8
Yesu n ke ka kukom nye laafe la yela
(Maak 1.40-45; Luuk 5.12-16)
1 Ka Yesu sig zuer zug na ka nidib bedego duꞌe dol o.
2 Ka kukom keenn o saꞌan na igin ka yel ye, “Zugsoba, fu yaꞌa bood, fu na tunꞌe ke ka m nye laafe.”
3 Ka Yesu tienn o nuꞌug n siꞌis o ka yel o ye, “M bood ala, nyem laafe.” Ka yim o nye laafe ka o kukom banꞌas la bas o.
4 Ka Yesu lem yel o ye, “Mit ka fu yel soꞌ. Amaa kem Winaꞌam maalmaan saꞌan ka ke ka o gos uf, ka maal maan tis Winaꞌam wuu Moses da sob ye ba niŋ siꞌem la. Ka li na paꞌal nidib ye fu nye laafe nannanna.”
Yesu ne sogia kpeenm tumtum la yela
(Luuk 7.1-10)
5 Ka Yesu daa kpenꞌ Kapeenum ka Room dim sogia kpeenm kenn o saꞌan na n sos o
6 ye, “M Zugsoba, m tumtum be yin n benꞌ n ponꞌolim, ka namisid hale.”
7 Ka Yesu yel o ye, “M na kena n tiꞌeb o.”
8 Ka sogia kpeenm la lebis yel o ye, “M pu suꞌum ye fu kenn man yin ne. Kudim yelim ne fu noor pianꞌauk maꞌaa, ka m tumtum la na nye laafe.
9 Mam meŋ mor sogia kpeenm one soꞌe man, ka man me mor sogianam ban ka m soꞌe. Ka m yaꞌa yel soꞌ ye, ‘Kem’ o kenne. Ka m yaꞌa lem yel soꞌ ye, ‘Kem na’ o ken ne na. Ka m yaꞌa yel m tumtum ye, ‘Niŋim ne’ o niŋidne ala.”
10 Ka Yesu n wum la, ka li lidig o. Ka o yel nidib bane dol o la ye, “M pu nye soꞌ ka o niŋ m yadda wenne dau kaŋa nwaa, hale baa Jew dim soꞌolim nii.
11 M yeti ya ye, nidib bedego na ti yi yatuon ne yanyaꞌaŋ na n zinꞌin Winaꞌam soꞌolim ni, ne ti yaanam Abraham ne Isaak ne Jakob n dit.
12 Ka bane nar ye ba naan diin Winaꞌam soꞌolim faar la, ba na kadi ba kpenꞌes likin. Anina ka nidib na ti kaasid ka gaꞌad nyina.”
13 Ka Yesu yel sogia kpeenm la ye, “Kem kul. Ka li na niŋ wenne fun niŋ man yadda siꞌem la.” Ka saŋkan la ka o tumtum la nye laafe.
Yesu n tiꞌeb nidib bedego la yela
(Maak 1.29-34; Luuk 4.38-41)
14 Ka Yesu keŋ Piita yin, ka nye Piita diem poꞌa ka o benꞌed ka digi ka o niŋ tul.
15 Ka Yesu siꞌis poꞌa la nuꞌug ka o niŋtuulum la bas o. Ka o maal Yesu saauŋ.
16 Ka zaam maꞌae ka ba mor nidib bane mor kikiris la bedego n kenn Yesu saꞌan na. Ka o noor pianꞌad maꞌaa ka o kad kikiris la yiis ka tiꞌeb banꞌadnam wusa.
17 Ka lin ka Azaya da sob o yela la niŋ sida ye, “O diꞌe ti niŋgbina toog ka yiisi ti banꞌas wusa.”
Bane bood ye ba dol Yesu ka biꞌesid la yela
(Luuk 9.57-62)
18 Ka Yesu n nye ka nidib bedego gilig o la, o yel o nyaꞌandolib la ye ba dol o keŋ beuŋ gbeug la sa.
19 Ka gbauŋmiꞌid keenn o saꞌan na yel o ye, “Paꞌana m na dol uf, fun na keŋ zinꞌisiꞌa wusa.”
20 Ka Yesu lebis o ye, “Teŋinbumis more ba vont, ka niis more ba teed, amaa Ninsaal Biig la pu mor zinꞌig ka o na kuki o zugo.”
21 Ka dau yinni one a Yesu nyaꞌandol yel ye, “Zugsoba, kel ka m keŋ yiiga mumi m saam.”
22 Ka Yesu lebis o ye, “Dol mam ka ke ka bane pu mor Winaꞌam nyovur paal la mum kuꞌum.”
Yesu n yel sisiꞌem ka li maꞌae yirr la yela
(Maak 4.35-41; Luuk 8.22-25)
23 Ka Yesu kpenꞌ aaruŋin la ka o nyaꞌandolib dol o.
24 Ka sisiꞌem titaꞌar gbirigi kenn beuŋin la na. Ka kuꞌopila ligil aaruŋ la. Ka Yesu gbisid.
25 Ka o nyaꞌandolib keŋ nie o ka ye, “Zugsoba, ti kpiide. Faanmi ti!”
26 Ka Yesu lebis ye, “Yanam bane ka ya yadda niŋir pu zuꞌe la, bo ka ya zot dabiem?” Ka Yesu tans sisiꞌem ne kuꞌopila la ka li lebi maꞌae yirr.
27 Ka li lidigi ba wusa. Ka ba buꞌos taaba ye, “Niŋkaŋa nwa a anoꞌone, hale ka sisiꞌem ne kuꞌopila siakidi o noore?”
Yesu n kad dap ayi kikiris la yela
(Maak 5.1-20; Luuk 8.26-39)
28 Ka ba paae beuŋ gbeug line a Gadarene teŋin la, ka dapa ayi bane ka kikiris doli ba yi yaadin na n tuꞌos o. Nidib zoti ba ka soꞌ pu dol anina gata.
29 Ka ba tans ye, “Winaꞌam Biiga, bo be tinam ne fun sisoogine? Fu kena ye fu namisi ti ka li saŋa nam pu paae?”
30 Ka kukurnam bedego kpiꞌe anina dit.
31 Ka kikiris sos o noor ye, “Fu yaꞌa kadi ti fun ke ka ti keŋ kpenꞌ kukurnamin la.”
32 Ka o yeli ba ye, “Kemi.” Ka ba yi dapin la ka kpenꞌ kukurnamin la. Ka kukurnam la wusa zo kukuna ni n sig beuŋin la ka kuꞌom dii ba.
33 Ka bane guri kukurnam la zo keŋ teŋ poogin yel line maal dap ayi la, ban ka kikiris daa doli ba la.
34 Ka teŋ la nidib wusa yi keŋ Yesu saꞌan, ka ban nye o la, ba sos o ye o yimi ba teŋin.