16
Laas line ka Winaꞌam supeen peꞌeli ba ni la yela
1 Ka m wum tansug n yit puꞌusum yin la n yet maleknam ayopoi la ye, “Kem kpaꞌe Winaꞌam supeen line peꞌel laas ayopoi la dunia zug.”
2 Ka yiiga malek la keŋ kpaꞌe o din dunia zug. Ka fenꞌed ponꞌosa bane zabid naam bane mor bunyua la zanbin ne bane naꞌasidi o win la niŋgbina ni.
3 Ka malek one peꞌes ayi la kpaꞌe o dine niŋ ateukun. Ka ateuk la kuꞌom tiake wenne one kpi ziim ne, ka bunvoeya bane be ateukun la wusa kpi.
4 Ka malek one peꞌesa atanꞌ la kpaꞌe o dine niŋ kolis ne kuꞌobulis ni, ka kuꞌom la kilim ziim.
5 Ka m wum malek one kpaꞌe o din kuꞌomin la ka o yel Winaꞌam ye,
“Fune a suꞌum nyain, ka da be,
ka kpelim be la.
Ka fu saria ban ka fu kat la ane sida.
6 Ka nidib daa ku fu nidib ne fu nodiꞌesidib ka ba ziim yi,
ka dinzug ka fu tis bane kuu ba la ziim ye ba nu.
Ban narin ye ba diꞌen siꞌeli la.”
7 Ka m wum kukor ka li yi maan maalug zinꞌigin la ni na ye,
“Zugsob Winaꞌam titaꞌar,
fu saria kadib la ane sida ne suꞌum.”
8 Ka malek one peꞌes anaasi la kpaꞌe o din winig la zug. Ka ba tis winig la paŋ ye o di nidib la wuu bugum ne la.
9 Ka nintaŋ tuulug la daa di nidib, ka ba tuꞌud Winaꞌam one soꞌe yeltood bama la yuꞌur. Amaa ba pu tiake ba sueya n naꞌas Winaꞌam.
10 Ka malek one peꞌes anu la kpaꞌe o din niŋ bunyua la naꞌam gbauŋ la zug. Ka bunyua la soꞌolim wusa lieb lik. Ka nidib dumi ba zilima ba niŋgbina toog la zug,
11 ka tuꞌud Winaꞌam one be arazana ni la ba niŋgbina zabir ne ba fenꞌed la zug. Amaa ba pu tiake ba sunya n basi ba tuumbeꞌed laa.
12 Ka malek one peꞌes ayuobu la kpaꞌe o dine niŋ moꞌatitaꞌar Yifiretis ni, ka moꞌar la kudig ka ke suer n tis naꞌanam bane yi ya nyaꞌaŋ na la.
13 Ka m nye kikiris atanꞌ ka ba wenne lomis yi dragon la noorin ne bunyua la noorin ne ziri nodiꞌes la noorin na.
14 Ba ane Sutaana kikiris bane maal bunnyalima ka yi keŋ dunia naꞌanam wusa ni n laꞌase ba kenn tanpin na, Winaꞌam one galis la dabis titaꞌar la ni.
15 Winaꞌam yel ye, “Kelisimi, m kenna wenne naꞌayiigi ken siꞌem la. Sumalisim be ne one nei ka pu gbise, ka ye o fuud ye o da keŋ bieli ka nidib nye o nyane.”
16 Ka kikiris la laꞌas naꞌanam la keŋ zinꞌikan buon Armageddon ne, Hibiru dim pianꞌad la ni.
17 Ka malek one peꞌesa ayopoi la kpaꞌe o din pebisim ni. Ka kukotitaꞌar yi naꞌam gbauŋ dine be puꞌusum yin la na ye, “Li naaeya.”
18 Ka sayanꞌasug ne vuud ne satansug daa naam ka teŋ daa dam bedego. Teŋ nan ziꞌ dam hale baa ninsaal pinꞌilugin saa. Neꞌeŋa daa a teŋdambeꞌedi gaad wusa.
19 Ka teŋdamug la pudug teŋtitaꞌar la zinꞌisa atanꞌ. Ka dunia teens la wusa saꞌam. Ka Winaꞌam tienn Babilon teŋtitaꞌar la yela, ka ke ka o nu o supeen titaꞌar butiŋ daam la wusa.
20 Teens bane ka kuꞌom giligi ba la daa melim, ka zueya wusa biris.
21 Sakuga titada bane ka ba yinni tebisim zem wuu yoor ne kuꞌom, yit agol n lut nidib zutin. Ka ba tuꞌud Winaꞌam, sakuga namisidi ba la zug. Li daa ane namis titaꞌar.