13
Kpaad one waal bunbuuda la yela
(Maak 4.1-9; Luuk 8.4-8)
1 Ka daakan yaꞌas ka Yesu yi yin la keŋe zinꞌin beuŋ gbeug.
2 Ka nidib bedego laꞌas o saꞌan na, ka o kpenꞌ aaruŋin, ka nidib be beuŋ gbeug.
3 Ka o yeli ba yela bedego ne siilis n yet ye, “Dau da be n keŋ ye o waal o bunbuuda.
4 Ka on waan la, bunbuud sieba lu suer zug. Ka niis kena n di.
5 Ka sieba lu zinꞌikan ka tan pu zuꞌe ka a tampiins zut. Ka tani pu zuꞌe la zug ka li bul toꞌoto.
6 Ka nintaŋi tulug la, ka ba zianki nwiilim, lin kaꞌa nyaꞌa la zug.
7 Ka sieba lu gonꞌos soogin, ka gonꞌos la nobugi sianki ba.
8 Amaa sieba lu koꞌolum zinꞌig, ka wel bielim. Sieba wel kobuga. Ka sieba wel piisyuobu. Ka sieba me wel piistanꞌ.
9 One mor toba on wum.”
Lin yela ka Yesu tis siilis la
(Maak 4.10-12; Luuk 8.9-10)
10 Ka o nyaꞌandolib kena buꞌos o ye, “Bo ka fu pianꞌad ne siilis tisidi ba?”
11 Ka o lebisi ba ye, “Yanam diꞌe Winaꞌam soꞌolim yelsuaꞌada. Amaa ban pu diꞌee.
12 One mor na diꞌe paꞌas ka li a bedego. Ka one pu mor la, hale ba na diꞌe on mor siꞌel la.
13 Dinzug ka m pianꞌadi tisidi ba ne siilis, bozugo ba gosidne ka pu nyeti lii, ka me wum ka pu baŋidi li gbin ne.
14 Sobkan ka Azaya da sob la niŋ sida ba ni ye,
‘Ya na wum ka ku baŋi li gbin ne,
ka na gosid ka ku nyeti lii.
15 Ba sunya digilimne,
ka ba liꞌ ba toba ka pu wum na,
ka umi ba nini ka pu nyeta.
Li yaꞌa kaꞌ alaa,
ba na nye ne ba nini,
ka wum ne ba toba,
ka baŋi li gbin ne ba sunya,
ka tiake lebe m saꞌan na ka m tiꞌebi ba.’ ”
16 Ka Yesu ye, “Amaa yelsum be ya ni, yaname mor nini ka li nyet, ka mor toba ka li wum la.
17 Yelsida ka m yeti ya ye, Winaꞌam nodiꞌesidib ne popielim dim bedego bood hale ye ba nye yaname nye siꞌel la, ka pu nyee lii, ka bood ye ba wum yaname nye siꞌel la, ka pu wum.”
Yesu paꞌal dau kane waal bunbuuda siiliŋ la gbin
(Maak 4.13-20; Luuk 8.11-15)
18 “Dinzug, kelisimi one waal bunbuuda la siiliŋ la gbin.
19 Soꞌ yaꞌa wum Winaꞌam labaar la ka pu baŋi li gbin ne, o wenne bunbuuda bane lu sueren la. Ka Sutaana one a tuumbeꞌed daana la kena n yiis line kpenꞌ o suunrin la.
20 Ka bane lu tampiins zug la wenne one wum labaar la ka diꞌe li aniŋa niŋa ne sumalisim.
21 Ka line kaꞌa nyaꞌa la zug, li pu yuuge ka kpi. O yaꞌa di fara bee namis Winaꞌam labaar yela o nyorigidne n bas.
22 Ka bane lu gonꞌos soogin nwa ane bane wum labaar la, ka dunia potenꞌer daami ba, ka arazaꞌas boob yela siank labaar la ka li pu wele.
23 Ka bane lu koꞌolum zinꞌig la ane one wum labaar la ka baŋi li gbin. Ka sid welne wela wuu kobuga bee piisyuobu bee piistanꞌ.”
Ki ne natis siiliŋ la
24 Ka Yesu lem siilim ba siiliŋ yinni yaꞌas ye, “Winaꞌam soꞌolim wenne dau kane budi o ki poogin.
25 Ka yuꞌuŋ sob ka nidib be gbeemin ka dataa me zaŋ natis keŋ n budi gendig kiin la.
26 Ka ki la yi na nobugi siak pidigir. Ka natis la me nobug ka ba nye ka li kaꞌ kii.
27 “Ka tumtumnib la kenn yidaan la saꞌan na n buꞌos o ye, ‘Zugsoba, fu daa pu bud kisuma poogin laa? Ka bo ka natis gendig bedego?’
28 “Ka o yel ye, ‘Li ane dataa la niŋe li.’
“Ka tumtumnib la buꞌosi ye, ‘Fu bood ye ti keŋ vonn natis la bee?’
29 “Ka o yeli ba ye, ‘Ayei, ya yaꞌa niŋ ala ya na laꞌam vonn ne ki.
30 Kel ka li wusa biꞌig n ti paae bunib saŋa, ka m yel m bunib la, ka ba vonn natis la yiiga n bobigi ba n nyuꞌe bugum. Ka lee bun ki la n su buorin.’ ”
Bielim line pood la siiliŋ
(Maak 4.30-32; Luuk 13.18-19)
31 Ka Yesu yeli ba siiliŋ yinni yaꞌas ye, “Winaꞌam soꞌolim la wenne zensiꞌa, line yuꞌur buon ye mustard bielim, ka dau soꞌ budi o poogin.
