4
Jesúskas Samaria pɨpuluras ashampakas
1 Fariseo awaruzne Jesúspa mɨara. Jesúsne Juankin an akkwan kanpamtuz mɨjara. Uskas an akkwan awaruza munnaninnara.
2 (Jesús tukas, paiña kanpamtuzne awara munnanara. Usmin sun kitchi).
3 Fariseo awaruzne Jesús kimtu aizpa piankammara. Jesús usparuza pilchapuznashitchi akwa, Jesúsne Judea sukis puz kit mamasa Galilea sura kailta.
4 Ɨmtuasmin, usne Samaria suwara pɨnshimtuat kit
5 Sicar pɨpulura piannara. An pɨpulune mamaz sura kashain uz. Ñamin au irɨt kwal Jacobne paiña painkulta, Joséra, sun su mɨlara.
6 Suane Jacobne kwazi kul sarɨt. Miwa ɨmtuasmin kwaiztɨt akwa, Jesúsne kwazi ukkam kulkin uzta. Paizka payu panapain.
7-8 Paiña kammuruz pɨpulura chiwazha kumira paina ɨarɨkane, Samaria pɨpuluras ashampane kwazi kulkin ara, kwazi ukkana. Jesúsne ussa kaizta:
—Kwazi kwincha.
9 Samaria pɨpuluras ashampane iztasparɨt, au Judío awakas Samaria awakas usparuzpain chinkas naiyamtu akwa. Usne Jesústa ka kaizta:
—Nune Judío awa i. Nane Samariakis ashampa ish. ¿Chikishma nawa kwazi paikumtus?
10 Suasne Jesúsne ussa sɨnkara:
—Nune Dios mɨlashimtu aizpa pianchi. Nune nawa kwazi kwincha kizmumikasha pianchi. Ussa kwazi kwan paikwatne, usne nua kwazi kwinazi, nu pailta payukima uznapa.
11 Ashampane ussa kaizta:
—Anpat. Nune chinkas mɨjki, kwazi ukkana. An kwazi kulne kwisha ainkih i. ¿Nune mɨntas kwazima kwinnash, na uzna?
12 Au ñamin irɨt kwalne, Jacobne, an kwazi kul sat kit aumɨza chɨhkanarɨt. Uskas paiña painkultuzkas paiña kalpakas an kulkin kuara. ¿Nune Jacobkin anza tɨnta kish? Nune an Jacobkin aumɨza kiwainsachi.
13 Jesúsne ussa sɨnkara:
—An kwazi kwattuzne mamasa kwazi kiyanazi.
14 Na kwazi kwinka kwattuzne mizurainkas kwazi kiyamanazi. Nua na kwazi kwintu aizpa kwazi puzmu kulkana puznazi, pailtachin. An kwazine nua uzninnazi, pailta payukima.
15 Suasne ussa wat mɨrachi akwa, ashampane kaizta:
—Anpat, sun kwazi kwincha, na kwazi kilmanpa, an kwazi kulta amanpa, kwazi ukkana.
16 Jesúsne ussa kaizta:
—An ñancha ɨt kit up ampura akwarash. Suasne akkin anka.
17 Usne kaizta:
—Nane ampu mɨjchish.
Suasne Jesúsne kaizta:
—Na ampu mɨjchi kizkane, nune watcha kaiztui.
18 Makima nune cinco ampu mɨjazi. Nu mɨjmikane up ampu chi. Nu kaizta aizpa watcha i.
19 Sun mɨrawane, ashampane ussa kaizta:
—Anpat. Nu sun nawa pian akwa, nane nu Dios pit kainammmika i piankamtus.
20 Aune ¿Mɨntama Diosta wakpuj wainñanapai? Au ñamin kwal uzasmin, uspane an ɨzakin Diosta wakpuj wainñara. Mane u Judío awane ka kaizamtu: “Jerusalén pɨpulura Diosta wakpuj wainñarawa.”
21 Jesúsne sɨnkara:
—Ashampa. Na kaiztu aizpa nɨjkulti. Mamaz payura awane an ɨzara nuamanazi, Diosta wakpuj wainna. Kawarain uspane Jerusalén pɨpulura ɨamanazi, Diosta wakpuj wainna.
22 Samaria pɨpuluras awa Diosta wat pianchi akwa, une ussa wat wakpuj wainñasachi. Sunkana aune ussa wat pianmakpas. Diosne Judío awaruza paiña kwal namninnara, au sukin watsat mɨlmumikasha ɨninnapa. Katmizna aune ussa wakpuj waina wat pianmakpas.
23-24 Sun payura Diosta wakpuj wainna me taiztɨt, wan awa wan suwara ussa wakpuj wainñanapa. Sɨnam Izpulne Taitta Dios watcha kaizta aizpa awaruza piankamninnanazi, an sukin Diosta wakpuj wainñanapa. Diosne Sɨnam Izpul i. Sun Sɨnam Izpulne awaruza kiwainnanazi, awa Diosta wakpuj an wat wainñanapa, watcha piankamanapa.
25 Ashampane ka kaizta:
—Dios kin namtɨtmikane, watsat mɨlmumikane, piannanpain pianish. (Usne Cristo i). Us akane, usne aumɨza chiwal kamtananazi.
26 Jesúsne ussa kaizta:
—Nane Dios kin namtɨtmikakas, watsat mɨlmumikakas, ish. Nane nukasa paramtus.
27 Sun urain paiña kammuruzne aara. Jesús maza ashampakasa kwinta kimtu akwa, uspane iztaspaarɨt. Mɨnminkas an ashampa ¿Chima pashimtu? mɨmaarachi. Mɨnminkas Jesústa ¿Chima an ashampara paramtus? mɨmaarachi.
