4
1 M tis uf noor Winaꞌam ne Yesu Kiristo tuon, one na ti kad bane voe ne bane kpi saria la ne, o lebig na ne o naꞌam soꞌolim yela,
2 ye fu tiꞌeb suꞌuŋa mool Winaꞌam pianꞌad saŋa suŋ ne saŋa kane kaꞌ suꞌum wusa, ka saꞌani ba ne noŋgban malisiŋ n paꞌani ba ka kpeꞌeŋidi ba ka mor suguru saŋa wusa.
3 Bozugo saŋa na kena ka nidib ku nyaŋe modig ne sida paꞌalug laa, amaa ba doli ba meŋ yaꞌamleog boodim n dol paꞌanib bedego bane na paꞌal line malisi ba toba ni maꞌaa.
4 Ka ba na fendig ka ku kelis sida laa ka lee kelisid line a solima.
5 Amaa fu nee, gbanꞌami fu meŋ ka modig di fara, ka a one moon Winaꞌam labasuŋ, ka tumi fu tuuma wusa.
6 Ka saŋa paaeya ye m vum na naae, m kuꞌum la wenne maan ka ba maal tis Winaꞌam.
7 M zab zabsuŋ la nyaŋe li, ka zo paae zua la ben, ka gur yelsida kan ka ti siak la yela la ka li pu saꞌam.
8 Ka nyaŋer nyood digi guri m line a popielim ka Zugsob one a li yelsida saria kat la na tisi m dabis kan daar. Ka li kaꞌane mam maꞌanee, amaa ban wusa more o lebig na tiꞌir la.
Paul toluŋ n tis Timoti meŋ
9 Kpeꞌeŋi fu meŋi keenn m saꞌan na nannanna.
10 Bozugo Kresens keŋ Galatia, ka Titus keŋ Dalmatia, ka Demas noŋ dunia kaŋa ka basi m ka keŋ Tesalonika.
11 Ka Luuk gullim kpelim be m saꞌan. Dol Maak na ka o mor suŋir ne m tuuma la zinꞌigin.
12 M tum Tikikus Efesus teŋin.
13 Fu yaꞌa kenna, fun on more m waad fukan ka m daa bas Kaapus saꞌan Troas teŋin la, ne gbana ka li kas kas ane gbauŋ bane ka ba sob ne konbid gbauŋ la.
14 Alekizanda one kunt siꞌelnam la niŋi m beꞌed hale, ka Winaꞌam na yo o li sam.
15 Guꞌusimi fu meŋ ne o ka o zanꞌasi ti pianꞌad la ne kpiꞌeuŋ.
16 M deŋir saria kadib la, soꞌ pu ziꞌeni m nyaꞌaŋ ka suŋi ma. Ba wusa bas man ne. Amaa ka m sosid Winaꞌam ye o tisi ba suguru.
17 Ka Zugsob la daa ziꞌe m nyaꞌaŋ ka tisi m paŋ ye m mool pianꞌad la suꞌuŋa ye bane kaꞌ Jew dim la bedego wum. Ka m daa nye faangir gbigim noorin.
18 Zugsob la na faann m line wusa a beꞌed zinꞌigin ka more man kpenꞌesi o naꞌamin. O na nye naꞌasi dine kaꞌ benne. Ami.
Puꞌusug
19 Puꞌusum Prisila ne Akuila, ne Onesiferus yidim.
20 Erastus kpelim Korint teŋin. Ka Trofimus benꞌedne ka m ke ka o kpelim Miletus teŋin.
21 Kpeꞌeŋimi fu meŋi kena, ka sapal nyaan paae. Yubulus ne Pudens ne Linus ne Klaudia ne ti baꞌabiis wusa puꞌusid uf.
22 Ti Zugsob na be ne fu siig.
Winaꞌam yelsum na be ne fu.