Winaꞌam Gbauŋ (Ghana) JOON 19

1 Ka Pilate ke ka ba fieb Yesu. 2 Ka sogianam zaŋ gonꞌos wug naꞌam zugpibig n pid o ka yeel o fuzenꞌug, 3 ka kenn o saꞌan na yel o ye, “Naa, Jew dim naꞌaba,” ka nweꞌ o ne tampiank.

4 Ka Pilate lem yi nidibin la na yaꞌas n yeli ba ye, “Gosimi ya, m na mor o kenn ya saꞌan na ka ya baŋ ye m pu nye taali o saꞌane.” 5 Ka Yesu pid gonꞌos zugpibig ka ye fuzenꞌug n yi na. Ka Pilate yeli ba ye, “Dau la nwa.”

6 Ka maalmaan kpeenmnam ne ba tumtumnib la nye o la, ba tans ye, “Kpaꞌami ne o dapuudir zug n ku. Kpaꞌami ne o.”

Ka Pilate yeli ba ye, “Ya meŋ zaŋim o n kpaꞌ, bozugo man pu nye o taale.”

7 Ka Jew dim la yel o ye, “Ti mor wada, ka li paꞌal ye, li nar ka o kpi, bozugo o maali o meŋ ye o ane Winaꞌam Biig.”

8 Ka Pilate n wum pianꞌabama la, dabiem maligim kpenꞌ o. 9 Ka o lem kpenꞌ zakin la yaꞌas ka buꞌos Yesu ye, “Fu yi yaa ni na?” Ka Yesu pu lebis oo. 10 Ka Pilate buꞌos o ye, “Fu ku lebisi maa? Fu ziꞌ ye m mor paŋ kane na bas uf, bee n kpaꞌa uf dapuudir zugo?”

11 Ka Yesu lebis o ye, “Winaꞌam yaꞌa pu tisin uf paŋa fu naani ku nyeen paŋi nyaŋeni ma. Dinzug one mor man na niŋi fu nuꞌusin la, tum tuumbeꞌed n gaad uf.”

12 Pianꞌakaŋa yela ka Pilate ied suer ye o bas o, amaa Jew dim daa tansid n yet ye, “Fu yaꞌa bas dau kaŋa, fu kaꞌ Room naꞌab Kaisa zuaa. Bozugo on mekama nok o meŋi maal naꞌab bood ye o zab ne Kaisa.”

13 Ka Pilate n wum pianꞌabama la, o mor Yesu n yi na zinꞌin saria kadib gbauŋ zug line be zinꞌikan ka Jew dim buon ye Gabbata la, ka li gbin a kuglama la. 14 Daakan nintaŋ soos, ka ba tiꞌebid kuꞌum malek gaadug tienr daar la.

Ka Pilate yel Jew dim la ye, “Ya naꞌab la nwa.”

15 Ka ba tansid n yet ye, “Mor o keŋ n kpaꞌ o.”

Ka Pilate buꞌosi ba ye, “M kpaꞌami ne ya naꞌab laa?”

Ka maalmaan kpeenmnam lebis ye, “Ti pu mor naꞌaba, asee Kaisa.”

16 Ka o yuꞌun kees o tisi ba ye ba kpaꞌ o dapuudir zug n ku.

Ban n kpaꞌ Yesu dapuudir zug la yela

(Mateo 27.32-44; Maak 15.21-32; Luuk 23.26-43)

17 Ka ba mor Yesu yi teŋin la ka ke ka o zeedi o meŋ dapuudir n keŋ zinꞌikan ka Jew dim buon ye Golgota la, ka li gbin a ye zunwana zinꞌig. 18 Ka ba kpaꞌ o n tabil dapuudir zug. Ka me kpaꞌ nidib ayi n tabil dapuuda zug, ka yinni be o dagobug ka yinni be o datiuŋ. Ka Yesu bee ba soogin.

19 Ka Pilate sob o yela n tabil dapuudir la zug ka sobir la yel ye,

“YESU ONE YI NAZARET,

KA A JEW DIM NAꞌAB LA.”

20 Zinꞌikan ka ba da kpaꞌ Yesu la, da kpiꞌene teŋ poogin la, ka Jew dim bedego karem sob la. Ka sob la da sob ne Jew dim pianꞌad, ne Room dim pianꞌad ne Greek dim pianꞌad. 21 Ka Jew dim maalmaan kpeenmnam yel Pilate ye o da sob ye, “Dau kaŋa ane Jew dim naꞌaba, amaa ye o som ye, dau kaŋa yel ye, o ane Jew dim naꞌab.”

