9
1 Ka malek one peꞌes anu la piebi o naꞌatan. Ka m nye nwadibil ka o yi saŋgbana ni lu dunia ni na. Ka ba tis o bumbok dine zulum ka kaꞌ ben la saafi.
2 Ka nwadibil la yoꞌog bumbok la, ka nyoꞌos yi na wenne bugum titaꞌar nyoꞌos ne, ka ke ka nintaŋ la kilim lik.
3 Ka naꞌazomnam yi nyoꞌos la ni n sig dunia ni na. Ka ba tisi ba paŋ wenne namis mor paŋ dunia ni siꞌem la,
4 ka yeli ba ye, ba da saꞌam siꞌelnam wusa line nobugid teŋinee, amaa ba poaꞌalim nidib bane pu mor Winaꞌam zanbina ba gbeꞌedin la gullim.
5 Ka naꞌazomnam la daa pu mor suere na ku nida, ka lee daa namisidi ba ne nwadisa anu. Ka toog kan ka ba daa nyeti ba niŋgbina ni la daa wenne naŋ toonbi zabid siꞌem la.
6 Ka nwadisa anu nwa saŋa, nimbama na ied kum ka ku nyee lii, ka me na bood kum, ka kum na zo ka basi ba.
7 Ka naꞌazomnam la wenne widi bane tiꞌeb gur zaba ne, ka mor line wenne salima zugpibis ba zutin. Ka ba nindaas wenne nidib nindaas ne.
8 Ka ba zuobid waꞌam wenne poꞌab zuobid ne. Ka ba nyina wenne gbigim nyina ne.
9 Ka ba nyoꞌod daa ligil ne siꞌel ka li wenne kunt zaba fuud ne. Ka ba kpukpama vuud wenne tanp widi teed tanp terokonami zo ti keŋ zaba ni ne.
10 Ka ba mor zuya ne toonsa wenne namis ne. Ka ba zuya la mor paŋ n na poaꞌalim nidib nwadis anu.
11 Ka malek one gur bumbok la daa aa ba naꞌab. Ka o yuꞌur ne Hibiru pianꞌad ane Abbadon, ka Greek pianꞌad a Apoliyon. Li gbin ane Asaꞌuŋ.
12 Yiiga susaꞌaŋ la gaadeya. Amaa susaꞌaŋa ayi kpelim na kena.
13 Ka malek one peꞌes ayuobu la piebi o naꞌatan. Ka m wum ka kukor yi salima maan maalug zinꞌig dine ziꞌe Winaꞌam tuon la lodisin anaasi na,
14 yel malek one peꞌes ayuobu mor naꞌatan la ye, “Yidigim maleknam anaasi bane ka ba lo Yifiretis moꞌar saꞌan la.”
15 Ba daa tiꞌeb ne gur yuum kaŋa ne nwadig kaŋa ne dabis kaŋa ne saŋa kaŋa ye ba ku ninsaalib pudugir la yinni pudugir atanꞌ la ni.
16 Ka m wum sogianam bane a wedbanꞌadib la kal. Li daa ane tusa piisi zinꞌis tusa piiga.
17 Ka m zaansuŋin la ka m daa nye widi ne bane banꞌadi ba la. Ka ban daa a siꞌem nwa. Bane banꞌad widi la daa yene zaba fut line muꞌe wenne bugum ka a sabilig ne donboolim ba nyoꞌodin. Ka widi la zut wenne gbigima zut ne. Ka bugum ne nyoꞌos ne tan line nyelig n dit wuu bugum ne yitne ba noya ni na.
18 Ka yeltood atanꞌ bama, bugum ne nyoꞌos ne tan line nyelig n dit wuu bugum la dine daa yit widi la noya ni la daa ku ninsaalib pudugir la yinni pudugir atanꞌ la ni.
19 Widi la paŋ daa bene ba noya ne ba zuya ni. Ka ba zuya la daa wenne wiigi ne n mor zut ka ba more li poaꞌalim nidib.
20 Ka nimbane daa kpelim ka yelbama daa pu kuu ba la, daa pu bas ban daa maal siꞌel ba meŋ la dolim, ka me daa pu bas kikiris ne salima baꞌa la ne anzurifa baꞌa ne kuga baꞌa ne daad baꞌa bane ku tunꞌe nye bee wum bee keŋ la puꞌusugo.
21 Ba me daa pu bas ba ninkuusim ne ba baꞌakon bugub ne ba poꞌaboodim bee ba naꞌayiigim la ka tiake.