7
Israel dim la yela
1 Neꞌeŋa nyaꞌaŋ ka m nye maleknam anaasi ka ba ziꞌe dunia lodisa anaasi la kad dunia sisiꞌem line yi zinꞌis wusa la lebisid ye sisiꞌem da daꞌad teens bee ateuk bee tiig soꞌoo.
2 Ka m nye malek siꞌa ka o yi winig ne tansid siꞌel la na ka mor siꞌel line maal Winaꞌam one voe la zanbina, ka yel maleknam bane ka Winaꞌam tisi ba teens ne ateuk poaꞌaluŋ paŋ la ne kukotitaꞌar ye,
3 ba da poaꞌalim teens la bee ateuk la bee tiis la, asee ka ba ti zanbil Winaꞌam tumtumnib la zanbina ba gbeꞌed ni.
4 Ka m wum bane ka ba daa zanbili ba ne Winaꞌam zanbin ba gbeꞌedin la kal. Li daa ane tusa kobuga ne tusa piisnaasi ne tusa anaasi nidib ka yi Israel dim dood wusa la ni.
5-8 Ka tusa pii ne ayi daa yi nimbama yinni yinni doodin na. Ka dood la a Juda ne Reuben ne Gad ne Aser ne Naftali ne Manase ne Simeon ne Levi ne Issaka ne Zebulun ne Josef ne Benjamin.
Nidib daa laꞌas bedego la yela
9 Neꞌeŋa nyaꞌaŋ la ka m gos, ka nidib laꞌas bedego, ka soꞌ ku nyaŋe kaal nidib la wusaa. Ba daa yine teŋgbana wusa ne buudi wusa ne dood wusa ne pianꞌad wusa ni na n ye fupielis ziꞌe naꞌam gbauŋ la ne Peꞌebil la tuon n mor kpukpara wila ba nuꞌusin,
10 ka pianꞌad ne kukotitada ye, “Ti faangir yitne Winaꞌam one zinꞌi naꞌam gbauŋ la zug ne Peꞌebil la saꞌan na.”
11 Ka maleknam la wusa ziꞌeni gilig naꞌam gbauŋ la ne kpeenmnam la ne bunvoeya anaasi la vabin naꞌam gbauŋ la tuon n zunꞌod Winaꞌam
12 n yel ye, “Ami, bareka ne zunꞌor ne yaꞌam ne bareka puꞌusug ne naꞌasi ne paŋ ne kpiꞌeuŋ ane Winaꞌam din saŋa dine kaꞌ benne. Ami.”
13 Ka kpeenmnam la yinni buꞌosi m ye, “Anoꞌonami a nimbama n ye fupielis? Ka ba yi yaani na?”
14 Ka m lebis o ye, “Naa, fune miꞌ, ka man ziꞌ.”
Ka o yeli m ye, “Nimbama yine fara titaꞌarin la na, ka piesi ba fut Peꞌebil la ziimin ka ke ka ba pelig.
15 Linzug ka ba ziꞌe Winaꞌam naꞌam gbauŋ la tuon ka tumi tisidi o nintaŋ ne yuꞌuŋ o puꞌusug yin la. Ka Winaꞌam n be ne ba la zug, ka o na guri ba.
16 Ka koꞌom bee kuꞌonuud kudin ku lem gbanꞌe baa, ka nintaŋ bee tuultitaꞌar ku lem tuligi baa.
17 Peꞌebil one be naꞌam gbauŋ la teŋsuk la na guri ba, ka doli ba keŋ kuꞌobulum line tisid nyovur la. Ka Winaꞌam na eens nintoꞌom wusa ba nini ni.”