22 Pilate lebis ye, “Mam sob siꞌem la line kpelim be.”

23 Ka sogianam kpaꞌ Yesu naae la, ba zaŋ o fuud pudugi li zinꞌis anaasi n tis taaba. Fuug la da pu senn, amaa ba wugu line mum.

24 Linzug ka ba yel taaba ye ba da aenn lii, amaa ba maal bugulum bugulum gos one na di.

Neꞌeŋa da niŋi ala ye Winaꞌam gbauŋ la sob siꞌem la niŋ ameŋa ye,

“Ba pudug m fuud n tis taaba

ka maal bugulum bugulum ne m fuug la yela.”

Ka sogianam la niŋi ala.

25 Ka Yesu ma ne o mapit, ne Kleopas poꞌa ne Meeri Magdalene, n ziꞌe kpiꞌe dapuudir la. 26 Ka Yesu n nye o ma ne o nyaꞌandolkan ka o noŋ la ka ba ziꞌe kpiꞌe la, o yel o ma la ye, “M ma fu biig nwa.” 27 Ka me yel o nyaꞌandol la ye, “Fu ma nwa.” Ka saŋkan ken sa ka o nyaꞌandol la dol Yesu ma la kuli o yin.

Yesu kuꞌum la yela

(Mateo 27.45-56; Maak 15.33-41; Luuk 23.44-49)

28 Ka Yesu yuꞌun baŋ ye siꞌel wusa naae ya la ka yel ye, “Kuꞌonuud more m.” O yeli ala ye Winaꞌam gbauŋ n sob siꞌem la niŋi ameŋa. 29 Ka nwam ziꞌe ne danmiꞌisug. Ka ba zaŋ sooso los danmiꞌisugin la lo kikanꞌarin niŋi o noorin. 30 Ka on nu danmiꞌisug la ka ye, “Li naae ya,” ka sun o zug ka kpi.

31 Li da ane vuꞌusum daar tiꞌebug, hale ka li a dabistitaꞌar, linzug ka Jew dim la pu bood ye niŋgbina la kpelim be dapuuda zugi li daare, ka ba sos Pilate ye o ke ka ba koꞌ ba noba, ka sigisi ba dapuuda la ni. 32 Ka sogianam keŋ koꞌ yiiga daan la noba, ne o tiraan one ka ba daa laꞌam kpaꞌa kpiꞌe Yesu la noba. 33 Ka ban kenn Yesu saꞌan na n nye ka o kpi la, ba pu koꞌ o nobaa. 34 Ka sogia yinni zaŋ kpan n kunsi o lugir ka ziim ne kuꞌom kpelim yi na. 35 One nye line naam la, dii li kaset. O pianꞌ ne yelsida, o meŋ miꞌ ye o pianꞌ ne yelsida, ye ya me siaki li. 36 Ka neꞌeŋa niŋ ne ye Winaꞌam gbauŋ la n sob siꞌem la lieb ameŋa ye, “Baa o konbir yinni, ku koꞌoge.” 37 Ka Winaꞌam gbauŋ lem sob zinꞌi siꞌa yaꞌas ye, “Ba na gos on ka ba kuns la.”

Ban mum Yesu la yela

(Mateo 27.57-61; Maak 15.42-47; Luuk 23.50-56)

38 Neꞌeŋa nyaꞌaŋ ka Josef one yi Arimatea teŋin ka a Yesu nyaꞌandol n keŋ sos Pilate ye o zaŋim Yesu niŋgbiŋ la tis o. Josef daa ane Yesu nyaꞌandol amaa on daa zot Jew dim la zug ka o pu neeli o meŋa. Ka Pilate n siak la ka o kena zaŋ niŋgbiŋ la keŋ. 39 Ka Nikodemus, one daa keŋ Yesu saꞌan yuꞌuŋ la, me dol Josef ka mor bunnyubis line buon mir ne aloes ka ba gendig taaba, ka li zuꞌe bedego. 40 Ka ba zaŋ Yesu niŋgbiŋ n bobug ne fuud ne bunnyubisa la, wuu Jew dim kum maluŋo a siꞌem la. 41 Ka lombonꞌog be zinꞌikan ka ba kpaꞌ o la baba, ka Jew dim yaug be li poogin, ka ba nam pu mum soꞌ li nii. 42 Ka dabisir la sadigim a vuꞌusum daar tiꞌebug la ka yaug la me pu lal la, ka ba mum Yesu anina.