5
Yadda niŋidib tuuma a siꞌem la yela
1 Bunkudug yaꞌa niŋ beꞌed da tans oo, amaa saꞌalim o baanlim wuu fu meŋ saam ne, ka niŋid dasam wuu fu baꞌabiis ne,
2 ka niŋid poꞌanyaꞌas wuu fu ma ne, ne poꞌabane pu kudug la wuu fu tanp ne, ne popielim maꞌaa.
3 Naꞌasim pokonya bane n sid aa pokonya la.
4 Ke pokoonr yaꞌa mor biis bee yaas ban on deŋim zamis line dol Winaꞌam suer, ka suŋi ba meŋ yidim, ka li yoo ba ugusig la sam, ka line maꞌed Winaꞌam suunr.
5 Ka one sid a pokoonr ameŋa gbanꞌad Winaꞌam yela ne nuꞌus ayiꞌiŋa ka kpelim be ne Winsosug ne Winaꞌam puꞌusug nintaŋ ne yuꞌuŋ wusa.
6 Ka pokoonr kane goondi tumi o meŋ boodim yori yori la pun deŋi kpin ne, hale laꞌam ne on kun voe la.
7 Saꞌalimi ba neꞌeŋa ka ba da mor gbadaa.
8 Ka soꞌ yaꞌa pu gosidi o duꞌadiba, ka li kas kas ane o yidim, on sob zanꞌas line ka ti siak la ne, hale ka o a tuumbeꞌed sobi n gat bane kaꞌ yadda niŋid.
9 Pokoonr yaꞌa pu paae yuma piisyuobu, o ma n duꞌa o laa, ka me pu a one da kulne sid yinni maꞌane, ban da paꞌas o pokonya la kalin ne.
10 Asee ka nidib pianꞌ o tuumsuma yela suꞌuŋa, ka a one ugusi o biis, ka a one diꞌesid saam, ka piesid Winaꞌam nidib noba, ka a one suŋid bane namisid, ka a one pesigi o meŋ tis tuumsuma wusa.
11 Da paasid pokonya bane nam pu kudug la kaline, ka dapboodim tunꞌe ke ka ba bas Kiristo tuuma la ka kul sidib,
12 ka na saꞌami ba yiiga noor ziꞌelug ka kpenꞌesi ba meŋ saria kadibin.
13 Lini paꞌas la, ba mor gbanyaꞌam ka zoti giligid ya, ka kaꞌane line maꞌanee, ka yeesid ka nweꞌedi ba meŋ n gentid nidib yela ni, ka pianꞌad line pu nara.
14 Dinzugo m bood ye pokonya bane pu kudug kul sidib, ka duꞌa biis, ka gosidi ba yidim wusa, ka dataas ku nyaŋe nyee ti gbadaa.
15 Ka sieba pun tiake dol Sutaana.
16 Ka poꞌa soꞌ yaꞌa a yadda niŋid ka mor pokonya o duꞌadibin on gosimi ba, ka da nok yelbama niŋ Winaꞌam nidib nuꞌusinee, ka ba na tunꞌe suŋ bane sid a pokonya.
17 Kel ka ba naꞌas yadda niŋidib kpeenmnam bane gur nidib suꞌuŋa line gaad la ane, bane kpeꞌeŋid hale ka moon ka paꞌan Winaꞌam pianꞌad la.
18 Ka Winaꞌam gbauŋ sob ye, “Da liaꞌ naꞌaraug noor one be ki tuuma nii,” Ka len sob ye, “Li nar ka one tum diꞌe o yood.”
19 Soꞌ yaꞌa yel ye kpeenm soꞌ tum tuumbeꞌed, da kelise, asee ka kasetib a wuu ayi bee atanꞌ.
20 Saꞌalim bane zanꞌas tuumbeꞌed basib la, yadda niŋidib wusa tuon, ka bane kpelim la na zo dabiem.
21 M tis uf noor kaŋa Winaꞌam tuon ne Yesu Kiristo tuon ne maleknam tuon ye fu tum yelbama ne sida, ka da mor baragaŋa.
22 Da gbirigi paꞌali fu nuꞌus toꞌoto soꞌ zuginee, ye o tum Winaꞌam tuuma, ka da gendigi ne o tuumbeꞌedinee. Kel ka fu a popielim sob.
23 Da kpelim nuud kuꞌom gullimnee, amaa num daam biꞌela fu poog yiti zabid la zug; ka fu noŋ benꞌes hale.
24 Ninsieba tuumbeꞌed nie paalo ni ka li kpenꞌesi ba yelin. Ka sieba tuumbeꞌed line nan pu nie paalo ni la na ti nie men.
25 Ka ala men ka tuumsuma me nied paalo ni. Hale baa line suaꞌ la na ti nie.