4
Sutaana n daa mak Yesu la yela
(Maak 1.12-13; Luuk 4.1-13)
1 Ka Winaꞌam Siig Suŋ la daa zaŋ Yesu n keŋ moogin, ka Sutaana ti mak o.
2 Ka o lo noor dabisa piisnaasi yuꞌuŋ ne nintaŋ wusa. Ka o koꞌom daa zabid.
3 Ka Sutaana kenn o saꞌan na, ka yel o ye, “Fu yaꞌa ane Winaꞌam Biig, fun yelim kuga nwa ye ba kilim diib.”
4 Ka Yesu lebis ye, “Li sobne Winaꞌam gbauŋin ye, ‘Ninsaal ku tunꞌe voe ne diib yel maꞌane, asee pianꞌad kan wusa yit Winaꞌam noorin la paas.’ ”
5 Ka Sutaana mor Yesu n kpenꞌ teŋsuŋ (line a Jerusalem) la n du Winaꞌam puꞌusum yin la zug,
6 ka yel o ye, “Fu yaꞌa ane Winaꞌam Biig, fun basim fu meŋ n lu teŋin, bozugo li sobne ye,
‘Winaꞌam na tis o maleknam noor ye ba mor uf ne ba nuꞌus
hale ka fu ku tuꞌug fu nobir ne kugire.’ ”
7 Ka Yesu yel o ye, “Li me sobne ye, ‘Mit ka fu mak fu Zugsob fu Winaꞌam.’ ”
8 Ka Sutaana mor Yesu yaꞌas n du zuetitaꞌar zug paꞌal o dunia soꞌolim wusa ne li paŋ,
9 ka yel o ye, “Fu yaꞌa siak n igin zunꞌe man, m na tis uf nwa wusa.”
10 Ka Yesu yel Sutaana ye, “Kem sa, li sobne ye, ‘Winaꞌam gullim ka fu na siak n zunꞌe o, ka tum n tis o.’ ”
11 Ka Sutaana bas Yesu ka keŋ. Ka maleknam kena n suŋ o.
Yesu pinꞌil o tuuma Galilee soꞌolim la yela
(Maak 1.14-15; Luuk 4.14-15)
12 Ka saŋkan ka Yesu wum ye ba gbanꞌe Joon la, o keŋ Galilee soꞌolim,
13 ka yi Nazaret n keŋ Kapeenum teŋin line kpiꞌe Galilee beuŋ noorin, Zebulun ne Naftali yaas teŋin.
14 Ka lin ka Winaꞌam nodiꞌes Azaya n da yel siꞌel la lieb ameŋa ye,
15 “Zebulun ne Naftali nidib,
nimbane be Joodan moꞌar nyaꞌaŋ n be ateuk baba la,
zinꞌig la me ane Galilee teŋ kane ka bane kaꞌ Jew dim buudi be anina la.
16 Nimbane be anina la,
bane be likin la, na nye neesim bedego.
Neesim na be n tis bane be teŋ line a lik wenne kuꞌum teŋ la ni.”
17 Saŋkan la ka Yesu daa moon ye, “Tiakim ka basi ya tuumbeꞌed, bozugo Winaꞌam naꞌam la liꞌelne.”
Yesu n daa buol ziŋgbanꞌadib la yela
(Maak 1.16-20; Luuk 5.1-11)
18 Ka Yesu n daa ken Galilee beuŋ noorin la, o nye Simon one buon Piita la, ne o baꞌabiig Andrew, ka ba lobid ba sau beuŋ noorin la; ka li ane ba tuuma la.
19 Ka Yesu yeli ba ye, “Kemi na dol man ka m na paꞌali ya suer kan ka ya na ke ka nidib dol man, wuu ziŋgbanꞌadib niŋid siꞌem gbanꞌad zimi la.”
20 Ka ba kpelim basi ba zimi laꞌad la, ka dol o.
21 Ka one gaad tuon la o nye nidib ayi yaꞌas bane a Zebedee biis la. Ba yuda buon Jemes ne Joon. Ka ban ne ba baꞌ Zebedee be aaruŋ la ni n maane ba zimi laꞌad, ka Yesu buoli ba.
22 Ka ba kpelim bas aaruŋ ne ba baꞌ, ka dol o.
Yesu n tum siꞌel la yela
(Luuk 6.17-19)
23 Yesu daa giligid Galilee soꞌolim wusa n kpenꞌed laꞌasug doodin n moon Winaꞌam soꞌolim labaar ka tiꞌebid nidib ba banꞌas buudi wusa.
24 Ka o labaar giligid Siriya teens wusa, ka ba zaŋ bane wusa benꞌed wiim buudi buudi n kenn o saꞌan na, bane namisid ne wiim mekama wusa ne niŋgbina zabir, ne bane ka kikiris doli ba ne kpisiŋkpiꞌir dim ne ponda, ka o ke ka ba wusa nye laafe.
25 Ka nidib bedego yi Galilee teŋin ne Dekapolis teŋin ne Jerusalem ne Juuda teŋin ne Joodan moꞌar gbeug n dol o.