3
Wada siakir bee yadda niŋir la yela
1 Yanam Galatia dim ane zon! M paꞌali ya Kiristo kum dapuudir la zug yela suꞌuŋa, ka li nie nyain ya nini ni. Anoꞌone maꞌa ya?
2 M bood ye m buꞌosi ya yel yinni maꞌaa, ya daa diꞌe Winaꞌam Siig Suŋ la ka li yi ne yaname dol wada la yel siꞌel la bee yanam wum labasuŋ la ka niŋ Kiristo yadda la?
3 Ya ane zon bee? Ya daa pinꞌili a Winaꞌam nidib, ka li yine Winaꞌam Siig Suŋ paŋin la. Ka ya yuꞌun bood ye ya naa li ne ya meŋ paŋ bee?
4 Ya namisug la wusa ane zaalim bee? Ayei, li kaꞌ zaalim.
5 Winaꞌam tisidi ya o Siig Suŋ ka maan bunnyalima ya saꞌan, yanam wum labasuŋ la ka niŋ Kiristo yadda la, ka kaꞌ yanam niŋ wada la yel siꞌem laa. Bee m maꞌane?
6 Li dolne lin da sob Winaꞌam gbauŋin Abraham yela siꞌem la ye, “On da niŋ Winaꞌam yadda, ka Winaꞌam gosi li ka siak ka o a popielim daan o tuon.”
7 Baŋimi ye nimbane niŋ Winaꞌam yadda la sid ane Abraham yaas.
8 Winaꞌam gbauŋ da pun nye ye Winaꞌam na ke ka bane kaꞌ Jew dim la a popielim dim o tuon ba yadda niŋir zug, hale ka li da nam pu niŋe, ka dinzug ka ba da pun yel Abraham labasuŋ la moolug yela hale ka li nan pu paae, on zug ka dunia buudi wusa na nye yelsum.
9 Abraham da niŋ Winaꞌam yadda ka diꞌe yelsum. Ka ala men bane me niŋ Winaꞌam yadda la na diꞌe yelsum wuu on men.
10 Nopoor be nimbane tiaꞌ wada la maꞌaa, bozugo li sobne ye, “Nopoor be ne bane wusa pu dol wada la yela zanꞌasa wenne lin sob Wada gbauŋin siꞌem la.”
11 Li ane nyain ye soꞌ kaeꞌ na di buod wada la dollim maꞌane, bozugo “Popielim daan na voe ne o yadda yela.”
12 Ka li lem sob ye, “One niŋ wada la yel siꞌel wusa la, o niŋir la na ke ka o voe”. Ka dinzugo wada la siakir pu yine Winaꞌam yadda niŋir nii.
13 Ka li me sob ye, “Nopoor be ne on mekama n kpi ka ba yaꞌal o tiig zug.” Ka dinzugo, Kiristo n da kpi dapuudir zug la, o da kpenꞌ nopoor la ni, ka faaenn ti nopoor line ka wada la mor na la nuꞌusin.
14 O faaenn ti ye yelsum kan ka Winaꞌam ziꞌel noor ye o na tis Abraham la me na a bane kaꞌ Jew dim la din, ban a yinni ne Yesu Kiristo la zug, ka ye ti me na diꞌe Winaꞌam Siig Suŋ line ka o ziꞌel noor ye o na tisi ti la, ka ti diꞌer la yitne ti yadda niŋir ni na.
Wada la ne noor ziꞌelug la yela
15 M baꞌabiise, m ye m zaŋ nidib beilim a siꞌem la n paꞌali ya siꞌel. Nidib ayi yaꞌa siak pianꞌ siꞌel yela ka sobi li, ka tik nuꞌug, soꞌ kaeꞌ na tiake lii, bee paꞌas siꞌela.
16 Aa to, Winaꞌam da ziꞌel noor tis Abraham ne o yaaŋ. Li da pu sob ye o ziꞌel noor n tis o yaase, ka li ane nidib bedegoo. Ka li lee sob ye o yaaŋ, ka li ane yinni. Ka one a Kiristo la.
17 Lin ka m yeli li la, ane ye, Winaꞌam da ziꞌel noor ka yel ye o ku saꞌami lii. Ka yuma kobus anaasi ne piistanꞌ da gaadeya, ka wada la nyaan kena, amaa li pu nyaŋe saꞌam noor ziꞌelug laa.
18 Bozugo faar la yaꞌa ane wada la dollim yela, li ku lem dolne noor ziꞌelig laa. Amaa Winaꞌam tisi Abraham yelsum la, li yi ne o noor ziꞌelig la zug.
19 Ka ya na buꞌosi m ye, bo zug ka Winaꞌam me da lem tis wada la? O da tisi li ye li paꞌali ti tuumbeꞌed a siꞌem, ka bood ye li be n ti paae saŋkan ka Abraham yaaŋ la na kena, on ka o da ziꞌel noor n tis la. Ka maleknam da diꞌe wada la Winaꞌam saꞌan n tis Moses, ka one tolisi li n tis nidib la, ka a nuꞌu nweꞌed daan.
20 Ka nuꞌu nweꞌed daan pu ziꞌe nid yinni maꞌaa yelle. Amaa Winaꞌam ane o konꞌ ka da tis noor ziꞌelug la ka nuꞌu nweꞌed daan la kaeꞌ.
Winaꞌam wada tisib la gbin yela
21 Ya tenꞌes ye wada la ne Winaꞌam noorziꞌelug la kiꞌisidi taaba bee? Ayei baa biꞌelaa. Winaꞌam yaꞌa da tisin wad line nyaŋedin ketin ka nidib voen, nidib naan sid aan popielim dim o tuon ba wada siakir la zug.
22 Ka li lee da sob Winaꞌam gbauŋin ye dunia dim wusa bene tuumbeꞌed nuꞌusin. Ka linzug li ane bane niŋ Yesu Kiristo yadda na diꞌe Winaꞌam noorziꞌelug line ka o tisid soꞌ on niŋ Yesu Kiristo yadda la zug.
23 Ka saŋa kan ka nidib niŋid Yesu Kiristo yadda la da nam pu kena la, ka wada la da loo ti ziꞌel, wuu ti bene sarega ni ne, n ti paae saŋa kan ka li nie nyain ye nidib na nyaŋe niŋ Yesu Kiristo yadda.
24 Dinzugo, wada la da zamisi ti ka aa ti tuon sob n ti paae saŋa kan ka Kiristo kena ka ti a popielim dim Winaꞌam tuon tiname niŋ o yadda la zug.
25 Ka nannanna ka yadda niŋir saŋa la paa na, tuon sob la pu lem soꞌe ti yaꞌasa.
26 Ka yanam a yinni ne Yesu Kiristo la, ya wusa ane Winaꞌam biis, ka li yine ya yadda niŋir la ni na.
27 Bane wusa diꞌe kuꞌom suub la paꞌal ye ba ane Kiristo nidib, ka Kiristo bee ba saꞌan ka wenne on meŋ ne.
28 Ka yanam a yinni ne Kiristo la, ke ka ya wusa a yinni. Ka bakir kaeꞌ ne Jew dim ne bane kaꞌ Jew dima, ka me kaeꞌ ne yamis ne bane soꞌe ba meŋa, ka me kaeꞌ ne poꞌab ne dapaa.
29 Fu yaꞌa a Kiristo nid fu ane Abraham yaaŋ ka na diꞌe line ka Winaꞌam da ziꞌel noor ye o na tis la.