2
1 M biiga, kpeꞌeŋim fu meŋ ne popielim piini line be Yesu Kiristo ni la.
2 Ka fun wum siꞌel mam saꞌan nidib bedego tuon la, tolisimi li tis yelsida dim bane na tunꞌe paꞌal sieba men.
3 Diꞌem namisug line a fu din, fun a Yesu Kiristo sogia la zug.
4 One tum sogia tuuma baꞌa kaeꞌ ne bane kaꞌa sogianam yela nii, amaa o bood ye o maꞌae o kpeenm la sunf.
5 Ka soꞌ yaꞌa bood ye o di yaꞌan diꞌema zinꞌigin, o ku nyaŋe diꞌe piini asee ka o dolis diꞌema la wada suer.
6 Li nar ka kpaad suŋ one tum tuuma hale deŋim diꞌe o zuud la nyood.
7 Tenꞌesimi mam yel siꞌem la, ka Zugsob na ke ka fu baŋ siꞌel wusa gbin.
8 Tenꞌesim Yesu Kiristo yela, one da vuꞌug kumin la, one da a naꞌab David yaaŋ wen wuu labasuŋ kan ka m moon la yet siꞌem la.
9 Labasuŋ kaŋa zug ka m namisid ka ba gbaꞌ m ne bana wen wuu tuumbeꞌed sob ne. Amaa Winaꞌam pianꞌad la pu gbaꞌ ne bana.
10 Neꞌeŋa zug ka m modigid siꞌel wusa ni ye bane ka Winaꞌam gaŋ la me nye faangir line be Yesu Kiristo ni la, laꞌam ne naꞌasi line kaꞌ naare.
11 Yelmeŋir nwa ye,
“Ti yaꞌa laꞌam kpi ne o,
ti me na voe ne o.
12 Ka ti yaꞌa modig,
ti me na mor naꞌam ne o.
Ti yaꞌa zanꞌas o,
o me na zanꞌasi ti.
13 Ti yaꞌa kaꞌ yelsida dima,
o na kpelim a yelsida sob,
bozugo o ku tiake o meŋ a siꞌem laa.”
Tumtum suŋ na a siꞌem la yela
14 Tienmi fu nidib la neꞌeŋa, ka saꞌali ba Zugsob la tuon, ka ba da mor noŋgban nwaꞌar pianꞌad yelaa, line pu tum suꞌum ka kulim saꞌamidne bane wum la.
15 Kpeꞌeŋim ka fun noki fu meŋ n tis Winaꞌam ka fu tuuma paa Winaꞌam yaꞌam, ka me a one pu zot nyan ne o tuuma, ka sid paꞌan pianꞌad line a yelsida la.
16 Zanꞌasim pianꞌayood line pu dol Winaꞌam suere; ka li na kpenꞌes nidib suebeꞌedin ka ba suebeꞌed dolim la na ke ka ba zanꞌas Winaꞌam yela.
17 Ka ba pianꞌad la, na wen wuu fenꞌekudugu onbid niŋgbiŋ yaligid siꞌem la. Ka paꞌaniba ayi bee ba soogin, ka ba ane Himeneus ne Piletus,
18 bane bas yelsida la suer ka yet ye kuꞌum vuꞌugir la gaadeya sa, ka me saꞌamid ninsieba yadda niŋir.
19 Amaa Winaꞌam eenbkpiꞌuŋ la ziꞌe kiŋ kiŋ, ka o zanbin la sobne anina ye, “Zugsob la miꞌ bane a o nidib,” Ka lem sob ye, “Bane wusa sid ye ba ane Winaꞌam nidib la, basimi ba tuumbeꞌed.”
20 Yir titaꞌar pu mor salima bee anzurifa laꞌad maꞌaa ne, amaa daad ne yaꞌad bunam me be, ka ba yiisid sieba dabis suma daar, ka sieba me a daar wusa tuuma laꞌad.
21 Ka soꞌ yaꞌa pie o meŋ wuu ban pied laꞌad la siꞌem la, o na lieb tuumsuma lauk, line ka ba gaŋ ka li nar ye yidaan noki li tumi o tuumsuŋ siꞌa.
22 Zanꞌasim dasam boodim line a beꞌed ka kpeꞌeŋ ne nimmua ye fu a yelsida sob ka mor yadda niŋir ne noŋilim ne sumalisim, laꞌam ne bane puꞌusidi ti Zugsob ne popielim la.
23 Zanꞌasim yalim buꞌosyaalis ka fu miꞌ ye li more zaba.
24 Mit ka Zugsob tumtum a one noŋ zaba. Amaa o naꞌasim nidib wusa ka a paꞌansuŋ ka me mor suguru,
25 ka nok yaꞌam saꞌal ne o dataas, ka daasiꞌere Winaꞌam na ke ka ba tiak ka baŋ yelsida la,
26 ka luak Sutaana bendugun la line ka o deŋi bend ye ba tumi o boodim la.