32 Bielim la pood gat bielim wusa amaa li yaꞌa bud li nobugid n gat tituud bane be wusa, ka lieb wenne tiig ne ka niis kena maali ba teed li wila ni.”
Dabin siiliŋ la
(Luuk 13.20-21)
33 Ka o yeli ba siiliŋ yinni yaꞌas ye, “Winaꞌam soꞌolim la wenne dabin ne, ka poꞌa noki li gendig bodobodo ni, ka li ke ka li nob.”
Yesu n da pianꞌad ne siilis la yela
(Maak 4.33-34)
34 Neꞌeŋa wusa ka Yesu pianꞌad nidib la ne siilis, hale o pu yeli ba pianꞌasiꞌa ka li yaꞌa kaꞌane siiliŋa.
35 Neꞌeŋa ane ye li niŋ sida Winaꞌam nodiꞌes la da sob siꞌel la ye, “M na siilim ne siilis, ka na paꞌal yelsuaꞌada bane suaꞌad dunia pinꞌilug saŋa la n ti paae nannanna nwa la.”
Yesu paꞌal ki ne natis siiliŋ la gbin
36 Ka Yesu bas nidib la ka kpenꞌ yin. Ka o nyaꞌandolib kena yel o ye “Paꞌalimi ti poog la natis la gbin ne a siꞌem.”
37 Ka o yeli ba ye, “One waal bunbuud soma la ane Ninsaal Biig la.
38 Ka poog la a dunia, ka bunbuud soma la gbin ane Winaꞌam soꞌolim nidib. Ka natis la a Sutaana nidib.
39 Ka dataa one but natisi gendig la, a Sutaana. Ka bunib saŋa la a dunia naar. Ka bunib la a Winaꞌam maleknam.
40 “Ka ban laꞌas natis la los bugumin siꞌem la, ala men ka li na niŋ dunia naar la.
41 Ninsaal Biig la na tumi o maleknam ka ba laꞌas bane panꞌasid nidib, ne tuumbeꞌed dim wusa bane be Winaꞌam soꞌolimin la
42 ka yiisi ba lob bugum zinꞌigin. Ka ba na kum ka gaꞌadi ba nyina.
43 Ka nidib bane a ninsuma na nie ba Baꞌ Winaꞌam soꞌolimin wenne winig nied siꞌem la. Dinzugo one mor toba, on wum.”
Arazaꞌas bane suaꞌ teŋin la siiliŋ
44 Ka Yesu ye, “Winaꞌam soꞌolim la wenne arazaꞌas bane suaꞌ teŋin. Ka dau soꞌ nye li ka lem lebisi ligili li yaꞌas. Ka o sunf maꞌae hale ka o kuli kuos on mor siꞌel wusa lebi n daꞌ poog la.”
Kugvenliŋ kane buon peel la siiliŋ
45 Ka lem ye, “Winaꞌam soꞌolim wenne kukpinkpine one ied kugvenla ban ka ba buon peel la, ka li ligidi zuꞌe hale.
46 Ka on nye peel yinni ka li ligidi zuꞌe bedego la, o keŋ kuos on mor siꞌel wusa lebi daꞌa li.”
Lauŋ la siiliŋ
47 Ka Yesu ye “Winaꞌam soꞌolim la lem wenne lauŋ kane ka ba lob moꞌarin ka li gbanꞌe zimi buudi wusa.
48 Ka li peꞌel lauŋ la. Ka ba teegi li duꞌos guur ka gaans bunsuma la n su ba gona ni, ka lob bunbeꞌednam la bas.
49 Li me na a ala dunia naar saŋa. Winaꞌam maleknam na kena n gaans nimbeꞌednam la ninsuma soogin,
50 ka lobi ba bas bugum zinꞌigin, ka ba na kum ka gaꞌad nyina.”
Bunsuma bane a bunkuda ne bunpaala la yela
51 Ka Yesu buꞌosi ba ye, “Ya baŋ neꞌenam gbin ne?”
Ka ba lebis o ye, “Eenn.”
52 Ka o yeli ba ye, “One a gbauŋmiꞌid Winaꞌam gbauŋ kudigin la ka yuꞌun zamis bam Winaꞌam gbauŋ paalig la Winaꞌam soꞌolim la yela, wenne yidaan one yiisidi o bunsuma bane a bunkuda ne bunpaala ne.”
Ba n zanꞌas Yesu o meŋ teŋin la yela
(Maak 6.1-6; Luuk 4.16-30)
53 Ka Yesu n siilim siilis la naae la ka o
54 kuli o teŋin ka paꞌali ba, ba laꞌasug doodin. Ka li lidigi ba, ka ba yel ye, “Ka oŋa nye yaꞌam kaŋa ne tuumnyalima nwa yaani?
55 O kaꞌane dakpiꞌed biiga? Ka li kaꞌane o ma ka ba buon Meeri laa? Ka li kaꞌane o pitib a Jemes ne Josef ne Simon ne Judas laa?
56 Ka kaꞌane o tanpi nwa ziꞌe ne ti laa? Ka yaani ka dau kaŋa nye neꞌenama?”
57 Ka ba zanꞌas o.
Amaa Yesu yeli ba ye, “Ba naꞌasid nodiꞌes zinꞌig wusa, asee o meŋ teŋin ne o yidimin ka ba ku naꞌas oo.”
58 Ban pu niŋ o yadda la zug, ka o pu tum tuumnyalima bedego anina.