28 Suasne ashampane paiña kwazi ulmu chɨhkat kit pɨpulura kail kit awara ka kaiznara:
29 —Maza ampura izna arain. Usne wan chiwal piankam kit na kirɨt aizpa nawa kaizta. ¿Anne Dios kin namtɨtmikaki? ¿Usne watsat mɨlmumikaki?
30 Suasne awane pɨpuluras puzat kit Jesús tukin aara.
31 Aamtuasmin, paiña kammuruzne Jesústa paikwat kit kaizara:
—Kamtam. Chiwazha kwari.
32 Usne kaiznara:
—Kumira pashitchi ish. Na kal kirɨt aizpa kumirakin an wari. An kumirawa une pianchi.
33 Paiña kammuruzne usparuzpain ka mɨmaamɨzta:
—¿Mɨnma kumira ussa karatsa? kizara.
34 Jesúsne kaiznara:
—Diosne nawa apa ɨninta, awaruza Diospa kainanapa. Nane us kaizta aizpa kishimtus, pailnakima. Na paiña kal kikane, nane kwisha warish. Kumira kwatkanain i.
35 Une sunkana minñamtu: “Mane au Judío awane Samaria su uztuza Dios pit kainammtuchimakpas. Mamaz payura aune Galilea su uztuza Dios pit kainanapas.” Apas awane akkwan piji sunkana kizamtu: “Ampara mish we, chara pippara pakna. Suasne kal kiaznapas.” Mane nane uruza kainammtus: “Umakin iztain. Paktu payukana i. Akkwan awa pura akwa, usparuza Dios pit kaizasan, su pit nɨjkulanapa.
36 Chara pippa malmuruzne pial sappamtu, uspa kal akwa. Kawarain Dios Pit kainammtuzne sappanazi. Mɨnpazha sun pit kainammtu, mamaztuz sun pit mɨanapa. Kwiztane suntuzne mamasa sun pit mɨat kit nɨjkulanazi. Diosne sun pit kainammtuza tananazi. Wan Dios pit kainammturuzne watsal kulanazi.”
37 Apas awane akkwan piji ka kizamtu: “Maza awa pippa warawane, mamazne sun pippa paktu.”
38 Sunkana kianazi. Mamazne ukin an ñancha Dios pit kainanara. Nane uruza ɨninnara, awaruza akwananapa, ap kwal namanapa. Katmizna sun awane ap kwal namarɨt, u Dios pit kainarɨt akwa.
39 Akkwan sun pɨpulukin uztuzne Jesústa nɨjkulara, Samaria pɨpuluras ashampa kaizta aizpa akwa. Usne ka kaiznara: “Usne wan chiwal piankam kit na kirɨt aizpa nawa kaizta.”
40 Katmizna Samaria pɨpulura uztuz Jesús tukin piannarawane, uspane ussa paikuara, usparuzkasa maanapa. Usne usparuzkasa paas payukima mara.
41 Sunkana an akkwan awane us kaizta aizpa mɨat kit us Dios kin namtɨtmika i, watsat mɨlmumika i, nɨjkulara.
42 Uspane an ashampara ka kaizara:
—Mane aune ussa nɨjkultumakpas. Nu Jesúspa kainarakas, mane aune us kaizta aizpa mɨramakpas. Aune Dios ussa kin namtɨt pianmakpas. Usne au sukin uztuza watsat mɨlmumika i.
Jesúsne gobierno ɨninmikawa painkulta kakulnintu
43 Paas payura Jesúsne Samaria pɨpuluras puz kit Galilea surakima ɨmɨzta.
44 Jesúsmin kammuruza kaiznara: “Ap sukin uztuzne nawa, Dios kainammikasha, nɨjchi kiamtu.”
45 Sua ussa nɨjchi kiarakas, Jesúsne Galilea sura piannakane, Galilea sukin uztuzne ussa wat sappat kit “kakishapu” kizara. Ñamin uspane Jerusalén pɨpulura ɨara, Pascua pishta izana. Suane uspane Jesús wan kirɨt aizpa an pishtara izara.
46 Suasne Jesúsne Caná pɨpulura, Galilea sura kailta. Ñamin usne sun pɨpulukin kwazi vinora namninta. Suane mikwa ɨninmikane tuazi. Usne Capernaum pɨpulura maza painkul imtu mɨj.
47 Jesús Judea suras Galilea sukin pianakane, ɨninmikane Jesúspa mɨt kit izna ɨt kit ka paikwat:
—Ap yalta ɨtpa, ap painkulta kakulninna. Inapain i, kizta.
48 Suasne Jesúsne kaizta:
—Na chiwazha iztasparɨt kal kimtukine, une na Diostas at nɨjkulamanazi.
49 Ɨninmikane kaizta:
—Anpat. Ap painkul irachasmin, azain ussa izna anka.
50 Suasne Jesúsne kaizta:
—Up yalta kailti. Up painkulne kakultu.
An ampune Jesús kaizta aizpa nɨjkul kit ɨra.
51 Paiña yalta pianatchasmin, paiña kiwaintuzne yaltas puzat kit ussa wanmalat kit kaizara:
—Up painkulne kakulti.
52 Suasne usne miza paka kakulta mɨmanara. Uspane sɨnkaara:
—Anchik nashka maza urara immu kara.
53 Suasne papihshne sun urain paiña painkul kakulmɨzta piankam kit Jesús kaizta aizpa ka nɨjkulta: “Up painkul kakulti.” Katmizna uskas wan paiña kwalkas Jesústa, watsat mɨlmumikara nɨjkulara.
54 Judea suras Galilea surakima mamasa kailtawane, Jesúsne an kwizta iztasparɨt kal kira.