6
Yesu paꞌalug nidib suŋir la yela
1 “Mit ka ya maal ya tuumsuma nidib tuon ye ba gosi. Ya yaꞌa maal ala, ya ku diꞌe nyood ya Baꞌ one be arazana ni la saꞌanee.”
2 “Dinzugo fu yaꞌa suŋ noŋdaan, da ke ka ba nweꞌ luŋ fu tuone, wenne zam dim maan siꞌem laꞌasug doogin ne sueya ni, ye nidib pianꞌa ba. Ameŋa ka m yeti ya ye, ban diꞌene ba yood ne ala.
3 Amaa fun yaꞌa suŋ noŋdaan, fun da ke ka fu dagobug baŋ fu datiuŋ niŋid siꞌela.
4 Dinzugo suꞌam ne suŋ noŋdim, ka fu Baꞌ one nye ka fu suꞌad n suŋid siꞌem la, na tis uf li yood.
Yesu paꞌalug Winaꞌam sosug la yela
(Luuk 11.2-4)
5 “Ka fu yaꞌa puꞌusid Winaꞌam, fun da niŋ wenne zam dim laa, bozugo ban bood ye ba ziꞌe laꞌasug doogin ne suekita ni n puꞌusid, ye nidib nye ba. Ameŋa ka m yeti ya ye, ba diꞌene ba yood ala.
6 Amaa fu yaꞌa ye fu puꞌus Winaꞌam, fun kpenꞌem fu doogin ka yo zaꞌanoor, ka puꞌus fu Baꞌ Winaꞌam one suꞌa la. Ka fu Baꞌ one nye fu yela bane suꞌa la na tis uf li yood.
7 “Fu yaꞌa puꞌusidne, da pianꞌa pianꞌazaalis wenne bane ziꞌ Winaꞌam n niŋid siꞌem la, bozugo ba tenꞌes ye ba pianꞌad bedego zug ka Winaꞌam na diꞌe ba puꞌusum.
8 Da maan wenne bane, bozugo ya Baꞌ Winaꞌam pun miꞌ yanam bood siꞌel, hale ka ya nam pu sos oo.
9 Dinzugo sosimi ne anwa,
‘Ti Baꞌ one be arazana ni,
ka fu yuꞌur a suꞌuŋa,
10 ka fu naꞌam na kena,
ka ke ka fu boodim n maal dunia zug,
wenne lin maan arazana ni siꞌem la,
11 ka tisi ti zina diib
wenne fun n tisid ti daar wusa siꞌem la,
12 ka di suguru ne ti poꞌogir zug,
wenne tinam dit suguru ne ti taab bane poꞌogidi ti siꞌem la.
13 Ka da ke ka ti kpenꞌ makir poogine.
Amaa yiisimi ti yelbeꞌed poogin.’
14 Ya yaꞌa di nidib suguru ba tuumbeꞌed zug, ya Baꞌ one be arazana ni la, na di ya suguru men.
15 Amaa ya yaꞌa pu di suguru ne nidib ba tuumbeꞌed zugo, ya Baꞌ me ku di suguru ne ya tuumbeꞌed la zugo.
Yesu paꞌalug noloor la yela
16 “Ka ya yaꞌa lo noor, yanam da niŋ wenne zam dim la lood nindaas siꞌem laa, bozugo ba loodne ba nindaas ye nidib baŋ ye ba lood noor. Li ane ameŋa ka m yeti ya ye, ba diꞌene ba yood la.
17 Amaa ya yaꞌa lo noor, yanam suenmi ya zut ne kpaam, ka piesi ya nindaas.
18 Ka nidib ku baŋ ye ya lo noore. Ka ya Baꞌ one suꞌa la, na baŋi li. Dinzugo ya Baꞌ one nyet bun line suꞌa la na tisi ya li yood.
Yesu paꞌalug arazana ni arazaꞌas la yela
(Luuk 12.33-34)
19 “Da suꞌa ya arazaꞌas dunia nwa nii, ka zinꞌikan ka muak muꞌad ka teŋinzenꞌem me saꞌami li, ka naꞌayiis kpenꞌed n zuud.
20 Amaa digilimi ya arazaꞌas arazana ni. Anina ka muak ne teŋinzenꞌem ku saꞌami baa, ka naꞌayiis me ku kpenꞌ n zuu.
21 Bozugo ya arazaꞌase be siꞌel la, ya potenda me bene anina.
Yesu paꞌalug niŋgbina la yela
(Luuk 11.34-36)
22 “Fu nif wenne niŋgbiŋ fitla. Ka fu nif yaꞌa a suꞌuŋa, fu niŋgbina wusa ane nyain.
23 Ka fu nini yaꞌa a beꞌed, fu niŋgbina wusa ane lik. Neesim kane nie fu ni la yaꞌa lebig lik, li ane lik ameŋa.
(Luuk 16.13)
24 “Soꞌ kaeꞌ na siaki dol zugsobnam ayii, bozugo o na kisi yinni, ka noŋ yinni, bee o na naꞌas yinni, ka poꞌog yinni. Ya ku tunꞌe dol Winaꞌam, ka lem bood dunia laꞌade.
(Luuk 12.22-31)
25 “Dinzugo man yeti ya ye, ya da yaꞌamsid ne ya nyovuya nwa yela yanam na di siꞌel, bee nu siꞌel, bee ya niŋgbina na yeꞌ siꞌela. Nyovur pu gat diibo? Ka ya niŋgbina pu gat fuude?
26 Gosimi, niis bane ianꞌad agol la. Ba pu buta, ka me pu buni n laꞌased n suꞌad buya nii. Amaa ne lin wusa, ya Baꞌ one be arazana ni la, diisidi ba. Yanam pu gat niise?
27 Anoꞌone be ya sisoogine na tunꞌe n paas o waꞌalim biꞌela one yaꞌamsid la zugo?
28 “Ka bozug ka ya yaꞌamsid ne ya fuud yela? Tenꞌesimi mopuum venla bane be moogin la n nobugid siꞌem la. Ba pu tumne bee nwiid gumne.
29 Amaa m yeti ya ye, baa naꞌab Solomon ne o naꞌam la wusa, o da pu mor fuud ka li venl wenne nwa.
30 Ka Winaꞌam yaꞌa maal mood line be moogin ka li venl, ka li ku yuuge ka bugum dii li, o ku yeeli ya fuud gaad moode? Yanam bane ka ya yadda niŋir pu zuꞌe nwa.
31 Dinzugo da yaꞌamsidi n yet ye, ‘Ti na di bo?’ bee ‘Ti na nu bo?’ bee ‘Ti na yeꞌ bo?’
32 Bane ziꞌ Winaꞌam la bood nwa wusa. Ka ya Baꞌ one be arazana ni la, miꞌ ye ya bood nwa wusa.
33 Amaa deŋimi n bo Winaꞌam soꞌolim ne o yelsum la yiiga, ka bun line n kpelim wusa o na paasi ya.
34 Dinzugo da tenꞌesidi bedego beug yelaa, bozugo beug na tenꞌes li meŋ yela. Keli ka dabisir wusa more li yel ka li siak.