5
Gbauŋ la ne Peꞌebil la yela
1 Ka m nye gbauŋ ka li sob li tuon ne nyaꞌaŋ, ka mor tabilis ayopoi. Ka one zinꞌi naꞌam gbauŋ la zug n more li o datiuŋ.
2 Ka m nye malek kane mor paŋ hale ka o moon n tansid ye, “Anoꞌone a suꞌum na nyaŋe lak tabilig la ka yoꞌog gbauŋ la?”
3 Ka soꞌ daa kaeꞌ arazana ni bee dunia ni bee teŋgbauŋ poogin na nyaŋe lak gbauŋ la gos poogine.
4 Ka m daa kaas hale, bozugo soꞌ daa kaeꞌ a suꞌum ye o lak gbauŋ la gos li poogin la zug.
5 Ka kpeenmnam la ni yinni yeli m ye, “Da kaasida. Gosima, one yi Juda buudi ni ka mor paŋ wenne gbigim la, one a naꞌab David yaaŋ la, o nyaŋ yelbeꞌed wusa ka na nyaŋe yoꞌog gbauŋ la ne tabilis ayopoi la.”
6 Ka m nye Peꞌebil ka o ziꞌe naꞌam gbauŋ dine ka bunvoeya anaasi ne kpeenmnam gilig la teŋsuk. Ka Peꞌebil la wenne one ka ba daa ku o, ka o vuꞌug kumin, ka mor iila ayopoi ne nini ayopoi dine a Winaꞌam siisa ayopoi bane ka o tum dunia wusa ni na la.
7 Ka Peꞌebil la keŋ diꞌe gbauŋ la one zinꞌi naꞌam gbauŋ la datiuŋ.
8 Ka on diꞌe gbauŋ la ka bunvoeya anaasi la ne kpeenmnam piisi ne anaasi la vabin Peꞌebil la tuon. Ka kpeenmnam la yinni wusa mor kon ne salima laas, line peꞌel ne tudaare dine a Winaꞌam nidib puꞌusug la.
9 Ka ba yuꞌum yuumpaali yet ye,
“Fune suꞌum ye fu diꞌe gbauŋ la,
ka laki li tabilis la,
bozugo ba daa kuu uf ne.
Ka fu ziim la faaenn ninsaal buudi wusa ne pianꞌad gun gun ne buudi gun gun laꞌam ne soꞌolim gun gun,
ka ba lieb Winaꞌam din.
10 Ka maali ba ka ba a soꞌolim naꞌanam ne maalmaanib
ye ba tum Winaꞌam tuuma,
ka na di naꞌam dunia ni.”
11 Ka m gos ka nye maleknam tusanam tusa sa, ka ba ziꞌeni gilig naꞌam gbauŋ la ne bunvoeya anaasi ne kpeenmnam la.
12 Ka m wum ka ba duꞌosid ba kukoya yumi yet ye,
Peꞌebil one ka ba da ku ka o vuꞌug la suꞌum
ye o diꞌe paŋ ne kpaꞌam ne yaꞌam ne kpiꞌeuŋ
ne naꞌasi ne zunꞌor ne senꞌuŋ.
13 Ka m wum ka bunvor mekama line be arazana ni ne dunia ni ne teŋgbauŋ poogin ne ateukun wusa yet ye,
“Bareka ne naꞌasi ne zunꞌor ne paŋ
be ne Peꞌebil la
ne one zinꞌi naꞌam gbauŋ zug
saŋa dine kaꞌ benne.”
14 Ka bunvoeya anaasi la siak ye Ami. Ka kpeenmnam la vabini zunꞌe Peꞌebil ne one zinꞌi naꞌam gbauŋ zug la.