19
1 Neꞌeŋa nyaꞌaŋ ka m wum nidib bedego kukoya vuud arazana ni ka li ye,
“Zunꞌomi Winaꞌam.
Ka yolisim ne naꞌasi ne paŋ ane o din.
2 O kad saria ne sida ne yelmeŋir.
Ka kad poꞌagoondtitaꞌar one saꞌam dunia ne o tuumbeꞌed la saria,
ka namis o, on ke ka o tumtumnib la kpi la zug.”
3 Ka nidib la lem tans yaꞌas ye,
“Zunꞌomi Winaꞌam.
Ka bugum n dit teŋtitaꞌar siꞌa la nyoꞌos dut ne agol saŋa dine kaꞌ benne.”
4 Ka kpeenmnam pisi ne anaasi la ne bunvoeya anaasi la vabin n zunꞌe Winaꞌam one zinꞌi naꞌam gbauŋ zug la n siak ye,
“Ami. Zunꞌomi Winaꞌam.”
Peꞌebil la poꞌadiir la yela
5 Ka kukor yi naꞌam gbauŋ la ni na ye,
“Yanam bane a Winaꞌam tumtumnib,
tadimnam ne kpiꞌemnam bane zot Winaꞌam la,
zunꞌom Winaꞌam.”
6 Ka m lem wum kukor dine vuud wenne nidib bedego vuud ne ka wenne kuꞌom surugid ne paŋ siꞌem ne satansug titaꞌar ne, ka li yel ye,
“Zunꞌomi Winaꞌam,
Zugsob Winaꞌam titaꞌar la a naꞌab la zug.
7 Keli ka ti maal sumalisim ka ti sunya malis,
ka ti naꞌas Winaꞌam.
Ka Peꞌebil la poꞌadiir la saŋa paaeya,
ka poꞌa la me tiꞌebi ya.
8 Ka poꞌa la mor suer na ye fupielis line nyeen ka a nyain.”
(Fupielis la ane Winaꞌam nidib popielim tuuma.)
9 Ka malek la yeli m ye, “Som neꞌeŋa ye, ‘Yelsum be ne bane ka ba buoli ba ye ba kenn Peꞌebil la poꞌadiir diꞌema ni la na.’ ” Ka lem ye, “Bama a Winaꞌam pianꞌad ameŋa.”
10 Ka m vabin o tuon ye m naꞌas o. Amaa ka o yeli m ye, “Da niŋ alaa. Ka man ane fu tumtum tiraan ne fu baꞌabiis bane mor Yesu Kiristo kaset suŋ la. Zunꞌom Winaꞌam.” Yesu kaset la ane line ka Winaꞌam Siig la nie paꞌal.
One banꞌad wedpiel la yela
11 Ka m nye ka arazana yoꞌog, ka wedpiel be anina, ka one banꞌad o la yuꞌuri buon Yelsida Sob. Ka o kat saria ka zabid zaba ne sida.
12 O nini daa wenne bugum pielim ne, ka o pit naꞌam zugpibis bedego o zugin. Ka o mor yuꞌur ka li sobi o ni ka soꞌ ziꞌi lii, asee on gullim.
13 Ka o daa ye fuug line ka ba los ziimin. Ka yuꞌur kane ka ba buon o la ane Winaꞌam Pianꞌad.
14 Ka arazana zabzabidib ye fupielis line a nyain n banꞌad wedpielis dol o.
15 Ka suꞌuditiŋ daa yi o noorin na. Ka o na zaŋi li zabi nyaŋ buudi wusa ka o soꞌe ba ne paŋ, wenne kunt dansaar ne. Winaꞌam titaꞌar la supeen la lu ba zut wenne ban yiti noodi nwiakid veen siꞌem la.
16 Ka yuꞌur kane daa sob o fuugin ne o gberin la ane,
Naꞌanam Naꞌab ne zugsobnam Zugsob.
17 Ka m nye malek ka o ziꞌe winigin, ka yel niis bane ianꞌad agol ne kukotitaꞌar ye, “Kemi na laꞌas Winaꞌam diꞌema titaꞌarin la n di,
18 ka onb naꞌanam niŋgbina ne zabzabidib kpeenmnam la ne zabzabidib ne widi ne wedbanꞌadib ne nidib wusa, bane a yamis ne bane kaꞌa yamise ne tadimnam ne kpiꞌemnam la wusa niŋgbina.”
19 Ka m nye bunyua la ne dunia naꞌanam ne ba zabzabidib ka ba laꞌas ye ba zab ne one banꞌad wief la ne o zabzabidib.
20 Ka ba gbanꞌe bunyua la ne o ziri nodiꞌes one daa maan nyalima n maꞌ bane mor bunyua la zanbina ne bane naꞌas o win la, ka nok bunyua la ne ziri nodiꞌes la ka ba nan voe n lobi ba bas moꞌar line peꞌel ne bugum ne tan line nyelig n dit wuu bugum la ni.
21 Ka suꞌug kane daa yi wedbanꞌad la noorin na la kuu o dataas bane kpelim la. Ka niis wusa dii ba niŋgbina n tig.