she adœke tshapashɔ gbɔ kœshe lœ awa nœ ye.
18 «Uzu á tshe kœsœ dœ kœyindœrœ ga ndœ ye, Ndjaba œ wa ngbanga ga tœ ye nene. Kashe uzu á tshe kœsœsœ dœ kœyindœrœ ga ndœ ye nene, Ndjaba wa ɓalima o'o ga tœ ye yé mbœrœ á tshe sœsœ dœ kœyindœrœ ga ndœ ɨ'ɨrɨ Gbolo tshebale nœ Ndjaba nene.
19 Yé ngbanga kœwa tœnœ dœke: Ɨngbɨsho na ga pa tshapashɔ, kashe azu yindœ ubu osho kœropa ɨngbɨsho, mbœrœ akwa tshelœ endje sœ tœ ekpenœ.
20 Atamœ, uzu kɔ á tshe sœ kœmbœrœ ekperœ, yiangba ɨngbɨsho. Tshe na ga ndœ ɨngbɨsho nene kparawa adœke ekperœ nœ œne wuta ngbɨ ga ushu.
21 Kashe uzu á tshe te manda adja o'o, sœ kœna ga ndœ ɨngbɨsho adœke endje wu ngbɨ adœke akwa á tshe sœ kœmbœrœ tœnœ sœ kœlɨsœ Ndjaba.»
Yisu œdœ Yowane
22 Manda nœ, Yisu na awa bale dœ ayambarœ nœ ye ga lœ ogo Yuda. Tshe lo lima awa bale dœ endje ɓa zœ yé œ sœ kœza lima batisimu fœ azu.
23 Yowane za ndje lima batisimu fœ azu ɓa lakpɨ Eno ndoo dœ Salime mbœrœ ungu lœ lima kpœtœmœ waa. Azu sœ lima kœna ga ndœ ye yé œ sœ kœgbɔ batisimu.
24 Andaa, endje zaza lima damba Yowane ga lœ kánga nene.
25 Ɔlɔ bale, anga ayambarœ nœ Yowane te lima tœ kœgbugburu tshelœ o'o dœ anga uzu Yuda bale tœ upu nœ kœdjutɔ kote utshu nœ kœ'e Ndjaba.
26 Endje na lima ga ndœ Yowane, œ yu lima she adœke: «Rabi, uzu á tshe sœ lima dœ ɓœ ɓa atshi ungu Yɔrdane, œshe á ɓœ pa o'o tœ upu nœ ye asœmœ; wusœ nœ adœke, tshe sœ ndje kœza batisimu fœ azu yé azu kɔ sœ kœna ga ndœ ye.»
27 Yowane gi fœ endje adœke: «Uzu gbɔ kolœ œrœ á Ndjaba œ to fœ she.»
28 E'e dœ tœ 'e, 'e li kœpandœ nœ adœke 'e dji lima mœ kœpa adœke: «Mœ dœ́dœ́ Kristu nene, kashe Ndjaba vwa mœ kœwuta utshunœ adœke tshe na.»
29 Ayi kœto yashe kœdœ akɔ yashe. Kashe yanga ayi kœto yashe œ ka kpœ ɨndɨrɨ ye yeka á dji she. Tshe sœ dœ yanga tœ kœdji tshadɔngɔrɔ ayi kœto yashenœ. Yanganœ asœmœ kœdœ œnœ mœ, yé lɔsu mœ sú ngɔngɔ asœ dœ tœnœ pete.
30 Œ li adœke uzunœ asœmœ wuta egerœ uzu, yé mœ sœ œnœ mœ teasho.
Uzu á tshe to ɓa lafo
31 «Uzu á tshe to ɓa lafo ropa œrœ kɔ. Uzu tshapashɔ kœdœ uzu tshapashɔ yé tshe pa kolœ o'o tshapashɔ. Tsheneke á tshe to ɓa lafo,
32 tshe sœ kœpa o'o tœ œrœ á tshe wu yé á dji. Kashe uzu bale yiyindœ œneke á tshe sœ kœmɨndœ nœ nene.
33 Uzu á tshe kœyindœ o'o nœ ye, uzunœ asœmœ yi ndje ndœ nœ adœke Ndjaba pa kolœ adja o'o.
34 Tsheneke á Ndjaba vwa she pa kolœ o'o nœ Ndjaba mbœrœ Ɨshirɨ nœ Ndjaba sœ lœ ye.
35 Ndjaba Aba yindœ Gbolo nœ ye, yé œ za she tœ gbozu tshapa œrœ kɔ.
36 Uzu á tshe sœ dœ kœyindœrœ ga ndœ Gbolonœ asœke, tshe gbɔ soro á ka nene. Kashe tsheneke á tshe kœvwaratœ ye tœ kœsœ dœ kœyindœrœ ga ndœ Gbolonœ, tshe gbɔ soronœ nene, yé ókó nœ Ndjaba œ sœ waa pa ye.»